April 2011 MCFS News

Editorial

MCF Day

March thla khan Mizo ten kan ngaih hlut em em Chapchar Kut chu zo hnahthlakte awmna hmun hrang hrangah hman a ni a.

MCFS chuan Chapchar Kut hmang ve thei lo mah i la, April thla chhung hian Christian-te tana ni pawimawhber pahnih Good Friday leh Easter Sunday changtluang taka kan hman leh ngei a rinawm.

Kristian ni pawimawhte chauh nilovin, MCFS hi Singapore-a cheng Mizo-te tan Duhlian-Mizo tawnga inkhawmna awm chhun a ni a, mahni tawnga Pathian kan biak theihna hmun a nih bakah, inpawlhona hrim hrim atan pawh a tangkai em em a ni tih kan hriat theuh ka ring. Chuvangin hetianga Fellowship zalen le belhchian dawl tur kan u ten an lo din hi kan vannei hle a ni.

Chutiang zelin kumin pawh a lo dinchhuah dan hre rengin MCFS day May thlaah kan hmang dawn a ni. MCFS hi kum 1997 ah din tan a ni a. AD 2007 May thla khan a kum sawm champha Marina Bay ah hlim taka hmang a ni tawh thin. Tunah chuan kum 14 hmel a hmu tawh ve tawh ta reng mai!

Hruaitute rel leh puan thin a nih angin kumin atang chuan MCFS day hi kum tin hman a ni dawn a. Kan hman ni apiangin a lo dinchhan leh a tum te; Kohhhran thliar bik neih loh leh Member-te harsatnaa theih tawp chhuahpui, hre thar lehin Chhim leh Hmar, Chhak leh Thlang, Pawl hrang hrang atanga lo kal khawm Mizote lungrual leh hlim taka Pathian kan fak zaho zel theih nan kan theihna zawnah MCFS tan mi tangkai tak nih i tum theuh ang u khai!

+++++++++++

KEIMAHNI

March ni 5 leh ni 27 khan MCFS Hruaitute meeting an thu a, a rorel then khatte chu:-

(1) MCFS Day Chungchang

May thla Pathianni vawikhatna (1 May)-ah urhsun leh hlimawm takin kan inkhawmna PSPC Biakinah hmang turin an rel a, chanvo neitu turte pawh a hnuaia mi ang hian an ruat nghal a ni.

- Inkhawm hruaitu: Pu Laldinpuia

- Thusawi (MCFS Chanchi leh Motto): Pu F Vanlalhruaia (10 min)

- Debate: (Nupui/pasal zawnna atan sum aiin hmangaihna a pawimawh zawk)

Sawitu:

Tv Lalhriattira

Nl Laldinpuii

Hnialtu:

Tv Zoramchhana

Nl Lalchhandami

(Minute 5 theuh hunpek an ni)

- Special Prayer: Tv Lalrawngbawla

- Lephet-toh, buhban awm leh thingpuite nen refreshment tuihnai tak buatsaih tur a ni a, a buaipui turin Pu Joshua, Nl Rosangzuali leh Tv Biakhmingthangte ruat an ni.

(2) June 18 khian Leadership training neih leh tur a ni a, nikum ang bawkin AM&PM coffee break leh chhunchaw tui tak buatsaih tur a ni ang.

(3) Thla hmasa chhuak News-a tarlan tawh angin MCFS Auditor Tv Joseph Lalhmachhuana a hawng tak avangin a aiawhtu tur atan Tv Biakhmingthanga thlan a ni.

(4) Chin Champion League

- 2011 Singapore Chin Champion League khel tur MCFS team tan S$800 hman phalsak an ni, hemi chhung atang hian player 20-te chu MCFS in kumin football team tan special-a a siam jersey var pakhat theuh a thlawna pek tur a ni a, a entu (supporter) te pawh S$15 leka tlan phalsak an ni ang. Mahse Committee chuan jersey hak 30 chauh chah turin a rel a ni.

- Inkhelh nia eiin buaipui turin Pu Joshua, Tv Thangpia, Nl Lalramdinpuii, Tv Lalhriattira, Nl Laldinsangite ruat an ni.

(5) Kawl Camping tan tanpuina

Thai-Burma ramria khawsa ring lo mite zinga chanchintha hrila thawk mek Evan Myo Lin-a tanpui rawn dilna angin MCFS chuan April thla chhung Kawl Water Festival (yi-laung-puai) laia Thailand Hmar lama cheng Kawlram mi (ring lo mi)te tan crusade/camping an buatsaihna atan S$150-a tanpui turin a rel a ni.

