Friday, February 12, 2010

Inhlanna

Dinpuii
Zing i tho tha em? I nun a hlim em? Lalpa nen in tho dun em? Zing i thawh veleh heng, a hnuaia kawng thum hi han hmang ve chhin la, i hlawk pui ve ka beisei.
Pakhatna : I taksa tan, zi mar ang che. Ding chungin emaw, khum tlanga thu chungin emaw duh tawkin han zi mar phawt mai teh. Chu chuan i taksa chhunga tui a tiluang tha ang a, i taksa khawl a tinung ang. Pahnihna : I rilru tan, nui(smile) ang che. Peih vak lo chung paw’n han nui hram teh. Chu chuan i ni hman tur atan i rilru a eng zawngin a kaihruai ang.
Pathumna : I thlarau tan, “Pathianin min hmangaih,” tih sawi chhuak ang che. Vawin tana i tawngkam chhuak hmasa ber chu Pathian tih a ni ta. I tho harh tha te a nih chuan vawin hi nangma ni ni lovin, Ama ni a nih thu hrilh ang che. I hun hman tur darkar tina thil lo thleng turte chu A kut chakah hlan ang che. “Amahah chuan engkim siam a ni a, Vana awmte, leia awmtre nen, hmuh theihte, hmuh theih lohte nen,… engkim Ama siam a ni, Ama ta tue bawka siam a ni. “ ( Kolossa 1: 16 ) “Tisa lam thil duh erawh chu thihna a ni si a, thlarau lam thil duh erawh chu nunna leh thlamuanna a ni.” ( Rom 8: 6 )
Bible chuan bang lova tawngtai turin min hrilh bawk a. ( I Thessa. 5 : 17 ) I ti thei ang em? A tih dan chi khat, kristian thenkhatten kum za tel an lo tih tawh thin dan chu “Thawlak Tawngtaina” hman a ni. Thaw vawi khat lak phaha Isua hnena i sawi mawlh mawlh theih tur tawngkam tawi te emaw, thu tawi te emaw thlang rawh;
“Ka hnenah i awm.”
“I khawngaihna ka chang leh ta.”
“Ka rinchhan che a nia.”
“Hriat che ka duh.”
“I ta ka ni.”
“Ka rin theihna tur chein min pui rawh.” Bible chang tawi pawh a hman theih:-
"Kei atan chuan nun hi Krista a ni.”
“Mi thlahthlam ngai lo vang.”
“Ka Pathian i ni e.”
I thinlunga zung a kaih thleng in, i theih tawka tamin tawngtai ang che. I tihchhan chu Pathian chawimawi na’n a ni a, Amah thunun tum na’n a ni lo tih erawh hrereng ang che.
“Pathian hnaih rawh u, tichuan Anin a hnaih ang che u.”
(Jakoba 4:8)
Lalpa’n malsawm rawh se! Amen.

Lehkhathawn

Lalherhi

Dear thian duh tak Vanlalkhirh,

Kumthar chibai le. Hlim taka kumthar i hman theih nan duhsakna ka hlan a che.
I kal chhuah ni atang khan vawiin thleng hian i chanchin sawi kan bang thei lo. I bula awm a nawm thin ziate leh kohhran leh khawtlang tan thahnem i ngaih thin ziate ka ngaihtuah chang phei chuan i awm lo chu kan khawtlang leh kohhrante pawh an ngui phahin ka hria. Singapore atanga lo haw tawh phawt chu i chanchin zawt lovin ka awm ngai lo. Singapore-ah MCF a awm tih ka hriat phei chuan theihtawp chhuaha MCF tan tan i lak pawh ka beisei. Ka thian, he khawvelah hian hnam dangten changkanna rahbi an rap chho nasa hle a. Keini Zo hnahthlakte pawh hian tan kan lak nasat a ngai a nia. Tin, i hna thawh puite khum i tum dawn nia. Ka thian, i hna thawhpui i thian te leh i boss-te tan rinchhan tlak nih ngei i tum dawn nia. Rinawmna, dawhtheihna leh taimakna kha i nunah vawng tlat thin ang che. I hna thawh leh i thiltihna apiangah Kristian nun mawi leh Zonun mawi kha i tan kawp tir tlat dawn nia.Ka thian, ram dang hnam dang karah i awm a, nulat tlangvalna kawngah fimkhur a ngai a nia. Nu leh pate bula kan awm lai chuan thian tha leh tha lo, nu leh pa’n min then hran sak thei a. Tunah chuan nangmahin i awm a, duhsak viautu chea i ngaih kha i tana tha ber an ni kher lo maithei. Tin, ka chah duh ber che chu, sikul kan kal tlan lai khan thianten pasal an nei a, hun rei lo te-ah an in lamah hnawk deuhva an lo haw leh thin kha.Ka thian duh tak, Zo hnahthlak val rual zingah duhaisam i tawng lo a nih pawhin i tana tha tur, rinawm leh fel, chhungkua i din pui theih ngei tur kha i zawng dawn nia. Tunlaiah mi tam takin nupui atana an duh tak tak si loh, hlim hlawpna atan nula an kawp kual vel thin a. Chutiang lakah chuan i fimkhur leh zual dawn nia. Vawi khat hming chhiat hian dam chhung a daih a, khaw lama i hming mawina zawng zawng kha i chhawm nun zel pawh ka beisei. Ka thian, thil eng pawh ti la, i chhungte leh i biak Pathian theihngilh lo la, tawngtai leh Bible chhiar mawlh kha theihngilh suh ang che. I tan, kohhran leh i chhungte’n an tawngtai sak reng thin che a. Tin, i lo haw hun kan nghakhlel em em thin a, hlawhtling taka i lo haw pawh kan beisei. Nangmah ngai em em thintu,


