Singapore Mizo

September 2011 MCFS News

2011-09-06T23:25:00.001+08:00

Chanchin Lawrkhawm

Libya

Hel ho chuan capital Tripoli leh Libya ram pumpui deuh thaw an hneh tawh a, kum 40 chuang rawng taka roreltu Colonel Gadafi chu a awmna chin hriat lohvin a biru mek a ni. Febuary thlaa intan roreltu sual paihthlak tuma ram chhung inbeihna avang hian mi sang tam tak an thi a, sing tam tak an hliam tawh a ni. NATO tangrual pawl (US, UK, France, etc) leh Arab ramten raldo thlawhna hmangin hel ho hi an tanpui a ni. - BBC/wikipedia

+++++

England

August 6-10 khan London leh England ram khawpui tam takah suahsual rawngbawlna namen lo a thleng a, tleirawl rual za tam tak chuan chhan leh vang mumal tak nei lovin kawng an zawh a, an hmuh apiang ti chhiain dawr tam tak rawkin an lak theih apiang an la a. Police leh heng mihawklakte inbeihna avang hian mi pa 5 in nunna an chan a, police 186 hliam an ni. Heng tleirawl rual thil tih chhiat zawng zawng hi pound maktaduai 200 hu anga chhut a ni. He thil thleng avang hian mi 3100 zet man a ni tawh a, 1100 chuang court-a thlen an ni tawh. - Agencies/wikipedia

+++++

Monaco

Argentina leh Barcelona player Lionel Messi chu Aug 26 khan UEFA Best Player in Europe lawmman hlan a ni.

+++++

Burma

Sorkar chuan income tax zaa sawm (10%) zel a lak thin kha thla 6 chhung ti hniamin zaa pahnih (2%) chuah lak a tum thu a puang. Hei hian August 19 atangin Febuary 19 thleng chauh a huam dawn tihna a ni. Entirnan Singaporea hnathawk thlakhata 1000 hlawh chuan Embassy-a thlakhat tan 100 a pek thin kha hemi hun chhung hian 20 chauh thun tura tih an ni ang.

Burma ram chhungah tunlai hian US Dollar rate a kai leh tan a, August thlaa dollar khatah 670 thlenga a tlak atangin 770 thleng a rawn kai chho leh a ni. Hei hi ram hruaitu thenkhatten sorkar official pawisa thleng rate dollar 1 a 900-1000 Kyat-a siam that an rawt thu thang vang nia rin a ni. Sorkar-in a rate rin tlak a siam tak tak ringin mi hausaten dollar an lei khawl nasa hle a, chu chuan demand ti sangin dollar rate a lo kai phah niin an sawi.

Kawlram chhunga chhungkaw tam tak hian an fate ram dang pawisa thawn an rinchhan avangin dollar rate tlahniam khan mi sang tamtak khawsak rel a ti buai a ni. – Agencies

+++++

Israel pan tur Mizo-Juda 7500

Kumin chhungin Mizo-Juda 7,500 aia tlem lo, an ramtiam Israel-ah an pem lut dawn a ni, August 26 chhuak The Times of India chanchinbuin a sawi a.

A tam ber chu Manipur atanga kal tur an ni a, Mizoram atang chuan mi 3000 vel an nih dawn thu Mizo-Juda pawl ‘Bnei Menashe’ hruaitu pakhat Jeremiah Hnamte chuan a sawi.

Aizawla hmunpui nei he Bnei Menashe pawl pawm dan chuan Mizo te hi Israel hnam bo 10 zinga pakhat niin kum 2700 kalta khan China paltlangin tuna Mizote chenna hmun hi lo thlang an ni.

Israel hnambote zawng kawnga hmala pawl ‘Shavei Israel’ chuan Bnei Menashe te chu an hnambo ngei an nih thu kum 2005 khan an rawn nem nghet a, chuta tang chuan a nawlpuiin Mizo-Juda-te ramtiam panin an pem thla nasa hle a ni.

Tunah mi 1700 aia tlem lo Mizoram leh Manipur state atanga kal Bnei Menashe member-te chu Israel ramah an inbengbel mek a ni.

Bnei Menashe te chu Israel ram an thlen hunah chauh dan ang takin Juda sakhua-a inlet tur an nih thu Jeremiah Hnamte chuan a sawi bawk a ni. TOI/Wikipedia

+++++

Sangha manna Bomb vanga thi

Sangha manna bomb, in chhunga tih puah palh avangin August 5 khan Kalay University campus bula khawsa mi pakhat a thih thu hriat a ni.