++++++++++

Sermons/Articles

Nghak zawk mai rawh!

By Nghak reng thintu

Kan hmachhawn zel tur hringnun kawngah hriatna rilru leh hmangaihna thinlung te chuan hnutiang chhawnin, buai em em in, nghaihdan, duhdan inmil thei lovin an awm thin a. Thinlung hmangaihna tih awmzia chhuichhuah tumin zawng vel thin mah ila, rilru ngaihtuahna hriatna te chuan rem an ti thei si lo. Riangvai taka hmachhawn zel tur hringnun kawngah hnemtu zawng vel thin mah ila, rilru hriatnain rem a ti thei si lo.

Ngaihtuahnate chuan a takin an thawhpui thei thin si lo. Hringnun kawng bumboh tak karah chuan hliam nasa tak tuara awm thin chu hmangaihna rawn pian chhuahna thinlung hmun lairilah hliam tawrhna dam chiang hmaa hliam thar hliam leh tur mai zawng rilru hriatna ngaihtuahna te chuan an phal thei ngial bawk si lo.

Aw! Thinlung khawngaihthlak awm, hrethiam ang che, rilru ngaihtuahna hriatnate chu ngaidam ang che. Lungrilah nasa taka I tawrhna, I hliam a dam chian hmaa hliam thar I hliam leh tur an hlauhthawnpui zawk vang che a ni.

Rilru hriatna ngaihtuahnate chuan hetiang hian an dawnpui ta a. “Ka hmaa tehna tinreng a khat, khirh khan leh zau tak, runpui chu eng tin nge ka kal tlang theih ang le. Ka hmaa tui fInriat zau tak, hmuhsitna tuifawn ri hum hum chu engtin nge ka hleuh tlang theih teh lul ang le. Ka hmaa awm ngaihdan chitin renga hnawh khah, thim mup hi eng tin nge ka tawn tlang theih teh lul ang le”.

Ka tan chuan chhan letna a awm ta si lo, keimah ngei pawh eng ti anga awm tur nge tih ka hriat si loh chuan thinlung khawngaihthlak awm tak chuan eng ti anga chakna neiin nge a tawrh tlang theih teh lul ang le.

Ka hriatthiampui a che, thinlung khawngaihthlak awm. Ngun takin ngai thla la, engtik lai pawha hmangaih em em thintu che, keimah ngei pawh min hrethiam theitu, khawngaihna leh ngilneihnaa khat Lalpa’n I tan a buatsaih sak tur che chu nghak zawk mai rawh.

Hmangaihna der leh neitu dik lo hmangaihna chu awt hek suh ang che. Buaipui bawk tawh suh ang che.

Hmangaihna thinlung neitu dik tak chhandamtu Lal Isua chu nghak fan fan zawk rawh. ‘Hun rei lo teah ka rawn let leh thuai ang’ tiin thu tiam a hnutchhiah si a. Chuvangin rinawm takin hmangaihna dika hmangaih thintu che Lal Isua chu nghak fan fan ang che. Thinlung khawngaihthlak awm, neitu dik chu nghak mai rawh aw, nghak zawk mai rawh.

++++++++++

Lalpa Malsawm Van Mana

By Lalhunsangi

“Tin, Lalpa in Pathian rawng chu in bawl tur a ni, ti chuan I chhang leh I tui chu mal a sawm ang a, tin, in zing ata hri ka ti kiang dawn nia.” (Ex23:25)

“Pe rawh u, chutichuan pekin in awm ang, thahnemngai taka teh a, beng muk a, sawi muk a, liam zawih zawihin, in mal chungah an pe ang che u.” (Luka 6:38)

Pathian chuan khawvela a thil siam zawng zawngte zingah keini mihringte hi chungnung berah min dah a, Ama anpui ngeia siam kan nih avangin min dah hlu a. Min hmangaih em em mai a ni. Mihringte hi Ama ropuina min kawl tira, chu chu Amah nena kan inzawmna Thlarau tak mai hi a ni a, Amah chawimawitu leh faktu atan. Min siam chhan hi keini Kristian-te hian kan hriatchian a pawimawh hle a. Hrethiam lovin kan lo nung ve mai mai ang tih erawh a hlauhawm hle thung a ni.

