Editorial
Hun leh nite an her liam zel a, 2010 kum chanve kan thleng leh ta der mai. Kan ti nek nek a, kan chanchinbu paw’n kum hnih hmel a lo hmu ta reng mai nia! Chhiartute hlut pawh a hlawh ve zel a, a tel lo chuan kan kim thei ta lo.
Article inziaksiak te kan han puitlin ve thei ta. Thla hmasa lama kan rawn puan tawh ang khan, “I vengte hmangaih rawh”, tih thupui hmangin article inziaksiakna kan nei a. Lalhunsangi ziak hi tha berah kan han puang e. A dangte pawh tha tak an ni. Tih lan vek a chakawm tehlul nen, kan chanchinbu phek zatin a zir hlawl lo a ni e.
Khawvel mipui tam takin-a kan thlir reng thin, World Cup pawh a hun takah a lo her chhuak leh ta. Tu ramin tak lawmman la ang maw! Ka u Biaka’n a rawn ziak khu luam a, lo chhiar sak ve ta che u.
Thuziak han thawh uar zel teh u. Fiamthu te pawh. Lehlin lam te pawh a theih tho a nia. Kan lehlinna tihlan erawh theihnghilh lo ila. Le! Chhiar nuam le.
++++++++++
Inkhawm Report
2 May
Inkhawm Hruaitu - Lalchhandami
Inkhawm zat - 50
Thawhlawm - S$ 134.50/-
Kal Thar - 1
Hun Neitu - Vanlalrengpuia
Refreshment tumtu - Lalhruaitluangi
9 May
Inkhawm Hruaitu - Biakhmingthanga
Inkhawm zat - 41
Thawhlawm - S$ 116.40/-
Kal Thar - 1
Hun Neitu - Pi Lalawmpuii
Refreshment tumtu - Pi Lalawmpuii
16 May
CCFS combined inkhawmah kan kal a, MCFS inkhawm kan nei lo.
23 May
Inkhawm Hruaitu - Thangpia
Inkhawm zat - 27
Thawhlawm - S$ 71.00/-
Kal Thar - 3
Hun Neitu - Zoramchhana
Refreshment tumtu – VL Hruaia
30 May
Inkhawm Hruaitu - VL Hruaia
Inkhawm zat - 23
Thawhlawm - S$ 61.00/-
Kal Thar - 3
Hun Neitu - Rev. Chhuanga
Refreshment tumtu – MCFS
----------
June Thla Chanvo Neitu Turte
6 June : Outing Program ( Pasi Ris Park )
13 June
Hruaitu : Lalramdinpuii
Hun neitu : Lalchhandami Colney
20 June
Hruaitu : Joshua
Hun neitu : Joseph Lalhmachhuana
27 June
Hruaitu Rosangzuali
Hun neitu : Hriattira
++++++++++
Chanchin Lawrkhawm
Burqa khapna Dan pass : Belgium parliament Lower House chuan Burqa (Muslim hmeichhiate mit chauh tilanga inthuamna) hak khapna Dan an pass tawh a, Senate-a an pass hnuah chuan Europe khawmuala he dan hmang hmasa ber ram an ni ang. Ref: BBC
Afghanistan: No 4 ruihhlo tichhuak tlem dawn : Pa hrik chi khat hri leng avangin kumin Afghanistan ram No.4 ruihhlo thar chhuah 25% a tlak hniam a rin thu Ms Antonio Maria Costa, UN Office on Drugs and Crime (UNODC) chuan BBC a hrilh a. Afghan poppy (No 4 kung) chingtute chuan he hrik hi US, UK leh Nato sipaite theh darhah an puh a. Afghanistan hi khawvela he ruihhlo tichhuak tam ber nih a la hauh ngar ngar a, 2009 khan 6,900,000 kilogram an siam chhuk nia report a ni. Ref: BBC
Pope-in Ngaihdam Dil : Roman Catholic Pope Benedict XVI chuan Ireland rama Catholic puithiam thenkhat nun bawraw lutuk chungchangah; Puithiam thenkhat chuan mipa naupang sex an hman luihpui thin a, a tuartute leh an chhungte hnenah March thla khan ngaihdam dilna lehkha a thawn a, ‘Puithiamte thil sual rapthlak tak an tih avang leh dan an bawhchhiat vangin zahthlak a tiin pawi a tihzia a tarlang a ni.
Ireland Catholic Kohhran chuan Puithiamte hetiang thiltihsual (sexsual abuse) vang hian a tuartute tanpuinan US$ maktaduai 1400 sen an tum thu a puang bawk a ni.
Tunlai hian khawvel hmun hrang hrangah Puithiamten mipa naupang chunga hetiang thil tha lo an tih thuah Catholic kohhran chu ‘chingfel tha tawk lo’ tia demna a nasa hle a, Pope hi German rama kohhran lu ber a nih laiin a kut hnuaia thawk Puithiam, hetinga thil tisual a ban loh chungchangah ‘Puithiamte sualna a haider lui tlat tawh thin’, tiin chanchinbuten an puh mek bawk a ni. Ref: The New York Times
Mingalar Zay tikangtu mi 3 man
Mingalar Zay bazaar kang chung-changah, ‘fimkhur loh vanga kang mei tichhuak’-ah Kang Thelh Pawl chuan mi 3 puhin court-ah thubuai an siam sak.
