Rev K. Lalrinkima te haw turin in puahchah

Rev K. Lalrinkima chuan tluang taka Phd a tih zawh hnuin annu Pi Lalnunzawmi nen Singapore chhuahsan a Mizoram lam a haw turin an in puahchah tan ta reng mai. Doctor of Philosophy in Theology tluang taka Pu Kima'n a zo hi kan lawmpui em em rualin Singapore min chhuahsan mai tur erawh kan ui tak meuh meuh a ni. Anni nupa hi Singapore Mizote min awp lumtu leh min kaihruaitu ber anni a, hun rei tak min kaihhruai hnuah an tihtur te fel taka an tihzawh tawh avanga min hawnsan tur hi kan ui tak meuh meuh a, Singapore Mizo Fellowship tana a thahnemngaihna leh thawhna zawng zawngah lawmthu kan sawi tak meuh meuh a ni. An rawngbawlna zel tur kawngah duhsakna sang ber kan hlan bawk a ni.

Pu Kima hian Trinity Theological College, Singapore-ah Mth zovin Phd hi TTC-ah bawk hian an zo leh a ni. Singapore a Mizo awm rei ber pawl leh Mizo fellowship tana thawkhlawk leh thahnemngai em em mai a ni a. A taimakna leh inpekna-ah zirtur kan ngah hle a ni. Hetiang a theology zirna hmun tha a Mth leh Phd a zo thei hi kan chhuang in kan lawmpui tak meuh meuh a ni. A hun kal zel turah pawh rawngbawlna zau zawk leh sang zawkah Pathianin a hlan chhoh zel kan beisei a ni.

Pu Kima te nupa hi an tum dan chuan ni 30 May 2009 hian Singapore chhuahsan in Mizoram lam pan an tum a, Mizoram a hun engemaw ti chen an cham hnuah Pu Kima hnathawhna lam Union Christian College, Barapani, Meghalaya an pan leh dawn a ni. An programe duan anga tluang taka hun an hman theihna leh an rawngbawl leh zelna tur atan kan tawngtaipui theuh dawn nia.

Pi MSI leh Sawmte-a ten min hawsan ta

Pi MSI w/o Pu Sangmama leh an fapa Sawmtea te chuan vawiin (May 21) khan Delhi lam panin min hawsan ta. Pi MSi te nufa hi Delhi ah ni hnih chhung vel an cham hnuin Mizoram lamah an chho dawn a. Pu Sangmama July thlaa a haw hma chu Mizoram lamah an lo han awm thung dawn a ni. MCFS in naute kan neih hmasak ber Sawmtea leh a nu Pi MSI ten mi hawsan hian kan lung an tileng hle mai. Keini ai mahin kan adviser a lung a leng dawn tih kan hre bawk a. A khawhar hnem turin hnatlang ho hial ila a tha awm asin! Anni chhung hian MCFS min tiphuisuiin memberte thla an timuang hle thin a ni. "Adios Sawmtea leh Pi MSI" kan ti ta mai si a le! MCFS associate member ah kan la ngai zui zel ang chu.

Pu Sangmama Thailand-a kal lo haw tawh

Pu Sangmama a zirna Lee Kwan Yew School of Public Policy-a a zirpuite nena field trip neia kar khat zet chhung Thailand a han zin pawh tluang takin a lo kir leh ta. Thailand-a an cham chhung hian community thenkhat sawrkara innghat lova hmasawnna nasa taka kalpuite hmalak dan te an han zirchianga, hmuhnawm leh zirzui tlak tak tak te an ni hlawmin a hlawk thlak hle niin Pu Sangmama hian a sawi.