Nitin, a malsawmna chi hrang hrang I dawn kha I chhiar ngai em? Damna, hriselna, thawh theihna leh chet theihna zawng zawng min petu chu Amah a ni si a. A khawngaihna leh malsawmna kan dawng tak meuh a ni lawm ni? Miin damdawiina sum leh pai tam tak senga an inenkawl mek laiin emaw tan-in (jail) bang zuta hrehawm tak tuara an rum an rum mek laiin Singapore-ah sum leh pai zawng thei dinhmunah min hlankai te hi ‘A van mana malsawmna’ a va ni teh lul em!

Tirhkohte 17:25, 28 ah “Amah ngei chu engkim hnena nunna te, thawkna te, leh thil zawng zawng petu a ni” a ti a. Chang 28 ah “ Amah avangin kan nung, kan che, kan awm a ni si a”. a ti bawk a. Kan nunna chelhtu leh control-tu a ni tih chiang takin min hrilh. A va ropui em! Kan Pathian hming fakin awm rawh se!

Tunlai khawvel kan thlirin thlipui, tsunami, nargis, tam, hri, kang mei, nuclear, tui let, lirnghing rapthlak tak tak a tleng nasa tawh hle a. Ram thenkhatah chuan politics avanga in tual vuakna leh in mausamna a thleng nasa hle bawk a. Tun hma pawha kan hriat ngai loh chanchin rapthlak tak tak, a sing tela thihna, in leh lo channa, tah leh ha thial mi eng zat tak awm ang maw, kan Bible-in a lo sawi lawk sa ang hi a thleng dik mek zawng a nih hi.

Lal Isuan a lo kal hun a hnaih chuan tamte a tla ang a, hrite a leng ang, lir a nghing ang, buaina a thleng ang a tih chu a lo kal lehna ‘second coming’ chu a entir a. Pathian hun tiam chu kan rap tan tawh a, chuvangin unau, tunah inpeih a hun tawh tak zet a ni. Lalpa a kan in tuk luh a, nitin kan awm dan leh nun danah Pathian thu anga kan nun a, a rawng kan bawl a hun tak meuh a ni.

(1) Lalpa rawngbawl chu enge ni?

Lalpa rawng kan bawl theih dan thenkhatte chu Bible chhiar, tawngtai, fak hla sak, sawma pakhat pek te a ni. Engkim kan thawh tan hmain Bible chhiar te, tawngtai te kan tih hmasak ber tur chu a ni. Thlarau thianghlim tanpui tura dila pawimawh hle a, chutichuan Lalpa kut chak a lo lang thin a ni.

I rilrua Pathian fak hla a rawm lan chuan sa chhuak la, sa zel ang che. Chutianga nitin hun I hman chuan I chungah Lalpa a lawm thin a ni. Tin, Lalpaa beiseina kan neih chuan nangmah leh Pathian inkar chingfel phawt rawh, tichuan I thil engkim dil chu a tih hlawhtlin tir zel ang che. Pathian chuan amah ringtute awm dan leh thinlung a en a, ringtuten kan tih a tan mawi lo kan tih chuan Pathian thiktu a chhia thin a, Thlarau Thianghlim tih vuiin a lo awm thin a ni.

A fak nan I thinlung leh I ka kha a dil a che, kan lei leh kan ka ven that a pawimawh hle a, a thatzia chauh sawi nan hmang ang che. Lalpa chungah hel lo I la kan thil dil chu tih hlawh tlinin a awm zel ang.

Mosia hmanga Israel fate Aigupta bawih ata an chhuaka thlaler nithum kal lekah kum 40 chhung Lalpan a vahvaih tir kha Pthian lakah an hel thin avang a ni. Pathian laka hel apiang a ti hlum thin a, Abrahama, Isaka, Jacoba te lakah Lalpan chhechhama ram a pek tur Kanan ram, khawizu leh hnutetui luanna ram chu an lut ve thei lo a nih kha. Lalpa thuawiha phunnawi lo apiang ram tiam Kanan chu an lut tih kan hmu a.