Bazaar hi thingpui lumna bel atanga kang tan a ni a, a chhunga tui a kan vek hnuah rei tak a inchhuan reng avangin a sa lutuk chuan a sira (dawr neitute thil zawrh) incheina bungrua a kang kai ta a ni. Bazaar chawng 4na leh chawng 5na (a chung ber) a tichhe vek a, May 24 zinglam dar 8 vela kang tan kha a tuk zing lamah chauh an thelh mit thei.
Mingalar Zay hi Ran-goon-a nepnawi zawrhna bazaar lian ber a ni. Thawmhnaw hloh zat chu nuai 209,263 Kyat (S$ mtd 30) chuang niin an chhut a, civil mi pakhat leh mei sipai pa 3 an hliam bawk . Ref: Irrawaddy
News Artical
London atanga Beijing ni 2 kalin
China mithiam rualten London atanga thlawhtheihna ang tluka chak relin ni 2 kala China khawpui Beijing thleng thei turin ruahmana an siam. China hian darkar khat mile 200 (200mph or 321kph) aia chak rel kal theihna tur high-speed rail network chu kum 10 chhunga siam zo turin India leh Europe te a dawr mek a ni.
Rail network zam dan tur chu 1. London atanga Beijing, Beijing atangin Singapore leh India, Pakistana duan phei a nih tur thu Mr Mengshu (a member of the Chinese Academy of Engineering and a senior consultant on China’s domestic high-speed rail project) chuan a sawi a. Rail network ruahmanna 2. na chuan hmar lam atanga Russia paltlangin Germany ah, European railway system a zawm phei ang a. Ruahmanna 3. na chu (South-East Asia) Chhim lam atanga Vietnam, Thailand, Myanmar leh Malaysia te an ni ang. “ High-speed network sys-tem siam tura idea hi China hriat chhuah a ni lo va, ram hrang hrang leh a bik takin India te hian he ruahmanna hi a bul tan turin min ti a ni zawk e”, tiin Mr Mengshu chuan a sawi a. “ A chhan chu heng ram te hian high-speed rail network siam turin an tlin lawk mai lo bakah kan experience leh technology te hi zir leh lak an beisei a ni”.
Tunah China hian ram chhunga rail kawng thar miles 19,000 bial, major khawpui zawng zawng high-speed railways (₤480 billion man)a tun hnu kum 5 chhunga zam fel tumin a bei mek a ni. Tin khawvel rel chak ber the Harmony Express , China siam ni mahse technology erawh chu Siemens leh Kawasaki technology ( darkar khat miles 250) chak Wuhan leh Guangzhou khawpui inkara service pawh kha, 2009 kum tawp khan zo fela hawn a ni tawh a. He the Harmony Express hian miles 660 hla hi darkar thum chhungin a thleng thei a ni. Entirnan, London leh Edinburgh hi darkar thum chhungin kal leh hawngin a thleng thei tihna a ni.
High-speed rail network project hi tluang taka an zawhfel theih hunah chuan London atanga chuang passengers ten miles 5,070 (8,159km) hla chu, ni 2 kalin China khawpui Beijing an rawn thleng dawn tihna a ni. (Mi thiam chhut mite sawi leh dan zelah chuan Choak pawh hian heng ang tluka hla hi ni 2 chhung thlawkin a thleng thin an ti) Miles 6,750 a hla Singapore chu a ni thumnaah a thleng thei dawn a ni.
Mr Wang an, “ Kan tum ber chu thlawhtheihna ang tluka chaka tlan thei rail a ni a, pawimawh hmasa ber chu he network pathum te kum 10 chhunga zawh fel”, tiin a sawi a. Tunah China hian, ram 17 a dawr tawh a. Tin South-East Asia line tur phei chu Yunan chhim lamah hmalain an siam tan tawh a ni. Hun rei lo te-ah Myanmar lam network line tur pawh an siam tan mai dawn a ni. Chinain Myanmar hi he rail kawng siam man zawng zawng a tum sak ang a, chu mi an tum sak man aiah Kawlram leilung chhuak Lithium (thir chi zinga zang ber) chu a la ve thung dawn a ni.
Cambodia to Singapore leh Vietnam to China, heng ram thum pal tlanga rail kawng siam nan a tlangpuia senso dan tur an chawh chhuah ringawt pawh hi pound maktaduai 400 a ni. Tun tuma Volcanic Eruption-in a phuh chhuah mei vap leh khuin thlawhtheihna engine a tihchhiat hlauh vanga van boruak kawng khar or flight cancel ang chiah te phei chuan tui lam kawng chauh pawh ni tawh lovin lei lam kawng atang pawhin awlsam takin a intlawh pawh zung zung theih dawn tihna a nih chu.