I thian,

Lalherhi

Inbuatsaih Rawh

F. Penny-
I nunah thil tha ber i beisei chuan a chhe ber tan pawh inbuatsaih rawh. Tichuan, i thil tawnah tawrhchhelna neiin thil engkim mai “ Siamtu remruat a ni,” tiin thlamuanna i nei thei ang.- Harsatna tawkin thil tha pawh i dawng a, i bul hnaih berah tunge awm?- Thil la thleng lo, thleng mek leh thleng tawh : heng pathum tan thinlung hlim taka a tawrh a, i hmachhawn zel theih nan Chhandamtu ‘KRISTA’ i thinlungah hmun pein i chatuan hmun tan pawh inbuatsaih rawh.

A Mawi Ber E

F.Penny

Khawvelah thil mawi tam tak a awm a. Nimahsela enge ‘mawi ber’ nia i hriat? Hmangaihte hmel mawi tak nge? Pangpar mawi tak nge? Chung leng hnuai leng, he khawvela awm, ransa chi hrang hrang mawi tak takte hi nge? Thil mawi tak tak ziak chhuak dawn ila, ziah chhuah zawh rual an ni si lo. Eng hi nge mawi ber ang? Kei chuan thil mawi zawng zawngte zingah a mawi bera ka hmuh chu hei hi a ni………“ Ungek….Ungek…” Riltam leh tap chungin nu pum chhung atang he khawvel buaina karah ka rawn piang a.
Nu hmangaihna chuan hnute tui thlumin min chawm sei lianin min awi tlei a. Kal thei chhet chhet ka chawnbana kai a, min veng a, kal min zirtirtu hmangaihna kut chu a mawi ber e!Pathian malsawmna zarah rawn thang lianin khawvel zirna zir thei ve tur leh mi ang sa anga sikul uniform mawi tak, ipte mawi tak nen, ziakloh lehkhabu, pencil mawi takte ka neih ve theihna tura thlai chi kui a, theih tawpa tanla thintu hmangaihna kut chu a mawi ber e! Nulat tleirawl hun a rawn thleng a. Kawng dik lova ka kal pen hlau va, kawng dik zawka ka kal thiam theihna tur in, chung Pathian Lalpa thununna ang zela min zirtirin leh min kaihruaitu hmangaihna kut chu a mawi ber e! Hlim leh lawm taka eirawng bawl in, choka atanga chhuak thei lo leh zing tin tlai tin pasal fanaute tan hah pawh hre duh lova ei rawng bawl thintu hmangaihna kut chu a mawi ber e! Chu tiang anga hmangaihna mawi zawng zawngte ngaihtuah letin ka va ngai tak em! Mel tam takin kan inkar dang in, ram hran daihah awm mah ila, ka ngaih em em thin, ka theihnghilh theih ngai loh chu kanu min hmangaihna kut mawi tak hi a ni.
Aw.. A mawi ber e.

