Friday, April 9, 2010

SUNNA

MCFS Chairman, Pu F.VL. Hruaia pa, Pu Lalchama (kum 58) chuan 21 Feb (3:30 am) khan Chatuanram min pan san ta. A kalsan tak a chhungte Lalpa Thlamuanna chuan awm pui zel rawh se.

Irene-i pu, a nu nuta, Pu Lallianzova Hmar (kum 52) chuan 25 March (2:00 pm) khan Chatuan Ram min pansan ta. A kalsan tak a chhungte leh Irene-i tan Lalpa Thlamuanna i dil pui ang u!

Ka Nu leh Ka Pa

Lalhunsangi

Ka pa hian kum 75 mi niin 2002 April-ah min boral san a. Pathian khawngaihna zarah ka nu hian kum 75 mi niin min la dam pui fan fan a, ka nu tih chauh sawi tur ka nei ta. Thenrual thenkhatte angin ka pi leh ka pu tia sawi tur leh hmuh tur ka nei ve lo va. Ka pa nu leh pa (ka pi leh pu) hi Mizoram thingtlang, Vaphai khua an ni tih chiah ka hria a, ka pa pawh chu Vaphai khuaa piang leh seilian a ni. 1948 India-Burma Indepen-dent a lo nih khan Burma Defense Army-ah a lut a, Maymyoah a awm. 1951-ah Chin Hill, Saek thingtlang khua ka nu nen an innei a. Ka nu hi Saek lal chhung a nih avangin a man atan Tlai ruk a ni a. Hman lai tlai khat chu se la a ni. Sial paruk tihna a nih chu! Tichuan Mandalay-Maymyoah an awm a. Ka pa pension hnuin thingtlang Vaphai khaw ri, thingtlang Satawm (Burma)-ah an khawsa ta a ni.Thingtlang Satawm KhuaChutih hun lai vela Satawm khua chu in 15 tha vel an ni a. Buh leh bal, leh thlai a tha thei hle a. Ran chhawr a la awm ngai rih lo. Buh leh thlai rah, thlai hnahte chu chhip ngatin ram hla chhukchho atang an phur hawng thin. Chuachhapah buh hi kut ngatin sum-ah an lo deng fai thin. Mumang anga ka la hriat chu ka nu hian hma lamah em (dawrawn) phur chungin mi pua a. Fanghma te, vaimim te, mai te, berul leh thlai chi hranghrang phur chung chuan mi feh haw pui thin. Thim dawnah in an thleng a, zanriah an bawl chawp leh a. Zing an tho va, dai pawna tuikhur lam panin thawlin tui an chawi thin. Tin, tapah in chhung tiengtu atan meipui an chhep a, mei lum an ai phah thin. Tichuan thlipui a tleh nasa thei hle a. In te pawh a nuai sawp remrum thin a, mihring hial te pawh a len bo va. Ka pa hian mi pua a, ka u te a kai khawm bawk a. Ka nu hian ka chhang hi a paw bawk a. Mi then-te chuan kan in lam panin an rawn zam chhe thin a, an sa himna zawngin inah an intawk khawm thin. Thli a nat theih em avangin ka nu hian, “ thli aw, zahngai, zahngai”, a tih ka hre thin. Tichuan, kan kawmthlang lamah Sechalthei kung leh thei-hmu kung lian tak tak a ding bawk a. In sir piah lamah theipui kung leh zawngtah kung a ding a. Chutah chuan sapthei hi a zam khat mup a, a rah lah chu a tam nasa hle a. Zan a lo thlenin chu thing zar velah chuan zawngte, chhimbuk, chingpirinu, vahrit, thuro, vaki, tlaiberh, thereng, leh va tinreng te chuan an aw mawi tak an chhuah hlawm a, an hram a, thing zarah chuan an kat nauh nauh thin. Tin, kan kawmthlang hnimbuk ruamah sakhi, sazuk, sanghal an tawm thin bawk. Ka nu leh ka pa hi ranvulhah Pathian malsawmna an dawng hle a. Ran kan ngah em em a. Sial, bawng, vawk, sakawr leh ar hi kan in hnuaiah pal kan pin sak a. In hnuai chu ran in vek a ni. Chhunah ramah leh daiah an va tla a, tlaiah an lo haw leh dial thin. Kan in awmna hi veng mawng lam a nih avangin ramsa hlauhawm tak tak an hrang hle a. Sakei, chinghnia, savawm, sihal te chuan kan ran rualte chu seh tumin zanah sekawtrawlh atangin an rawn veh chhen thin a. Kan ran te chuan an hlau thei hle a. Ka nu leh ka pa hi an tho va, kawmchar verandah atangin an au a, lungin an vawm thin. Ka pa hian a chang chuan silaiin ramsa ho chu a kap thin a ni. Tin, ka pa hi sawrkar lam pawimawhin khual a zin thin avangin ka nu hova kan lo khawsak chang a awm thin a. Ramsa an lo kalin ka nu chauh pawh hian tukverh a hawng a, ramsa ho chu a hnawt kiang thin. Chuachhapah suamhmang an la tam lehnghal a. Kan banga arbawm tar leh chhiara ar awm ho te chu sanghar leh savuak, mu hian thiar tumin an rawn hel ziah ve bawk a. Tin, kan vawk, dai pawna tla ho chu sanghal nen an inthlah a, sanghal no an pai thin. Tun anga ka ngaihtuah hian ka nu kha ka pa zin hlana keini, a fate rual nena a lo khawsa thin kha a huai ka tiin nutling ka ti takzet a ni.

