Thihna Hi!!!

The Rengs

Thihna hi a zalen a.

Tar leh naupang, thalai tan pawh a chan theih vek a.

Mi lianin an pumbilh thei lo va,

Mi rethei ber tan pawh quota hmuh loh a phanawm hek lo.

Rukruin an rawk thei lo va, suamhmangin an chhuh thei na hek lo.

Terrorist-in an bomb darh thei lova,

Magician-te thup bo theih chi pawh a ni lo.

Thlarau miin an chang tam chuang lo va, tawngtaia pumpelh mi a ni bawk lo.

Thihna hi a fair a.

Politician-ten an dang nalah an tawlhthluk tir thei lo va,

Zawlnei der-te vau zam mai mai theih a ni hek lo.

Nu leh pa thuawih-lo pawh a pawm tho va,

Fanu / fapa chhuanvawr a en hrang chuang lo.

Chuvangin thlamuang takin awm rawh.

I chang ve khawp ang.

Ka Hrethiam Lo

Awmpuii

Hringnun kawng zawhnaah hian zir tur, hriatthiam tur a va tam tak em!
Mi thenkhat mawl ang deuhva lang si, thuril tak tak pai ve reng an tam laiin thenkhat lah mi hmuha intiveivung, hriat zau hmel em em, han bih chian a, thupui fumfe pawh nei lo an ni leh lawi si.
Rilru tha lutuk leh zaidam lutuk lah chhawmchhaih an hlawh a, mi tak leh lutuk lah a indahsang, a induh si tiin kan sawisel leh bawk si. Kam tam lah kan ning, tawng tlem lah a intithei tiin kan ngeih leh bawk si lo. Mi ze chi hrang hrang, ngaih dan hrang hrang nei karah a tawk chauhva len dan a va han har tak dawn em!
Mahni thlirna tlang atanga thlir ve lote kha mahni anga fing ve lo, ngaihtuah thiam lo tia thutlukna siam mai hi a finthlak ber em aw tih ngaihtuah tham a ni.
Pawn langa intithlarau mi em em, inkhawm taima hi Pathian tih mi kan ti a. Chhungrila Pathian nena inzawmna nghet tak nei hi hmu thiam lovin awm dan pangngaia nungte hi a la piangthar lo tiin ngaihdan han siam kan hreh lo.
Hmaichhana infakmawi thiamte, mi biangbiak thiamte hi a rilru a tha e, tiin kan lungawi pui a, a chhungril nuna mite itsikna leh elrel zui duhna thinlung kha tak mai kha kan hmuh hmaih thin hi a dik chiah em aw! Mite va pak huamhuam thiam lo, thinlunga hleih neih lote hi va hmuh tlang theihna mit neih theuh a va chakawm em!
Eng pawh ni se, kei atan zawng Hringnun hi hriathiam a har a nih hi!

