Happy Birthdays!!

Zoramchhana 7, Nov
Lalruatfela 15, Nov
Khawlliani 20, Nov
Lalthankimi 20, Nov
Lalramchuana (R.C-a) 21, Nov
Lalhriattira 24, Nov
Lalhlunmawia 25, Nov
Landry Lalmuanawma 26, Nov
Daniel-a 26, Nov
Zomuansangi (Ms-i) 29, Nov

Order of Service

Zoramchhana

MCF Sunday inkhawm a changkan deuh deuh theih nan inkhawm program hman dan ka rawn ziak ve tawp mai a. Hmun hrang hrang atanga kohhran dang dang member kan ni hlawm a, kan lo tih thin dan te a inang lo ngei ang. A hnuaia ka ziakte hi MCF thuchhuah a ni lo va, ka ngaih dan leh tha ka tih dan liau liau a ni e.
Inkhawm programe (Order of Service) tlangpui:
1. Kohna,
2. Hla,
3.Tawngtai,
4. Bible chhiartu,
5. Thupuan,
6. Solo/Duet/Zaipawl,
7. Bible Chang byheart,
8. Thilpek lakkhawm & Hlan,
9. Kal thar Hmelhriattirna,
10. Tawngtai Rual,
11. Hla,
12. Sermon/ Thupui,
13. Hla,
14. Malsawmna/ Lal Tawngtai
Inkhawmnaa chanvo neitute hi mipui aiawh an nih angin tawngtaina leh thil dang sawinaah pawh ‘Kan’ tih hman zel a mawi hle. Entirnan: ‘Ka Pa ropui leh thianghlim’, aiah ‘Kan Pa ropui leh thianghlim’.

Chairman/Inkhawm hruaitu

Inkhawmna hlimawm taka hman a nih theihna turah Chairman hian mawhphurhna lian ber a nei a. Fel taka a inbuatsaih beisei a ni. A thawmhnaw hak leh inchei chungchangah pawh fimkhur a tul mai bakah, a chezia leh a tawngkam hman tinreng chu mawi hnai tak a nih vek bakah chanvo neitute an chanvo hmang tura a sawm dan tur te, kal thar hmelhriat tirna neih dawna a tawngkam hman tur thlengin a ngaihtuah sa beisei a ni. Miin chanvo an hman zawhin lawmthu emaw comment pakhat khat a sawi ngei a mawi bawk. Tunlaiah ‘na’ tih tel tam thin lutuk hi thenkhat chuan an ning hle. ‘Tawngtaina’, ‘Bible chhiarna’ leh a dang te, sawi nan, ‘Tunah I lo tawngtai ang u’ tih mai a mawi. Chutiang bawkin ‘Bible chhiarturin chu mi kha mi kan sawm e’ tih mai theih a ni. Inkhawm kaihruaitu a nawi viau chuan inkhawm a hlimawm mawh khawp mai. A mawhphurhna:

1. Kohna:
Kohna hi ‘mipuite rilru Pathian lama koh khawmna’ tih a ni a. Bible bung leh chang sawi tel kher a ngai hran lo, ‘Aw’ nena tan, Sam ziaka mi hman thin a ni. Kohna Bible chang chhiar hmain thil dang sawi loh a tha a, mipui hmaa ding chhuakin ‘Aw’ nena bul tan, hlim taka Pathian fak leh chawimawi tura sawmna, Bible chang pakhat khat ring tawk/fiah tha tawkin a chhiar ang. Tin, chairperson-in kohna a chhiar zawh hnuin sermon pate thlak chhunzawm hi a mawi lo em em a ni. Hunserh kan tan hmaa Mipui hla kan lo sak zawng zawng pawh hi Inkhawmna vek a ni a, ‘Tunah kan inkhawm kan lo tan tawh mai ang a’ kan tih thin hi bansan a tha hle. Ka sawi duh a nih chuan “Hunserh kan tan tawh ang" tih mai tur a ni.

2. Hla (mipui dingin):
Thenkhat chuan an hla thlante thliarhranna chenin fel fai takin an hre kilhkelh a, entirnan ‘Fakna’ ‘Chawimawina’ ‘Dilna’ ‘Isua tawrhna’ leh a dang te. Inkhawm hruaitu tam tak chuan hla an thlan apiang ‘Pathian fak leh chawimawi nan ilo sa ang u’ kan ti mai thin a, a mawi lo. Hla zawng zawng hi Pathian Fakna leh Chawimawina a ni vek kher lo va, kan hre chiang lo a nih chuan, ‘Hla number chuti zat khati zat kan zavaiin i lo sa ang u’, tih ang chi-a sawi mai tur a ni. Mipui hla sak zawha thut tur nge din rih tur ang chi te pawh a puang sa dim diam beisei a ni, hmun thenkhatah chuan mipui hla sak zawh hian mipui thu lovin ‘Inkhawm hlan tawngtaina’ neih thin a ni.

3. Tawngtai:
Inkhawm hlan tawngtai a ni a, hmang turin mi dang a sawm thei bawk. Amahin a hmang lova mi dang a sawm bawk lo a nih chuan Bible chhiartu chu Tantu anga kal tirin ‘Inkhawm hlan’ tawngtaina hmang ngei ngei turin a hrilh hre ngei tura ngaih a ni.

4. Bible chhairtu/Tantu:
‘Bible chhiarna i lo nei ang u’, tih hi ngaihthlak a nuam lo em em a, ‘Pathian thu thianghlim i lo ngaithla ang u’ emaw, ‘Bible i lo chhiar ang u’, ‘Bible thu i lo ngaithla ang u’ tih ang chi-a tluangtlam taka sawi mai amawi. Hmun thenkhatah chuan Bible chhiartute hian tawngtaina an hmang zui nghal lem lo va. A Bible chhiar tur bung leh chang vawi 2 sawi nawn a tha, lo chhinchhiah duh emaw Bible lo keu duhte tan.
Bible chhiar zawha tawngtaina a hmang duh a nih chuan ‘Inkhawm hlan tawngtaina’ mi dangin an hmang tawh nge la hmang lo tih a hriat a pawimawh hle a. Mi changkang chuan an Bible chhiar malsawm turin tawi tein a dil mai tur a ni. Mahse Inkhawm hruaituin Tantu anga chanvo a pe a nih chuan Inkhawm hlan tawngtaina a hmang tel ngei tur a ni.

5. Solo:
Hla sak thiam vak lova a inngai a nih pawhin uar lutuka sawi lan chiam a tul lem lo. ‘Hla sak ka thiam lo va, a Hla thu min lo ngaihthlak sak zawk turin ka sawm a che u …..’ ang chi phei chu a tih chi loh, ngaithlatute rilruah ‘A thu chauh ngaithla tura min duh chuan a chhama i chham mai loh’, tih ngaihtuahna a siam thei. A thiam emaw thiam lo emaw mipui hmaa dinga chanvo a hmang thei hrim hrim hi a lawmawm lutuk tih a hriat a tha.

6. Thilpek lakkhawm & Hlan:
Kohhran thenkhat chuan Pathian biak inkhawmnaa kan tih zawng zawng hi rawngbawlna, a pawimawh dan inang khat vek angin an ngai a, Thilpek lakkhawm lai hian thil dang, solo emaw mipui zai ang chi, an kawp tir lem loInkhawm hruaitu tha tih dan dan a ni mai a. Chanvo neitute an lo kal leh kal loh hriat chian ngei a tha a, an lo kal lo a nih chuan an aiawh tur ruat vat tur a ni a, thilpek hlan dawna mi dang han in-man-chawp hian inkhawm a ti nawi em em a ni.
Thilpek hlantu hian thilpek a hlan mai tur a ni. Inkhawm a bul atanga a tawp thleng awmpui tur te, sermon-tu lei leh ka hmang tura Pathian hnena ngen tel leh kher a tul lem lo. Midangin inkhawm hlan tawngtai an hmang tawh tih hriat a tha a.
Thilpek hlan vanga Pathian hnena malsawmna dil kher pawh a mawi lutuk lo va, Pathian hnena thilpek pe thei tura Pathian malsawmna a miten kan dawn avangin ‘Lawm thu’ hrilh zawk a mawi a, khawi atanga dawn nge tih hriat loh pawisa leh thil dang A hnena kan pekte lo pawm hram hram turin Isua hmingin a hnenah kan dil zawk tur a ni a, thilpek hlan a nih angin ‘Kan rawn hlan e’ tih nena tawp tir a mawi hle bawk.

7. Sermon/Thupui:
Sermon leh thupui sawitu hi uluk taka a inbuatsaih ngei beisei a ni. Minute 15 chin hi sermon puitlinga ngaih thin a ni a, sawi rei a tum a nih chuan mipuiin an nin loh nan ‘fiamthu thianghlim’ emaw ding chunga mipui zai ang chi a zep tel a tha. Mihring hi rei tak che lo chang lovin kan awm hle hle thei lo tih hriat thiam a pawimawh.

Christian Nun Hi Eng Nge?

Hruaia

Tirhkoh Paula khan ram hrang hrangah rawngbawla kalin Pathian kohhran a din thin a. Tumkhat chu korinth khua-a kohhran ho chu an lo buai a, Paula’n lehkha a thawn ta a. 1Kohrinth 1: 12-13 Hei hi a ni ka tih chu, mi tinin, “Kei Paula pawl ka ni,” “Kei zawng Apollova pawl ka ni,” “Kei zawng Kiphaa pawl ka ni,” “Kei zawng Krista pawl ka ni,” in tih hlawm hi. Krista chu thenin a awm em ni? Paula in aia khenbehin a awm em ni? A nih loh leh, Paula hminga baptis-in in awm em ni? A ti a. Kohhran hruaitu-ah leh kohhran dintu-ah in nghat lutuk suh u, a tihna ang a ni. Kan mizo society-ah ngat phei hi chuan kohhran buaina hi a tam leh zual em ni aw! tih tur a ni a. Mahse, han ngaihtuah chian tak tak chuan kan biak Pathian lah chu hmun khat a ni bawk si a. Pathian nei hrang theuh kan ang tlat a. Mahse, Paula’n kohhran zawng zawngah hian Krista chu thenin a awm lo ve, a ti a. MCFS-ah pawh hian Krista chu thenin a awm lo tih hi ka puang ve duh a ni. Ram hrang hrang, hmun hrang hrang leh kohhran hrang hrang atangin kan lo luang khawm a, MCFS-ah kan inchhung khawm a. He kan insuihkhawm theihna chhan hi Pathian kaihhruaina leh tanpuina liau liau a ni a. Tanpui ngaite tanpui leh chhawmdawl ngaite chhawmdawl turin Pathianin Singapore-ah kan phak tawk theuhvin mawhphurhna min pe tih hi ka sawi leh duh bawk a. Chung zawng zawng chu Christian nun dik tak a ni tih hi ka sawi dawh bawk.
Pathian ni apiangin MCFS-in biak inah hian Pathian nena inpawlna, Pathian biak inkhawmna kan nei ziah a. Christian kan nih chuan inkhawm sawm kher ngai lova kal te hi kan tih tur ni awm tak a ni si a. Day-off kan neih dan chin a inang lo vang. Mahse, kan day-off neih chhuna Pathian tan kan hun kan hmang lo va, thil dang chhuanlam siama inkhawm kan thulh ziah hi Christiante tih tur a ni thei ang em? Pathian biak in kal tur hian chhuanlam enge kan neih le? I hnathawhnaah te, i zirnaah te hriselna te, chakna te, finna te, tawng thiamna te, malsawmna te i mamawh ve tho si a. Chung zawng zawng neitu leh petu chu tuna kan biak lai Pathian chauh hi a ni asin. Kan nitin kan mamawh leh kan duh zawng kan dil hunah te, kan mangan niah leh tanpui kan ngaih niah Pathian hian kan chungah chhuanlam siam ve dawn se la chuan nung damin kan awm tawh lo vang mawle. Mahse, hmangaihna Pathian a ni tlat a, engtik lai mahin min thungrul ve ngai si lo va. Christian chuan a nunah mite hmuh tura eng turin Pathianin min phut tlat bawk. Philippi 4:8
kan chhiar chuan, “A tawp berah chuan unaute u, a dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiangte thatna reng a awm a, fakna reng a awm phawt chuan chung chu ngaihtuah rawh u,” a ti leh ta a.