Ding Dong ------ Ding Dong

F. Penny

Ni thar lawmawm Sunday zing khawvar eng mawi tak chu a rawn thleng leh ta.“Ding..dong….ding..dong..” Beng darin a hria dar vuak ri, ri mawi tak chu. Naupang tet atanga tunhnu thlenga danglam ngai lo, hun lo la kal zel turah pawh danglam lo tur, ka seilenna khuaa Sunday zing inkhawm dar vuak ri a lo ni. Sunday zing a rawn thlen chuan ngaihthlak nin theih loh dar vuak ri, ri mawi tak chu ka hre thin. Chu lo pawh ka hriat nin theih loh pakhat chu Sunday zinga min kaitho thintu ka pa awka nem; “Tho rawh, tho rawh, Penny. Inkhawm turin inbuatsaih rawh”, tih kha a ni.…… Thlasik zing a nih avangin peih vak lo chungin ka tho ta a. Ka ha ka nawt a. Ka hmai ka phih a. Ka insil ta a. kawr mawi tak leh kawrlum mawi tak nen min lo nghak rengtu ka nu zing hmel mawi tak chu ka hmu ta a…… Tuk khat Sunday zing khawvar eng mawi takah chuan kan in tukverh atang pawn lam thlirin ka naupan lai ka ngaihtuah let a. Ka va ngai tak em ve aw! Hun leh ni te an ral liam mai ta si. Koh kir theih rual a ni si lo maw, ka pa duh tak! Sundy ni a rawn thlen chuan dar vuak ri mawi tak chu ka bengdarin a hria a. Nimahsela Sunday zing tin min kaitho thintu ka pa awka nem erawh chu ka hre thei ta si lo.‘Boral rih suh, min kalsan rih suh ka pa’, tiin han hrilh duh mah ila ni tlak ruala chhun ni a ral ang maiin ka pa duh tak chuan September 6, 2009 zing dar nga-ah he khawval buaina atang chung Pathian Lalpa hnenah min chawlh san ta. Sunday zinga inkhawm dar vuak ri, ri mawi tak hre chung zelin kan intawn leh hma zawng mangtha mai le ka pa duh tak. Khawvel mihringte an danglam thin a. Chatuan daih lo tur he khawvel thil zawng zawng hi rei lo te langa ral leh mai thin chum rang ang hi an ni si a. He khawvel inhmangaihna chuan rei a daih si lo. Inhmangaih em em thin mah ila inthen a tul leh si, he khawvel danah chuan. Nimahsela danglam ngai lo, chatuana awm reng tur chatuan Lalpa hmangaihna, khawngaihna leh ngilneihna chu mihringte tan belhchian dawl ber inhumhimna chu a lo ni e.SAM 19;18-20 : I dan thu atanga thilmak ka hmuh theih nan ka mitte hi mi tihvar sak ang che. Leiah hian mikhual ka ni a. I thupekte chu ka lakah zep suh ang che. Ka nunna hi keh sawmin a awm a, englai pawha i rorelnate a ngaih avangin.


Kum Hlui Mangtha

Kawlchuani (Haizawl)

“Tun hma thil tuman an hre reng lo va, nakinah pawh tunlai thil hi an hre reng lo vang.” Thuhriltu 1:11 Tlai khat chu ni tla tur hi ka thlir reng a. A liam takngial dawn tlang karah, ka va han ui tak em! Vawiina Ni ka hmuh hi engtikah mah ka hmu leh tawh dawn lo a ni, tih hre rengin ui em emin ka thlir reng a. Mahse chu ni eng mawi tak mai chuan kar lovahmi a liam san ta a. Hmanlai ni te, hun te ka ngaihtuah chho ta zel a. Hlim lai ni zawng te an ral zel a, hmanlai an chang mai tur leh kum hlui han liam vung vung tur chu a lunglen thlak ngei mai. Ei leh bar harsatna avangin mitin mai hian buai philia hna thawh a lo ngai a. Tuanna tlang a lo dangin tunah chuan kan nitin hma tawn thin te, kan lenrualte an dang zo ta vek a. Kan tawng hman te thlengin dar kar tam tak chu thlak a lo ngai ta hial a. Hei hi kan changkan vang chauh chu a ni lo tih a chiang mai. Kan lunglen dan inang hauh lo, hnam dangte nen thawh ho te a lo ngai ta reng mai. Chu’ng kan hun tawng danglam ta-ah te chuan kan hmailai nun te kha kan ngaihtuah hman tawh loh mai bakah tunah chuan kan hmangaih em em thin kan nupui fanau te, kan nu leh pa te, u leh nau te, thenrualte kan hmu phak ta lo hi kan tum reng a ni lo vang. Mahse kan hun tawn te hian a zir miau si a, a chang chuan lungleng lo awma awm te a lo tul ta hial a ni. Mi lungleng mi tan chuan kum hlui ral mai tur te hian dawn a titamin lunglen a kai tho nasa hle.Kawlthangpuia Varte poem ziah hian lunglen a phawk zo ngei mai. A thupuiah ‘Ka ngai mang e’ a han ti a. Lenrual lungduhte nen, Hlimlai vawrin kan nui hiau;Engdang tudang ngai lovin kan leng,Kan lungrual ngei kan za ten;Tunah erawh lengna tlangA dang ta si!Tuan tul lenrual hluite leh Fam tate kha,Ka ngai mang e!
Nun hlui mual liam hnu,Ngaih a sawt lovin;Hma tiang sawnna ni lo mah se;Sawt lo ngaia rum hi!Hringnun pianken, lunglen thiang,Kan nih ang ngeia kan la tih tur chu;Ka ngai mang e!A han ti dap dap mai chu nun hlui mual liam hnu te kha mitthlaah a rawn lang uar uar mai le! Kum 2009 a han her liam mai tur leh upa tawng taka ‘hmanlai’ a han chang mai tur chu a uiawm dawn vawng vawng hle mai. Kan hringnun par ang vul lai niten mual min liam san zel dawn zawng a nih hi. He hlathu hi bih chiang leh teh ang u. An lung a leng ve ngei angAwm khaw har changin,Ka dawn vel thin a:He hringnun par ang vul lai nite;Mual min liam san thin,Kan hlim nite;,Hmanlai an chang zo, Nghilh a har ngei.
Lenrual lungduhte nen hlim teinZai tin kan vawr lai kha;Ka ngai thin e thiante kha,Kan lenna a dang zo ta si;Min han hriat chhuah changin,Kan nun dan thin,An han dawn kir ve ang a,He hlathu hian lunglen a hril kim ngei mai. Kumin 2009 pawh kar lovah a liam mai dawn a. Enge 2009 chhung hian hriat chhuah fo tlak kan nunah kan neih le? Nge, hriatchhuah leh tlak loh khawpa kan hun hmante avangin kan buai zawk? Kum hlui ‘hmanlai’ chang mai turah hian kan tan hriat chhuaha chhui chhuah ngam zan nun kan neih a va tha dawn em! Hmanlai chang mai tur ni mah se, min tihlim ngei tur nun mawi tak chhui chhuah tum theuh ila. Chuti chuan kan ngai vawng vawng ang a, ui em em in, hun hlutzia te hria in, 2009 kum hlui tur hi “Kumhlui Mangtha” kan ti theuh thei dawn nia.
MANGTHA NUN HLUI.