Hringnun Lamtluang

James CVL Thafamkima, Bhubaneswar

Hringnun hi kan duhdan ang leh kan remruat angin a kal lo fova; mihringte ngaihtuahna atanga kan hriatthiam phak bak ai hian he khawvel thil inher vel hi a thukin, a ril zawk fova. He ramsa chikhat, ke pahnih hmanga vak kual vel thin hian khawvelah hian chungnung ber ni a inchhal chung leh, a ramsapuite tana Khuanu siam nia inngai chungin a inhrosa kual vel a. He lei dam chhung ni thleng hian chhut chhuakin, tuifinriat thuk ber berah leh khawvela tlangsang ber berah te a sulhnu hnutchhiahin, thang leh thar lo la awm zel turte tan, hriatna leh thiamna chitin khawlkhawm mah sela, hriatthiam theih loh chin, hmuh phak loh chin, thlen theih loh chin leh tih theih loh chin a nei zel lo thei lova, chumi hun a lo thlen chuan he hringnun hian Pathian a ngai thin.He khawvelah hian mi hlawhtling leh thiltithei, kan mihringpuite zah leh ngaihsan nih kan chak a. Nawmsakna um chungin hausak tumin kan intlansiak a. Heng kan duhna te tihhlawhtlin a nih theih nan hian thi leh thau pawlh tak meuh meuhvin, a thim a var pawh thlu lovin kan tlan a. Kan intlansiakna hi a namai loh em avangin a then ding taka an tlan nal nal laiin a then kan tlu a, tho leh hleithei lovin kan silawng a, chutah, he mihring mihrinna hi lo chhuakin,chu kan mihring mihrinna chuan he khawvel piantirh ata min dintu leh kan nihna engkim hretu, awm lo ata awma min siamtu hnenah chuan min hruaikir a, rilru beidawng tak chungin keimahnia beiseina la awm chhun chu auchhuahpuiin a hmaah kan bawkkhup leh thin. Ni e, beidawnna ruam atang hian kan hringnun hi Pathian ngaiin a rum thin.Kan vela cheng nungcha hrang hrang leh thing leh mau te, luite kianga to thin phairuang te damchhung kum leh nite, chungleng savate bu chheh hun leh sathar no neih hun thlengin chhut chhuak thei mah ila, keimahni, keimahni ngei damchhung kum leh nite erawh kan chhutchhuak thiam lova. Kan inrinlawk hma hauhvin a chang chuan thihna kutvawtin min man a, ni e, kan duhtakten piallei dai min belhsan changte hian he hringnun hian hnemtu a ngai thin a, mihringte hriatthiam ve phak loh hrethiamtu, mitthite hnena nunna petu chu a ngai thin.He thi thei taksa vaivuta siam, hmangaihna leh malsawmna avanga nunna thawk khuma awm hi, natna chi hrang hrangin a tlakbuak fova. Sik leh sa inthlakdanglamin natna min thlen chang a awm a, nawmsak kan tum luat avanga kan tawrh chang pawh a awm. Hmasawnna hming chawia kan hmalakna hrang hrang ten natna tha lo tak tak min thlen changte, kan nunphung kan thlahdah avanga natna khirh tak tak kan tawrh chang ten, he kan hringnun hi mangangin a rum thin a, a Siamtu hnenah kirin, inchhirna thinlung nen a hmaah abawkkhup thin.Hringnun par tivula, vanglai nun tinuamtu nulat tlangval inhmangaihna te hian mi thenkhat hnenah damchhung hlimna a thlen laiin thenkhat tan erawh rilrua retheihna, thinlung lungchhiatna leh beidawnna a thlen a. Thiantha tawngkam thlumin thinlung na a thawidam zawh loh chang leh, puipunna-a kalin thaw a tih ipik a, fianriala thutin rilru na thawidam ahneha a tihzual a, thlifimte takngial pawn an thianghlimna an hloh chang hian he hringnun hian Pathian lam a hawi thin.Duhamna leh ropui nih inchuhna ten remna leh muanna bang chhu chima, indona muala thalai thisen lum a tirh liam lai leh, phairuama thisen a luan a, pawi sawilote thisen chhuah a nih lai te, retheite rah beh an nih a, suahsualnain ro a rel lai hian he thinlung lungchhia hi Pathian hmaah leih buakin a awm thin.Chung ni a lo thlen chang chuan rilru leh tihtakzeta amah autute hnenah kan Lalpa chu inphahhnuaiin a inlar thin a. He ‘hringnun lamtluang’-ah hian kan Pathian hian min thlahthlam ngai lova, Lalpa chu amah hmangaihtute tan chuan a hnai reng si.

(Bhubaneswar atanga thu rawn thawhtu James-a chungah ka lawmthu zawng zawng ka sawi e. –Ed.)

I Nu leh Pa Chawimawi Rawh

Kawlchuani (Haizawl)

“I nu leh i pa chawimawi rawh, tichuan Lalpan ram a pekah che hian i hmuingil ang a, i dam rei dawn nia (Deu 5:16)". Nu leh paten fate min hmangaihna hi chhuichhuah theih rual a ni lo va; a thuk zawng, a san zawng, a sei zawng, a zau zawng, eng ti kawng pawhin. An nun hial fate tan pek an huam a, fate chunga an hmangaihna hi bithliah awm lo hmangaihna a ni. Khawvel inhmangaihnaah a tlukpui hmangaihna a awm lo. Amaherawh chu nu leh pate leh fate inkara kan thil tawn a inan lohnaah mitin hmuh dan leh ngaihdan a hrang ngei ang. Mahse, tu nu leh pate pawh ni se, fate chunga an hmangaihna chu a danglam chuang lo vang. Chu hmangaihna chu tute pawn kan lo ngaihtuah ve thin ang a, eng kawnga rulh let a, pe let ve turin nge kan inbuatsaih a, kan lo pek let ve dan le? Chu chu fate zawng zawng tih awm reng a ni si a. Mahse nu leh paten fate tana an rilru zawng zawng seng a, a sur a sa hnuaia hahchawl thei lova an lo thawhna chu ‘bata’ ruat lovin, an tih tur renga ngaiin, hmangaihnain an lo thawk zawk a ni, tih chu kan hriat a ngai. Fate tan rulh zawh rual a ni lo. Chu ti a nih chuan:Engtin nge kan chawimawi ve ang? Fate hian nu leh pate chawimawi dan turah kan chiang lo hle a, mi tam takin kan duhthlanna chu nu leh pate tan rilru hahna leh khaw hawi ngam lohna a ni thin. Nu leh paten fate chungah beiseina sang tak an nei a, anmahni tan ni hauh lovin fate hmakhua atan a ni an beiseina a awm thin. Engkim hi fate tan an lo thlir lawk a, an lo ruahman lawk a, a chang chuan fate hmangaih luat vangin dan khauh taka min enkawl chang te a awm thin reng a. “Thununna reng reng hi tuar lai chuan lawmawmin a lang lo va, lungchhiat thlakin a lang zawk thin. Tuar hnuah erawh chuan chu mia sawizawia awmte tan chuan rah thlamuan awm tak, felna chu a chhuah sak thin (Heb 12:11). Faten khuahkhirhna ata zalenna zawngin sual khurah kan pil san thin a, kan han harh chhuah meuh chuan a lo tlai hle thin a ni. Nu leh pate rilru hreawm taka kan siam thinte hian kan malsawm dawnna te a dal thin a. Nu leh pate kutthlakte, anchhe lawhte chan kan Bible-in a sawi hi i han bih ang u.“Tupawh a nu emaw a pa emaw vua apiang chu tihhlum ngei tur a ni. Tupawh a nu emaw a pa emaw anchhe lawh apiang chu tihhlum ngei tur a ni (Ex 21:15, 17. Lev 20:9)". “A nu emaw a pa emaw anchhe lawh chu, thim tham lai berah a khawnvar tihmih sak a ni ang (Thuf 20:20).” “Fapa a chu a pa vanduaina a ni a (Thuf 19:13)". Nu leh pa chawimawi hi eng tia chawimawi tur nge?.. “Ka nu, ka pa, ka chawimawi che u”, tih lam a ni lo va, mi tam takin nu leh pa kan chawm hi kan chawimawiah kan inngai a, kan chapo hle thin. Kan nitin nun dan, khawsa dan hian a chawimawi zawk tur a ni. Nungchang mawina leh chhungril nun rinawmna te hian kan chawimawiin kan zahthiam em em a pawimawh a, kan thawhrah eia hahdam taka kan dah theih chuan a tha leh zual. “I pa, a hringtu che thu pawm la, i nu chu a lo tarin hmusit suh (Thuf 23:22). Eng ang pawhin zir sangin fel hle mah ila, nu leh pa kan chawimawi thin loh chuan kan chhungte leh mi dangten min ngaisang ngai hauh lo vang. Nu leh pa chawimawi chu mi puitlingte tih dan a ni a, vawiin thlenga mite ngaihsan leh mifelte reng reng chu nu leh pa chawimawitute hi an ni. “I nu leh i pa chawimawi rawh. Chu chu thupek tiam nei hmasa ber a ni. Chuti chuan i tan a tha anga leiah hian I dam rei bawk ang” (Eph 6:2-3).

