News

26 August 2010: Kawlram roreltu Sipai sorkar chuan Noverber 7 ah rampum huap inthlanpui neih tur a nih thu August 13 khan a puang tawh a, tel tur party 40 an awm thu hriat ani bawk.

He inthlan hi sipai sorkar-in kum khuaa ro a rel theih nan kawng chi hrang hranga a duan ‘inkaihhruaina danpui’ hmanga buatsaih a nih avangin inrawlh ve a sawt lo a ngai pawl an awm laiin then khat chuan sorkar rum tak inthlahzal lai chuhin ram leh hnam tan engemaw chen thiltha tih theih an beisei ve thung a ni.

Sorkar dinglai chuan NGO anga a din USDP chu political party-ah a siam a, member maktaduai 8 chuang neia sawiin rorelna zawng zawng hum zel a tum hle a ni.

Tarlan tawh angin 1990 inthlana hnehna chang NLD party chuan kumin ‘inthlanpui kaihhruaina dan’-in an hruaitu Pi Aung San Suu Kyi leh politic avanga lungin tang mekte tel ve a khap avangin inthlannaa tel an tum lova, ‘inthlanna kaihhruaina dan’ leh ‘inkaihruaina danpui’ hrim hrim hian democracy ramah a hruaithlen theih an ring lo bawk a ni.

Inthlan a hnaih ang bawkin party hrang hrang chuan bial hrang hranga an candidate tur an puang ta sap sap a; Kawlram pumpui zarpharha USDP khing pha tur an vang hle a ni.

Kumin inthlanah hian hmun hrang hranga thu tur dansiamtu (legislature) thanhnem tak thlan ani dawn a, Tahan leh a chhehvel-in an thlan turte chu:

1. Amyota Hluttaw MP (Kalay District tan pa 1) [India Raja Shaba ang chi]

2. Pyithu Hluttaw MP (Kalay Township tan pa 1) [India Lok Shaba ang chi]

3. Ragion Hluttaw MP (Kalay Township tan pa 2) [Mizoram MLA ang chi]

4. Ragion Hluttaw MP (Kalay Township-a cheng Chin miten pa 1) [Mizoram MLA ang chi] – Hei hi danpui Chapter IV, section 161 (b) angin Sagaing Region, Kalay township-a Chin mi belh (140,000?) chuan Kawlram mihring zat (mtd 57) atanga 0.1% (57,000) a khum avangin Sagaing Region Hluttaw-ah Region MP pakhat Chin mite pualin an nei thei a ni.

Tahan-Kalaymyo biala Party dang candidate hriat a ni rih lo naa Chin Progressive Party (CPP) chuan an tih fel tawh thu Party hruaitu pakhat hnen atangin thu kan dawng a ni.

List kan dawn danin:- Amyota Hluttaw MP tan U Khin Maung Yin a ni a, Pyithu Hluttaw MP atan Pu Khawtuahlala candidate tura ruat a ni. Ragion MP pahnih atan: Tahan-Kalay Kawngpui Hmarlam zarah Pu Zam Khan Thang vote hung tura tih a ni a, Chhim lam zar atan Pu Khaw Tin Thang candidate a ni. Tin, Ragion MP (Chin quota) tan Party President Pu No Than Kap a ni ang.

Aizawl-a hmunpui nei Khonumthung News (online) tarlan danin Lusei hnam ten 0.1% Quota atangin MP neih theih an tum thu hriat a ni a, August ni 11-a ziak News-ah chuan ‘veng upa’(local elder) pakhat chuan “mihring 50,000 kan awm chuan MP seat khat pe turin” sorkar-ah ngenna an theh luh thu ziak a ni a, “tunah mi 20,000 list kan pe lut tawh” tiin chu upa’ chuan a sawi bawk niin tarlan a ni bawk.