A awmzia chu Christian nunah chuan thil tha tih theih zawng zawng kha chu tih vek a ni mai. Zuk leh hmuam kawngah te, mite tanpui kawngah te, tlawmngaihnaah te, taihmaknaah te, ect... mi ten, “E!..he pa chu, he nu chu!”...an tih chiah khan keimahniah eng an lo hmu tawh tihna a ni. Tin, chung Christian nun nei tawh mi chu khawiah pawh awm se, a tlatlum ang a, Pathianin a hre reng a, a mangang ngai lo vang. Tin, Philippi 4:11-13 kan chhiar chuan “ Ka thlakchham thu sawi zawng ka ni lo ve. Kei zawng eng ang pawhin awm mah ila, lungawi zel ka ching tawh si a. Tlawm taka awm dan ka thiam a, hausaa awm dan pawh ka thiam bawk a, thil tinrengah leh thil zawng zawngah tlai leh riltama awm dan, hausa leh tlachhama awm dan thuruk chu ka hrechhuak tawh. Mi tichaktuah chuan engkim ka ti thei a ni, a ti a. Khawhar tak pawn awm ila kan tuar thiam a, kan hnaah te inngeih lohna te leh inthliarna te awm thin mah se, engkim kan chunga lo thlengah lungawi zel dan leh chan tawka lungawi dan kanthiam dawn a ni. Heng zawng zawng hi Christian nun kan lanchhuah tirna tur chu a ni bawk.

Mi chi hrang hrang nen, mize inang lo tak tak karah nitin hna kan thawk a, a chang chuan thinrim loh hi harsa tak a ni. Mahse Christian ka nihna avangin ka inhnem leh thei chauh thin a ni, chu chu Christian te kan vanneihna a ni. Tin, hetiang thil a lo thlen fo loh nan nitin ka zing thawh apianga ka tawngtainaah “ Lalpa, hei hna thawk turin ka inbuatsaih leh tawh a, zaidamna, finna, dawhtheihna, thuhnuai rawlhna, hriat thiamna te nei thei turin min pui la, chetsualna leh inhliamna lak ata min veng ang che, Lalpa ka chunga thil thleng hi i duh dan zel ni rawh se, ka chunga thilthleng apiangah ka lawm theih nan chan tawka lungawi dan min zirtir bawk ang che,” tiin ka tawngtai hmasa thin a ni. Heta chin hian nasa takin ka danglam a, ka in-control theih phah a, chan tawkah lungawi dan ka thiam tawh bawk a. Paula’n “Eng ang pawhin awm mah ila, lungawi zel ka ching tawh si a,” a tih hi ka lo hrethiam ve ta a. Christian nun hi enge ni tih hi nitin ka inzawt fo thin a ni.

Lalpan malsawm rawh se.....Amen....

East Coast-a Outing Hlimawm

MCF ten thla thum dana kan neih thin, kan nghakhlel em em, East Coast-a outing program hmang turin Oct 25.09 (Sunday) khan Bedok MRT-ah chhun 12 atang kan innghak khawm a. Mi kan thahnem tawk tihah Bedok Bus Interchange atang Bus No. 401 chuangin East Coast lam kan pan a, a hmun kan thleng chu Model in-pose thiam tak ang maiin thla kan la sup sup a, a nuam ang reng. Chu mi hnu chuan Tv.Bawla leh Tv.Hriata ten intihhlimna an kaihhruai a. An hruai thiam zarah hmel hriat thar te kan chharin kan innel pah sawt a, darkar khat vel hlim taka intihhlimna kan hman chu haw hun a tlai loh nan tiin kham lo takin kan titawp a. Chu mi zawhah refreshment chu sem sem dam dam-in kan ei za hnuin Group Photo kan lak zawhah haw zai kan rel thei ta hram a ni. A manhlain a va hlimawm em em!!!!!!!

Duh leh Duh Intawng Chu

Kan Assistant Secretary ni mek Tv. Joshua leh heta bible sikul rawn kai a, haw leh ta, Mary Lalchhuanmawii @ Machhuani te chu November ni 7 khian Rangoon English Methodist Church-ah kumtluanga inthen leh tawh lohna tiamthu tiam turin an inbuatsaih mek a. MCFS member zawng zawng min sawm vek a, lawmpuinaah tel thei lo mah i la, an inneihna a puitling ngei theih nan i tawngtai sak ang u.

SUNNA

Jenny-i u, Lucy Lalnuntluangi Tuallawt (Kum 36) chuan Oct ni 1, 2009 tlai lam 6:30 pm (Indian standard time) khan Chatuan ram min pan san ta. A kal san tak a chhhungte tan i tawngtai ang u.

Happy Birthdays!!

Lalhmuakliana 2, Oct
Lalrinpari 3, Oct
Lalrindiki 7, Oct
Lalchhanchhuaha 12, Oct
Lengpuia 12, Oct
Lalrinkimi 14, Oct
H. T. Lalhruaitluanga 14, Oct
Lalzampuii 20, Oct
Lalropari 25, Oct
Lawmzuali (Nuteii) 25, Oct
Zohmingliani 28, Oct

BEIDAWNG SUH ANG CHE

Teziri Fanai

Vawikhat chu pa pakhat hi ka zawt a, “ Rilru hahna i nei ve em?” tiin. “ He khawvela mi zawng zawng hian rilru hahna kan nei theuh ang chu’’, a ti a.
A ni khawp mai, tupawhin rulru hahna, manganna kan nei theuh ang. Mahse, kan harsatna, manganna leh rilru hahna a inchen lo maithei . Thenkhat chuan chhiat ni, that ni avangin emaw, kan beisei anga kan nu leh pa, u leh naute an awm that duh loh avangin emaw, chhungkuaa sum leh pai harsatna avangin emaw, zirlaiten an zirnaa harsatna avangin emaw, etc…Hengte avangin rilru hahna, manganna kan tawn tawh theuh ka ring. Thenkhat chuan tunah pawh kan tawng mek ang. Tawn zel tur pawh kan la nei a ni thei e.
I rilru hahna em em kha mi dangte ngaihah chuan engmah lo emaw, midang rilru hahna em em i tan ho tak angah i ngaih sak pawh a ni thei e. Mahse, a tuartu tan chuan tawrh hreawm tak angin kan inngai theuh ang. Midang harsatna i hriat hma chuan i tan tawrh hreawm tak a ni tiin i inngai pawh a ni thei e. Mahse, nang aia harsat manganna tawng tawh leh tawng mek an awm a ni tih hi theihnghilh suh ang che.
He khawvela mi hmingthang tak takte leh thil siam chhuaktute chanchin kan hriat pawh hi harsatna tawng nasa tak an ni zawk asin. Mahse, chu harsatnaah chuan beidawng mai lovin hma lam kawng an pen zel atanga hlawhtlinna hmu an ni. American mi, electric bulb siam chhuaktu Thomas Alva Edison (1847 – 1931) pawh kha school thla 3 chhung chiah a kal a. Kum 12 mi a nihin rel kawngah chanchin bu zuarin hna a thawk a. Harsatna atanga a hringnun intanin electric bulb a siam chhuah pawh kha vawi sang tam tak tisualin beidawng miah lova hma lam kawng a pen zel atanga hlawhtlinna hmu a ni.
I chunga thil lo thleng harsatna avangin beidawng suh ang che.I tawrh laia harsatna anga i ngaih kha i hma hun nunkawng tirualremtu, tihmasawntu a ni tih kha theihnghilh lovin tawrh tlang tum ang che. Chu harsatna chu nangmah chauhva i phurh chuan i tan phurrit tak a ni maithei.
“ Nangni, thawkrim leh phurrit phur zawng zawng te u, ka hnenah lo kal ula, keiman ka chawlhtir ang che u” ( Mt 11:28 ) titu i Pathianin tanpui tur chein a nghak reng a che.
He khawvela mi tam tak ten an rilru hahna avanga beidawng a, sual lam panin emaw, mahni intihlum tate chanchin kan hriat theuh ka ring.
- Sum leh pai tlakchhamna avangin BEIDAWNG SUH ANG CHE.
- In inchhung khura chhiatni leh thatni avangin BEIDAWNG SUH ANG CHE.
- I nu leh i pa, i unaute avangin BEIDAWNG SUH ANG CHE.
- I zirlai a harsa deuh a nih pawhin BEIDAWNG SUH ANG CHE.
- I pi leh pute tihretheihna leh hmuhsitnate avangin BEIDAWNG SUH ANG CHE.
- I hriselna a chak vak lo a nih pawhin BEIDAWNG SUH ANG CHE.
- Nula, tlangvala i leng rei deuh tawha i inngai a nih pawhin BEIDAWNG SUH ANG CHE.
I ka atanga tawng chhuak tur atana i hlauh ber tur chu, “ Ka beidawng e,” tih hi a ni. “Ka beidawng ta”, i tih chuan i tan ‘Goal’ a awm tawh lo. I hnehna tur zawng zawng i hawi let san a ni.
Khaw pakhata pa ho tuichhun lai pawh tawng li, nga an lai a, tui a rawn chhuah hmain “ He tah chuan tui a awm lo,” an ti a. Hmun dangah an lai leh a, a hma ang bawkin tawng li, nga an laih hnuin “ tui a awm lo,” an ti zel a. Tui hnar an hmuh chhuah tak tak hmain an beidawng hma lu-tukin an khuain tuichhun an neih loh phah ta a ni.
Nang, i thiltum enge ni? I nu leh i pa in atanga i rawn chhuah dawna i thiltum kha enge ni? Thenkhat chuan in hlawhtling tawhin, in ‘goal’ in thleng tawh emaw, in hnaih tawh viau pawh a ni maithei. Mahse, a then chuan kawng chanve in thleng tawh emaw, in intan chauh pawh a ni thei e. Engpawh nise, i Hnung lama thil kal tawh harsatna avanga lunghnur reng lovin, i hma lama lo thleng tur ni awma i ngaih chhiatna lam ngaihtuah lovin, tuna i thil tawnah lawm takin i ke zangkhai takin pen zel ang che.
Harsat manganna chu tupawhin kan tawng theuh ang. Mahse i thil tawn harsatna avanga i bei i tihdawn mai chuan i hma huna i dawn tur malsawmna inhung sa engtikah mah i dawng thei dawn lo a ni tih hre rengin i ke penin sir lam hawi pawh phal lovin Lalpaa innghat chung zelin i hma lamah huaisen takin ke pen zel ang che.
Harsatna kan tawn hi Pathianin keimahni min tihchhiat a tum vang ni lovin Amah min hnaih zual tirna zawk a ni. I tluk hunin tho thuai la, thima i kal hunin eng lam pan thuai ang che ( Marka 7:8 ).
Mi tawrhchhelte leh beidawng mai lova bei hram hramtute tan, i chan tur lawman ropui tak Lalpa i Pathianin a hung sa reng e. ( Jakoba 1:17)
Beidawng mai suh ang che!!!!!