++++++++++
Thukhawchang
I vengte hmangaih rawh
- Lalhunsangi
“ Isuan “A ropui ber chu hei hi a ni : ‘Isarelte u ngai teh u, Lalpa kan Pathian chu Lalpa pakhat chauh a ni a, Lalpa i pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hma-ngaih tur a ni’ tih hi. A dawt lehtu chu hei hi a ni ‘Nangmah i inhmangaih angin i vengte i hmangaih tur a ni’ tih hi.” Marka 12:29-30
Awle, kan vengte chu kan bul hnaia kan then leh rual, thenawm khawveng, u leh nau, laichinte bakah hnam hrang, awze mi, hmelhriat lohte lamin a huam tel vek awm e! Luka 10:25-36 ah danhretu hnenah Isuan samari mitha tehkhinthu a sawi a.
Tu emaw Jeriko khuaah a kal dawn a. Suamhmangte a tawk a, a silhfen an hlih sak a, an vaw nek a, thi lek lekin an kal san a. Puithiam tu emaw chu mi kawngah chuan a zuk kal a. Kawng sir lehlamah a hel a. Tin, Levia chi tu emaw pawhin kawng sirah a hel leh a. Tin, Samari mi a lo kal a, a hmuh veleh a khawngaih em em a, a enkawl a, a sa chungah a chuan tir a, khualbukah a kal pui a, a enkawl a, khualbuk vengtu hnenah chuan duli a pe a, lo enkawl la, hemi bakah i senso zawng zawng chu ka lo kir leh hnuah ka rawn rul leh ang che a ti a. Chu mi pathum zingah suam-hmangte tawka vengte chu tu ber nge nia i rin a ti a. Tin, ani chuan a khawngaihtu chu a ti a. Tin, Isuan, nang pawh chu ang bawk chuan va ti ve rawh a ti a.
Isua tehkhinthu atang hian hnam hrang hrang an nih leh hmel hriat loh an nih min kawhhmuh a. Mi tu pawh an harsat mangan hre-awm laia tanpui a, chhawmdawl ngaite chhawmdawl turin leh an tlakchham laia ei leh in, silh leh fen te pe a, khawngaiha hmangaihna angkhata hmangaih turin Isua chuan min duh a ni. Kan Bible-ah rinna thuk tak tlang sawn theihna khawp hial rinna famkim nei mah ila, hmangaihna kan neih si loh chuan engmah a sawt loh thu kan hmu a. Pathian kan rinnain mi tana thiltih sak a neih si loh chuan kan rinna chu a thlawn mai a lo ni ang.
“ Unau pa emaw, unau nu emaw saruakin awmin an nitin chaw tlachham se la, tin, in zinga tuin emaw an hnenah thlamuang takin kal ula, lum tak leh puar takin awm rawh u ti ula, taksa tan thil chakkhai chu in pek si loh chuan enge sawt ang? Chu tiang bawkin rinna chu thiltih nei lovin amah chuahva a awm chuan thi a ni.” Jakoba 2:15-17
Tirhkoh paula chuan a rawngbawlna khua zawng zawnga mite hnenah chuan hmangaihna a sawi uar hle a. Rom khuaa mite chu rinnaah an chak avangin lawmthu a sawi a ni. Hmangaihna nei turin rinnaa a unaute hnenah lehkha-thawnin a fuih a ni. He hmangaihna a sawi hi tawp chin nei lo Chatuan hmangaihna famkim, Pathian hma-ngaihna (Agape) a sawina a ni. Thuthlung hlui hunah kha chuan pawn lam atangin Pathianin a mite a bia a, danin a kaihruai a, dan an zawm theih thin loh avangin nun a awm lo; ‘rawh’, ‘suh’ danin a kaihruai a. Serhtan hi Pathian chhinchhiahna a ni. Thuthlung tharah chuan dan petu Pathian kha kan chhungah a nung a, kan nunah thu a sawi tawh zawk a, kan chhunga Krista thatna chu pawn lam nunah a rawn lang chhuak mai thin a ni.
Genesis 3:6,13 kan en chuan Evi buma a awm thu leh Adama chu buma a awm loh thu kan hmu a. A nupui thu a zawm avangin a nupui chu a hmangaih a, a thihchilh ta a ni. Pathianin ei loh tur a tih an ei tak avangin an rilru, an taksa, an thlarau chu Pathian ngaihah an thi a. Pathian duh loh zawng an tih tak avangin an inchhir ta a. In chhirte chungah chuan khawngaihna a lan tir a, a hmangaihnain a um zui ta a ni.
Kan naupan laiin thlan-mualah inhmangaih em em, inngai-zawng tuak khat hi an lo thu dun a. An nu leh pate ve ve khan inneih tir an phal tak loh avangin ‘Tur’ an in a, an inthihchilh ta a ni. Mihring lama inhmangaihna thuk ber chuan mi pakhat tan thih a huam mahna! Pathian hmangaihna erawh chuan mi zawng zawng chhandam an nih theih nan a thi a. Evi leh Adama atanga kan neih, kan mihring hlui mizia kha a kheng bet a, a thih-chilh ta a. A thihna leh thawhlehna chuan Pa hmaah min din sak a, thiam chang kan lo ni ta a. A thihna leh thawhlehna chu kan thihna leh thawhlehna atan min puan sak a, a nun lamin min pe ta a ni. A va ropui em! Chu nun chu tunah kan chhungah kan kawl a, thlarauva kan fiah ni apiangah Pathian hmangaihna keimahniah hriatin a lo awm thin a ni.
