June 2011 MCFS Newsletter

Editorial

Khawvel in her dang lam zelah MCFS new pawhin kum thum hmel a hmu ve ta der mai! Kan chhuah hlim a The Rengs-a hoa kan buai nak nak laite pawh a ngaihawm ang reng.

Kan hruaitu thu leh hla thiam tak takin mahni in lum panin min haw san a, news chhuah chhun zawm pawh a lungngaih thlak duh khawp mai. Mahse, vawi’n thlenga MCFS News chhiar tur kan la nei zawm thei te hi Pathian rem ruat liau liau a ni. Mizo-te hi thu leh hla a tuimi kan ni bawk a, Article tha tak tak leh chanchin thar tha tak tak kan member-te hnen atangin leh hruaitute hnen atangin kan dawng deuh reng a, a lawmawm tak zet a ni.

Tun tumah pawh nu leh pa hmangaihna Article tha tak chhiar tur kan nei a. Ngun deuhin in lo chhiar dawn nia. Tangrual hi chakna a ni tih hre rengin MCFS member tinte kan news tan hian tan I la thar leh theuh ang u.

++++++++++

KA NU MIN HMANGAINNA

By Silvia

Ka nu min hmangaihtu chuan, tuisik ka nihlai atangin, thla 9 chuang min pai a. He khawvel eng ka lo hmuh ve theih nan, rim tak leh hrehawm tak tak tuarin a awm thin.

Chutin ni leh thla tam tak a liam hnu chuan, a beisei leh a duh ang tak chuan, kut leh ke kim piansualna awm lo chuan min hring chhuak ta a . Mi te anga puitling ve thei turin, a chakna, tlinna te leh tha leh zung zawng zawng a lo seng thin.

Ka ril a tam hlauvin hnute tuiin min chawm a, a ma taksa pawh tuar hial khawpin min hrai thin. Chu chauh pawh nilovin ka zun leh ek pawh min then fai sak thin. Rim taka hna thawkin ka ei turte min hlawh sak thin bawk a.

Tawng min zirtir a, kal dan min zirtir thin bawk. Tawng thei leh duh duh ka rawn sawi ve thei hnuah, khawvel thiamna lam pang zirna vansang min kai tirin ka zirna man tur min hlawh sak thin.

Ka nu min hmangaihna chuan min la tawpsan mai lovin, nula ka nih thleng pawhin, puitling nun min zirtirin, thil tha tin reng; nungchangtha, nundan mawi, tlawmngaihna te, mi kawh hmuh thin.

Mite ka lo an ve theihna turin, a chakna, a tlinna, tha leh zung tam tak ka chunga min sen sak avangin ka nu min hmangaihtu chungah ka lawm em em a ni.

Chung chauh chu a la nilo fo, ka nu min hmangaihna chu, Pathianin sual avanga thihna, hremhmun chang tura min ti chu a fapa Lal Isua rinna avanga chatuan chatuan nunna chan theihna min siamsakna thu ropui tak mai chu min hmangaihtu ka nu kal tlangin Pathianin a fa a min ruatna chu, “rinna avangin ka lo chang ta”.

Chuvangin ka nu min hmangaihna, tumruhna, tawngtai fan fan nun leh Pathian hnena chhun zan zawma min dilsak avangin “Chatuan nunna ka chang ta”. Ka nu min hmangaihna chu a va ropui em!

I lo hlu ber e ka nu he leiah hian,

Ka khawvel ti engtu ka nu;

Lawmthu ka hrilh a che.

Nu Hmangaihna

Nu hian khawvel a ti famkimin a va ti ropui tak em!

Kan engkima kan engkim mai an ni;

Pangpar mawi tak ang hian an mawiin an hlu a ni.

Hreawm leh mangannate pawh lo tawk mah ila,

Nu bawk hi a ni lo pawimawh thin ka tan;

Pathianin nu min pek hi kan va han vannei tak em!

Nute’n an mi hmangaih ang hian keini pawhin I hmangaih let ve ang u!!

(Nute Ni-a MCFS inkhawmnaa lehkha ziaktu chhiar chhuahchhawn a ni. Ed)

++++++++++

Min hmangaihtu Zuapa

By F. Penny (Nghak reng thintu)

Pa-te zawng zawng “Happy Father’s Day” chibai ka buk a che u.

Ka pian hma atang ka tan tha hrui zung zam, thinlung hmangaihna min hlan thintu ka pa I hnenah lawmthu ka sawi e. Zuapa ka awmna hmun atang hian chibai ka buk a che. Ka zuapa, min hmangaihna te, min khawngaihna te, min lainatna te, min duhsakna te, min lawm thinna te, min zilhhauna te, … ka dawnkir changin, a ropui’n a va hlu teh lul em!

Ka zuapa min hmangaihnate chu puan chhuah sen rual a ni si lo maw! Kan naupan tet atangin rual ka ban ve theina turin leh mi ang sa ang a awm thei turin ka tan theih tawp chhuah a, tan la thintu ka zuapa.