For all the heartaches and the tears, (Rilru hahna leh mittui zawng)
For gloomy days and fruitless years; (Khawdur ni leh rah neih loh kum)
I do give thanks, for now I know (Tunah ka hre ta, ka lawm e Lalpa,)
These were the things that helped me grow.
(Ka than lenna tura min tanpuitu an lo ni)
By…. Crandlemire…

A RUH NO NO CHHUAKAH

Mahlimi Pu

Mizo naupang infiamnaah, “ A RUH NO NO CHHUAKAH” kan ti thin a. He infiamna hi tun hnua ka ngaihtuahin awmze nei deuh a lo ni. Thutthleng seia thut a, innek a ni thin. A ruh no deuh leh a naupang deuh te chuan tuar lovin kan chhuak mai thin. Tunlai khawvel kan thlir chuan a ruh no no chhuahna khawvel a ni tlat. Thiamna a lo sang chho a, kan hnam nun pawhin hma a sawn chak khawp mai. Chutih rual chuan kan hnam nun hi a kal sual palh ang tih a hlauhawm.
(1) Hnamah kan chian a ngai
Hnam min nih tirtu chu kan hmel, vun leh pumrua te hi a ni lo. Kan tawng te, thu leh hla te hi a ni zawk. Tunlai chuan zir sang leh mi fing apiangte mahni hnamah an chiangin hnam hmasawnnan tan an la nasa. Zo hnahthlak thangtharte pawhin hnamah kan chian a ngai hle mai. Thu leh hla mawi tak kan neih te hi humhalh a ngai a nia. Sap pa’n min lo humhalh pui dawn lo. Thu leh hla mawi tak kan neih te hi a pil bo mai lohnan tan i la ho ang u hmiang!
(2) Ei bar zawngna kawng ah
Ni tin kan nuna thil pawimawh tak pakhat chu ei leh in a ni a, a tel lovin nun a har khawp mai. Hnam pakhat ding chhuak tur chuan ei leh inah kan intodelh a ngai. Hman lai kan pi leh pute kha ei leh barah an lo intodelh a. Keini thangtharte pawh hian ei leh barah kan intodelh a ngai hle.
Engtin nge kan intodelh ang? Eng angin nge tan kan lak ang! Tunlai chu an rinawm avangin sum dawnna kawng khatah mi engemaw zat intel khawmin an thawk tlang a, an hlawhtling hle thin. Zo hnahthlak te pawh hian mahni chauha tan lak ngawr ngawr ai chuan a huhovin rinawm takin thawk ho ta ila, kan hnam hian a hlawk pui viau lo ang maw! Thil kan tihna apiangah pakhat leh pakhat induhsak tawn kan thiam a ngai a nia.
(3) In lungrualna kan mamawh
Zo Fate hi khawi hmunah pawh kal ila, insuihkhawm leh pawl din mai chu kan awlsam khawp mai. Mahse, insuihkhawm that leh pawl kan din chakna tura hmalak erawh kan tum lem lo. Ka thian pa’n “ Zo Fate chu inkhatah mi pathum kan awm chuan sawi neuh neuh a tam a, Fellowship khatah mi za chuang kan awm tawh chuan lung rual a theih tawh lo” a ti. A dik a rinawm khawp mai. Lungrualna lamah tan lak hle a ngai. Tam eng ang mah ila lungrual taka thil kan tih khawm loh chuan hnam dang karah kan hnufual kumkhua mai dawn a ni.
Zo hnahthlakte piallei thim taka kan pil bo mai lohnan kan thiltihna kawng engkimah tan lak ho a ngai a nia. Lungrualna hrui khat vuan a, tu dang ngai lo tea kan len hun a nghahhlelh awm hle. Lung rual takin hma lam thlir chung zelin leh Pathian rawn chung zelin kan awmna apiangah Zo fate tan tan i la ho zel ang u!

REM TI MAI TEH !

The Rengs

Ka nu,
Sai sen tet ata mi chawi lian a,
Ka tan huphurh leh hlauh reng
I nei si lo.
I hmangaihna hi ka tan a tawk a,
Ka no-ah hian a luang liam a ni.
Mahse... ngaithiam teh.
Tleitir-biangno-vin mi man tak hi.
Sorry!
Ka inawk a ni zawk e.
A thua kal nuam ka ti a,
A sakhmel hmuh ka kham thei lo.
Nangin.....
Apple man to chi mi pek ai khan
Ani’n.....
Sweet man tlawm chi mi pek kha
A tui ka ti deih zawk nia!
Ka lei-ah a tuina a cham reng a,
Ka hnarah a rim a reh thei lo.
Amah ka ngaihtuah ringawt pawhin
Ka lung hian phut dan mumal
A neih theih tak loh hi!
(Zahpuiawm lutuk!)
A hmel ka hmuh phei chuan
Ka awm vei lam hi
dawm beh a ngai.
A chhunga phu ut ut hi
A per chhuah vaih zawngin
I fapa hi ka mualpho lutuk ang.

Mahse... ani chu...
Nangin rem i tih chauha
Ka thai chang tur a ni a
Nang chu...
Tu remtihna mah lak ngai lova
Ka nu i nia lawm.
Chu vangin..
Rem ti mai teh.
Maw, ka nu
Rem ti mai teh a!

DARTHLALANG

F. Zothangliana (Khampat. 2)

Darthlalang chu chi hnihah then ta ila,

1. Khawvel Darthlalang
2. Ringtute Darthlalang


1. Khawvel Darthlalang
Keini mihringte tana pawimawh tak ni si, thil ho te chu Darthlalang hi a ni. Darthlalang hi mi hriat lar tak leh hman hlawh tak a ni. A lo awm lo ang tih te pawh hi ka hlau khawp mai. A ropui a ni. A pui a pang, a tar a zur hian kan lawm hlawm em em a, lawmtlak tak pawh a ni. Tun hnua kan pi leh pu te pawh hian an lawm tlang ve tho a ni. Lo awm lo se chuan kei ngei pawh hi a buai tur zinga mi ka ni ve a ni. A siamtu hi ka fak khawp mai.

Nula te inchei tak maiin an han leng chhuak a. Bag an khai tawh phawt chuan 90% hi chuan he Darthlalang hi an pai tel vek ang ti ila a sual tam lo hle ang. Anni ho tan phei chuan a pawimawh leh zual bik a sin. An han vak hah deuh a, thlan a rawn tla tan chiah hi chu, tlema mi awm lohna deuh an han zawng a. An bag an zen rak rak tawh hi chuan eng dang an phawrh ngai lo. Darthlalang hi an phawrh chat mai a ni.

Nula leh tlangval reng reng hi in atang kan han chhuah dawn phawt chuan Darthlalang hmaah hian kan han inen veng vawng a, kan han nui vel thin a, a then phei chu kan pian a fuh em tiin kan han vir tawn zak zak thin a nih kha. Kei ngei pawh hi ka bang bik lo. MTC-a ka kal laiin room khatah mipa panga kan awm a. Darthlalang hi pali kan nei a, kan la indaih lo fo a ni. Kei phei chu zan ka mut dawn pawh hian chiang tawkin ka han inen a, chuan zing ka thawh veleh ka ban hmasak ber chu Darthlalang hi a ni. Chuti khawp chuan ka tan hian a tangkai a, mi dang te pawh hian keimah ang ve tho hian in lawm ka ring ve thin. Darthlalang hi han awm lo ngat se, zawngin a mawng khak a hmu lova a thiante a nuihzat ang mai hi kan ni duh ngawt ang le.

He khawvel Darthlalang hi chuan kan pawn lam mawina leh kan chian lohna zawng zawng mai min hmuh tir a. Amah avangin mi karah pawh intithei takin kan len ve theih phah a ni. Chuti khawpa pawimawh leh tangkai chu a chungah hian lawm thu i sawi ve dawn lo em ni? Han sawi dawn chuan sawi sen pawh a ni lo ngei ang le. Tuna ka rawn tar lan tak hi a tlangpui chauh ni mahse a pawimawhna dangte chu kan hre theuh ang chu .

2. Ringtute Darthlalang
Keini, ringtute hian Darthlalang hran bik kan nei a ni. Chu ringtute Darthlalang chu a tha hle a, khawvel Darthlalang ang mai chu a ni lo. Kan pawn lam chauh ni lovin kan chhung lam engkim min hmuh tirtu leh hrilhfiahtu leh kan chet dan, kan awm dan leh kan hun lo la kal zel tur min hrilhfiahin min hmuh lawk tirtu a ni bawk. Chu ti khawpa tha Darthlalang chu i duh ve em? Man tlawm si, tha si i duh a nih chuan ka han hrilh ang che. Keini ringtuten kan neih Darthlalang chu BIBLE hi a ni. Kan hun kal tawh leh hun lo la kal tur thlengin min hrilhfiah thei chu a ni. Tunlai Darthlalang ang mai hi zawng a ni lo.

Keini ringtute hian kan Darthlalangah hian kan inen chian hle a ngai a ni. Ringtute hian mahni Darthlalang hmang si lovin khawvel Darthlalang kan hmang fo thin hi chu a pawi hle thin a ni. Mahni inhmu chiang si lo hian mi dang hi kan hmu fo thin a, an chunga ro kan lo rel sak thin hi chu a pawi hle bawkin ka hria. Mi, Pathian-ah lawmna a rawn hmu thar ve a, keini chuan lawmpui a hnekin a hun lo kal tur kan lo sawi lawk sak thin chu a tha lo hle a ni. Ringtu a nih tawh chuan ani pawhin Darthlalang tha tawk a nei tawh a ni tih hi i hria ang u. Chu bakah mi dang chungthuah mahni duh duh dana kan lo rel sak ve chuan nakinah rorelna nia roreltu tur Pathian hian rel tur a nei lo ang tih a hlauhawm khawp mai. Chuvang chuan a then a zar hi chu Pathian relah i khek ve tawh ang u hmiang.

