CIA Factbook website-a tarlan danin Australia ramah hian mihring maktaduai 21.5 chuang an awm a, chung zinga 63.8% chu Kristian an ni na a, Prime Minister nimek Pi Julia Gillard-i hi ‘Pathian ring lo mi’ a ni ve tlat a ni. Party inthlannaah PM Kevin Rudd-a hnehin June thla atang khan ro a rel a, PM hlui tih chau a nihna chhan bera an ngaih Super Profit Tax (chhiah tih san) chungchang rei lo te chhunga a tih fel nghal mai theih avangin fak a hlawh hle a ni.
Pi Gillard-i Labor Party khingtu tur chu Liberal Party a ni a, an hruaitu chu Pu Tony Abbott-a ni. A ni hi a tleirawl laiin Catholic Puithiam niturin a zir tawh thin a, khoh taka che duh mai thin nia hriat niin ‘The Mad Monk’ tih hming an phuah sak nghe nghe a ni.
Tuntum inthlanpuiah hian party hruaitu ve ve hian khawvela Australia dinhmu tur – foreign policy ang chi - aiin ram chhung inrelbawl dan tur nasa zawka sawiin mipuite hip an tum niin a lang a.
Sorkar dinglai Labor Party chuan an ram sum hmuhna lian ber mining sector - thir leh lung alhthei lai/hralhtu - atangin an hlep atanga 30% chhiah dil a tum a, leilung hausatna mipuiten rual zawka zar a zo theih nan hmalakna tiin a sawi a, Australia ram pumpui Internet chak chi Fiber Optic connection zam chhuah a tum bawk a ni.
Liberal Party ve thung chuan sorkar dinglai hi border veng tha tawk lovah an puh a, refugee tamtak lawng nena Australia rawn pan thin ti tawp chungchangah khoh zawka hmalak an tum thu an sawi a ni.
Innei lova bialpa nena chengdun Pi Gillard-i hian Queen Elizabeth II thih hnuah UK King/Queen hnuai atanga inla hrangin Republic (President lalna ram) puan a duh laiin Pu Tony Abbott chuan tuna Australia dinhmun – Canada, New Zealand te anga a thua England Singapahrang hnuaia ram peng pakhat anga awm - tih danglam a tum lo a ni.
Australia hmeichhia PM hmasa ber Pi Gillard-i hian fa neih a duh loh chungchangah sawisel a hlawh fo thin a, chhungkua hlutna a hrethiam tak tak lo niin Liberal Party member-te chuan an puh thin a ni.
Australia ram hi invenhimna (defence) lama chuan US nen thiantha tak a nih rualin sumdawnna lam ve thungah chuan China a hnaih hle thung a, China, India leh ram thangchho meka lung alhthei (coal) leh thir nasa taka a hralh avangin khawvel ram hosa zingah financial crisis (2007-08 khawvel sumdawnna tlahniam) in a tih buai ve loh ram awm chhuna ngaih a ni. He dinhmun hi hmang tangkai thiam lo tiin khawvel Newspaper liante chuan Pi Gillard-i tlin tawk lohnaah an ngai a, Pu Abbott pawh khawvel levela huangzauh turin ‘a zei tawk lo’ tiin an sawisel bawk a ni.
No comments:
Post a Comment