Mi thi, Pu Lian Za Thang, hian a mahin bomb chu inah a sawngbawl niin chinchang hriat tuma va kal ten an sawi a, bomb puak chuan in chhung atangin a vawrh chhuak a, a pum vel a hliam nasa hle a, a in pawh a chhe darh hle a ni an ti bawk.

Pu Lian Za Thang hian fa pahnih a nei a, a pa chu pastor niin an sawi bawk a ni. - Chinlandguardian.com

+++++

Zirlaite hmelma: Computer Games

Mizo doctor zirlaite, a bik takin mipate, chuan an zirna tibuaitu ber chu ‘computer games’ a ni tih interview-ah an sawi.

Interview-naah chuan “Games kan khelh chuan class kan la hman tawh lova, atawpah exam chhang thei lo (debar) zingah kan tel a, exam kan chhang thei lova kum khat kan fail phah thin a ni...kan mitin a chhiatphah a, kan rilru ngaihtuahna zawng zawng a tibui..” tiin an sawi.

He interview hi University of Medicine, Mandalay-a Mizo zirlai pa 7 leh Sanga leh Muantei inkawmna a ni a, zirlaite chuan mahnia in-control theih a tul zia an sawi uar hle a ni. - zoin.info

+++++

Singapore President Thar

September 1 (Nilaithawntan) khan President atan Singapore mipuite thlan tlin Dr Tony Tan Keng Yam chuan a hna a chelh tan a, a ni he ram President pasarihna a ni.

Dr Tony Tan (kum 71) hi Deputy Prime Minister hna hial lo chelh tawh thin a ni a, OCBC bank Chairman & CEO, sorkar pawisa hmanga sumdawnna lam khawihtu GIC-ah deputy Chairman, Singapore Press Holding Chairman hnate pawh a lo chelh tawh thin a ni.

NUS, MIT (US), University of Adelaide (Auz) atanga zir chhuak niin, NUS Vice Chancellor hmasa ber a ni bawk.

Amah hi Anglican kohhran mi niin fapa pathum 3 leh fanu pakhat a nei a ni.

Singapore President te hian thuneihna tak tak an nei tlem hle a, mahse ram aiawhtu a nih avangin an thlang fimkhur hle a ni. – Agencies

+++++

Tiau kawng leimin rapthlak

Kawng min avangin August 6, 2011 atang khan Tiau (India border) lama atanga rawn haw thla turte chuan buaina an tawk tan nia hriat a ni.

A min dan hi rapthlak hle a, kum tamtak kal ta atanga a min nasat ber kum a nih hial rin a ni. Tidim leh Sozang inkar a chhe nasa ber a, hmun tam takah a chim thlak avangin ke pawhin harsa taka kal a ngai hial a ni.

August 12 khan kawng phuahchawpin motor 20 vel chu Tahan lam panin an lo thleng thei hram. Motor lian kal thei tur chuan thla tam fe nghah a la ngai dawn niin a lang. Tahan-Tiau kawng hi Tahan atanga Mizoram kal tlang theihna kawng awmchhun a ni. - Tahan Times

+++++

Keimahni

MCFS General Meeting

August 30 (Thawhlehni) khan OB leh Committee member-ten General meeting vawi 3-na an nei a, an rorel tlangpui hruaitute hnen atanga kan dawn te chu:-

1. Outing vawi 3-na

A hun: 2 October (Sunday hmasa ber)

A hmun: Woodlands Waterfront

2. Computer lei

Inkhawmnaa hman tur Computer lei tura thu pass a ni a, September 2nd Sunday-a hman tan theih beisei a ni. S$600 aia to lo, lo lei turin a hnuaia mi pali-te hi mawhphurhna pek an ni.

(i) Pu Joshua

(ii) Nl Lalchhandami

(iii) Tv Thangpia

(iv) Nl Rosangzuali

Computer chu Biak Ina dah thin tur a ni a, Fellowship pawimawha hman atan chauh lakchhuah phal a ni ang. Secretary leh Asst Secretary te chu In-Charge atan ruat an ni.

3. 2012 Hruaitu Thlan

December 1st Sunday-a neih tur a ni.