Kei ni ringtu te pawh hianpawn lam mawina pawh hi kan mamawh ve tho a ni. Mahni hmel fuh lohna inhmu si lo hian mi dang hmel fuh lohna kan hmu thin pawh hi sawi zia a tha kher lo a ni. Darthlalang inen lem lova chhuah chu a pawi duh hle ang mai khan Pathian thu hre lem si lova mahnia tha intihna, fel intihna te hi a tha lo hlein a hlauhawm hle a ni. Khawvel Darthlalang hian kan pawn lam min hmuh tir a, mi a hrilhfiah ang bawk hian, kan Pathian thu (Ringtute Darthlalang) pawh hian kan chhung lam mawi lohna, fel lohna leh tlin lohna te min hriat chian tir a ni. Ring lotute tan phei chuan keini kristian te hi an Darthlalang kan ni ka ti duh a. Kan chet dan leh kan nungchangah hian lang se, anni ho pawhin keimahniah chiang takin an inen or inhmu ve thei dawn a ni. Tunlai keini ringtute hi chuan he kan khawvel Darthlang chauh hmang lovin ringtute tana buatsaih kan Darthlalang pawh hi i hmang ang u.

Kan khawvel Darthlang hi chuan kan sawi tawh angin kan pawn lam mawina, pawn lam engkim min hmuh tira a tha hle a ni. Tin, ringtute Darthlalang ve thung erawh chuan kan chhung lam thil engkim min hmuh tir ve thung a ni. Ringtute tan chuan a pahnihin kan hman kawp thiam hle a pawimawhin a tul tak meuh meuh a ni.

Chu’nga kan hman kawp thiam chuan kan hmel a titha ang a, kan nungchang min siam thain min timawi dawn a ni. Lal Salamona thusawi angin, "Ka hang nain ka nalh a nia", a tih ang deuhin keini pawh Pathian hmaah chuan kan hmel a chhe nain kan nalh ve dawn a ni. Chuvang chuan tun atang chuan he Darthlalang chi nih hi keini ringtute chuan i hman kawp tawh ang u.

RINAWM TAKIN AW!

Kawlchuani

Singapore ka rawn chhoh hma, Yangona ka la awm laiin nu pakhat hian, “Singapore chu kal chi a ni lo. Singapore kal tawh reng reng him dama rawn haw leh an awm lo”, tih thu zahpah nei miah lova a han sawi chu ka lo zam ru hle mai a. Kei ngei pawh Singapore kal mai tur ka ni si a. Hreawm ti tak chuan a thusawi chu a tawp thlengin ka ngaithla thei hram a. Chuti taka thusawi chu a hmelah hian hriat chianna tak nei pawh ang ve niin ka hria. Ka ngaihtuah zawm lo thei lo va, ka rilrua thil chiang em em lo lang chu, “Singapore-a kal zawng zawngte eng vanga hmer nge a nih a, a kal zingah him dam an awm tam dawn si a”, tih chu ka ngaih dan a ni. Tin, thil pakhat, Singapore kal kher lo pawhin mahni in lum ngei atang pawh mahni kan inhum duh loh chuan a him loh theih a ni, tih hi a chiang a ni.

Rinawm taka thahnem ngai em em, mittui nen, chaw kham khawp pawh ei ngam lo, pi leh pu te vin dawr dawr leh sawisel hlawh reng chung pawha tuar hram hram, in lam harsatna avanga mahni thla-hlawh pawha inei puar phal lo, mi thahnemngai takte dinhmun thlir thiam puitu tan chuan rilru a na em em a ni. Chu tianga mi fel takte an awm teuh laiin mi thenkhat, vanduaina avang te leh mahni duhthu vang reng tea lo fimkhur lote avanga kan vai hmelhem phah tur hi chu a pawi hle dawn a ni. Mite min thlir dan turte atangin kan thianghlimin kan rinawm tawk em? Kei mahni theuh inchik chiang ang u. Kan kalsan tak kan nu leh pate, nupui fanaute leh kan u leh naute’n min beisei ang leh min chhuan ang hian kan him tawk em le? Zalenna hmang thiam mi chu eng lai mahin a inchhir ngai lova belhchian a dawl thin.

Ka pa thusawi ka ngaihsan em emte zinga pakhat chauh han tar lang ila. Mahni leh mahni chunga rinawm a pawimawhzia a sawi a. “Vawi khat chu zial ka nghei dawn hian harsa ka ti khawp mai a. Chhungte hnenah ka zial nghei tur hi hrilh ila ka nghei thei ngei ang ka ti a. Hei zial ka nghei dawn a nia tiin ka han sawi a. Mahse ka lo nghei thei reng reng lo va. A ruk hian hmun dangah ka zu ru fo mai a. Ka zuk ruk apiangin ka chhungte’n zial ngheiah min ngai a ni si a. Ka chhungte’n min ring em em mahse Pathian leh keimahin ka nghei lohzia kan hre chiang si a. Eng lai pawha min hmutu Pathian leh keimah hriatpuiin ka nghei e ka ti ta a. Zu ru leh dawn mah ila ka inhmuh reng thin avangin zial chu ka bansan a, ka nghei hlen thei ta chauh a ni”, a ti.

Chuvangin chhungte hmuh phak lova min hmu chiangtu chu Pathian leh Mahni kan ni a, engmah hi zep theih a ni lo. Zep lova inpuanga hawi santu chuan zahngaihna a hmu ang. Kan taksa te hi Pathian ta a ni. I Korinth 3:16-17. Pathian in in nih leh Pathian thlarau nangmahniah a awm reng tih in hre lo vem ni? Tupawhin Pathian in chu a tihkhawloh chuan chu mi chu Pathianin a tikhawlo vang; Pathian in chu a thianghlim si a, chu in chu nangmahni in ni e. I Korinth 6:12-20, II Korinth 6:16-17.

Singapore-a awm MCF nula te u, mite min thlir dan atangin “rinawm takin” hma lam I pan zel ang u.

Vanram Lemziak Entirna In

(Heaven’s Art Gallery)
Harrison Woodard

Tsl. By Awmpuii

Zan khat ka mumang chu Vanrama museum popui tak kawtah hian Isua nen kan lo ding dun reng a. Isua’n thil hmuh tir duh mi neih avangin a chhunga lut a’n mi sawm a. A chhunga bang te chu lemziak mawi ber ber te nen an cheimawi a, chung lemziak te chuan hringnun a entir tih Isua’n mi hrilhfiah a. Lemziak ho chuan ka thinlung a khawih hneh em em a, ka nuna engemaw kim loh rukna mi hriatchhuah tir niin ka hria. Lemziak phenah hmangaihna, khawngaihna, muanna leh tawrhna te a lang chiang em em a ni. Isua hnenah, “Hetiang em ema mawi tur hian tunge lem ziak thiam ang, Nangma’n nge, Van angel hovin nge heng lem hi ziak?”, tiin ka zawt a. “Nia, mihring chuan hetianga tha famkim hi anmahni chuan an ti thei hauh lo mai. Mahse Pathian fate erawh chuan an ziak chhuak thei asin,” tiin mi chhang a. Kei chuan, “Eng tin nge an ziah ang, a ni thei dawn em ni?”, tiin ka chhang a. Isuan, “Pathian puihna nen chuan engkim a tih theih alawm. Miin thil a tihna apiangah, a thinlung leh a duhna ka hnenah mi hlan tak zet chuan lem mawi tak a ziak chhuak thei ang a, a nun kawng tha takin rem a ruat thiam bawk ang. Mahni tha intihtawkna te, tanghma sialna te, hlauhna te, duhamna te, rinhlelhna te, rin lohna nei erawh te chuan an lemziahna-ah beidawnna an hmu thin. Mahse thinlung, thlarau leh taksaa mi hmangaiha mi chawimawi chuan mi hnena pho lan phu nun a nei ang”, tiin mi chhang a. Chutia lemziak kan en kual hnu chuan Isuan, “ He’ng zawng hi heta entir theih chu an ni e”, a ti a. Mahse keiin, “Lalpa, en tur dang a la awm ang ka ring. Mi hmuh ho te hi tlem te chauh an la ni”, tiin lungawi zan lovin ka chhang a. Isuan, “Ni e, en tur dang a la awm alawm”, ti pah chuan lemziakna in hnung lama kudam hnawk nuaihah mi hruai phei ta a.

Chhuatah chuan lem ziahna’na an hman rawng dahna thleng te nen lemziak tamtak an lo chhep khawm ruih mai a. Chuta lemziak then te chu ti nialnuala ziaka la zo lo te, a then chu thawm that leh ni awm te, a then chu pawhthler nuaih te-in an lo awm a. “ Lalpa, heng te hi eng ti zia nge, heta mi ni awm lo tak!”, ka ti a. Isuan, “Ka fapa, heta mi vek an ni e. Helai lemziakin a entir duh chu hmasawm chho mek hringnun hlu tak hi a ni”. “Mahse lemziak entirna hmuna tar atan chuan an va iaiawm ve”, ka ti a. Isuan, “ I sawi dik e. Heng lem te hi tar tlak an ni lo. Mahse ka Pa hi a dawhthei em a, mitinin an nuna lemziak mawi ber an ziah chhuah hun thleng a nghak fan fan a ni. Khawvela mihring awm zawng zawngin nun an neih chhung chuan vanram lemziak entirna hmunah an hringnun hrilhfiahna lemziak pho chhuahin a awm reng ang”, tiin mi chhang a. Keiin, “ Anmahni theihna nen chauh chuan engtin nge a nih theih ang?”, ka ti a. Isuan, “ Ni lo ve, anmahni chuan engtikah mah an ti thei lo vang. Ka tanpuina an dil a, ka puih hi an mamawh a ni”, tiin mi chhang leh a. “ A nih, tanpui dil lo ta che sela, engtin nge an awm tak ang?”, tiin ka zawt leh a.

Tichuan, Isuan kudam hnung deuh hlekah mi kal pui leh a, kawngkapui a hawng a. Chuta ka va hmuh chu lemziak tamtak chheh khawm, lo kang hluah hluah hi a ni a, Isua lam ka va leh hawi chuan a biangah mittui a lo luang a. “ Heng lemziak alh mup mup hi anmahnia hringnun kawng zawh ho tawpna a nih hi. Lemchang thiam te, infiammi te, sumdawng te, ram roreltute leh zirtirtu te, nu leh pa te, rethei leh hausa te, mifing leh mimawl te, an tel kim vek. Tupawh a theihna, chakna nena a beih chhung chuan engtikah mah tha famkim an ni thei lo vang. Kei mi hre chang lova nun tumte tawpna chu tuma ngaihsan hlawh lovin thelretpuan anga meia halral an ni ang. Chutiang mite’n dam chhung nun an hman ral dan hi a va’n rapthlak em!”, tiin pawi a tih thu Isuan mi hrilh a.