Chutiang bawkin keini pawh a tha tur zawnga infuih nan nilova, mi sawisel nan, phunnawi nan, mi rel nan, itsik nan, chapo nan, mahni thiam inchan zut zut nan kan rilru leh kan ka-te hi kan hman erawh chuan Lalpa chungah kan hel tihna a ni a, khawvel thlalerah hian Setana bumin kan boral mai ang a, Lalpa min hruai tumna hmun kan beisei Van Kanan chu kan thleng zo lo ang tih a hlauhawm em em mai a ni. Kan Bible in ‘Lalpa tih mi chu a nunah malsawmin a awm ang’ a ti a. Kan nun hian Pathian I chawimawi thar leh ang u.

(2) Sawma pakhat pek leh thil hlante

Malakia chuan ‘Mite leh sakhaw hruaituten sawma pakhat leh thil hlante chu an thlahthlam em em a, an tih that duh loh avangin a haw em em mai a ni. Pathianin sawma pakhat chu ka ta a ni a ti’ a ti a. Kan pek loh chuan eiru minti a ni. Malakia 3:8 ah “Mihringin Pathian ta chu a ruksak tur em ni? Mahse nangni chuan min ruksak thin” a ti a. Keini Kristian zawng zawngte hian sawma pakhat chu kan pek that loh erawh chuan Pathian chuan eiru min ti dawn tihna a ni.

Kan pek hian pastor te, mi rethei chanhai te, rawngbawltute kan pe mai tur a ni lo va, Lalpa Biakinah lakhawm turin min ti a ni. Chu ta tang chuan rawngbawltute leh missionary chawm nan, mi rethei tanpui nan an sem chhuak leh tur tih min kawhhmuh a ni.

Sawma pakhat pek hi ui chunga pe lovin, phal vanga pek pawh ni hek lovin, pek loh theih loh va inngaia pe pawh nilovin, pek tur a nih vanga pek mai tur a ni zawk.

Miin dik taka a pek zel phawt chuan van tukverhte hawngin malsawmna chhiarsen loh, belte phai thei lo, van mana malsawmna in a vur thin a ni. Chu malsawmnaah chuan sum leh pai bakah thlarau dam nan, taksa lam damna te, hmuingilna te, tluanna te nen mal a sawm belh chhah thin. Chutiang bawkin I huan thlai leh I rante pawh Lalpa tan a hawng hmasa ber leh a tha ber chu I hlan thin tur a ni a, I ran vulhah leh I huan thlaiah hmui ngilin an lo pung ang a, I huan thlaiah mal a sawm ang che. Kan pekna zawn zelah a ni mal min sawm thin ni.

Tin, keini’n vak chhuakin Pathian rawng kan va bawl thei lo, kan thawh chhuah sum leh pai te hi Lalpa rawngbawl nan kan pek zel hian Lalpan kan thlarau man ve nan min chhiarsaka Lalpa mit hmuhah rawngbawl kan lo ni a. Duet 8:18-ah “Sum leh pai deh chhuah theihna petu che u chu amah a ni zawk a sin” a ti. Ama hnena kan pek let hi a lawm zawng a ni. Sawma pakhat chauh min dila pakua te chu a lo pun leh zual theih nan leh hman a lo zai theih nan.

Sawma pakhat pekna kawngah chuan fiah a phal a ni. Ring lo mi pawhin a pek dik phawt chuan malsawmna ang khatin mal a sawm tho a ni. A chhan chu Lalpa hriatna an lo neihna tur leh amah tih nan a hruai lut thin a.

Mahse sawma pakhat pek hi van kaina a ni lo. Pathianin mihringte hnena malsawm kan dawn theihna tura a buatsaih a ni zawk. A malsawm kan dawn leh theih nan leh pek let leh tur kan neih theih zelna tur kawng a lo ni a, keini Kristian te hian I ngaih thah suh ang u!

Pek dan dik

Entirnan, I kutah $500 I nei ta a, I kuta a awm chhungin I ta a ni. Sawma pakhat $50 chu kohhhranah I pe tur a ni. Tin, I chhungte a zat veI lo thawn ta a, an lo dawn $250 atang chuan dik takin sawma pakhat chu an pe ve tur a ni. A la bang $250 I kuta I neih atang chuan nangin dik takin I awmna hmun kohhranah I pe ve leh tur a ni a.

Peka kan awm theih nan ‘pe rawh u’ min ti a ni. Peka hneh ban theih loh Pathian a ni si a. Malakia 3:10 ah “Ka inah ei tur a awm theih nan sawma pakhat zawng zawng chu thawhhlawm inah rawn la rawh u. Van tuk verhte chu hawn sak che u in malsawmna dawnsen loh khawp hial ka vur dawn che u nge, dawn lo mi han chhin teh reng u. Sipai hote Lalpa chuan a ti”.