“Kan inhmangaih tawn chuan Pathian keimahniah a awm reng ang a, a hmangaihna pawh keimahniah a famkim bawk ang.” I Johana 4:12
Kristaah chuan a tha lam leh chhe lam a awm lo. Kan thinlung miziaah chuan a tha lam leh a chhe lam a awm a, kan thatna zat chiah hian kan sual leh thin a ni. Kan mizia a inthlak thleng thin a. Kan hmangaihna awm sa hi than tir lam ni lovin kros-ah tihhlum a lo ngai zawk a. Mihring mizia inthlakthleng velna hian kristian emaw kan lo ti thin. Kristianna chu Krista nun nen inpumkhatna a ni. Kan mihring mizia hian dawh-theihna a nei lo. Hmangaihna, dawhtheihna te nei ve thin mah se, a thatna chuan rei a daih lo va, ‘vang’ awm chauhva hmangaih theihna a ni. A ziktluak lo a ni. Tin, mi chunga a beisei anga a chunga a lo nih loh hian a vui leh thin a. Mi tih that a hriat veleh a rilru tak takin a lawmpui thin lo a ni. He mizia hi tihhluma a lo awm chiah hian Pathian thu thar keimahniah a lo thleng a, rinnaa ke a penna zawn zelah thlarau rah amahah tihfamkimin a lo awm a, a duh zawnga ke pen tawh lovin Pathian duh zawngin ke a pen tawh zawk thin. Chumi nun duhawm tak atang chuan vengte hmangaih theihna nun amahah kawlin a lo awm a, Lalpa nen a nitin nunah ke an pen dun tawh thin a lo ni.
“ Thlarau rah erawh chu hmangaihna te, dawhtheihna te, hlimna te, remna te, ngilneihna te, thatna te, rinawmna te, thu-hnuairawlhna te, insumtheihna te a ni zawk e, chu tiang kalh zawngin Dan thupek reng a awm lo ve. Galatia 5:22-23
Chhiartu zawng zawng Lalpa malsawmna leh hma-ngaihna in lo chan theuh theih nan Pathianin a tharin malsawm che u rawh se!
Amen.
++++++++++
INTHUAMNA CHHE THEI LO
- Lalawmpuii
Tunlai khawvel hmasawnna vuakvet hian kohhran leh khawtlangah kan inchei dan te, kan rilru sukthlek dan te leh kan nun dan chenin a tidanglam a. Chung zinga kan ngaihtuah zui atan ka vei ve chu pawn lam mawina kan dah pawimawh zawkna hi a ni. Chu chuan kan nun hona leh mimal nun hi a ni telin min ei chhe mek a. Chuvangin he article-ah hian kohhran leh khawtlanga kan inthuam dan dik tawk lohnate hai lan a, inthuamna chhe thei lova inbel a tul zia tih lan kan tum dawn a ni.
Tunlai Inchei Uar Dan: Tunlai kan chenna khawvel kan enin thawmhnaw chhuak thar leh chin thar apiang neih ve zel kan tum a. 'Thil thar neih' leh 'mi neih ang neih ve' chu kan intlansiakna a ni ta em aw tih theih a ni. Chu achhapah man tlawm deuh, tha tho si ai chuan a dangdai (fancy) leh a man to apiang neih hi kan intihhmuh a. Nu leh pa thenkhat phei chuan an fate tan an thil lei sak leh an neih ve chu a tangkai tur zawng leh hlawkpui tur zawng ngaihtuah ahnekin rual-pawlna leh changkannaah an ngai a. Thenkhat phei chu an thawh chhuahin a tlin tawh loh avanga puk chawpa thil thar neih hreh miah lo te, a baa lei inthlahrun nachang hre lote kan kat ta nuk mai. In leh lo din ngheh nan inchhek khawm ai chuan mite huikhawm leh intihvei nan mahni phak baka inbel mawi duh lah kan bo lo. Chutiang thli chhe leng vel karah inngaih-tlawmna hi mite thinlung hnehna tura hmanraw tha ber a ni tih hi kan hriat thar a va tul tak em! Chuvangin mit la thei leh lang mawi apiang um zui mai lo va, mamawh tawk chauh neih a, thui tak dawna fimkhur taka mahni inthunun leh insum thei mi nih a pawimawh tak zet a ni.