Dawn Ve Ngai Em

Lalhriattira
Beisei ngam si loh beisei tlat te,
Hmuh theih si loh
Mitthla-a cham reng te,
Theihnghilh tum tlat si mahse
Thinlai rilan cham reng thin te hi,
A na thin a sin,
Fam si lo dairial chan reng mai zawng.
Kei zawng ka dawn bang thei lo,
Chhun ni a rei tih leh
Zankhua a sei si,
Chin lem a nei lo ve nang ngaih hian,
Chung si-ar mai khi maw,
Ka lungrual pui tur,
Mahse kawpten an leng thin a sin,
I thlir changin rairah min han
Dawn ve thin ang che.
Engtin ngai ve ang che maw,
I zunah chhawl ang ka uai hi,
Lungrun i tang bel tur hian,
I thlang dawn e maw a ngur leng,
Dawn suihlung ka phang leh thin.
Mahten ka thlir chung thangvan,
Chhawrthlapui eng no nghial e,
An mawi ngei e,
Chung si-ar zawng te khi,
Aw….theih chang se nang nena
An ianga len ve ka nuam,
Mahse duthu leng samin
A thamral leh si thin.

Kan Duh Thlan Chu

Tluangtea

Samsona chu Pathianin Israelte Philistia mite kut ata chhan-chhuak tur leh venghim turin a ruat a. Chhula a awm lai atang rengin uain, zu leh ei thiang lo reng reng te pawh ei hauh lo turin leh a lo piang ang a, a lu-ah chuan bak mehna reng reng hmang lo tura tiam a ni. A nu chuan thutiam chu hrerengin uain leh zu reng reng lakah insumin a chawilian a. Samsonan ama chhia leh tha hriat--na hmangin a duh dan leh a ngaih dan te a siam thei tawh a. Pathian tan nung lovin a duh dana nun hmangin a khawsa a. Pathian duh loh zawng, ring lo mite kawng chu zawhin serh tan loh hnam nulate chu a ngaizawng a. A hnuhnung berah Delili a ngaizawng leh a, a rim thin a. A chakna sam chu tan sak a ni a. An man a. A mit te an kher sak a. Mi ramah thihna hial a tawh phah ta a ni. Kan nu leh pate hi kan nun kawngah hian kan mawhchhiat em le? Nang leh kei hi sorkar sikul leh sande sikulah zirna nei lovin kan awm em? Ka nu hian khawvel lama ka kal thui theih nan sum leh paiin min support lutuk a, ka sual phah kan ti nge? Ka pa-in hlimhlawpna sual lam ka buaipui tan khan min thunun ngam loh vang alawm kan ti nge?