Inthlan Chairman

Pu Laldinpuia (Valbuanga)

Puitute

Tv Biakhmingthanga (ziaktu)

Nl Lalchhandami (projector control-tu)

4. Music sub-Committee

He sub-Committee atan a hnuaia mi pariatte hi thlan an ni. MCFS hlabu chhunga hlate sak nuam tawk tur key lo zawng tura mawhphurna pek nghal an ni a, hla hruaitute hman tur master copy an buatsaih nghal bawk ang.

(i) Tv Lalhriattira (Leader)

(ii) Tv Lalrawngbawla

(iii) Tv Gospel Hrilzauva

(iv) Tv Zothlamuana

(v) Nl Rebecca Lalnunpuii

(vi) Nl Laldinsangi

(vii) MCFS Chairman (ex-officio)

(viii) MCFS Secretary (ex-officio)

5. MCFS Dan

Dan lo ennawn turin a hnuai mi 7 te hi mawhphurhna pek an ni a, October thla General meeting huna bihchian theih tura lo draf tura tih an ni. Dan chu Zawhfel hnuah a bua siam tur ani.

(i) Tv Zoramchhana (Leader)

(ii) Pu Laldinpuia (Vanbuanga)

(iii) Nl Lalchhandami

(iv) Tv Biakhmingthanga

(v) Tv Lalhriattira

(vi) MCFS Chairman (ex-officio)

(vii) MCFS Secretary (ex-officio)

6. Thulaipuibu

Kum 2012-a zir tur Thulaipuibu lo ngaihven turin: Pu Laldinpuia, Nl Lalchhandami, Tv Biakhmingthanga, Tv Lalhriattira, Tv Jimmy Lalruattluanga-te ruat an ni.

+++++

Editorial

BIAK IN CHUNGCHANG

AD 2009 a in her chhuah khan MCFS pawh hma kan sawnnin member pawh kan thahnem ta hle a, Dover Biak Inah kan len tak mang loh avangin committee chuan Biak In thar zawn a rawt ta a.

Kan Pastor fel tak takte leh kan hruaitu fel tak takten Biak In thar zawngin hma an la tan a. Inkhawmah pawh tawngtai thupui berah neihin Pathian hnenah kan thlen thin a nih kha. Kum tawp dawn ruaiah Pathian in kan dilnate chhangin tuna kan Biak In luah mek hi min pe a. Ni 6, Sep 2009 ah kan luah lut ta a ni. Tun kar hi kan luah luh kum hnihna chiah a ni a. Pathian hnenah lawm thu i sawi mawlh mawlh ang u. Kan Biak In neitu kohhran hi an felin an tha em em a, kan thil mamawh music instrument leh bungrua dahna tur thlengin min ngaihtuah sak a. Kan phu loh malsawmna MCFS hian kan dawng tak meuh a ni.

Kan Biak In neitute hian thil pakhat erawh min phut a, Biak In leh a chhehvel tih thianghlim hi a ni. Tin, Biak In compound chhungah Zuk leh hmuam hman khap a ni bawk. He thianghlimna thupek hi zawm ila, chuti lo chuan miin “Mizo ho hi an hmel that hlawm tehlul nen, an va thing e’ min tih palh ang e.

Pathian fak nana ring deuhva zai leh tawngtai chu an phal hle thung a ni. Kum rei tak he Biak Inah a mah kan fak ho theih nan Pathian hnena kan dil mawlh mawlh a ngai a ni.

+++++

2011 September thla chhunga chanvo neitu turte

1st Sunday [4 Sep 2011]

Sacrament/Sermon

Chairperson : Pu FVL Hruaia

Hunneitu : Rev Ngengchhuana

2nd Sunday [11 Sep 2011]

Thulaipuibu Zir 14

Chairperson : Pi Hana Lalchhandami

Hunneitu : Nl Lalrinpari

3rd Sunday [18 Sep 2011]

Sermon/Thupui

Chairperson : Tv Lalzothanga

Hunneitu : Tv Zoramchhana

4th Sunday [25 Sep 2011]

Thulaipuibu zir 15

Chairperson : Tv Lalhlunmawia

Hunneitu : Nl Rodingliani

+++++

Article

NUN HLUI MANGTHA

By F. Zothlamuana

Tlai khat chu thiante nena awm e ti lo chuan ka rilru ka lo kawm veng veng mai a, ka thawlak a zawi fan raih mai a, muang changin van lam chu ka han thlir chho va. Chhawrhthla eng pawphet mai chu ka thlir reng a. A lan dan atang chuan lei lam eng tam lutukin a mawina a paih sak vek ni hian ka hria. Minute reilo te hnuah chuan thawpui chhuah pah chuan “Awi! kan khuaah chuan e, I enna daltu a piang chu ka diriam thin a sin” tiin zawite hian ka han phunsap a. “I mawina eng lawmin perhkhuang tingtang te nen zan khawtlai tur reng dawn lovin I zar kan lo zo thin lai te kha aw!”

