Singapore Mizo Inkhawmna Lamtluang

Singapore Mizote kan pung ve zel a. Chawlhni inkhawm kan neih apiangin mithar, inkhawm vawikhatna lawmluh tur kan nei thei ziah mai hi malsawmna ropui tak a ni.

Singpore a ka kal ve vawikhatna 2001 ah te kha chuan Fellowship te chu awm ve mah ila member kan thahnem lo hle a. Chawlhni tin kan inkhawmin inkhawm lo pawh hi kan inhre vekin thahnemngaih a na duh hle. Fellowship Chairman khan ( hun engemawti chhung chu chairman hranpa nei lovin pastor senior kan ring mai) member te a han phone zung zung a, lo kal thei lo turte kan inhre vekin a chhan te kan hre kilh kelh a. Lokal tlai turte lamin kan hriain kan innghak kim hram hram thin. Kan vai deuh thawin kan inkhawm thin chung pawh khan 10 hi kan pel thui vak ngai lo. Tlem ber tumin 4 chauh nih chang te pawh a awm. Mahse kan tlem aiin kan hlim phian zel a, tawngtai lama kan thlarau mi Pi Hnuni(RIP) te khan min tinungin kan member kan tawngtaipui tam tak Pathianin a venhim ziate kha mak tak a ni.

Sept 9 2001 a kan inkhawmna thin Trinity Theological College campus thara a insawn atang khan keini pawh inkhawmna kan sawn ve a ngai ta a. Anglican kohhran Chapel of the Holy Spirit in min lo mikhual thei hlauhte kha kan lawm teh zawng anih kha. Chapel of the Holy Spirit pawh chu kum hnih vel kan hman hnuah an sak that dawn avangin kan chhuahsan a ngai leh a, riakmaw va an sawi ang maiin riahrun belh tur kan zawng leh ta ruai ruai a. Tichuan Charis Assembly of God ah rei vak lo chu kan inhamtang a, mahse nuam kan ti chiah lo nge ni rei vaklo hnuah tawp sanin engemawti chen chu inkhawm pawh kan han tikhat a. Chutia baihvai angreng taka kan awm lai chuan Uncle Wong Lee-a te chhungkuain an inah inkhawm mai turin min phalsak ta. Singaporeah hian ina inlen pawh hi an ching vak lova, thiante pawh hi ina lengah an insawm vak lo. Hetiang khawtlang leh culture-ah Uncle Wong Lee-a te chhungin an ina Mizo inkhawm min phalsak hi thil namai ani lo khawp mai. Lawmthu kan thiam ang tawk chuan kan sawi ve thin.

Mimal ina inkhawm chu thil tihreng theih a nih loh avangin inkhawmna dang kan zawng leh ta a. Tichuan tuna kan inkhawmna St. John's St.Margaret a an pastor hian kan harsatnate min hriatsakin hmun indaih loh hle mahse min siamsak ta hram a, a tawp a tawpah chuan inkhawmna hmun mumal kan nei ve leh ta. Inkhawmna kan zawn thin vel lai hian lu a hai duh hle. Member thahnem deuh ni ila hawh man te pe thei dawn ila hmun tha deuh pawh a awm nen chutiang han cho tham meuh kan awm rih si lova. Kan hmelhriat lohte huana theihai rah hmin thlir ang maiin kan thlir vauh vauh thin anih kha. Rualawh a na duh thin khawp mai.

Kan inkhawmna thar room lian vak lo pawh chu Biak In sak that dawn avangin an thiat leh pek dawn a, mang a ang thar leh ta. Biak In neitute lah chuan room min pek theih tur leh tur loh an chiang lawk thei bik si lo. Chutia a khat tawka kan inbiaka kan ngen kan ngen hnuah chuan engemaw ti tiin tuna kan inkhawmna hi min pe ta hlauh mai a, kan thaw ve huai mai. Duhthusam ni lo mahse kan member zat nen pawh kan inhmeh tawk viauva, hlim pawh kan hlim tlangkhawp mai. A room a len avangin kan thawl hle a. Engtikah tak luah khat zo awm ang maw kan ti rilru thin.

Tunah chuan kan lo pung ta a, luahkhat zo chu kan awm ta reng mai. Kan khawhar thin laite ngaituahin leh mizo hi mi 25 tal awm ve ila, inkhawm hi mi 20 te han tling ve ila chuan a nuam awm mang e kan tih thin laite kha khuarei an lo chang zo ta. Kan inkhawm pawh 40 kan pelh changte a awm ta a, thutnain min daih loh mai hlauhthawn changte kan nei ta hial mai. Mi 20 tal inkhawm ila kan tih kha 20 aia tlem inkhawm kan nei ta meuh lo. Pathian hnenah lawmthu i sawi ang u.

Singapore hi ram te takte ni mahse khawvela ram changkang leh hmingthang ber pawl ani a. Thil zi r peih tan thil tha lam zawng zir tur a tam hle anih hi. He khua hi mizote tlangnelna khawpui a la ni deuh deuh dawn a. Chuvangin member tinte pawhin midangte lokal ve theih nan tangkai i tum ang u. Mizote hi hnam thang duang tak kan ni mek a, thiltha a awm chuan tha lo a awm ve fo angin kan than danah hian erawh chu kan duhtui a tul khawp mai. Sualna ni changkanna ani lova, awm duhdah hi changkang zia ani hek lo. Pathian lawm tlakin thawkin nung ila, hma i sawn ang u; tichuan kan inchhir ngai dawn lo nia.