Wednesday, August 11, 2010

World News

Germany-ah Muslim Biak In khar sak

Aug 8, 2010 (Wed): German thuneitute chuan World Trade Center suchhetuten inhmuh khawm nana an lo hman thin Muslim Biak In Thawhtanni khan an khar sak a, he Mosque hi sakhaw tana thihchilh tur thalaite lak khawmna hmun a nih thu an sawi bawk.


Hamburg khuaa ‘Taiba Mosque’-ah hian 9/11 laia thlawhna chhuhtu mipa 3 te khan US an pem hmaain vawi tam tak inhmuhkhawmna an nei thin nia hriat a ni a, chumite zingah chuan World Trade Center (WTC) su hmasa ber thlawhna khalhtu Mohamed Atta pawh a tel nghe nghe a ni.


Germany ramah hian Muslim sakhaw zuitu mataduai 4 chuang an awm nia hriat a ni a, thuneitute chuan tuna Mosque leh a peng ‘Cultural Centre’ an khar sak hi Muslim sakhua chunga khuahkhihna a niloh thu an sawi a, Mosque hian thalaite indona thianghlima tel turin a fuihpawrh thin vanga khar an nih thu an sawi bawk a ni.


Hetihlai hian WTC hmun , ground zero, bulah ‘Mosque leh Community Centre’ chhawng 13-a sang Muslim hovin sak an tum chu May thla khan New York khawpuia hetiang lam thuneitu ‘Community Board 1’ chuan a phal sak a, 9/11 laia nuna hloh-te chhungte chuan an kalh nasa hle a ni.


Kum 2001, September 11 khan Muslim firfiak hovin passenger phur thlawhna chhuh(hijack)-in khawvela insang ber pahnih WTC Towers an chhu chhia a, mi 3000 chuang an thi a ni. Agencies

1 comment:

b-buata said...

Kan Muslim unau te hi zawng an zia hi a dang deuh bawk a tin ni. German ho hi ka dem lo ve. Tin Ground Zero a Building sak an tum ve kher hi engemaw an hriat le.. WTC chhiatna a nunna chan chhungte tan phal loh pawh awm ve tak a ni.