Chumi zawh chuan kawngkapui chu a khar a, kudamah chuan mi hruai phei leh a. “Lalpa, lem ziak thiam turin beiseiawm ka awm em?”, tiin ka zawt a. Isuan, “ Awm e, mi zui rawh”, mi ti a. Pindan te tak teah mi ko lut a. Chutah chuan milem ziah lai tarna thelretpuan fai tih lo chu, chu pindan chu a ruak vek a. “ Hei hi enge ni?”, ka ti a. Isuan, “ He thelretpuan hian ka thisena silfai hnu i nun a entir”, tiin mi chhang a. A fai zia mak ti deuhin ka en reng a, thelretpuanah chuan bawlhhlawh kai pakhat mah hmuh tur a awm lo. Isuan ka duh duh ziak turin lemziahna hmanrua mi pe a. Ka ziah thiam tur rei fe ka ngaihtuah a, mahse vanram lemziah entirna hmuna tar chhuah tura lem tha tak ziak tur chuan ka tih theih loh zia ka inhmu chhuak a. “ Lalpa, lemziak mawi ber chu sual chhhuah duh mah ila ka thei lo a nih hi!”, tiin beidawng takin lemziahna hmanrua chu Isua hnenah ka pe let leh a. Mahse Isuan ngilnei tak leh lainat takin ka kut chu a la a, lemziahna chu mi vawn tir a, Vanram lemziah entirna hmuna tar tur i ziak dun ang hmiang”, tiin mi sawm ta a……..

Happy Birthday!!!

1. Jenny Zodinpuii 1, Sep
2. Zosangzela 8, Sep
3. Dr. Rosie Sailo 16, Sep
4. Lallawmsanga 17, Sep
5. Vanlalruati 19, Sep
6.Vanlalthakimi Hauhnar 20,Sep
7. Khualtinkungi 20, Sep
8. Hranghmingliani 23, Sep
9. Vanlalhruaii 23, Sep
10.Lalchawimawii Renthlei 28,Sep
11.Lalnunmawii Renthlei 28, Sep

MIZO CHRISTIAN FELLOWSHIP OF SINGAPORE

Hruaia

Kum 1997 May thla khan kan hruaitu hmasa tlawmngaiten Pathian thua inpawlhona tha zawk leh rinna lama inpumkhatna tha zawk, chhiatni thatniah pawh intanpui tawn theihnan tiin, M.C.F.S hi an lo din a. M.C.F.S an din hma zawng hian Halkha leh Falam Fellowship-ah te an inkhawm thin a. Tin, Mizo thenkhat phei chuan an tawng kan hre mang si lova tiin hmun danga hun khawh ral mai mai hi nuam an ti lo tan ta a. He mi kum hian pu Vanlaltluanga hi Anglican Welfare-ah hna thawkin a awm a. Rev. Lalthlamuana pawh Bible training lai tak a ni bawk nen, inhuikhawmin inhmuhkhawmna an nei a, Pathian hnenah tawngtaina nen inhlanin an inrawn khawm a. Tin, inkhawmna tur hmun an lo mamawh tan ta a. Pu Tluanga chuan an hnathawhna (Anglican Welfare Centr, Blastiar st. Pago Rd) an office hmunah a Pu Albert chu dilin M.C.F.S te chuan awmhmun an lo khuar ve tan ta a. Tin, Rev. Lalthlamuana, pu Tluanga, Tv Sangmama ten zanah hmun hlaa awmte hnenah tawngtai rawngbawlnate an neih pui thin a. Chutiang chuan memberte chu huikhawmin inkhawm ngailo leh hmun hlaa awmte an sawm khawm a. Pu Tluanga hian an hnathawhnaah Mawtawr a lo kawl hlauh mai a, hmun hla deuh deuha member te leh kal dan pawh thiam mumal lo te chu a Mawtawr chuan inkhawm ni apiangin a hruai khawm thin a, a thlah leh thin. Chutiang chuan nasa takin tan an lo la thin a.

Ni 18, 1997, Sunday 2:00 pm khan hruaitu inthlanna an nei a, a hnuaia mite hi thlan tlin an ni.
1. Chairman :Rev.Lalthlamuana (Mandalay)
2. Vice Chairman :Pu Vanlaltluanga (Rangoon)
3. Secretery : Hmangaihzuali (Tahan)
4.Treasurer : Zamawii (Tahan)
5. Asst. Treasurer :Pi Rohnuni (Tahan)
6. Auditor : Lalromawia ( Tahan )
7. Assist. Auditor : Sangmama ( Tahan )
8. Executive Committee members
Tv. Sangtea ( Tahan )
Tv. Marova ( Tahan )
Tv. Kawllianhnuna ( Tahan )
Tv. Siama ( Tahan )
Pu Muana ( Tahan )
9. Advisory Members
Pu Lalmuana
Pu Vanlaltluanga

Rev.Lalthlamuana hmangin Methodist kohhran Biak in zau tak mai Lalpan a pe leh a, tah chuan an insawn lut leh ta a ni. Tin, inkhawm ban hian chawhlui kilhona an nei ziah thin a, an inpumkhat em em thin a ni. Tin, khang hunlai khan member tam zawk chu permit nei lova awm an ni a, man theih reng an nih avangin rilru hlauthawng reng renga an awm chang hi a tam em em thin. Chung ho chu chawlhni apiang hian an inkhawm thei thin a, inkhawm te hi member tlem ang huin an tha em em thin a, inkhawm pawh a hlimawm em em thin a ni.
Tin, a hnuaia mi ang hian MCFS inkaihhruaina dan an siam a;

MIZO CHRISTIAN FELLOWSHIP OF SINGAPORE
INKAIHHRUAINA DAN
(Revised 1 Feb 2004)

Motto: :“Nangni thawk rim leh phurrit phur zawng zawngte u, ka hnenah lo kal ula, keiman ka lo chawlh tir ang che u” (Matt. 11:28).

1. FELLOWSHIP HMING
Mizo Kristian Pawl kan nih avangin kan fellowship hming atan ‘Mizo Christian Fellowship of Singapore’ ( M.C.F.S ) tia vuah kan ni. Kan inkaihhruaina dan hming a tan hian M.C.F.S inkaihhruaina dan tia koh tur a ni.

2. PAWL DIN CHHAN ( VISION )
Mizo Christian Fellowship of Singapore hi thlarau lama tuihal leh tanpui ngaite Pathian kaihhruainaa tanpui tura ding a ni.

3. PAWL HNATHAWH ( MISSION )
Singapore-a mizo ( mizo nia inhria or inngai ) awmte inkara inkungkaihna tha siam leh thlarau, tisa leh hnaa harsatna neite zawnchhuah, a theih dana tanpui zel hi a ni.

4. PAWL THIL TUMTE (OBJECTIVES)
4.1. Singapore-a mizo awmte hmasawnna tur leh hlimtlanna hi a ngaih pawimawh ber a ni.
4.2. Mizo hnam nunmawi chhawm nun zel.
4.3. Khawvel thila kan pilbo lohnan Pathian thua inpawlhona neih
4.4. Ram sawrkhar dan a kalh tur a ni lo

5. MCF MEMBER CHUNGCHANG
5.1. Tupawh M.C.F.S-a a luh duh chuan hruaitute hnena hriattir a nih hnuin memberah lak luh theih a ni
5.2. Fellowship danga member nihna nei tawh, M.C.F.S-a rawn lut duh chu M.C.F.S-in a awmzia a hriat chian hnuah chauh membera lakluh theih a ni ang.
5.3. Tupawh M.C.F.S member ni tawh phawt chuan member fee dik takin a pe tur a ni.

6. CHHIATNI THATNI CHUNGCHANG
(A) CHHIAT NI
6.1. Kan member zinga miin thihna hial a lo tawh palhin S$ 100-a ralin kan thutpui ngei tur a ni.
6.2. Kan member zinga miin chhiatna a tawh palh chuan S$ 50-a ralin thutpui nise kan ti a, hei hian pianpui unau, nu leh pa, nupui pasal leh fanaute chauh a huam ang.
6.3. Kan member zinga mi dam lohna avanga hna thawk thei lote chu S$ 50-a tanpui tur a ni.
6.4. Kan member, fellowship danga member ni bawk chu chhiatni that niah ngaituah theih an ni lovang.
(B ) THATNI
6.5. Kan member zinga mi kohhran dan anga nupui pasal nei an awm chuan S$ 50-in kan lawmpui tur a ni.
6.6. Kan member zingah graduate tharte an awm chuan S$ 50-a lawmpui tur a ni.
6.7. Kan member zinga mi nupui pasal nei turten mahni kohhran ngeia kutsuih an duh chuan kan fellowship Pastorte kal tlanga rawih sak theih a ni

7. INDAWR DAN CHUNGCHANG
7.1. Mi tupawh kan fellowship hminga rawngbawlna nei duh emaw, tanpuina pe duh emaw an awmin MCFS-in a hriatpui ngei tur a ni.
7.2. Mi tupawh kan fellowship hminga tanpuina dil duh chuan fellowship phalna la lovin engmah a ti tur a ni lo.
7.3 Kan fellowship hriatpui lovin fellowship hminga tanpuina dawn phal a ni lo.
7.4. M.C.F.S chhinchhiahna (seal) hi committee hriat puina lovin mimalin lak chhuah leh hman phal a ni lo.
7.5. Inkhawmna-a hun nei duh chuan chairman leh secretary te a hriattir hmasa tur a ni.

8. INKHAWMNA-A TAWNG HMAN DAN CHUNGCHANG
8.1. Mizo Christian Fellowship kan nih angin Mizo tawng ngei hman tur a ni.
8.2. Tawng dang hmang, Mizo tawng thiam lote chu a tul dan anga tawng lehlin sak tur a ni.
8.3. Inkhawmnaah Mizo Christian Hlabu-a mi chauh lo pawh kan phurtlan dan azirin harhtharna hla Dang engpawh zalen taka sak theih a ni.

9. A. INTHLAN DAN
9.1. M.C.F.S hruaitu chu kumtin December thla chhunga inthlanna buatsaih zel tur a ni.
9.2. Chirman turte chu mi piangthar an ni ngei tur a ni.
9.3. Fellowship danga mawhphurhna pawimawh neite chu hotu atan thlan theih an ni lo vang.

B. INHRUAI DAN
9.4. M.C.F.S-in pastor kan nei a nih chuan fellowship hnuaiah rawng a bawl tur a ni.
9.5. Kohhran bing inhruaina dan leh kohhran bing doctrine lak luh phal a ni lo.