Kohhran Inthuam Dan Tur: Kan chhehvel hmuh theih kohhran kan en chuan Esaua silhfen inbel a, Jakoba aw ni si rawngbawltu kan va tam ta em! Nihna duh vang te, lansarh duh vang tein chhungril nun takna nei si lovin mi hmuha mawi chauhva tawngkam thlum tak nena mi hip tum hrim hrim te, chetziaah pawh chawimawi phu nih chak khawpa lemchang thiamten kohhranah bu an khuar nghet vaih chuan kan hmakhua a va thim dawn em. Pulpit ko tlanga thlarau chang sang em em, mahse beram no zinga chinghne awm anga thawhpuite tan hlauhawm leh rawng-bawlpui hahthlak leh lawi si, Zawngin a mawng khak a hmuh loh anga thawhpuite relchhiat ching, Pathian thuah intihmu fuh em em, nuna hmuh tur awm lo ringtu suak laka fimkhur a tul ta hle. Mi thenkhat phei chu mite vawrh san nghak zo lo va, mahni inbarh lut a, inthuam mawi duh kohhran member kan nei thar ta zel mai pawh hi lungngaih thlak tak a ni.
Jakoba anga a fa u zawkte thuam mawi ai chuan Josefa chauh thawmhnaw mawi leh tha bel duh mite chuan kohhran hi an hruai. Chutiang kohhran hotute chuan an mit meng zau lovin mahni mi leh sate thawmhnaw mawi chauh tarlan an thiam a. Mi dang (langsar vak lo) silhfen hlutna leh thatna an hmuh hmaih thin avangin thlarau leh taksa lamah kan hmasawn tur angin kan hmasawn chak thei lo va. Chuvangin huapzo kohhran kan nih ang ngeia Pathian min pek kan thlarau thilpek chi hrang hrang chul lo tura intihsawt tlan a hun ta hle. Chu bakah kan unau rinna chak lote hmusit lo leh sawisel lova infuih tawn leh intawngtai sak zawkin mimal thlarau leh taksa thanlenna tithuanawp thei silhfen chu hlipa kan zavaia thattlanna tur thawmhnaw thar inbel theuh ang u.
Pathian hrerenga inchei: Kan Pathian pawhin Ama hmaa kun tur chuan thianghlim leh mawi taka inthuam a duh a (Ps 96:9). Kan Kohhran Thunun Dan Buin mahni invawn fel dan turah pawh mitin mahni phu tawka fai tak leh fel takin inthuam tur a ti a. Amaherawh chu mahni rilrem zawng, tha leh mawi nia kan hriat dana kan inchei hian chapona, tlakranna leh sual lam min hruai thei inchei dan pangngai aia uchuaka inthuam loh hi keini ringtute tan a mawi a. Chu mai a la tawk lo. Thawhnaw thar leh thil thar ka duh kohhran member kan nei thar ta zel mai pawh hi lungngaih thlak tak a ni. Jakoba anga a fa u zawkte thuam mawi ai chuan Josefa chauh thawmhnaw mawi leh tha bel duh mite chuan kohhran hi an hruai. Chutiang kohhran hotute chuan an mit meng zau lovin mahni mi leh sate thawmhnaw mawi chauh tarlan an thiam a. Mi dang (langsar vak lo) silhfen hlutna leh thatna an hmuh hmaih thin avangin thlarau leh taksa lamah kan hmasawn tur angin kan hmasawn chak thei lo va. Chuvangin huapzo kohhran kan nih ang ngeia Pathian min pek kan thlarau thilpek chi hrang hrang chul lo tura intihsawt tlan a hun ta hle. Chu bakah kan unau rinna chak lote hmusit lo leh sawisel lova infuih tawn leh intawngtai sak zawkin mimal thlarau leh taksa thanlenna tithuanawp thei silhfen chu hlipa kan zavaia thattlanna tur thawmhnaw thar inbel theuh ang u.
Pathian hrerenga inchei: Kan Pathian pawhin Ama hmaa kun tur chuan thianghlim leh mawi taka inthuam a duh a (Ps 96:9). Kan Kohhran Thunun Dan Buin mahni invawn fel dan turah pawh mitin mahni phu tawka fai tak leh fel takin inthuam tur a ti a. Amaherawh chu mahni rilrem zawng, tha leh mawi nia kan hriat dana kan inchei hian chapona, tlakranna leh sual lam min hruai thei inchei dan pangngai aia uchuaka inthuam loh hi keini ringtute tan a mawi a. Chu mai a la tawk lo. Thawhnaw thar leh thil thar kan neih hian kan rilrua Pathian chan tur zawng zawng kha chu chuan a luahlan loh nan te, chapo phah loh nan te, mite thinlung tilawmtu a nih theih nan te Pathian hnenah lawmthu sawia inhlanna neih theih hi a tha a ni. Chutilo chuan Pathian hrechang lek lo va, Jeru-salem hmeichhiate anga intithei taka kan kal awr awr chuan rimtui aiah rimchhia, kawnghren aiah hruihrual, sam siam puk aiah chal kawlh, awm bel mawi aiah saiip puan, hmelthat aiah hmelchhiat chu Pathian hremna kan tawh tur chu a ni ang (Isa 3:16-24). Chu bakah hnam tinin inthuam mawi dan pawm chin kan nei theuh a. Entirnan - African hmeichhiate chu an sam phiar chik nuk mah se, an hnam tih dan a nih avangin an mawiin an inhmeh em em a ni. Keinin ti ve dawn ila chuan miin min en dan chu a dang daih thei. Chuvangin ringtute tan chuan a hun leh a hmun a zira thawmhnaw inbel leh inchei thiam hi a pawimawh hle bawk.