Tunah zawng, khang hunlaia kan hlimna te khan mual min liam san zo ta. Ngaiin au mah ila kir zai an rel tawh si lo. ‘Valtha tin a hun ta’ tia zanlai boar zairi te kha min hriat chhuah tir ta hial mai.

“Suihlung lenin tlangtin ka han chuan a, Zanpar rimtui suihlung kuai tu reng’an a leng vel e, zanpar rimtui lenin” ti a, C. Van’an thiam taka a sak fawn delh delh te kha ka thinlaiah a lo thar leh uar uar mai!

Thlasik laia daithlifim vawt raih mai leh boruak thiang tak karah chuan Hmangaihna pawh a par mawi zual thin nameuh mai, Tunah zawng khang kan hlimna thin, tlang leh mual zawng zawng te khan kan hriat reng na turin sulhnu tak ngial pawh min hnut chhiah ta lo.

Avang chu Hmasawna-in thlaler ram ang hialin a ti tiau zo ta. Khawvel hmasawnna chak taka fawn vel chuan mitin te hi a hrut a, chu mi karah chuan keini ho pawh min chim pil ve mek zawng a nih hi!

Tun hma ka hlimpuithin te khan min ti tlei zo tawh ta lo. Duh tawk tih a awm thei lo bawka mahni nunna hial pawh thap ngam turin hmasawnna chuan huai senna min neih tir a, beiseina sang tak nen, hlawhtlin tum tlatin, then leh rual, khua leh tui, ram thlengin min then hran tir ta hial zawng a nih hi.

Mi tam takin Tuipui ral ram min kai san a, kir zai reng an rel tawh lo. Thenrual lungduh te intawn leh ni awm leh tak ang maw?

A then fam ro lung muala’n min ngai lo ten an liam si; kan chhung te leh ka khua leh tui ten malsawmna an dawn theihna tur chuan hmangaih tun a tuar a ngai tlat bawk si a ni. Ngai chungin chhungte leh thian thatte kan thlah liam a, Inhnemnan: “Chung Pathian zarah kan la in hmu khawm leh ang” tiin kan inthlir liam vawng vawng thin.

Kan Zo khawpui ngeiah lam ang let leh mah ila lenrual kim ni tih a awm thei tawh lo. Hmanah chuan lenrual duh ten nen tlai khua pawh kan var thin a, tunah erawh riakmaw va iangin chhawn tu nei lo rengin;

Aw khawnge maw in awm tak le!

Zai vawra suihlung rualpui;

Nang zawng Nun hlui mual liam ta la,

Dam takin Aw! Mangtha le!

++++++++++

Computer thar kan nei

MCFS chuan Netbook computer kan nei ta, ASUS X23FT, Intel Core i3 - 380um a ni a, kum khat warranty awm chi a ni. S$599 man a ni.

++++++++++

August 2011, MCFS Newsletter

2011-08-12T05:17:00.001+08:00

Hmeichhia tan YMA Conf. rorelnaah kekawr hak loh rel

YMA General Conference Organising Committee chuan, kumin conference rorel inkhawma kal tur hmeichhiate’n kekawr hâk loh hram ni se, an ti.

Kumin October thlaa YMA General Conference thlengtu tur, Kolasib khawpui chu kawng hrang hrangin a inpuahchah mek a ni. - Vanglaini

++++++++++

Oil zawnnan km. 3.8 verh tawh

Lok Shabha MP, CL Ruala, Ministry of Petroleum Standing Comittee member ni bawk chuan ONGC-in Meiduma tuialhthei zawn hna an thawh mek a tlawh a; ONGC hnathawkte chuan km. 3.816 an verh tawh tih an lo hrilh.

