Trinity Theological College Kum 60 Tling Ta

Trinity Theological College chu vawiin hian kum 60 a pumhlum ta. Kum 60 chuang lai kaltaah khan Japanin Singapore a awp laiin Changi prisonah kohhran hruaitu thenkhat ten a thuphungin Theological College din ho tha an tih thu an sawihova. Chu chu bawhzuiin a tirah chuan Anglican, Methodist leh Presbyterian ten intawmin Union College an din ho ta a ni. A hnu kum sawm velah Lutheran hian an belh ve leh ta bawk a. Chuvangin tunah hian heng kohhran palite hi neitu chan chang chu an ni.

Trinity Theological College hi Singapore-ah chuan Theological College hmasa ber a ni a. Asia khawchhak lamah hian a lar ber pawl leh tha ber pawla ngaih ani. Chinese leh English department te awmin zirlai hi 300 vel an ni tlangpui thin. Zirlaite hi Asia ram hrang hrang leh Australia, Africa, USA leh Europe ram thenkhat atanga lokal an ni ber a. D.Th, M.Th, M.T.S, M.Min, M.Div, B.D, leh diploma course thenkhatte offer a ni thin, Nakkum atang khian D.Min zirna hawn ani bawk ang. Zirlaite hi kohhran chitin kalkhawm an ni a. A chunga neitu kohhran pali bakah khian Independent kohhran hrang hrang leh pentecostal kohhran hrang hrang, Roman Catholic leh national church chi hrang hrangte atanga kalkhawm an ni.

Khawvel hmun danga Seminary/University tha Cambridge, Princeton, Dallas Theological Seminary leh thenkhat dangte nen inlaichinna tha taka siam ani a. Khawtual kohhrante nen hian inhne hnaiin seminar leh workshop buatsaih fo thin a niin special course chi hrang hrang hawn a ni thin bawk. Singapore hi kawtchhuah pawimawh tak anih avangin mithiam ho zin vel hian chawlh an ching hle a, special talk leh lecture tha tak tak ngaithlak tur a awm deuh reng thin.