Tirhkohte 5:1 kan en zel chuan Anania leh a nupui Saphiri-te chuan ram an hralh man a then an zep ta a, Tirhkohte ke bulah an rawn dah a, nimahsela Petera’n “Anania, Thlarau Thianghlim bum tur leh ram man a then zep turin enga ti nge Setanna’n I thinlungah a tih khah? A awm chhung khan I ta a ni reng lo em ni? I hralh hnu pawh khan I thu thuin a awm lo em ni? Engatinge heng thu hi I ngaihtuah? Mihring bum I nilo a, Pathian bum I ni zawk e”, a ti a, an nupain an thu rual avangin a hau hlum ve ve tih kan hmu a. keini ringtute pawh hi Anania te nupa angin Setana’n kan thinlungah nasa takin hna a thawk thin a, Pathian hnenah pek phal lohna leh uikawmnain kan thinlung chu a ti khat thin a ni.

Chuvangin keini ringtute tan chuan kan pek dik a pawimawh em em a, kan pek dik loh erawh zawngin Thlarau Thianghlim bum kan lo ni ve dah ang e. Dik taka kan pek chuan kan chhang te, kan tui te chu malsawmin a awm ang a, kan zinga hri lo piang tur lamin min ven him sak dawn a lo ni. Chu chu Lalpan kan rawngbawl nan min chhiar sak a, thil engkim kan tihah hmui ngilnain a um zui thin a ni. Ama zara sum leh pai kan thawh chhuah hi a rawng bawl nan I pe phal zawk ang u.

Jacoba 2:20 kan en chuan “Thlarau tel lovin taksa chu thi a ni. Chutiang bawkin thil tihte tel lov rinna pawh chu thi a ni” a ti leh a, chu kan rinna chu kan thil tih nen a inkawp tlat tur tih min zirtir. Amah chauhva a awm ve ve chuan thi a ni tih kan hmu thei. Abrahama chuan Pathian a ring a, chu chu a felnaah ruat a ni. Rinna ngawtin thiam a chan theih loh thu Abraham atang kan hmu thei a. Chu a rinna chuan thil a tih tira a fapa a hlan a, Pathaianin A fapa aiah beram pa a pe ta zawk a nih kha.

Hebrai 11:1 ah “Tin, rinna hi thil beiseite awm ngeia hriatna thil hmuh theih loh te hriat fiahna a ni” a ti. Chuvangin keini ringtute pawh Pathian kan rinnaah hian, a tana thil tih nen a inkawp loh chuan kan rinna hi a thlawn mai a lo ni ang a, ringtu thi leh suak mai kan lo ni ang. Kan rinna leh thil tih a inkawp tlat erawh chuan Lalpa tan mifel a chhiar kan lo ni thei ang. A thilpek leh thil hlanah te chuan malsawma kan lo awm theuh theih nan I pe phal zel ang u. Amen.

++++++++++

Vanglai Nun

By Silviajoute

Kan thatlai kan vanglai hunte hi ral leh mai tur hringnun a ni si a. Thawnthu anga thamral leh si thinin. He kan lei hrehawmnaah hian hlimna tur awm lo lungngaihna chauh lo chu.

Kan vanglai hunte hi Lalpa tel lo chuan kan nitin nun hi a harsain, a hreawmin, beiseina thlawn mai a lo ni thin a. Kan hun liam ta te kha chhui letin siamtu lung hi kan ti awi a ngem aw?

Keini thalaite hi infiah a hun tak zet a ni. Khawi lamtluang nge aw kan zawh le? kan thatlai hunah hian.

Lalpa chuan kan nitin hringnun hi pakhat mah hriat loh a nei si lova. Saruak mai kan nih lai pawhin Amah chuan a faah min pawm si a. Keini chuan rinna a hmutu kan lo ni zawk si.

“Engpawh ni sela, in awm dan chu Krista Chanchin tha nen inmawi phawt rawh se, …Krista avanga amah in rin chauh ni lovin, amah avanga in tuar pawh phal a ni si a;…” (Philipi 1:27-29).

Chuvangin hmangaihtu hnenah lungchirin I pan ang u! Chutichuan Ani’n min lo lawm ngei ang. Kan vanglai nunte hi hmang thiamin, Lalpa tan I hmang ang u khai!

++++++++++++