Thu dawn danin, ONGC hian km 4.3 thleng an verh dawn a, hei hi thla khat leh a chanve chhungin an verh thlen theih an inbeisei. Lei verh mekah hian gas an laih chhuah hmasak rin a ni a, tuialhthei pawh an laih chhuah ngei an inbeisei a ni. Mizorama oil leh gas zawngtu company-te hi Mizoram sorkar chuan MoU ziahpuiin, ram leilung fa a tam thei ang ber chhawr turin thu an thlung tawh niin thu dawnna chuan a tarlang. - Vanglaini

++++++++++

Medical college din turin hma lak mek a ni

Health Minister Lalrinliana Sailo chuan, Referral Hospital, Falkawnah medical college din tura hmalak zel a nih thu House a hrilh. Chief Minister pawhin Refferal Hospital peih fel a nih hunah Aizawl Civil Hospital chu sawn a nih tur thu a sawi bawk. - Vanglaini

++++++++++

CM in NIT hmun tur a tlawh

August ni 2 chawhnu khan Mizoram Chief Minister Pu Lal Thanhawla chuan Thenzawla National Institute of Technology (NIT) hmun tura ruahman chu a hmunah kalin a thlir a.

Chief Minister chuan, NIT tura ram pek chhungah mimal tan ram neih a thiang lo tih a sawi a, "A nei an lo awm a nih pawhin cancel nghal vek tur a ni," a ti.

NIT dinna turin kum nga chhung atan cheng vbc. 520 ruahman a nih thu hriat a ni bawk. - DIPR

++++++++++

Raj Bhavan sak that a ni dawn

Mizoram Governor chenna In Raj Bhavan chu sak that tura ruahhman niin, 21st July khan Governor MM Lakher-a leh Chief Minsiter Lal Thanhawla te chuan, Raj Bhavan sak thatna tur lungphûm Raj Bhavan Annexe bulah an phúm nia thudawn a ni. - Vanglaini

++++++++++

Leimin leh tuilen duhna hmun zirchianna atlas tlangzarh

August ni 1 khan Mizoram Remote Sensing Application Centre (MIRSAC)-in Remote Sensing leh Geographic Information System (GIS) thiamna hmanga Mizoram chhunga leimin duhna hmun leh tuilen theihna hmun Atlas an buatsaih chu Planning Minister Pu H.Liansailova’n a office chamber-ah a tlangzarh a ni.

Project Director Dr.R.K. Lallianthanga’n satellite thlalak hmanga an zirchian dan a tarlangah chuan Mizoram pumah leimin duh zualna lai chu 8.65% a tling a, Aizawl khawpui chhung bikah chuan leimin duhna lai chu 20.75% leh leimin duhzualna lai chu 1.32% a ni a. Mizoram pumah tuilen duhna hmun chu 37.25 sq.km. lai a tling a ni. Heng an zirchianna te hi a map-in Atlas-ah hian tarlan vek a ni. - DIPR

++++++++++

India U-16 team-ah Mizo panga:

Nepal ramah Under-16 boys South Asian Football Federation Cup (SAFF Cup) neih mek a ni. India chu Pakistan leh Maldivas nen group A-a dah a ni. India team-a Mizo panga te:

Lalramzauva Khiangte - Luangmual

Lalrammuana - Ramthar Veng

Daniel Lalhlimpuia - Serchhip

Vanlalthlamuana - Ramhlun S

Vanlalduatsanga - Mamit

++++++++++

Stadium zawh thuai beisei

Sports Minister Zodintluanga chuan Lt.Col. ZS Zuala zawhna chhangin, Mualpuia Rajiv Gandhi Sports Stadium phase-I chu kumin August thlaah zawh tum a nih thu House a hrilh a; Phase-I contractor chu Lloyd Insulation (India) Ltd, Kolkata a nih thu a sawi.

TT Zothansanga zawhna chhangin, Minister Zodintluanga chuan, Lammuala phûl lem phah te, Chawnpui Sports Complex sak leh Mualpuia stadium sak mek te, Pitarte Tlang, Republic Venga indoor stadium sak mekte leh hmun hrang hranga hmalak dante House-ah a hrilhfiah bawk.