Heng a chunga kan tarlan tak kan hruaitu hmasa te hian mi ramah Zofa te hian tisa leh thlaraua chakna leh inpumkhatna kan neih theih nan leh harsatna chi hrang hrang kara Mizo nunmawi leh tlawmngaihna hnamdang laka inhumhalhna kan lo neih nan tiin he Fellowship hi an lo din a ni. Chuvangin he Fellowship thil tum hi a ropui em em a. A chhan chu mi ramah kan awm a, ram changkang nun kan lo dawngsawng ve tan ta a. Tu control-na hnuaiah mah kan awm lo va, kan zalen em em a.
Chu vangin kan nihna leh kan kal chhan hi theihnghilh a awl em em a ni. Kan sawi duh chu a hmei a pain, ram changkang zawkah chhungkaw chawm nan te leh lehkha zir tur te’n lunglen leh retheih huamin kan lo chhuak hlawm a. Chu vangin kan nun kawng hi uluk takin hmang ila, kan Christian nun leh kan mizo hnam nunmawi tak hi kan awmna apiangah zofa ten keng tel zel ila, kan Pathian biak theihna hun tha kan neih chhun te hian inkhawm hi ngai pawimawh ang u, Pathianin hna thawh tur min pek te, hriselna min pekte avangin Pathian fak leh chawimawi hi kan ngai pawimawh em em tur a ni. Thlen hlim hian khua hi a har ngawih ngawih thin a , thian kan ngai a. Kan mamawh em em thin bawk a, keini Zofate phei hi chu thian ngai mi kan lo ni bawk nen. Tin, hna kan han thawk tan a, tawng lamah te, hna lamah te harsatna kan lo nei tan ta zel bawk a. Hna kan chawlh changin inkhawm kan duh a, kan kal thiam bawk si lo. MCF hruaitute emaw, kan member pui te emaw, kan rawih a lo tul ta a. MCF hruaitute hnenah kan in-report a, hruaituten address te zawt chhuakin inkhawm turin an va hruai thin a, vawi 2 – 3 an hruai chuan an kal thiam ve mai thin bawk a.
Tin, hnathawhnaah engemaw palh chetsualnate leh dam lohna-in Damdawiin ( Hospital ) hiala awm ngai te emaw, in lama mahni nu leh pa, pianpui unaute chhiatni thatniah te MCF te hian kan thiltumte hre rengin tanpuina emaw, inlawmpuina emaw kan nei thin a.
Tin, MCF te hian kan member zawng zawngte hi kan hre vek a, kumkhat atan member fee S$20 kan chhung thin a. Mi tupawh rawn kal tharin MCF hi a rawn zawm chuan S$20 hi a rawn chhung ve anga membera pawm tur a ni a. Member-te, chhiatni thatni-ah MCF-in a hre reng a, a humhalh tlat bawk a ni. Tun thleng hian Pathian zarah kan zingahmawi lo leh pawlawh taka awm hi an la awm hrih lo bawk. Pathian kaihhruaina kan dawng tak zet a ni.
MCFS lo dintute khan Zofate darhsarh taka mi rama kan awm tur leh hun kal zel turah inthlahdah taka awm hi a awlsam dawn a ni tih an lo hmu tlang sa vek a…Zofate kan inzawmkhawm theihnan a bul an tan hi tunah hian kei ni, thangtharte, tun hnua rawn kal te leh la rawn kal leh zel tur te tan hian an thawh rahsa paltlanin kan lo awm ve thei ta zawk a ni tih hi uar takin ka han sawi duh bawk a ni.
Singaporeah hian a kum a telin kan pung chho ve zel a, a awm rei tawhten min tin san ve zel bawk. 2007 May thla khan MCFS kum 10 piancham pha chu kan lo hmang ve thei ta reng mai. Tin, Pathianin kan hruaitu hmasa te kha hmanruaah hmangin MCFS hi a lo din a ni tih hi ka ngaihtuah chhuak a. Hmanrua reng reng a that loh chuan engmah a tih theih loh a. Chu vangin keini ho zawng zawng pawh hi Pathianin min hmang duh vek a, Pathian hmanrua tha tak ni tur hian keimahni theuh hi kan pawimawh a ni. MCF kaihruai zel tur pawh hian kan zavai hian Lalpan min hmang duh a, rilru zawng zawng leh hmangaihna nena kan vawn tlat a pawimawh ang.

Nun Hlimna Thuruk

Kawlchuani, Haizawl

Thal favang tur nipui chu hriat loh karin a lo her chhuakin a her liam leh mai dawn. Kum 2009 kum chanve te pawh kan lo chuangkai leh der tawh mai. Tichuan kan ni tin hun hman dan te hi a hreawm zual chang chuan ni te a her muangin darker te hi a inhlat emaw tih turin hreawmna a vangin kan rum tak meuh meuh a. Tin, kan ni hman dan te a nawm chang erawh chuan rin ai takin hun te a liam duak duak ni hian kan hre leh a. Mahse hun leh ni, kum te hian a her ngaiin a her reng a. Pathian thil rel hi mihringte tihdanglam rual a awm lo va, engkim siama Ruattu chuan a ruat sa vek a ni. Thil engkim hi a hunt akin a rawn her chhuakin a her liam leh mai a ni zawk. Tuna thil thar kan tih te hi tun hma lama lo awm tawh daih kha a ni a, engmah hi a thar a awm chuang lo. Thuhriltu 3:15-ah, “ Thil awm mek te hi lo awm tawh sa kha a ni a, thil lo awm tur te chu lo awm tawh sa kha a ni. Pathian chuan a bo tawh kha a rawn la kir leh zel a ni”, a ti a. Chung a nih si chuan eng hi nge thil thar ni a, eng hi nge thil hlui chu le? A nih loh leh eng hi nge kan ruahman ve theih thil chu ni ta ang le? Awle, kan nun dan thin te hi kan ngaihtuah let ngai em? He khawvel par tlana kan hun hman tawhah “nun hlimna’ kan hmu em? Lal Solomona ropui zia kan hre theuh ang a. Pathian pek finna, hausakna nen a khawvel hun a hman khan eng hi nge hlimna, nawmna tiin engkim a dap kual a, a ropui nasat nen khawvelah engmah innghahna a hmu lo va, khawvela thil engkim hi engmah lo a nih zia a hmu chhuak zawk a ni. Chutu a nih si chuan keini michhe dai kil kara leng, Khawvel nawmna chen pha bawk si lo, lo chen ve thei pawh ni ila, nun hlimna kan hmu em? Thu inthup, mifingte pawhin an hriat fiah zawh lo, mimawl takte, mi hnuaihnung zawkte tana hriat fiah theih si chu kan Pathian thuruk hi a ni. Kan Pathianah chauh lo chuan nun hlimna a awm lo. Thuhriltu 11:9-10, “ Thalaite u, in that lai chen ula, in la naupan viau lai hian hlim rawh u. Amaherawh chu Pathianin in chungah ro a rel dawn tih hre reng ang che u. Engmah engto nei suh ula, in pang tinatu awm hek suh se. In that lai hun a rei dawn lo.” A tawp berah chuan Thuhriltu 12:13, “ Pathian tih la, a thupek te vawng rawh” tih hi. Pathian tiha a duh zawnga nungtu tan erawh chuan ‘nun hlimna thuruk an hmu thin’.

Pensawnthangi Pa, Pu Lalthanhawla A Boral

Kan MCF member, NL. Pensawnthangi pa, Pu Lalthanhawla chu September 6, chawlhni zing dar 5 vel khan Tamu-ah a boral thu kan hriatin MCF ten kan tuarpui hle a ni. Pathian hnen atang thlamuanna leh tawrh dan a thiam theih nan Nl.Pen-i tan kan fianrial tawngtainaah i hrereng ang u. Nl.Pen-i hria lo palh kan awm takin a thlalak kan rawn upload nghal e.

Prinsep Street Presbyterian Church-ah inkhawm neih tan a ni.

Pathianin hun rei tawh tak atang Amah pawl nan hmun thar kan dilna te a ngaihthla a, September 6.09, 2:00 pm khan Prinsep Street Presbyerian Church-a MCF te inkhawmna hmun thar turah inkhawm tan a ni. Pathian kaihhruaina zarah mi 90 lai kan pungkhawm thei a ni. Inkhawm boruak a nuamin zai a tui a, PSPC Pastor Rev.Peter Chan'n 'Foot Washing' thupui hmangin fuihna thu tha tak tak min hrilh bawk. Inkhawm banah Pi Hena-i'n hmun thar lawm nan refreshment tui tak a rawn thawh chu kan tlei tlang hle.

Oct.25-ah East Coast-ah MCF Outing Neih Tur A Ni.

MCF Meeting chuan member te pakhat leh pakhat inhriat tawn nan leh innel zual zawk theih beiseiin thla thum dana outing neih turin rorel a ni a. July 26.09 khan Mt.Faber leh Henderson Wave Bridge-ah hlim takin outing hman a ni tawh a. Tun tumah East Coast-ah outing neih leh a ni dawn a, member tin ten kal theuh kan tum dawn nia.
Outing Program:
Outing chhuah ni : October 25.2009 (Sunday)
Inhmuhkhawmna hmun : Bedok MRT
Bedok atang chhuah hun : 12 pm sharp
Fellowship Hruaitu tur te : Lalchhandami (damtei), Lalrawngbawla (Bawla),Lalhriattira(Hriata).

Thla tin hian newsletter kan tichhuak ve a, chung zinga keimahni pual thu deuh bik tih loh chu rawn tihlan vek kan han tum thin ang e.

MCFS NEWS
A MONTHLY NEWSLETTER OF
MIZO CHRISTIAN FELLOWSHIP IN SINGAPORE
JUNE, 2009 NO. 06, VOL. 02

EDITORIAL

May thla kha MCFS kum 12-na a ni a. Tun thla hi MCFS News-in kum khat hmel a hmuhna a ni leh ta der mai!
Kan Editor hi a fakawm khawp a. Thla tin mai, thu tha tak tak min hlui a. A khum, MCFS office atana a hmang pawh hi a inpekna tilangtu a ni.
Ku Chhana hian theih tawp chhuaha News tha tak tak a rawn thawh thin avangin a chungah Editorial Board kan lawm hle, nupui tha tak a hmuh theihna’n i tawngtai pui thin ang u!
Ka u Hruaia hian chanchinbu adjust leh print lamah tan a la nasa. Vawiin ni thleng hian ama print vek a la ni. A lawmawm em a, a chungah an NU thuneihna awm reng rawh se!
A tawp ber atan article leh nepnawi rawn thawhtu zawng zawng chungah lawmthu kan sawi a. Rawn thawh zel turin kan ngen bawk a che u. MCFS News-in tluang taka ke a pen zel theihna’n i tawngtai pui thin ang u.
By Biaka ( hmu zo lo)

Ka Hringnun Hun leh Nite Ka Chhiar A (III)
-Hruaia

Rangoon International Airport
January ni 1, 2000 zanah Khampat atangin ka nu leh ka pa ten min rawn phone a. A tuk chhuak mai tur ka nih tawh avangin min rawn chibai a. Ka nu aw ka hriat meuh chuan ka mittui chu ka dang hneh ta lo va. Hriat ngai lohna ramah chhungkaw harsatna avangin eng pawh thawk ila ka huam e..! tiin ka chhuak ve ta a. Harsatna thim hnuaiah Ni eng a lo chhuak mahna tiin…..
January ni 2, 12:00 pm-ah Rangoon International Airport-ah chuan kei leh Ahminga, Mahminga leh midang kan thawhpui turte nen kan inchhawp phei ve ta ran mai a.