Inthuamna chhe thei lo: Pathianin mi tin hi taksa mawina leh nungchang mawina min pe a. Mahse mi tam zawk hian taksa mawina hi kan lungkham zawk niin a lang. Chuvangin pawn lam mawina turin Pathian tana kan pek phal loh pawh sam tihngil leh tihkir nan, hmel in-plaster nan leh thawmhnaw thar lei nan chuan pawisa kan ui lo va. Chung chuan hun rei lote chhung atan chuan kan nalh pawh a ni mahna. Mahse, kan tar kun hunah chuan ngaihnobeina chu engmah lo mai a lo ni thin. Hmelthatna pawh a chuai leh mai thin tih hi kan hriat a tha (Thuf 31:30). Chu chu hriain Paula leh Petera pawhin Pathian ngaihsak hmeichhiate chu pawn lam incheina – sam chei lerh te, rangkachak thi awrh te, silhfen tha/ puan man tam inbeltea inchei mawi tum lo turin an duh a.
Taksa mawina tura incheina zawng zawng hi tih miah loh tur tihna a ni lo va (I Tim 2:9; I Pet 3:3), an sawi tum nia lang chu senso hautak lo ber leh tlo ber, chhungril nun (nung-chang) mawina an dah pawi-mawh zawk vang a ni a. Thufing pawhin thawmhnaw kan inbel leh inchei mawi vang tea mi fak der ai chuan kan thiltih that vang leh taihmak vang tea chawimawi hi thlang zawk turin min hrilh a. Chuvangin Petera leh Paulan Pathian tihtu hmeichhe zahawmte chuan thiltha tih te, thinlung atanga mize dik, rilru thuhnuai-rawlh leh nunnem, inthuamna tet thei lo leh chhe thei lova inchei turin min fuih a (I Tim 2:10; I Pet 3:4). Chuvangin kan zavai hian Pathian mithmuha hlu em em, inthuamna chhe thei lo, chhung-ril nun takna leh mawinain i inthuam mawi zawk ang u.
++++++++++
World Cup
- Biaka
Tun atanga ni li-ah khawvel mi pui tam takin kan nghahhlelh em em mai 2010 FIFA World Cup chu an tan dawn ta der mai! South Africa-in an thleng dawn a, June 11 hian tan tur a ni. Eng ram champion ang maw! Kum 50 dawn lai South America leh European ram te hian an inlak chhawk tawh a.
World Cup an buatsaih atang hian South America team 3 leh European team 4 te hian World Cup champion lal lukhum an khum tawh thin a. South America atang chuan Brazil, Argentina leh Uruguay ram te an ni. European atang chuan England, France, Germany leh Italy te hian an champion tawh bawk. Brazil hian tum 5 an la tawh a, Italy hian tum 4, Germany hian tum 3, Argentina hian tum 2, England, France leh Uruguay te hian tum 1 theuh an la tawh bawk.
World Cup hi 1930 atangin an buatsaih tan a, a tan tirh lam hian South America hi an che tha a, a hnu ah European an che tha ve leh thung . 1962 leh 2006 thleng khan World Cup tum 12 a awm a, South America leh European te hian an inlak chhawk. World Cup hi tum 18 buatsaih a ni tawh a, South America leh European hi tum 9 ve ve an champion tawh a ni. European hian an Euro khawmual chhungah chauh an champion thin a, Argentina pawh hian South America khawmual chhungah chauh a champion thin bawk. Brazil hi chuan 1994 United State leh Asian Khawmualah te champion a lo ni tawh thin. Kumin hian Africa khawmual hian a vawi 1 thlenna tur a ni a. A boruak te a lum deuh avangin Euro lam atanga kal te tan chuan harsatna an nei deuh mai thei. AD 2002 Japan leh South Korea-a an nghah tum khan khaw lum avangin Europe ramte chuan buaina an nei nasa.
Kuminah Spain, England, Brazil leh Argentina te hi rin kai ber te an ni a. Boruak lum a nih avangin Africa khawmualte pawh hian tum loh deuhvin an champion mai thei bawk. 2002 World Cup khan South Korea khan Semi-final an thleng a, Spain leh Italy te a tlawm a nih kha. Kumin pawh hian Africa khawmual hian team tha tak tak a nei a, an nghahna South Africa, Ivory Coast, Nigeria leh Ghana team te hian player tha tak tak an nei. An player tam zawkte hian Euro khawmualah an khel a.