Zodintluanga chuan, Pitarte Tlang mini sports complex chu mamawhna a sân tawh avangin chhun-zan zawma hna thawh a nih thu a sawi a; district hrang hranga boxing ring pek chhuahte enkawl dan a sawifiah bawk a ni. - Vanglaini

++++++++++

Mizo tlangval Snooker Champion

Lalrinsanga Renthlei chu July 26-27 2011 chhunga Indian Junior Snooker Championship, Chennai-a neihah a champion. - Vanglaini

++++++++++

PENSION HLAWH TIPUNG

Myanmar sawrkar chuan June 30 khan sawrkar hnathawk pension hlawh chu a tihsan thu official-in a puang. A san dan chu a tlem berah 20000 atang a tam berah 110000 thleng a ni ang. Tunah hian sawrkar hnathawk pension, pension hlawh la nuai 12 chuang an awm a.

Myanmar sawrkar hian kum 1993 atang khan sawrkar hnathawk pension hlawh hi vawi 2 a lo ti sang tawh a, tun hi a vawi 3-na a ni. Pension hlawh pung hi July thla atang khan lak chhuah theih a ni.- Tahan Times

++++++++++

India in Chin State $6m tanpui dawn

India sorkar in Chin state hmasawn nan tanpuina US$ maktaduai 6 pek a tum thu hriat a ni.

He thu hi Mandalay-a innghat The Indian Consul General Dr. Madan Mhohan Sethi chuan August ni 1 a Halkha a zu tlawh tuma a sawi a ni.

India-in Chin State puala tanpuina a pek vawikhatna hi a bik takin Hriselna (Health), Zirna (Education) leh Social sectors lama hman tura ruahman a ni.

Kawlrama State rethei bera sawi India sorkar-in hetia tanpuina pek a tum hi lawmawm an tih thu Chin political party hruaituten an sawi. KNG

++++++++++

FIFA in Burma a hrem dawn

July 29 khan Burma leh Oman ramte World Cup 2014 qualifier tan Yangon-ah an in khel a, entu mipuite hlauhawm taka an chet avangin laklawh deuhva tih tawp a ni.

Burma-in goal 2 an phurh chiahin Burma mipui thinrim sosang chuan field chhungah thil chi tin reng: nihliap, slipper, tui bur, leirawhchan thlengin, an vawm lut a, filed sira Oman reserve player thenkhat an inhliam thu hriat a ni bawk. Oman chu hnehna pek a ni a, World Cup tel tur thlitfimna atangin Burma chu a tla fel ta a ni.

Tunah hian FIFA chuan thilawmzia a chhui mek a, Burma ramin a ram chhunga ‘Home match’ a khelh khapsak a nih rin a ni a, danah chuan ‘inkhelh laia field-a thil a tlakin pakhatah US$5000 zel chawi tir tur’ tih a ni. - Irrawaddy

++++++++++

MSF Education Seminar

June 25 khan kumina matric pass-te tan Mizo Students Fellowship, University of Kalay chuan Mission veng MYA chapel-ah Education Seminar a buatsaih a. Matric pass nu leh pate sawm tel an ni. University kal tan turte hlawhpui tur Subject tha tak tak an zir ho thu hriat a ni. Tahan Times

++++++++++

Editorial

MCF hi December Sunday hmasa berah kan inthlang thin a, a chhan chu kum tawp thlaa inkhawm kan that ber ni tura kan ngaih vang niin a lang.

Mahse thenkhatte ‘ka’ kan dawn danin thla khata nikhat chauh off-day neiten Kristmas Nia chhuah an duh zawk avangin Sunday hmasa berah an lo chhuak lem lo tih a ni a, chuvangin kumin chu hruaituten inthlan an ti hma pawh a ni mai thei tih thuruk kan han khi-lai hmasa a che u.

News lam pawhin kum tawp nghak tawh lovin, kumin chu inthlan chungchang kan thlur tan mai dawn a ni. Keimahni huangah a tlangpui kan tial phawt a, hei hi nikum November-a chhuah tawh kan han modify a ni a, a lehpekah OB te, Committee memberte chungchang pawh kan rawn tarlang zel ang. A duh aping rawn ziak ve turin kan han insawm nghal bawk e.

Pu Siama’n thutha deuh a rawn thawh a, a chungah kan lawm hle, chubakah, YZTP Pu Zawma thuziak, Tahan Times-a chhuah tawh, min rawn sihhmuh bawk a, kan lawmna a thuahhnih tih kan han tarlang e.