Singapore Changi Aiport to Hostel
Tin, dar 12:00pm ah Singapore Airline chuan kan thlawk chhuak ta a. 3:00pm velah Singapore kan va thleng ta a. Singapore time chuan dar 4:30pm vel a lo ni tawh a, kan company manager chuan Immigration-ah min lo hmuak a. Company motor-in kan awmna tur lam pan chuan kan phei ta a. Changi Airport atanga kan chhuah chiah chuan Motor chung atangin kan han thlir vel thin a. A thianghlimin a mawi hi kan ti em em mai a. Khaw chhung atang chuan kan kal zel a, ram lam kan pan zel a. Minute 25 vel kan kal hnu chuan Singapore Cemetery tih signboard hi a lo awm kuau mai a. Kan han hawi vel chu, mual pawng deuh et-ah hian zau tawkin thlanlung ngil em ema intlar hi a lo cham phei put mai a. Thlanlung kan hmuh chuan thlanmual a nih chu kan hrethiam ve mai a. Chumi thlanmual kan pelh atanga rei vak lovah chuan 25 Amakeng Rd tih hi signboard a lo intar kuau mai a. Kan kawi lut ta a. Hostel chu kan thleng ta nghal a. Kan thlen hmaa rilrua suangtuah dan ang chu a lo ni ta awzawng lo mai a, a lo awm hmasa tawhten an company uniform bal leh tawp zet zet mai chu hmun tin maiah an lo khai ferfur ka’n hmuh chuan rilru hi a hnual ruih thei a ni.
Tin, Hostel-ah chuan min dah ta a. Room khatah mi 22 min khung khawm a. Khum chhawng a ni a, mutna’n kan leng vel chiah chiah a ni. Kan Hostel bul vel reng reng chu ram reh tak mai hi a ni a, ram pik tak a ni. In pakhat mah hmuh tur a awm lo bawk.

Thlen Hlim Ei Rel Bawl Dan
Tin, kan thlen tlai atang chuan ei rawng inbawl tur a nih avangin Singapore cheng pakhat mah kan lo keng ve si lo, ei rawngbawlnan bungbel kan la nei bawk si lo, chaw kan nghei ta a. A tuk zing pawh chuan chaw ei tur kan la nei chuang lo va. Tlai lamah chuan kan pute rawn kalin S$ 50 theuh min rawn puk tir a. Ei rawngbawlna tur bungbel min rawn pe bawk a. Rice cooker chu kan insem ta hlawm a. Kei leh Ahminga, Mahminga; kan pathuma inkhawpin Canteen-ah kan va kal a. Buhfai bag, a tlawm ber man chi chu Vai-buh, fang sin te, rum zet mai hi a ni a. Bag khatah Kg 25 a ni a, S$ 15 a ni. Thai buh ve thung chu fang fim, pum sei deuh et hi a ni a. A ban deuh hlek a. Bag khatah Kg 25 a ni a, S$ 18 a ni ve thung. Tin, Ar-tui hi Tlep khatah pum 10 a awm a. S$ 1 man a ni. Ni tin Vaibuh leh Artui chu ringin zing leh tlai chaw kan ei thin a, kar khatah Arsa hi vawi khat te kan ei thin.
Kan awmna piah lawk ramah chuan Dil zau deuh mai hi a awm a. Dil kamah chuan Kuangkua hi a lo zam teuh mai a. Kuangkua zik te, Rawtuai te kan khawrh thin a. Ar-tui hi thla 3 chhung zing zanin kan hmeh a. Mi pakhatah pumkhat hisap zela siam a ni bawk. Kei hi sumkawltu ka ni a, eiin man tura kan sum dah hi Tlangsum tiin kan ko bawk a. A hmasa bera kan thlahlawh chu S$ 250 a ni a, tlangsum hi mi pakhatah S$ 50 theuh kan thawh khawm thin a. Engkim mai hi kan lei hmain Burma-ram cheng nena chhut a, a to viau chuan lei loh a ni mai.

Hna kan thawk tan ta
4, Jan 2000-ni ah chuan kan puten hnathawhna lamah min hruai phei ta a. A hmasa berin Office-ah min hruai lut a. Uniform leh hmanraw pawimawh te min pe chhuak hlawm a. Chumi hnuah Office hmun khatah min hruai leh a, Tv-ah hna thawh dan tur leh a kalhmang zawng zawng chu min en tir ta a. Chetsual, intihpalh , tlakpalha thih a hlauhawm zia chu kan en ta thap mai a. Tin, TV kan en zawh chuan hmunkhatah min hruai leh a. Officer pakhat hian min zirtir leh ta chiam mai bawk a. Sap-tawnga a tawng avangin kan la hrethiam chiah lo nen, Karen hnam mi pakhat hian tawng a let a. Kei chuan an sawi zawng zawng kha 60% chu ka hrethiam nghal ve mai bawk a. ‘Marawh chu ka tawng ngam ngang lo a ni ber mai. Tlai dar 4 velah chuan kan hawng leh ta a.
Ni 5 Jan 2000 niah ve thung chuan mihring min then ta a. Mahni thawhna lam theuh turah min dah hrang ta a.
Ahminga leh Mahminga te chu mihlui ho thawhnaah Lawng chhungah rawng hnawih turin an dah ta a. Kei erawh chu Office lamah min hruai ta a. Kan company-a Air-con siamna maintenance workshop-ah min thawh tir a. Mechanic ho karah chuan thla khat chhung chu workshop-ah ka thawk ve ta a. A tul tul min tih tir a, a chang leh Air-con bang te rawng min hnawih tir a. Ni tin zing dar 7am atanga tlai dar 4 thlengin kan thawk thin a, overtime hi min pe duh lo va. Ni khatah darkar riat hi kan thawk thin.
Thla tawp hlawh rawn chhuakah chuan S$ 250 a rawn chhuak a. Ka thiante; Ahminga leh Mahminga ve thung chu mi hlui ho karah Lawng chhunga rawng hnawih an nih avangin ni tin overtime an thawk deuh reng mai a, nitin zan dar 10-ah te an rawn hawng thin a. An hlawh a rawn chhuak chu S$ 450 te an hmu bik a. Kal tlang theuh theuh hi hlawh a inhlau thei khawp mai a, riru hi a na duh vang vang khawp mai.
Kei lah chu ni tin darkar 8 bak thawh tur a awm bawk si lo va. Tlai dar 4-ah ka hawng a, ei rawng ka lo bawl sa diam thin a. Ka thiante pahnih tan chuan thil remchang tak a ni ve thung a. A tuk zing hna thawhnaa fun tur thlengin ka lo siam sa thin.
Tin, February, 2000 thla tawp hlawh a rawn chhuak leh a Keini ho kha S$ 350 vel a rawn chhuak leh a, ka thiante pahnih ve thung kha chu S$ 500 te kha an rawn pha ta der mai a. Ka thahnemngai leh rilru na chuan ka rilru te te-in, “ Kan pute hnenah hian ka va sawi ang a, he tah chuan ka thawk peih tawh lo. Lawng chhungah ka thawk ve tawh dawn, hlawh a tlem thei em mai ”, ka va ti dawn em ni aw!!.tiin ka ngaihtuah rum rum thin a ni.
-chhunzawm zel tur