Kumin hian Euro khawmual atangin Spain, England, Italy, Portugal, France leh Holland te hi rin kai ber te an ni a. Chutah Spain leh England te hi rin kai zual te an ni. 2008 Euro Cup atang khan Spain hian World Team tha ber nihna a la hauh reng a. Euro Cup an lak tuma an playerte kha an la kim vek bawk. Rawl thar tha tak tak an neih belh bawk a, an Coach hian mi 23 thlang tur hian buaina a nei a ni. England lah chuti bawk. 2008 Euro cup an khelh theih loh avangin an Coach an thlak a, Italian mi Copelho chu man to takin an Coach atan an la a, an lak atangin an game khelh a tha thei hle a ni. Tun hnaiah England playerte hi an che tha hlawm hle mai a, an player-te an dam kim chuan tawrhhlelh awm tak tur an ni.
South America khawmual atangin Brazil leh Argentina hi an tawrhhlelh awm bawk dawn a. World Cup tum 5 lo la tawh Brazil hian kumin pawh lak leh a tum khawp mai. Brazil Coach Dunga hi 1994 World Cup an lak tum khan Captain a ni a, kumin hian Coach niin lawmman lak a tum hle a ni. Player tha tak tak a nei nual mai a. Mahse, player nungchang tha lo chu lak a tum hauh lo. Brazil Coach Dunga hian “ Ka player thlante hi team tana khel tha vek an ni a, mi dang tha tak tak an awm a, mahse nung-chang mawi lo playerte chu ka teamah lak luh ka tum lo” a ti a. Argentina pawh hi World Cup tum 3 la tawh an ni a, kumin hian player tha tak tak an nei a. An Coach Maradona hi 1986 World Cup Argentinain an lak tum khan an play maker ber a ni a, amah vangin World Cup an lak phah bawk a ni. Kumin hian theih tawp chhuaha a player-te enkawl a, lawmman lak pui ngei a tum a. Beiseina sang tak nen Africa lam an pan dawn a ni.
Kumin hian team dang tha tak tak an tam khawp a, Italy, Germany, Portugal, France te pawh hian player tha tak tak an nei bawk. Italy pawh hian tum 4 champion lukhum a khum tawh a, 2006 pawh khan champion a nih kha. 2006 world cupa an player ten tar lam an pan tawh tih lovah chuan hlauh awm tak a ni bawk.
2010 FIFA World Cup South Africa-ah hian eng ram tak champion ang maw!! Nuam tak maiin kan thlir ho dawn nia.
++++++++++
Lallukhum
By Hawilopar
Khawvela lallukhum ropui ber chu England lalnu Queen Victoria-i khum tura 1838-a siam, “The Imperial State Crown” a ni a. Lunghlu man to chi 317-a cheimawi a ni a, lunghlu te chi 3,000-in a pawn lam chu an chei nawn leh bawk. Chu aia lallukhum ropui chu an la nei a, “Crown Jewels of England” an vuah a. He lallukhum hi lal rohlu bik atana an siam ni mah sela sorkar ta a ni a, ni pawimawh bikah chauh an la chhuak a, lalin a khum thin. Tower of London ah an dah a, kum tinin mi tam takin an en huai huai thin a ni. Kum 1974 khan a hlut man an chhut a, dollar mtd 740 vela hlu niin an hria.
Crown of the Holy Ro-man Emperor hian “ German Reichskrone ” or “ The Crown of Charlemange ” ti pawhin hming a nei bawk a. He lallukhum hi Holy Roman Empire of Germany dintu lal Otto-I tan kum 962 khan, rangkachak, lunghlu chi hrang hranga cheimawiin siam a ni a. Lal Otto-III na hian a cheimawiin a belhchhah nghe nghe an ti. Kum 1938-a Hitlera’n Austria a run tum khan he lallukhum hi Vienna atangin Nurembergah dah turin a dil a. Mahse America-in Nuremberg zalenna a pek hnu khan a bo an ti tlat mai a. Nazi hruaitu an man ho chu zawtin an bei nasa, anni ho lahin Austria dil thuk takah paih a nih thu huai takin an puang ve bawk a. America awih lo chuan Nuremberg Mayor chu manin an dawp a, a tawpah chuan Himmler (kum 1929, Hitler personal body guard) in thukru a, mipui hriata sulhnu chhui theih loh tura bo ti tlat turin thu a lo pek avangin lei hnuai thuk takah thingrem tha tawka kalh chhungah dahin an lo thukru a. Chuti chuan laichhuak lehin tunah Schatzkammer museum, Vienna-ah dahin a awm a.
The Crown of Napoleon, he lallukhum pawh hi rangkachak chi hrang hranga chei niin, kum 1804 khan Napoleona’n a khum a. Tunah Louvre Museum, Paris-ah en theihin a awm. Lei lalte lallukhum hi chu a hluin an van hmingtha tak em! Vawiin thleng hian an la hlut a, khawvelah an hmingthang a, ram pumin an buaipuiin an chhuang tak meuh asin. Lei leh van siamtu lalber kan Lal Isua lukhum erawh chu Rom sipaite siam, a mawi leh hlut chu sawi loh, hling lukhum (Crown of thorns) a ni ve thung a ni. Nunna kalsanin thihna mualpho thlak ber thing anchhe dawng kraws a rawn tuar a. Chawimawina kal sanin hmuhsit leh tihduhdahna tinreng tuar turin a rawn inpe a. Khawvel sual leh a thiltihtheihna chu thihna-in a hneh a, lei leh van siamtu kha a siam leiah an zalh a. Tui siamtu chuan, “ka tui a hal e”, tihna hmun a rawn pan a. Lalber chuan chhiahhlawh hna a rawn thawk a, mi thianghlim ber chuan mi bawlhhlawh ber chan a rawn chang a.