Bible chungchang hi Tv Lalhriattira lakkhawm a ni a, tun tuma News kan chhuah zawng zawng hi Board member-te thawhkhawm dial dial a ni. Biaka’n June thla chhuak a siam khan MCFS football khelh chungchang a tarlang ta lo nain (duh lo nilovin), tun tumah Mizoram leh Burmaa Mizo football khelh thiamte chanchin telh tura min rawn tur sek pawhin hmun a chang ta lo a ni.

+++++++++++

Lawmthu

MCFS Hlabu chhut thar, tuna kan hman mek, siamna zawng zawng hi Tv Lalhriattira’n Pathian ropui nan a thawh a ni. Kan Lawm E.

Hriattirna

MCFS Chairman Pu F Vanlalhruaia Phone number thar: 9849 3045

++++++++++

2011 July thla chhunga chanvo neitu turte

1st Sunday [7 Aug 2011]

Sacrament/Sermon

Chairperson : Pu FVL Hruaia

Hunneitu : Pu Laldinpuia

2nd Sunday [14 Aug 2011]

Thulaipuibu Zir 12

Chairperson : Tv Lalhriattira

Hunneitu : Nl Lalchhandami

3rd Sunday [21 Aug 2011]

Bible Sunday

Chairperson : Nl Lalramdinpui

Hunneitu : Jimmy Lalruattluanga

4th Sunday [28 Aug 2011]

Thulaipuibu zir 13

Chairperson : Pu Joshua

Hunneitu : Tv Lalhriattira

++++++++++

Inthlan Thurawn (1)

1. MCF hruaitu hna hi rawngbawlna a nih mai bakah tlawmngaih thil tak tak a ni a, Singapore ram angah hi chuan hun pe thei mi thlan thiam a pawimawh em em a ni.

2. Member-te enkawl hi MCF thiltum pawimawh em em a nih avangin kan hruaitu atan member-te harsatna hrethiama, hnema tanpui theih dan ngaihtuahpui tura inhawng reng mi a nih a ngai. (I phone apianga nel awm lo deuhva lo chhawn mi an nih chuan chu ti hlauh!)

3. Mizo vek nimah i la, hmun hrang hrang leh Kohhran hrang hrang insuihkhawm kan nih ril taka hriatfiah a pawimawh, hruaitu atan hmun hrang hrang Kohhran hrang hrang a mi lawrkhawm dan thiam pawh kan lungrual zelna atan tih makmawh a ni.

4. Talent dawn zawng a in an loh avangin mawhphurhna la tura kan thlante chu an hna tur thlir sak thiam a tul.

5. Fellowship hmalaknaa min hruai tur chuan helaia an hman tawng leh thilawm dan hre tha thawkhat nih a ngai tih hria i la.

6. Eng che nge pastor nei lova kan awm reng dawn hriat a ni lova, hruaitute hi thil tam takah pastor-te aiawhtu an nih a ngai fo thin a, mi uaplum theitu kan thlan thiam a ngai bawk.

++++++++++

Nunkawng hruaitu

by Lalsiamthanga

Hringnun lamtluang zawh mek hringfate hian, kan nitin nun dan leh kan khawsak dante hi nguntaka kan thlir chuan kan ke pen zelna tur (kan hma thlir) min hmuhtirtu tur beiseina kannei theuh a, chu kankawng zawhmek chu kan hmuhdan leh kan thlir thiam dan erawh a in ang lo thei hle ang.

Nu pumchhung atangin saruak maia lopiang chhuak mihringte hian khawvel eng kan hmuh tirh atangin kan nunkawng chu a intan nghal mai a, nau te mai kan nih lai chuan kan nu leh pate min hruai dan ang apiang chu kan nunkawng zawh dan ani mai a, mahni a khawsa rual kan lo nih ve atang erawh chuan, kan nunkawng zawh mek chu fimkhur taka mahni a ke kan pen a lo ngai tawh dawn a ni.

Nun kawng zawh mektu hringfate chu an kalna kawng kawhmuhtu azirin an ke pen a danglam hma em em a, khawvel thil lam thlir a zawhtu nun leh Krista hruaina kawng zawha ke pentute nun dan i han thlir ho teh ang. Khawvel lam thlir leh mahni kawng ‘ar khaw thim dai’ ang maia hmuh fiah leh tumna zawn nei mumal lotu chuan a nun kawng tichhe theitu tur kawng bum boh tak tak chu paltlang a ngai a ni tih reng hre lovin ke a pen mai thin a, a tawp a thihna lui kawr ruamahte leh mahni phur zawh loh nghawngkawl inbatin a tlu chhe leh thin a ni.