Sunday, February 7, 2010

THINLUNG BAWNG IN

Hawilopar, Singapore

Baibula hming chuang miah si lo, mahse, Kristianten ka ngaihhluta ka ngaihpawimawh em em “KRISMAS” ni eng a lo zam thar leh hian a khawi ber nge tih sawi fiah theih si loh hian lairil a fan a, chhungril a tham vang vang mai thin. Thlasik daifimin thing hnah a bawh chiai a, siam hlim ang maia tharlam daifim a han bawl tiam tiam thin maite pawh hian thinlungah thu tam tak a sawi tawh thin. A boruak leh thilsiamte mawina mai avanga lairil fan erawh a ni vek lo va, he hun thlasik zan vawt veng veng hnuaia Bethlehem dai, bawng ina khawvel chhandam tura Isua Krista lo pian tak tlat vang a ni zawk. Chu hmun tlawm tak leh khawhar takah chuan Josepha leh Mari te inkarah Van Lal Fapa meuh chu kan lei hringnun tawmpuiin a lo piang ta a ni. Heti ema tlawma a lo piang hi Rokunga chuan;“Chumi zan reh takah chuan, thlasik vur daifim hnuaiah,Bethlehem bawng in tlawmah Lal Krista a lo piang ta…”tiin a lo chham chhuak thlawt mai a nih hi. Khawvelah Lal tam tak an lo piang tawh a, Isua Krista pianna ang ema tlawma piang hi an la awm lo va, lei lalte chu sawi loh, keini rethei berhchep berte , dai kil kara mi takngial pawh bawng in tlukatlawmah hian kan la piang ngai lo va, mahni in lumah tal kan la piang asin. Isua Krista erawh tlawm lehzual tur awm lo khawpa hniam, bawng inah a han piang hi zawng a va han riang lulai tak em! Rokunga bawkin’ “ A riang ngei e Van Lal Fa chu A pianna ranthlengah…” a lo ti hial reng a ni. Khawvela lalfa piang turah chuan damdawi in changkang takah daktawr leh nurse thiam thiamten chhar tumin pawimawh dang zawng zawng tlansanin an lo inralring a, chanchinbu mite lahin nau piang chanchin la turin an lo nghak thuap thin. Lawmpuina chi hrang hrang chhiar sen loh an pe chauh pawh ni lovin mipuiin an lo lawm thin a ni. Thinlunga lawmpui vang ni lovin tlawnna vangte pawh a ni fo. Isua Krista erawh chu lei leh van Lal ropui a nih vei nen, beram pute leh khawchhak mifingte chauh kha a lawmtu an intih kan hmu a, a va han tlawm bik tak em !!A pianna hmun kha a hnuaihnung mai a ni lo va, amah lawmtu an tlem em em kha tuna han ngaihtuah kir chuan lainatawm tak a ni. Mahse chuti khawpa riangvai chuan lo piang mahse, khawvel chhandamtu, lei leh van Lal ropui a ni si a. Hlain;“A tlawm lai kha a mawi lai ber, Lei leh van Lal a ni si; Chhandamtu a ni, i chawimawi ang, A hnenah thinlung hlanin…” a lo tih ang hian theihtawpa lawm a va phu tehlul em! Van ropuina zawngzawng tlansana lei hreawma lo piangin, khawvel sual tlan tur in, hmun tlawm berah a lo piang hi mihring ngaihtuahna hian hrethiam lo mah se, nang leh kei atan tlanna ropui ber a ni thung. Kamlala chuan; “Khawvelah hian lal tam tak an lo piang ta a, Mahse Lal Krista ang hi an la piang ngai lo; Van Lal Fa a lo piang Lal kraun min khumtir tur, Van mi zawng zawng pawhin min lawmpui ve rawh u...”tiin lei mihringte mai ni lo, van mite hial pawh lawmpui turin a sawm tawp mai a ni. Thinlung bawng inah ngei lo piang a, ama nun neitute fakna hian tawpintai a nei thei tawh ngai lo. Hmanah chuan Isua pianna Bethlehem khua chu pakhat chuah a ni a, tuah erawh chuan mi zawng zawng thinlung hi Isua Krista pianna Bethlehem a lo ni a. Kum tam tak leh hun rei tak chhung chu kan thinlungin a lam hawi lo va, khawvel thilahte lo tlan thin tawh mah ila, tun atang chuan kan THINLUNG BAWNG IN hawngin, “Kan lawm a che lei leh van Lal ropui, Theihtawpin i fak hla kan sa ang; Riangvaite lehretheite Lalpa, Hmanah Bethlehemah i tan Hmun a awm lo; Tunah erawh i tan hmun a awm kan ziangah…” tiin A fak hla i sa zel ang u.