A mak mang e, khawvel lalten lallukhum an khum hi chuan mipui nen an inkar a hla a, mi rethei leh mi hnuaihnungte tan phei chuan khawih leh deh chu sawi loh, hmun an chang lo a ni ber mai. Khawvel lalte ropui takin lalthutthlengah an thu a, kan Isua erawh chuan tlawm takin ranthleng a rawn luah ve thung. Khawvel lalte chuan khawvel thisen an chhuah, Lal Isua chuan khawvel tan ama thisen a chhuah tir a. Kan Lal Isua chuan chu hling lukhum a khum ni chuan Pathian leh mihring kan inrem a, miretheite tan hausakna, hausate tan hausak thiamna, mimawlte tan finna, lungngaite tan thlamuanna, thihna thim hnuaia thute tan enna, khawvel lalten mi zawng zawng salah an siam a, kan Lal Isua chuan mi zawng zawng ang khatin zalenna mi pe thung. A van ropui tak em! Kan Pathian hming chauh fakin awm rawhse! Amen.
Hlinglukhum a khum chhan chu keiniin lallukhum kan khum theih nan a ni a. A tuihalna chhan chu chatuana kang leh tawh lo tur tui nung kan neih theih nan a ni a. Thi tur kha kan nung a, tunah kan taksa hi thi mah se, chatuana nung turin ka thi tawh ang. A pain a kalsanna hmunah khan amah vangin a awmpuina kan chang a. Lalpa a tel phawt chuan khawi hmun pawh hi a nuam vek a nia. Lalpa a tel loh chuan eng anga in tha pawh a nuam chuang lo, in tha chu a sak theih a, in nuam chu a sak theih reng reng loh. Mahse dap leh mautah, sawi tlittlet-ah pawh awm mah ila, Lalpa a tel phawt chuan a nuam tho tho. Han thlir mah teh, hringnun hi. Ram hrang hrang changkang tak takah pawh awm mah ila, Lalpa a tel loh chuan a nuam chuang lo. Mahse Lalpa a tel erawh chuan mi ramah ar chal tiat tak ngial pawh hmun leh ram nei lo mah ila, neih chak leh awhna hi awm tawh lo ni lovin awm reng chung siin kan nunah hmun an chang tawh lo zuk nia. Chu tak chu alawm kan hausakna Lalpa chu. Pathian thu atanga i thlir loh ni a piangah lei hringnun hrehawm zia, itsik elrel, insan siakna, tah leh ha thialna khawvel a nih laiin Pathian thu atang erawh chuan hringnun vanram a ni tlat. Paulan tlakchham thu sawi zawng ka ni lo ve, kei zawng eng ang pawhin awm mah ila, lungawi zel ka ching tawh si a.
Lal Isuan hlinglukhum a khum avangin amah ringtute khum turin lallukhum chi li a lo chhuak a.
1. Thih thlenga rinawmte leh thlemna tuar hram hramte khum tur Nunna Lallukhum te ( Jak 1:12; Thup. 2:10)
2. Rawngbawl hna hlen chhuakte khum tur Lallukhum chhe thei lo te (I Kor. 9:25)
3. Intihsiakna tha bei zova lei nun chhuahsan mekte khum tur Felna Lallukhum te (II Tim. 4:8)
4. Kohhran hruaitu fak tlakte khum tur bik Ropuina Lallukhum te an ni (I Pet. 5:4)
Ka lawm e.
++++++++++
NEPNOIS
¤ Extra-Virgin
A virgin over lutuk a, a zun-in deuh reng.
¤ Inremsiamna
American mi, Scotch mi leh Russian hi motor accident-in hliam na tak an tuar a, an thi-dang a. Vanram an han thleng a. Paula’n a lo en a, an la naupan em avangin ti hian rem a siam sak a. Mi pakhatin dollar 500 theuh an pek chuan an dam chhuak leh dawn a ni. American chuan dollar 500 a phawrh a, a pe nghal a. Operation roomah a rawn harh chhuak a. Doctor chuan mak a ti em em a.
“ I thi tawh emaw kan lo ti vek a!”
“ Dollar 500-in Paula’n min tidam leh alawm.”
“ I thiante pahnih kha?”
“ Kan Scotch-a kha chu Paula nen an innep mek a, Russian-a kha chuan an sawrkawrin pawisa an rawn pek sak hun tur a nghak a nih kha.”
¤ Ka Hre Chiang Em!
Roreltuin a zawt a.
“ I pawisa ruk, dollar za kha engtin nge i tih?”
“ Hotela Mary ka pe a, zan khat ka awm pui.”
“ Court hmaah dawt sawi suh. Eng tikah mah Mary’n dollar sawm bak a la ngai lo.”
++++++++++
