World News

Thenfai nan leh tundin nan BP-in billion 20 dah that a rem ti

British Petroleum (BP) chuan a khawnvartui khur chhia atanga irh chhuakin a tih bawlhhlawhte thenfai nan leh a chhehvela chengte ei-bar zawnna a tih chingpente tundin leh nan US$ 20 billion dah that a rem tih tawh thu President Obama’n June ni 16 khan a puang a ni.

US dollar maktaduai 100 dang pawh khawnvartui khura thawk tawh thin, tuna hna nei lo te chhawm dawl nan BP chuan pek a intiam bawk a ni.

He Gulf of Mexico, America chhim-chhak lam khawmual hrual tuifinriat-a khawvartui irh chhuak, vawin thlenga an la thawlphui hleihtheih loh hian a chhehvel mel 25,00 bial zet a fan chhuak a, tuifinriat rinchhan eizawnna chi hrang hranga thawktute chawbel a tihchhiat bakah, tui chhunga nungcha chhiarsen loh an thih phah avangin hun kaltawh zawng zawng chhuiletin America-in hetiang lam chhiatna a tawh rapthlap ber an ti hial a ni.

April ni 20 khan he Deep Water Horizon khawvartui lakchhuahna hmun hi a kang a, khawl hmunpui leh tuifinriat mawng leilung inzawmna, khawvartui pump chhohna, dawt metre 1500 zeta sei chu tliakin dan rual lohvin khawvartui a irh chhuah ta buan buan mai a ni.

A sarhu lai chuan nikhatah barrel 35,00 atanga 60,00 inkar hisapin tuifinriatah khawnvartui a phuhchhuah an ring a, vawiin thlenga a phuhchhuah zawng zawng total 6,900,000 barrel aia tam a nih tawh an ring bawk a ni.

He khawllian kang chhia hian a hmuna thawk mi 11te nunna a la bawk a, mi 17 ten hliampui an tuar bawk a ni.

Tuna BP pek tur billion 20 hi kum 4 chhung tanpuina tur a ni a, hei hi he khawvartui company kum khat hlep zat vel niin sumdawnna lam mithiam te chuan an chhut a ni.

Ref: Reuters/Wikipedia/; all photo:google.com