JOSEFA LEHKHATHAWN

Dr. Ralph F.Wilson
tsl by Awmpuii

Ka nu,

Bethlehem atang Mari leh nau te Isua nen chibai kan buk ache.Ka nu, i awih ka rin loh avanga hrilh loh tam tak ka nei che a, tun tumah hrilh hriat che ka duh a. mi hriatthiam ka beisei.

Ka nu, Mari hi ka hmangaih a. Tleirawl te a nih atang ka pa nen min dem fiam ziah thin kha! A unaute nen tual kan chai thin a, kan chhungkaw hnihin zanriah kan ei khawm thin. Mahse chutia hlim taka nun kan hman lai, kei kum sawm hnih, Mari kum 15 a tlin kumah ka nuna hun khirh tak mai a lo thleng ta tlat mai. Chu ni chu nang pawn i la hrereng a ni lawm ni?

Mari nen inhualna lehkhaa remtihna kan nemngheh hnuah chu manganna chu a lo thleng a. Kha mi kum nipui khan Mari chu judai rama a laichin nu Elizabethi tlawh turin a kal chhuak ta thut a. Thla thum vel a va cham a, a lo haw hnuah Mari a rai tih thu a lo thang tan a.

Chu mi thu ka dawnsawn ni chu ka tan chuan ka hmaah chhum chhah pui hliahkhuh ang a ni. A tawp, a tawpah chuan Mari chu nau i pai em ni tiin ka zawt ve ta chawt a. Mi en ran chungin a bu nghauh mai chu sawi zawm tur ka vai ruai mai. A tawpah ‘tunge' tih ringawt ka tawng chhuak thei a ni. Ka nu, Mari anka ngei atang a rai thu han hriat chu ka tan beidawn thlak tak a ni.

Ka nu, kan inhual hnuah pawh mawi lo takin vawi khat mah kan awm ngai lo. Mari chuan, "Josef, hrilhfiah dan tur kawng ka va hre lo ve. I hrethiam thei dawn chuang lo. Mahse nang lo chu tumah ka ngaina ngai lo tih erawh i hriat ka duh," tiin ngui takin mi chhang a. A tho a, dim tein ka kut chu a la a, vawi khat mah fawp tawh lo tur ang hrimin a fawp a. Tichuan a tlan haw nal nal a.

Ka thu hriat ni atang ka rilru a mumal thei lo va, ka hnathawhnaah pawh ka tui thei lo. Ka hmangaih em avangin vantlang hriata tihmualpho ka duh si lo va. A tawpah chuan a ruka then zai ka rel ta a. Chu thu chu tumah ka hrilh ngam si lo va. Chu mi zanah chuan hma taka mut tumin khumah ka lawn chho a. Mahse a thusawi ‘nang lo chu tumah ka ngaina ngai lo’ tih ka bengah a cham reng a. Ka nu, Mary chu han rin mai ka va duh tak em!

Chutia khuma ka ngaihtuah lai chuan ka lo muhil a. Ka nu, zanah mumang hmangin Pathian a rawn inpuang a. Vantirhkoh pakhat hi ka hnenah a lo kal a, a thusawi te chuan ka thinlung a hneh em avangin nimin leka sawi ang maiin a sawi zawng zawng ka la hre reng asin. Ani chuan, “Joseph, Davida fapa, Mari chu i nupuia neih tim suh. A naupai saw Thlarau Thianghlim hnen atang a ni e”, tiin ring fiah takin a sawi a. Ka nu, a thusawi chu awih har ka ti. Vantirhkoh chuan, “Mari chuan fapa a hring ang a, mi te sualna laka a chhanchhuah dawn avangin a hmingah Isua in sa ang,” a sawi zawm leh a. A sawi zawh chuan ka dar nghet taka hmerin mi en reng a, ka thinlung mi khawih ngei mai. Tichuan hmel hlim takin mi kalsan ta a.

Ka tho thut a. Chu mi hnu chu Angel thusawi ngaihtuah let lehin ka mu thei reng reng lo mai. Chuan, ka tho va, tihharh palh che ka hlauh avangin dim takin ka insiam a. Tichuan zan thim hnuaiah thui fe ka kal hnuin Pathian fakna hla ka sa a nih chu! Han ngaihtuah chhin mai teh, ka nu. Fakna hla sa mah ila, ka chhungrilah ka hlim thei lo. Mahse, Pathian hnenah Mari chu miin engtin sawi mah se, a pawi lo ve. Mari chu ka nei ang a, a nau te pawh ka enkawl ang tih ka tiam ta a.