*********************

KA PI LEH PUTE
- Rengpuia

Falama kan awm laiin thal sikul chawlh hian Tahanah kan zin thin a. Kan chhungkaw inkhai bawr laih min hmuh veleh ka piin, ‘Mapuia te an lo haw e’, a ti thin. ‘An lo zin’, a ti lo. ’87 kumah Tahanah kan pem a. ’89 khan pawimawh tiin Falamah ka zu zin leh a. Falama ka piin, ‘ I u Tea a lo haw e’, tiin ka pu te-a fate a au khawm a. Kha ta ka pi lawm zia kha!
Ka pite hian enga ti nge ‘zin’ ti lova ‘haw’ an hman tlat le! Tawngkam hmanna dik an hriat chian loh vang chu a nih ka ring lo. An tupa hi an thinlungah eng tik lai paw’n ka awm reng a. Hmun dang ram dangah kan va pem daih a, hun rei tak kan va awm hnu paw’n anni chuan zin chhuak rei min ti mai a. Eng tikah emaw an hnena let leh tur nia ngaiin min thlir reng a. Chu rilru atang chuan, keini’n va zin zawk ang leka kan inngaih laiin, anni chuan ‘ Tea a lo haw e’, min ti ta thin a ni ngei ang.
Tahana ka pi leh pute kha ka pa lama ka pi leh pute an ni a. Ka pi chu Hualngo nu zet mai; ‘chhuk leh chho’ pawh ‘suk leh so’, ‘chhawhchhi’ pawh ‘sawhsi’ ti thin a ni a. Naupanga thukhawchang, a tawng hi kan nuih pui dar dar thin. Tuibur hi a zu reng a, a tui a hmuam bawk a. Ka pi leh tuibur rim hi thliar hran hleihtheih pawh a ni lo. Tuna ka han ngaihtuah pawh hian ka hnarah tuibur rim a cham vang vang hian ka zu hre tlat.
Zan mutnaah thawnthu min hrilh thin a. Mahse pawnto chau tawh lam kan nih avangin kei phei chuan a tawp hmaa ka mutthilh san a tam zawk. Zingah bawng hnute a sawr thin a. Chaw kan ei hian a saum thawh hlim a nih chuan mi a chawm sak a, a nih loh leh bawng hnute. Chi hi chawah mi a phul sak ngei ngei bawk..
A ke lei ei, khir chhah zet mai chem tea a zei thla zer zer mai kha hmuhnawm kan ti thei teh e! Sikula kan tih that ve deuh thu a hriat te hian a lo lawm ve em em a. A mi fuihna ber chu, “Zir turh turh rawh u”, tih kha a ni mai. Chu bak sawi thiam hek lo. Zing a bazaar haw hi kan lo chang thin a. Chhang min hawn thin avangin! Pawisa a neih tlem deuh changa ka pu a hawn kep ve loh changin ka pu kha a vui bang thei lo.
Ka pu chu Leithum atanga kawl phai leilet zuana Tahana pem a ni. Pa lian pui a ni a. A tu leh fate, tuma’n kan tiat lo. Pa taima tak a ni e an ti a. Mahse a vanduai a. A tha (nerve) hi a tha lo va. Ka hriat phak ve hman hma hian mahnia chechang thei lovin a awm tawh. A kal duhin kaih a ngai a. Thutthleng seiah a thu tlok tlok a. A kut leh a lu hi a khur dur dur a. A tha khur chuan a tawng te thleng hian a tihsak phah a.
Ka hriat reng thin chu a luphut an khuih sak thin kha a ni. Luphut hi a leng darh chuai chuai mai a. A chang phei chuan pawna inkhuih hial a ngai thin. Luphut chu zozai chu a thak em em ngei ang. Luphut thak takngial pawh kha a inhiat tha hleithei lo kha a nia! Kum rei tak chu tianga awm ta chu pangchan chang hi a nei thin. Hreawm a tawrh rei zia ngaihtuahin thinchhia leh khermai taka a awm lo kha mak ka ti zawk.
Tum khat pawh a kal dan zirin chhuat laiah ka kal chhut chhut a, ka ni fate’n min dawm der a. Kan nui vak vak a, a aw khurh dan ang te’n ka han tawng vel chiam a. A lo nui khuk khuk a, “ Ka tih dan chu zir nuam in ti hle mai”, a ti a. Huatah a la lo.
Falama ka pu hi ka pi aiin kum sarihin a naupang a. Ka pi hi a ralkhat ngaihzawn em avangin an va dil tawp a. Ka pi te chuan lo hnial thlak rikngawt ai chuan tiin an tlin zawh loh tura an ngaih zat, sial an lo dil a. Ka pu te’n an lo tlin tak avangin an innei ta e an ti a. Hei hi tu min hrilh nge tih ka hre tawh lo. Dik chiah lo lai pawh a awm maithei. Mahse an thawnthu hi ti hian mawi ka ti a. Hriat chian leh zual ka tum hran lo.
Ka pu hi Zawlsei atanga Falama pem a ni awm e. Falam Presbyterian kohhran upa min a ni ve. Mistiri hna thawk a ni. Ka u matric zir lai hian ka pu chuan a zilh a. “ Pa-a, ngaihzawng ka nei a, lehkha ka zir thei lo in tih dawn ai chuan”, tiin bul a han tan a. “Ban daih rawh u”, a ti dawn emaw tih nak a laiin, “ Nei mai rawh u”, a ti daih!
Ka pi Chawngtinzovi hi chawngthu a ni lo va, Fanai a ni. Nu invawng fel tak leh hmel tha tak a ni. Mi hi a ngai thei em em mai a. Tahan damawi in hovin T.B leh sikserh hrik an hmuh theih em em lai khan kei ka hritlang va inen tir pawh kha, “T.B i nei”, min lo ti tlat mai a. Ka inngaih bel chho emaw ni, ka khawvel kha a hnim deuh ruih te hian ka hre tan a. Zial ka zuk ngam loh vang pawh a ni maithei.
Chu tih lai chuan Falama ka pu a rawn zin a. A haw dawnin Falam damdawi in puia in-checkup tha turin min sawm a. Kan inzui haw ta a. Falam ka thleng chiah chu ka piin cheroot tel lian tawk hi mi lo lei nghal a. T.B in-checkup tura kal ka ni tih a hre tho. Ka zu khu vut vut a, ka dam suai suai hian ka inhria. T.B vei tih chi loh lutuk!
A nihna takah chuan Falama ka pi leh pu te hi ka nu pianna nu leh pa te an ni lo. A pa tea te an ni a, fa nei thei lo an ni.
Ka nu hi a nuin a thih san hma a. A pa (ka pu ) hi tirhkoh a ni a. A hna thawh leh a fa te pa li nen a buai em avangin a fanu upa ber (ka nu) leh a fapa naupang ber (ka pu tea) te chu an khua(Zawlsei) lama awm rih turin rem an ruat ta a.
Tahan bul Mualzawl khua atang kein an kal chhuak a. Falam an thleng thla ta a. Ka nu, naupang tein a nau a pua a, a kal hnak hnak mai a hmuhin ka pi a awm hle hle thei ta lo. Falam atanga an kal chhuah leh hnu tawkfangah a va um zui a, a hruai haw ta a. Chu mi ni atang chuan fa nei thei lo ka pi chu chhungpui nu dik tak a lo ni ta a, tu leh fate nen puinawi takin a hun a chhiar ve tan ta a ni. Mi tam zawkin he thu hi an hre lo. Kei paw’n puitling thawkhat ka nih ve hnua ka hriat chauh a ni. Ka pi chu eng emaw ti tak hian lainatna ka nei tlat. Kan pianna pi a ni lo tih kan hriat hnu khan kan en dan a danglam taah mi a ngai ang tih hi ka hlauh ber a ni! Enge maw chang khan inthlahrunna kha a nei emaw ni! Min nel loh chang deuh a neiin ka hre tlat thin. Ka ngaihbel lek ni teh se.
Pi leh pu tumah ka nei ta lo. A mal malin an kal liam zo ta! An hun tawp lam awmpui theih pawh tumah ka nei lo. Enge maw changa ka hrechhuak thin tih bak ka pi leh pute’n ka nunah chan ram an nei ta lo.
Nakinah keipawh, ka awm loh hnuin khawvel hi a her ngaiin her mahse tu hriat lohvin ka la tham ral ang.
******************

Happy Birthdays!!

Lalrintluangi 1, June
Duhhnina (Duha) 3, June
Hmangaihzuali (Zuali) 3, June

Lalropari (Marovi) 4, June

Lalawmpuii 4, June
Sangtea 5, June
Lianzami (Zami) 5, June
Lalpektluanga (Peka) 8, June
Lalnunsangi 8, June

Saihnuna (Saia) 9, June
Lalthangmawii (Thangtei) 9, June
R. Lalnunsangi (Sangtei) 10, June

Vanrammawia (VR-a) 13, June
Nuzawni 17, June
Lalbiakzuali (Mazuali) 20, June
Lallawmzuali (Zuali) 20, June
Lalnuntluangi (Tluangi) 23, June
Vanlalchhawna 24, June
Rodiki 26, June

Contact Number Thar
Jenny Zodinpuii 97580006

Inkhawm Report

3 May
Inkhawm Hruaitu - Rev. Lalrinkima
Inkhawm zat - 61
Thawhlawm - S$ 126. 50
Inkhawm Thar - 1
Hun Neitu - Rev. Lalrinkima
Refreshment Tumtu - Irene-i leh A thiante

10 May
Inkhawm Hruaitu - Lalawmpuii

Inkhawm zat - 33
Thawhlawm - S$ 69
Inkhawm Thar - Nil
Hun Neitu - C. VL Ramsanga
Refreshment Tumtu - Laldinthara

17 May
C C F combined service-ah Biak in kharin kan kal a, M C F inkhawm kan nei lo.

24 May
Inkhawm Hruaitu – V L Hruaia
Inkhawm zat - 26
Thawhlawm - S$ 67
Inkhawm Thar - Nil
Hun Neitu - Rev. Lalrinkima
Refreshment Tumtu - Joshua & Laldinsangi

31 May
Inkhawm Hruaitu – Thangpi-a
Inkhawm zat - 35
Thawhlawm - S$ 77
Inkhawm Thar - 1
Hun Neitu - Lalchhandami
Refreshment Tumtu - Lalawmpuii

Chief Minister Mizoram pual lunch buatsaih

Singapore Mizo te chuan ni 25 June 2009 hian The Ledends, Forth Canning Park, Singapore-ah Chief Minister of Mizoram Pu Lal Thanhawla te nupa leh PHE Minister Pu H. Hiato te pualin lunch kan buatsaih sak. Chief Minister te hi Singapore International Water Week leh Water Leaders Summit ni 22-26 June 2009 hmang a lokal anni. Singapore Mizo zawng zawng he hunah hial tel kan duh hle laiin kan hun neih tlan dan nen a inmil chiah lo a. Lunch a nih avangin kan hun neih dan leh kan guest te hun neih dan avangin mithahnem tak kan tel theilo a pawi kan ti hle. Chief Minister te nupa leh Minister hi Singapore Mizo hmingin Lee Kuan Yew Memoirs hlan anni bawk.

He luncheon meeting hi Pu C. Vanlalramsanga IES, Lee Kuan Yew School of Public Policy a awm mek chuan kaihruaiin Singapore sawrkarin ‘Singapore International Water Week’ hmang tura khawvel ram hrang hrang hruaitu sawm bik zingah Mizoram sawrkar hruaitute an tel avanga chhuanawm an tih thu leh Singapore nena ram hmasawnna kawnga thawhhona tha tak neih zui anih theihnana hmahruaitu anih a beisei thu a sawi a. Singapore Mizo chanchin leh inrelbawl dan tlangpui sawiin, nakin zelah Mizo tam zawkin Singapore-ah hnathawk leh lehkha zir an pun chhoh zel an beisei thu a sawi a.

Pu Lal Thanhawla, Chief Minister chuan thu sawiin Mizoram sawrkar tharin ram hmasawnna kawngah chak taka hmala tur leh ramrorelna tha din tura theihtawp chhuah anih tur thu sawiin, ram hmasawnna ruhrel ‘infrastructure’ tha neih anih theih nana hmalakna kawng hrang hrang tarlangin ‘power and energy’ tha leh rintlak neih chu sawrkarin a ngaihpawimawh hmasak tur thu a tarlang bawk a ni. Mizoramah sports facilities leh infrastructure tha kan neih loh avanga Mizo thalaiten an nih tur ang annih theihloh thin chu sawrkarin a ngaihpawimawh thu tarlangin District tinah sport facilities and infrastructure tha din anih theih nan chak zawka hmalak anih tur thu a sawi bawk. Chief Minister hian Mizo te khawvel ram hrang hrang a zirna sang zawk zira chhuak leh hnathawk a chhuak an tam chho zel chu lawmawm atih thu sawiin ‘skill set’, job market in a mamawh ang zel atana intahhriamna lamah tan lak lehzual anih chuan tun aiin kan dinhmun a that chhoh zel a beisei thu a sawi bawk. Tin, ram hrang hranga Mizo awm ten kan awmna hmun leh ram theuhah Mizo hmel zahawm taka lantir a pawimawh a tih thu leh community anga kan awm thinna kawngah zirna leh khawtlangnun chawikang zawnga kan in siamrem thiam a pawimawh thu a sawi bawk a ni.

Chief Minister nupui Pi Lal Riliani pawhin thu sawiin hriselna leh faina lama Mizoram leh zofaten tan kan lak lehzual a pawimawh thu a sawi a. Kan awmna hmun apiangah nun uluk tak, zei tak leh mawihnai taka awmdan thiam a pawimawh thu uar takin a sawi a. Zuk leh hmun leh ruihtheih thil lama inthiarfihlim thiam tur leh hetiang kawnga midang zirtirtu ni theuh turin kalkhawm te a sawm bawk a ni.

Pu S. Hiato, PHE Minister pawhin thu sawiin Singapore chu ram nuam leh fai, chenna atana nuam tak ni a a hriat thu sawiin Mizo thahnem tak cheng thei an awm chu chuanawm a tih thu leh vannei atih thu a sawi a. Singapore ram atanga entawn tur leh tihve theih rawn zirchhuak tur leh chutiang kawnga Mizoram sawrkar finchhuah zel turin kalkhawm te a sawm bawk a ni.