Singapore General Election 2011 Results
Sorkar dinglai People’s Action Party (PAP) chuan Group Representative Constituencies (GRC) 14 leh Single Member Constituencies (SMC) 11 ah chakin kumin Singapore General Election-ah hnehna a chang leh ta a ni.
May ni 7-a buatsaih he MP Seat 87 luahtu tur thlannaah hian Prime Minister nimek Lee Hsien Loong-a kaihhruai PAP chuan seat 81 a hui a ni.
A vawi khatna atan opposition Workers’ Party (WP) chuan candidate pa 5 funkhawmna bial lian (GRC) pakhatah hnehna a chang a, Hougang SMC a hum thei bawk nen, he party atang hian MP 6 thlantlin an ni ta ni.
PAP leh WP nilo party dang atanga MP thlan tlin an awm lova, mahse Singapore danpui chuan ‘Parliament-ah opposition MP pa 9 aia tlem lo a awm tur a ni’ a tih avangin, opposition candidate-te atangin thlantlin loh vote hmu tam ber pathum chu non-Constituency MP (NCMP)-a lakluh an ni ang. Chu seat 3 atan WP atangin pahnih Singapore People’s Party atangin pakhat lak an ni ang.
Singapore Parliament hi thlantlin MP 87, kumin tan NCMP 3 leh political party atang ni lo President-in a ruat Nominated MP 9 te nen an vaiin MP 99 a din tur a ni.
Kumin inthlanah hian vote thlak thei (kum 21 aia upa) nuai 23 chuang zinga 93% chuan vote an pe nia hriat a ni.
PAP chuan Aljunied GRC an hloh tak avangin he bial atanga an candidate pa 5 zinga cabinet minister ni mek pathum: Foreign Affair Minister George Yeo, Minister of PM Office Ms Lim Hwee Hua leh Senior State Minister Mr Zainul Abidin Rasheed, te chu an tla ta a ni. Agencies
No comments:
Post a Comment