Vartianah ka lo haw a. Ka nu, kha mi tuk kha i la hria emaw? Thu hrilh tur ka neih che avangin i ban kaiin lung chunga ka thut tir che kha. “Mari chu ka nupui atan inah ka lo hruai haw dawn a, a thil vel dah nan hmun i siam sak thei ang em”, ka ti che a. Mahse rei fe i ngawi reng a, a tawpah, “Miin an sawi hi i hria a ni lawm ni?”, i rawn ti chhuak a. I awki san deuh hlekin, “I pa la dam se la chuan sawi tur a nei ngei ang. Ka hrilh ang che. Inneih hmaa hetianga thil awm hi kan chhungkaw tan a mualpho thlak lutuk. Nang leh Mari tan ngei pawh a zahthlak”, i ti a.

Mahse ka nu, hrilhfiah che tum mah ila, Angel nangmah hnenah a inlar zet loh chuan mi rin chuan dawn loh avangin engtin mah ka chhang ta lo che a. “Ka nu, ka tih tur dik tak a ni”, tih chauhvin ka chhang che a. I rilru hmin loh hlauvin ina hotu pa ber angin i hnenah thu ka sawi ta a. “Mari a lo lawi luh hunah a rai thu chungchang kam khat mah sawi lo ula. I mo a nih avangin i zah tur a ni. Tlang sawi chhiat a tawrh avangin i puihna a mamawh”, tiin ka duh thu ka hrilh che a. Ka nu, chutia i hnena thunei taka ka sawi i phu lo. Tichuan, “ka nu, ka mamawh che” ka tih hnu chuan ka kut vuanin i lamah mi pawt phei a. I mitmeng atang i lungngaihna a bo duak tih ka hmu asin. Mi pawm a, ‘Josef, mi rinchhan thei e’, i ti a.

Tichuan, Mari te in lam ka pan chho nghal a, an kawngka ka va kik a. A nuin kawngka mi lo hawn a, lungawi loh hmel deuhvin mi en a. Chuan, ‘Josefa a lo kal’ tiin vin deuh hlekin in chhung lam a va au a. Mari chuan ka phatsan dawn emaw ti ni awm takin kun deuh ngiaiin a lo chhuak a. A mit te lah a vungin a sen a. Ka va’n khawngaih tak em! A nu leh pate’n amah an hauh dan tur te ka ngaihruat thei a ni.

In atang hla vak lovah kan pen phei a. Mari chu naupang hlauh nei hi a ang a. A hnenah “I thawmhnaw siam la, ka inah ka nupui atan ka hruai haw dawn che” tiin zaidam takin ka hrilh a. Chu veleh Mari chuan a theih tawpa nghetin mi kuah a. Khati takin a chak ang tih ka lo hre ngai lo. Ka ruahman sa dan te ka hrilh a: “Tun karah Zirtirtu Ben Ezera inah kan kal ang a, inneih kan buatsaih tir dawn nia”. Thil a ni thut lutuk tih ka hria. Mahse, ka nu, kan inneih vat kha atan, keimah leh naute tan a tha-in ka hre tlat a ni. Mari hnenah chuan, “Kan inneihnaah kan thiante an rawn kal theih loh pawn Pathian hmaah kan inhmangaihna kan tiam theih a pawimawh ber. Ka nu chu a lo kal ngei ang a, chuan I thiannu Rebeki kha a pain a phal chuan a rawn tel thei ang a. I nu leh pate an lo kal thei ang emaw!” ka ti a.

Mari chu a khur der der a, a rukin a insit tih ka hriatin, “Mari, lungngai reng reng suh. Miin engti pawhin sawi chhia che mah se la, ka nupui i ni tur hi ka chhuang che asin. Pathian hnenah ka ngaihsak dawn che tih thu ka tiam tawh”, tiin intipachangin ka hnem ta a. Mari chuan mi rawn en chho va, zana mumanga angel ka hmuh thu pawh zaidawh takin ka hrilh ta a. Chutia ka sawi veleh Mari hmela hreawm tawrhna chu hlimna, lungawina chuan a khuh nghal a. Tichuan, hlim takin in lam pan kan tum mek lai chuan a nu chuan, “mi lo nghak ru”, tih rualin a lo tlan phei a. Kan thusawi kawngka phen atang a lo ngaithla a ni ngei ang. A biangah mittui a luang zawih zawih a, “In inneihnaah i pa nen kan lo kal ang,” a ti a. A pasal chu a zawng ta nghal a. A tawpah chuan kan inneihna chu lungawi takin kan buatsaih thei ta a. Ka nu, kha zawng kha ka hrilh hmaih che chu a ni. Khang hun laia kan pahnih tan min lo dinpui vangin ka lawm e.

Tun tum atan tawk rih mai se……


I fapa duh tak,
Joseph.