Kan nu leh pate hian Samsona ang khan kawng dik, kawng tha leh kan thatna turin min enkawl seilian a. Kan naupan lai atangin sande sikulah Pathian thu min zirtir a. A tam zawk chu intermediate, senior leh zirtirtu thlengin kan kai thei a. Bible chang leh thufing thenkhatte chu by-hearta sawi par par thei kan ni hlawm awm e. Nun pui lem lovin nawm-na lam chu, ‘a pawi thui em nang’, tih hi kan kawng zawh duh dan a ni si a. Kan biak Pathian lawm loh zawng leh kan nute mittui titla thei zawng, nun ngaihtuahawm tak, a tawpa in-ngaihtuah lungchhiat leh inchhir-na mai chu kan thlan a lo ni reng mai. Kan chhia leh tha hriatna hian ‘Pathian duh loh zawng’ a thlang a nih zawngin Samsona ang khan kan vanglai hi engmah lo maiah a chang dawn a ni. Salte chuan an pute mit-hmuha tihlawm tuma an thawk ang mai ni lovin, Krista bawih ang zawkin Pathian duh zawngin kan thinlung zawng zawng leh tih tak zetin i thawk zawk ang u.Chhiar tur : Rorel 13:4-5, Ephe 6:5-8, Sam 66:18