Rev K. Lalrinkima'n Thesis Ziakzo Hnai Ta

MCFS Pastor leh Singapore Mizo Christian Fellowship din anih tirh lam atanga puipa ni ngar ngar Rev K. Lalrinkima chuan Phd Thesis ziakzo hnai tawhin thehluh theih mai turin a peih ta der mai tih thu kan dawng. Singapore Mizo ten kan tawngtaisak fo thin a, a ziah zawh dawn lamah hrisellohna hrang hrang in tlakbuak mahse a hun takah a zo fel thei niin kan hria a kan lawmpuiin kan duhsakna kan hlan mawlh mawlh a ni. Annu Pi Lalnunzawmi'n a rawn awmpui achinah a hna a sawn zual hle niin kan hria a kan lawmpui lehzual hle a ni. Rev Lalrinkima te nupa hian May thla nihnuhnung ber hian min hawnsan an tum niin kan hria a, kan lung a leng lawkin kan Singapore Mizo ten kan ui dawn tak meuh meuh a ni. An rawngbawlna zel turah duhsakna kan hlan bawk.

Rev Zosanglina Colney Singapore lokal

Rev Zosangliana Colney, Mizoram Synod Executive Secretary nilai mek chu tunlai hian Singapore-ah international conference on mission hmangin a cham mek. Rev Zosangliana Colney hi Trinity Theological College buatsaih International Conference on Mission ni 23-26 March, 2009 chhunga neih-ah keynote speaker tur a sawmna angin a lokal a. Ni 26 March, 2009 hian Cooperation in Mission chungchang-ah paper a present bawk ang.

Rev Zosangliana hian Singapore a cham chhungin Singapore Presbyterian Church, Synod hotute nen thawhho theih dan tur kawng zawngin inbiakna hun pawimawh tak an nei nghal bawk dawn a ni. Singapore Presbyterian hotute hian Mizoram Synod nena thawho an duh thu leh Mission hnathawh kawngah Mizoram Synod chu entawn tlak hle nia an hriat thu an sawi bawk a ni.

Rev Zosangliana hian Singapore Mizo Christian Fellowship (MCFS) inkhawm-ah pathianni hian thuchah a sawi dawn a, mi zawng zawng inkhawm theuh tum ila a lawmawm hle awm e. Kan inkhawm hun kha chawhnu lam dar hnih anih kha hre rengin tan hun hma a thlen theuh kan tum dawn nia. Rev Zosangliana hi tihtur pawimawh tak tak a ngah hle mai a, kan mimal tawngtaina theuh-ah kan hre tlang dawn nia.

Rev K. Lalrinkima'n Phd Thesis Ngawrh Takin Ziak

MCFS min kaihruaitu ber Rev K. Lalrinkima tuna Trinity Theological College a Phd bei mek chuan zawh lam hnaih tawhin tunlai hian ngawrh takin a thesis a ennawn mek niin kan lo hria a. Pu Kima hi a nupui Pi Lalnunzawmi'n a rawn tawiawm thei bawk a, April-May thla hi chuan thesis pawh fel taka zawh ngei a tum nin kan lo hria a duhsakna sang ber kan hlan a ni. Kan mimal tawngtai na-ah hre theuh bawk ila a tha awm e.

ZO INDIGENEOUS FORUM

Khawvel ram hrang hrang Zofate inpumkhatna leh zaikhata kan luankhawm theih nan leh kan hnam nunzia, khawsak phung leh nihna te vawnghim tur te leh chhan hrang hrang avangin Zo Indigenous Forum din a ni a. Chak taka hmalak an tum mek thu an Director Pu C. Lalremruata hnen atangin thu kan dawng.

Khawvel ram hrang hranga Zohnahthlak awm te kan inhriatpawh theih na tur leh he forum hmalakna khawvel hriata puanzar anih theihnan leh kawng hrang hranga hma an sawn zel theih nan website an siam (http://www.zoindigenous.blogspot.com/) bawk. An Director be pawh duh tan rema_cc@yahoo.co.in leh zoindigenous@gmail.com ah te email thawn theih a ni e. Singapore Mizo ten Zo Indegeneous Forum te hnam hmasawnna leh inpumkhatna thazawk an neih theihna atana an hmalaknaah duhsakna leh lawmpuina kan hlan e.