KAN IN PUI

Rengpuia
A Hmunhma
Kan in pui ka tih chu Tahana ka pi leh pu in ka sawina a ni a. Tuna a chanchin ka ziah hi tunhma kum 25 kal ta vela a chanchin a ni. Chung lai chuan Tahanah kan awm lo va, thal sikul chawlhah Shang Grila tlawhin kan va tlawh thin. A aia hmun nuam tih leh thlakhlelh dang ka nei lo. Kan in pui chu Tahan khaw hmawr lama awm a ni a. A chung di, a bang dap, a chhuat thing phel a ni a. Kawmcharah bawng in a awm a. Kan kawt sir lam, kawmthlangte nen kan inri-naah tuichhunchhuah a awm a. Tuichhun leh kan in inkarah ser kung lian zet a awm a. Tuichhun bul, tui chim ngunna lai velah jasmine kung an bawr taih hlawm a. Zingah an par thin a. Kan lo va, kan thil khawm a. Bang vela kan tar loh leh lukham hnuaiah te kan dah thin. A par chu a var, sin te ni mahse a hmui tui em em a ni. Kan kawt zawn, kawng nena kan inrinaah chuan pal phun awm lovin sekawtrawlh a awm a. Duh hunah kawt zawn kha kawng nena inpawhzawm theih turin a hawn theih a. Kan kawm charah lui te a awm a, lui chin chu kan huan a ni. Lui kamah chuan mau an ding tlar a, chu chu kan kawmchar lam huan pal a ni nghal.

Chu Shang Grila-ah chuan
Kan huanah chuan thingkung chi tam tak a awm. Theihai kung kha a hlu a ni. Amaherawh chu haihrik kha thalah an ninawm bawk. Hrik tih lemah thla an nei a, an mi seh chu a thip ve zek zek thin. Zanah khawnvar eng ring kan ni a. Kan khawnvar chhit chu an rawn bawm luih luih thin a. Chu tak chu an ninawmna lai a ni. An mi seh chu chuti tehchiam a ni lo. Tengtere kung lian pui pui pahnih hi bawng in bulah an ding thiang bawk a. A rah a la thur lai atang kan ei tan tawh a, a zik hnah no nalamin chawhmehah leh antuiah a rin theih. A rah hmin hma deuh, a vurum lai hi tengtere tui lai ber a ni a, a chuhin kan inchuh thin. A hmin tawh chuan a kungah kan lawn a. Tengtere hi thing nel tak, tliak har deuh mai a nih avangin a tang ler tak tak thlengin kan zawh kur duai duai thin. Tlak lam kha kan hisap tel lo hrim hrim. Tengtere hnah hi a thur avangin a tlakna lei lung a tha thei lo va, thlai an dawng thei lo. Mahse chu vang maia kih thluk rawt erawh kan awm lo.Kan kawmthlang huan pal hrulah zawngtah kung lian zet a awm a. Kawlthei kung, kawl sunhlu (plum) kung, theiherawt kung tih vel chu sawi tam tawh lo mai ang. Kan huana ankasa tam zia kha aw! Chawhmehah an siam tel ziah lehnghal a, ka nin zia!

Kawmchar Lui
Kawmchar lui lamah pensan daih ang. Kan naupan lai kha chuan sangha kha a la tam khawp a; nghavawk, nghakhing, nghaler,ngharul, nghachik, nghakhuai, nghadawntial, chhingbenginu tih vel kha keia hriat chu a ni mai. A hming kan hriat loh, a phek chi kha chu nghaphek an ni vek mai. Mau phel sin, suih mamin nghakuai kan siam a. Ka ni fate ho nen, pali ngain kawmchar luia nghakuai kan han chiah khan naupang paw’n chhungtlai kan awk ve mai thin. A changa kan man tlem deuh leh kan rep khawl leh mai a. Kha’ng lai kha chuan Tahan chheh velah khan mi kan la tam lutuk loh vang nge, sangha man tur kha a la tam a. Lo tui pekna kawng vel mai maiah pawh khan rei lovah chhungtlai hi kan man zung zung mai. Chakai leh kaikuang pawh a tam. Kan nghakuai kha tap bul, dap bangah kan thiat far hlawm a. Ka pi khan kan nghakuai theuh kha mi a lo hriat pui emaw ni. Thal sikul chawlh a zo va, kan haw hnuah ka u nghakuai dah that, ka ni faten hman an tumin, “kha chu Mapuia ta,” a ti a, a hman tir phal tlat lo ni awm a nia. Mahse chu mi hnu chuan ka pi kan hmu leh ngai ta lo. Kawmchar lui chu tlang lam atanga hawk rawn luanna mai a nih avangin thalah a kang thin. Tui a kang ro vek hmain sangha kan thliar a, kan man thin. Tihian kawmchar lui chu i duh tawk mai teh ang u.

