THINLUNG BAWNG IN

Hawilopar, Singapore

Baibula hming chuang miah si lo, mahse, Kristianten ka ngaihhluta ka ngaihpawimawh em em “KRISMAS” ni eng a lo zam thar leh hian a khawi ber nge tih sawi fiah theih si loh hian lairil a fan a, chhungril a tham vang vang mai thin. Thlasik daifimin thing hnah a bawh chiai a, siam hlim ang maia tharlam daifim a han bawl tiam tiam thin maite pawh hian thinlungah thu tam tak a sawi tawh thin. A boruak leh thilsiamte mawina mai avanga lairil fan erawh a ni vek lo va, he hun thlasik zan vawt veng veng hnuaia Bethlehem dai, bawng ina khawvel chhandam tura Isua Krista lo pian tak tlat vang a ni zawk. Chu hmun tlawm tak leh khawhar takah chuan Josepha leh Mari te inkarah Van Lal Fapa meuh chu kan lei hringnun tawmpuiin a lo piang ta a ni. Heti ema tlawma a lo piang hi Rokunga chuan;“Chumi zan reh takah chuan, thlasik vur daifim hnuaiah,Bethlehem bawng in tlawmah Lal Krista a lo piang ta…”tiin a lo chham chhuak thlawt mai a nih hi. Khawvelah Lal tam tak an lo piang tawh a, Isua Krista pianna ang ema tlawma piang hi an la awm lo va, lei lalte chu sawi loh, keini rethei berhchep berte , dai kil kara mi takngial pawh bawng in tlukatlawmah hian kan la piang ngai lo va, mahni in lumah tal kan la piang asin. Isua Krista erawh tlawm lehzual tur awm lo khawpa hniam, bawng inah a han piang hi zawng a va han riang lulai tak em! Rokunga bawkin’ “ A riang ngei e Van Lal Fa chu A pianna ranthlengah…” a lo ti hial reng a ni. Khawvela lalfa piang turah chuan damdawi in changkang takah daktawr leh nurse thiam thiamten chhar tumin pawimawh dang zawng zawng tlansanin an lo inralring a, chanchinbu mite lahin nau piang chanchin la turin an lo nghak thuap thin. Lawmpuina chi hrang hrang chhiar sen loh an pe chauh pawh ni lovin mipuiin an lo lawm thin a ni. Thinlunga lawmpui vang ni lovin tlawnna vangte pawh a ni fo. Isua Krista erawh chu lei leh van Lal ropui a nih vei nen, beram pute leh khawchhak mifingte chauh kha a lawmtu an intih kan hmu a, a va han tlawm bik tak em !!A pianna hmun kha a hnuaihnung mai a ni lo va, amah lawmtu an tlem em em kha tuna han ngaihtuah kir chuan lainatawm tak a ni. Mahse chuti khawpa riangvai chuan lo piang mahse, khawvel chhandamtu, lei leh van Lal ropui a ni si a. Hlain;“A tlawm lai kha a mawi lai ber, Lei leh van Lal a ni si; Chhandamtu a ni, i chawimawi ang, A hnenah thinlung hlanin…” a lo tih ang hian theihtawpa lawm a va phu tehlul em! Van ropuina zawngzawng tlansana lei hreawma lo piangin, khawvel sual tlan tur in, hmun tlawm berah a lo piang hi mihring ngaihtuahna hian hrethiam lo mah se, nang leh kei atan tlanna ropui ber a ni thung. Kamlala chuan; “Khawvelah hian lal tam tak an lo piang ta a, Mahse Lal Krista ang hi an la piang ngai lo; Van Lal Fa a lo piang Lal kraun min khumtir tur, Van mi zawng zawng pawhin min lawmpui ve rawh u...”tiin lei mihringte mai ni lo, van mite hial pawh lawmpui turin a sawm tawp mai a ni. Thinlung bawng inah ngei lo piang a, ama nun neitute fakna hian tawpintai a nei thei tawh ngai lo. Hmanah chuan Isua pianna Bethlehem khua chu pakhat chuah a ni a, tuah erawh chuan mi zawng zawng thinlung hi Isua Krista pianna Bethlehem a lo ni a. Kum tam tak leh hun rei tak chhung chu kan thinlungin a lam hawi lo va, khawvel thilahte lo tlan thin tawh mah ila, tun atang chuan kan THINLUNG BAWNG IN hawngin, “Kan lawm a che lei leh van Lal ropui, Theihtawpin i fak hla kan sa ang; Riangvaite lehretheite Lalpa, Hmanah Bethlehemah i tan Hmun a awm lo; Tunah erawh i tan hmun a awm kan ziangah…” tiin A fak hla i sa zel ang u.