Vanglai Hun

Lalhunsangi

“Tin, i vanglai hian i siamtu hre reng rawh. ‘Ni tha lo te a lo thlen hma leh lawmna reng ka nei lo ve,’ i tihna tur kum te a lo hnaih hma hian.” Thuhriltu 12:1“Lalpa chunga lawmna chu in chakna a ni si a,” a ti a. Nehemia 8:10Pathian khawngaihna avangin March thla kan lo chuang kai leh ta der mai. Ni hi a her ngaiin her mahse khawvela kan hun hman a lo tam ve telh telh a, keini mihringte pawh kan dam chhung kum chhiar pun a lo tul leh thin a ni. Sam 90:10-ah, “kan dam chhung kum te chu kum sawm sarih a ni a, chakna avangin kum sawm riat pawh a ni thei e,” a ti a. Mi tam tak chu naupang tein mual an liam zung zung ve bawk a. He kan that lai vanglai hun hlu tak hi hman dan thiam leh chhiar dan thiam a va pawimawh tehlul em! Awle, kan Bible-in ‘vanglai’ a tih chu kan that lai leh thawh theih lai hun chauh ni lovin he khawvela kan dam chhung leh cham chhunga Amah kan fak theih hun hi vanglai a tih chu a ni. Khawvel chhuah san tawh hnu chuan Pathian a fak theih tawh lova kan dam chhung hi a pawimawh ta em em a ni. Eng tik lai pawha hriatreng chu thil har a ni mai thei e. Kan hriat reng theih nan enge kan tih atana pawimawh ber kan tih chuan nitin kan nun danah mahni leh mahni kan inchhut a ngai a. Vawiina kan nun danah Lalpa a lawm ang em? Amah biak nan, Bible chhiar nan leh tawngtai nan ka hun ka hmang thin em? Vawiin ka awm danah Lalpa huat zawng ka ngaihtuah em? Sual thupha ka chawi thin em?, tia kan tih veleh kan nunah Lalpa tihna a lo pung zel a. Leia malsawmna kan dawn a bakah thlarau lam malsawmna kan chungah a lo thleng thin a ni. Lalpa kan chunga a lawm phawt chuan Sual hnehna kan chang thin a, khawvel lam duhnain kan nun a kaihruai tawh lo va, Ama duh danin kan nun a kaihruai thin zawk a lo ni. Khai le! MCF thalai rualte, Lalpa rinnaah kan lo than len a, hma kan sawn zel theih nan,“Ka tih thin te ka tih a rem tawh lo, Ka tih ngai loh te tih a tul zawk a; Thinlunga la atan ka lo thlang ta a, A duh zawnga awm atan min duh,”tih hla siamtu’n a lo tih angin kumin atang hian kan memberte Bible chhiar tam kum leh tawngtai tam kum ni se, engkimah kan than lenna leh Lalpaa kan chakna a lo nih beiseiin. Pathianin malsawm che u rawh se! Amen.