A Tham Ral
Kan in puia ka pi leh ka puan la awm lai chuan in pui tak tak a la ni a. In hrang chang hlawm tawh mah se, ka pate unau za tan an in a ni chiang a. Naupang inkhawmpui thlen in emaw tih mai turin kan chim reng a. Ka pi leh pu te an awm tak loh hnu chuan zawi zawiin in pui a nihna a hloh ta a. Ka pa tea’n a luah a. Ka pa tea a boral hnuin mi dangin an luah hawh a. Chu kan in puiah ngei chuan ka tlangval hun hnuhnung lamah ar vulhin ka parawl ta a. Miin ar-vulhtu-pa min tih phah a. Ka vulh tawh loh hnu paw’n ar-vulh-tawh-lo-tupa min tizui ta zel a. Nupui ka neihin chu inah ngei chuan chhungkua ka din pui a. In bang vel kha a chhe tawh si a, nu ber chu hmaizah awm duh angreng khawp mai. Mahse, hmeichhia chu lainat anga lan chuan an pawngpawrh duh tih ka hriat chian em avangin khawngaih angin ka lang duh miah lo. (Tlangvalte hriat reng tur.) Ar kan vulh tak loh hnuah chu in chu kan chhuah san a.

In Pui Thar vs In Pui Hlui
Ka pa’n, a pension hnuin chu in chu thiatin a sa tha a, a luah ta a. Kan chhungkaw tan in pui a lo ni leh ta. Mahse, engemaw chang chuan chu hmun ngeia kan in pui hmasa zawk kha ka ngai thin.

Ka Thlang Ber Che

Teziri Fanai
Darthlalangah ka inen,
Ka innuih sak,
Ka mawi ber e.
Ka zawng hmasa ber keima hmel,
Group thlalakah.
‘Ka leh kei’ intihnain ka inthuam,
Harsat mangan tawn hma chuan.
Hriat ngai loh lungngaihnain mi hual,
A pawi ka ti, ka lo hre lo;
‘Ka leh Kei’in mi tihbuai tur zia.
Ka lenrualten min biruk san,
Khaw nge in awm?
Ka nei tih pawh ka hriat loh,
Ka mit atang dan zawh rual loh;
Chhing mittui a luang chhuak.
Ka hnung atang hmuh ngai loh,
Mi pakhatin mi rawn kuangkuah;
Ka tih ngai loh ti turin mi zirtir,
Ka hriat ngai loh thu tam mi hrilh.
“Heng hi hrereng in, nun pui rawh,
‘Hmangaihna, inngaihtlawmna,
Dawhtheihna, thuhnuairawlhna,
Ngilneihna, rinawmna,…..”
A va’n har dawn em, kei ka tan!
‘Lungngai suh, ka pui ang che;
Mi ring mai rawh’, a ti.
Ka tan a thlum, a tawngka chhuak,
Ka kham thei lo, a thu min fah.
Hlimna nui ri an chang ta,
Ka tunhma mittui zawng te kha.
Ka lawm e, mi kalsan suh,
Nang nen len dun ka thlang ber e.
Ka thlang ber che, ka LAL ISU.

Saturday, February 6, 2010

Kum Thar Chibai

Kawlchuani Haizawl
“Chumi avang chuan tupawh Kristaa a awm chuan thil siam thar a lo ni a; thil hluite chu a ral ta a, ngai teh u, a lo thar ta”. II Korinth 5:17“Kum kal ta hun chhung zawnga ka tlin lohna sual zawng zawngte i hmaah bawkkhup chungin ngaihdam ka rawn dil a che. Kan tan ni ropui a eng, malsawmin vur la aw Lalpa; I duh angin min hmang la, ka inpe e aw Lalpa”.He hla hi Rev Gospel Hrilvelthanga phuah a ni a, MCFS member zawng zawng tan kum kal ta tana kan ngaihdam dilna leh kumthar lawmawm taka kan inhlanna ni thei se la, a lawmawm ngawt ang.Hun a lo thar angin ngaihtuahnate pawh a thar zel a, kum kal taa pachhe kumtiam chu a lo inher chhuak reng ta mai. Kan beiseinate a taka tihlawhtling turin mitinten kumthar tana ka ruahman lawknate chu thahnemngai leh rinawm takin a tan I han la theuh ang u. Singapore hi kan hmun leh ram a ni lova, khawvelah hian mikhual cham mai kan nih abakah Singapore-ah hian kan la cham leh chhawng a. Kan Bible-in, “Hetah hian khawhmun nghet kan nei si lova, khaw lo la awm tur chu kan zawng zawk a ni”. Heb 13:14 ah a ti a. He khawvel-ah mikhual kan nih zia a chiang em em a ni. Chu mi a nih achhapah kan nupui fanaute, nu leh pate leh u leh nau thenrualte nen kan la inthen fo hi han chhut hian a retheih thlak em em a ni. Kan chhungte theuh nen intawh khawm a nghahhleh awm tawh hle mai. Mahse chu hun a la rawn thlen theih hma hi chuan mitinin thahnemngai takin beiseina nung nen tan i han la theuh ang u. Hnam dang karah kan hnam nun mawi tak leh tlawmngaihna kha chhawm nung zelin rinawm taka hna kan thawhin kan mitthlaa’n kan hmangaih, kan chhungte kha cham reng se la. Chu chuan kan nun a vawng felin hmasawnna leh hlawhtlinna ropui tak min neih tir ngei ang. Kumthar lawmawm tak hi mitinte tana hlawhtlinna lo ni theuh turin ka duhsakna ka hlan a che u. “Kumthar chibai ule”.