Chung Pathian malsawmna zarah, zuapa min enkawlnaah chuan rawn seilianin bicycle khalh dan min zirtir a, ka tluk hlau a, ka hnungah min dawmin thlansa phul kai a, min venghim thintu ka zuapa. He lei pial lei thima mite min hmusit lohna turin thil engkima min kai hruai thintu ka zuapa. Kan unau kan hlim zaho theih nan, kawttualah min inchaipui a, hlim taka min infiampuiin Ka zuapa min hmangaihna chuan Krista Isua nun kawng zawh a, kan kal thiam theihna turin min kai hruai thin a ni. Zuapa min kaihhruaina avang chuan Isua Krista ringtu kan lo nih hi a va ropui tak em!

“Ngai teh, unaute inngeih dial diala awm khawm hi a va thain a va nuam em! Lua hriak hlu tak, khabe hmula luang thla, Arona khabe hmul ngeia luang thla a, A kawrfual hmawra luang thla ang kha a ni. Hermon daifim Zion tlangtea tla thin ang hi a ni; Chutah chuan Lalpan malsawmna thu a pe a, kumkhuaa nunna tur chu.” (Sam 133:1-3)

Kan unau inhmangaih dial diala kan awm theihna turin Bible thu min kawhhmuhin min fuih thintu ka zuapa. Rintu rinawm tak ka nih theihna tura thu tha min fah thintu ka zuapa. Ka tlin lohna, ka fel lohna, ka sualnaah te pawh anka nem tak a, min zilh hau a, min hmangaih thintu ka zuapa. Kan unau inkhawngaihna, in lainatna kan vawng that theihna turin;

“Tin, inkhawngaih tawnna lainatna neiin awm ula, Pathianin Kristaa a ngaidam che u ang bawkin inngaidam tawn rawh u..” (Ephesi 4:32) Lalpa thu a min fuih thintu kazuapa

Min hmangaihna leh min khawngaihnate hi kan chungah a va tam teh lul em! Engtik lai pawha min hrethiam thintu Zuapa, kan pek let hmangaihnate, khawngaihnate hriatthiamna te hi a va nep tak thin em!

Zuapa, I hmangaihna leh I khawngaihna te avanga kan sualna min ngaihdam thin ang bawkin, ka sualna te, ka that lohna te, ka dik lohna te, min ngaidam leh hram ang che aw. Lungchhirna mittui nen I mi ngaihdamna, thupha ka rawn chawi e.

He khawvel hreawmna kal sana, pialral khawpui mawi tak atang min thlir la, min ngaidam leh hram ang che aw. “Ka zuapa ka hmangah che, mita hmuh loh, benga hriat mai a, famkhaw dai pialral min chansan tawh mah la, I hmangaihna te, I khawngaihna te, anka nem thu min fah te, min zilhhauna te, min duhsaknate chu ka thinlungah nghilh ni a awm lo, min vawn nunin a awm reng thin a sin ka zuapa.

“Happy Father’s Day” Chibai ka buk nawn leh a che. Chatuan ram nuam Lalpa ang chhungah intawn leh hun nghakin “Chibai ka pa Chibai” mangtha le aw… min hmangaih thintu ka zuapa duh tak…chatuan ram nuam Lalpa ang chhungah in tawng leh ngei ang aw, ka zuapa.

“An mit ata mittui zawng zawng a hrefai ang a, thihna a awm leh thei tawh lo vang. Lungngaihna te, tahna te, natna te pawh a awm leh tawh hek lo ang, thil hmasate chu a ral ta, a tih ka hria..” (Thupuan 21:4)

Chhiartu zawng zawng Lalpan a tharin malsawm che u rawh se! Amen. Kalawm e zuapa! Mahni pate theuh hnenah lawmthu I sawi ang u khai, unau duh takte u.

++++++++++

Keimahni

2011 MCFS General Meeting Vawi 2-na minutes

Librarian leh News Editorail Board member thar: Tv Joseph Lalhmachhuana’n Mizoram lamah min hawnsan tak avangin Librarian atan Nl. Rosangzuali leh News Editoral Board member atan Nl Lalramdinpuii te ruat an ni.

Diploma/degree late chawimawina certificate pek chungchang:

Certificate hi Mizo leh saptawnga ziak a ni anga, chawimawina dawngtu thlalak a chuang ang. MCFS chairman leh secretary ten sign-in MCFS seal chhut a ni bawk ang. Tin, he chawimawina certificate dawn tur te hian chhiatni thatni fund a pe ngei tur a ni.

MCFS OUTING: October 1^st Sunday ah MCFS outing neih leh tur a ni dawn a. Hunserh leh Games min hruai turin heng mi te hi kan ruat. Tv Biakhmingthanga (leader), Pu Jimmy Lalruattluanga leh Nl Lalramdinpuii te ruat an ni.

Feedback paper sem chhuah: MCFS hruaitute leh kan rawngbawl ho dan inenfiah-na atan November 1^st Sunday hian feedback paper sem chhuak nise kan ti a. Papre lo buatsaih turin Pu F Vanlalhruaia, Tv Zoramchhana leh Nl Lalchhandami te kan ruat.

Buiding sum account: MCFS meeting chuan Building sum neih tha a ti a, Kumin June 2011 atang hian Building account hawng tan tur a ni ang. Last Sunday inkhawm thlawhlawm apiang Building sumah a lut thin ang. Kan thawhlawm ip sem chhuah thinah pawh Building Fund category telh a ni tawh ang. Tin, kum tawp MCFS sumpui chhawm atanga 20% Building sumah a lut ang. Building sum khawltu atan Nl lalramdinpuii kan thlang.

++++++++++