Hrai Duh Leng

Kawlchuani, Haizawl

“Ngai teh, fanaute hi Lalpa laka kan rochan a ni a, rila rah hi a lawman mi pek a ni.” Sam 127:3 Nu leh pate dinhmun atang chuan khawvela kan hmangaih berte chu fanaute hi an ni awm e. Kan nu leh paten kawla ni chhuak chhiara hna thawkin, a thlum a al pawh ei phal lovin min lo enkawl seilian a. Ka nu leh ka pate thusawi ka hriat reng thin, “tunlai mite hi an makin an awh apiang an lei ta mai a, hun te hi a va danglam tak em”, an ti thin. A ni tak a, kan nu leh paten rual kan ban loh hlau-vin rilru zawng zawng sengin tan an lo la a, nulat tlangval lai chuan engmah ngaihtuah pui lem lova kan lenlam san nite chu chhiar sen a ni lo.Tuna nu leh pa dinhmun ka han chan meuh chuan fate tan theih tawpa hna thawkin, hrai-duh-lengte nen khua hmunah pawh leng thei lovin, mualzapui kar dana sum zawn a lo tul ta hial a, ka nu leh paten min lo hmangaih zia leh min lo thawh sak nasat ziate tunah ka hre dawn chauh a lo ni. Nu leh pate hmangaihna hi ka hre hle ti mah ila, kan lo la hre zo lo nasa a, a tawna tawn a, hriat belh theih zel chauh a lo ni.
Nulat tlangval lai atanga kan hmalam hun tur thlirlawk a, theih tawp chhuaha tan lak a pawimawhin kan hun hmante kan lo vawn thianghlim a pawimawh hle.Khawvel thila kan nun vawng feltu leh tanlakna min petu hi inzawt ila, kan chhanna tur chu a hrang theuh ngei ang. Ka chhanna chiang tak ni thin chu “ka hrai lengte” tih hi a ni. Vawiin thlenga ka kepen min tizangkhaitu chu ka fate hi an ni a, mitthlaah an cham bang lo va, ka ngaiin hunte hi her muang ka ti thin. Retheihna avangin fate nen inthen a la ngai rih tlat si a, Pathianin rem a tih chuan awm khawm zai kan la rel ve ngei ang. Chu hun chu nghakhlel takin bei-seina nung nen ka thlir reng thin.
Fanaute hi nu leh pate rilru tihlimtu leh tilawmtu ber an nih rualin, rilru tihahtu an ni tlat thin. Enkawl thiam an har em em a, officer pakhatin, “ mi fate chu ka enkawl thiam a, ka fate erawh chu enkawl dan ka thiam lo’, a ti a. A ni khawp mai, kan fate awm dan hi mihrang tan hriat a awl a, nu leh pa tan chuan hmangaihnaa kan thlir reng avangin an nun dan tha lo hi hriat a har hle thin.“Naupang chu a kalna awm kawngah chuan zirtir ula, a upat hunah pawh a thlah lo vang.”Tuhf-22:6. “I fapa chu thunun fel la, chawlh-na a pe ang chia, a ni, i rilru lawmna a thlen sak ang che”. Thuf 29:17. “Beisei awm a la nih laiin i fapa chu thunun la, boral mai turah ngai suh”.Thuf-19:18
Naupangte hi vuaka thu hrilh ngei ngei ngai an awm rualin zaidam taka zilhhauna dawngsawng chi an awm bawk a. A pawimawh ber chu kan fate mizia hriat a tul a, mi sawi nazawng leh fate sawi apiang pawm loh a tha hle. Nu leh paten thudik hi peih taka kan zawn chhuah a pawi-mawh. Pa pakhatin, “in fate hi in duh angin ka duh ve lo asin” a ti a, a dik hle a ni. Hmangaihnain fate kan en a, an chet dan apiang a mawi em em laiin midang tan ninawm an ni thei tih hriat a tha hle bawk.
Zirna lamah V.L Awia’n “Fuihna an ning” tih thupui hmanga a ziah khan zirlaite enkawl dana kawng thar dap a tul zia a ziak a, a ni taka, kan fate hi ran thlaha thlah liam mai lo vin, an zirna atana an mamawh kan hriat puia an nitin zirlaite en fel sak reng a ngai. “Zir rawh, chhiar rawh” tih reng ai chuan an zir dan tur kawng kawhhmuh a tha lehzual. Tin, an zir tur thute pawh nu leh paten kan hmelhriat that hle a ngai. Fate hi zalen tak siin khuahkhirh dan thiam ila, zaidam taka thu hrilh an tul huna zaidam thiam te pawh nu leh paten kan zir tel a ngai. Kan hmangaih anga dan khauh tak tak kan hmang fo thin hi fate tan hriatthiam a har thin.
“Nangni pate u, in fate ti-thinur suh ula, Lalpa thununnaah leh zilhnaah chuan enkawl zawk rawh u”. Eph-6:4.“ Pate u, in fate tinuar suh u. Chuti lo chuan an bei a dawng dah ang e”. Kolo-3:20. Kan rochan fanaute hi thiam taka enkawl turin nu leh paten mawhphurhna lian tak kan nei.

Nepnois

 Khawvela Thudik Pangate
(1). I leiin i ha zawng zawng i hawl kim vek thei lo.
(2). Thudik 1-na khi dawt a ni.
(3). Mimawl chuan thudik 1-na a chhiar zawh khian a leiin a ha a hawl chhin thin.
(4). Mimawl i lo nih tak avangin i nuih a za ta hle.
(5). I chhiar zo ta a, ho i ti hle.

 Mini-skirt
Super market-ah naupang pakhat hian a nu a bo va, tap chungin dawr nghaktu pakhat hnenah a va sawi a. Dawr nghaktu chuan naupang chu a lo hau va.“ Hetiang dawr liana rawn kal chuan nute kut vawn tlat tur alawm.”“ A kut pahnihin a awl lo alawm.”“ A nih loh leh a skirt tal vuan ta che.” “ Vawn ka tum a, ka ban pha lo alawm.”

 Sawi Dawn Lo Rengreng!
Thian dun hi kawngah an intawk a. “ Hmanni lawka ka lehkhabu ziah kha i lo chhiar ve tawh em?” “ Chhiar tawh e.” “ Chuti maw? Engtin nge, i hmuh dan te han sawi la.” “ Ka sawi lo vang. Kei aiin i sek zawk a, boxing te kha i zir bawk a ni lawm ni?”