Kan nun kawng min hruaitu tur Krista kan nei a ni tih hrechiangtu erawh chuan, naupang a lo piang a, a nu leh pate hruaina ang zelin ke a pen mai thin ang hian Krista hruaina engah chuan ke a pen mai thin a, Krista eng chuan a nun kawng tichhe thei tu turte chu a hmuhfiah tir thin a, a tana thalo leh hlauawm tam tak te pawh a hmuhfiah tir thin a, thil tha lo leh khawvel sual lam hawina kawngte chu a pumpelh tir thin a ni.

“I thu hi ka ke a tan te hian khawnvar ani a, ka kawng a tan eng ni.” (Sam 119:105).

Kan nunkawng hi ngun tak a kan thlir thiam a pawimawh em em a , Krista eng chu thlir lova ke kan pen mai chuan nunkawng tha lo kan zawh theih nana thahnemngai em em tu setana chuan kawng tha lo lamah min hruai leh mai thin a. Sava thang kamtuin sava te duh zawng leh kal duhna zawn hriain, an eitur tuihnai thei ang ber leh an chawlhna hmun tur atana nuam thei ang ber tur a buatsiah sak a, sava te chuan a awh nan thang an kam ani tih reng hre lovin an pana a awk leh ngei thin ang hian, setan a hian kan duh zawng leh kan chak zawng te hi a hre em em mai a, kawng tha lo kan zawh theih nan min awk bet leh mai thin a ni.

Nimahsela thu dik tak ka hrilh a che u, ka kal intan a tha e, ka kal loh chuan Thlamuantu chu inhnenah a lo kal dawn si lo, ka kal erawh chuan inhnenah ka ron tir ang.(Johana 16:7). Kan nun dan kawng min hruaisaktu Krista chuan, englai pawhin kan kawng min hruaisak chu a duh reng a keimahni mai chuan ke kan pen thiam lo a ni tih hriain thlamuantu thlarau thianghlim min pe a, chu thlarau thinghlim ngei chuan kan kawngte min hruai sak thin a, khawi hmunah pawh awm mah ila kan hnena awma inpeihrenga kan mamawh leh kan dil a piangte chu Pa hnenah min thlensak thin a ni.

Krista eng chuan, nunkawng tha lo leh ti chhe theitute chu hmuh fiah tirin nunkawng thaah chuan a hruai thin a, khawvel sual thim zinga tlu chhe mai lo turin kan kawngte min tih en sak thin a, khawvela kan mamawh ei leh in kan zawnna kawngah te, sum leh pai kanzawn na kawngah te, finna leh thiamna kan zawnna kawngah te, nitina kan hmachhawn mek harsatna tinrengte leh nunkawng harsa tak kan zawh mek laite pawhin, kan kawng daltu thim chhah takte pawh min chhut en sak thin a ni.

++++++++++

Bible Society

Kum 1804 March ni 7 khan London-a Tavern pakhatah mi thahnemngaiten British and Foreign Bible Society (BFBS) an din a. Hei hi Bible Society rawngbawlna intanna alo ni ta.

Bible Nihna

-Mihring dikna chanvo thuchah bulpui.

-Dikna leh khawngaihna innghahna.

-Mite tanpui duhna thinlung min pe.

-Krista Pathianna leh mihrinna min hrilh.

-Sual laka chhandamna a tarlang.

-Rilru leh thlarau tan thlamuanna a pe.

-Mite duh leh huat a ni kawp.

-A thute hi a tlo va, chatuan atan a nung reng.

-Mi pawimawh ber Isua Krista chanchin a puang.

-A thlen chin a hneh zel.

-Lehkhabu hralh tla ber a ni.

-Mihring chanchin ziakna bua rintlak ber a ni.

-Mitin tan a pawimawh vek.

-A chhiartu tupawhin thiltha dawn tumin

an chhiar.

-Indonaa thi turte tan inhnemna tling a ni tlat.

-A chhung thu kan zirin vanram par

rimtui kan tem thin.

-Mahni intichhe mekte tan pawh beiseina thuchah nung a keng.

-Mi zawng zawngte dikna a hriatpui a, a vawng nung tlat bawk.

-Tihboral tumtute pawhin a aia thiltha

zawk tundin tur an nei chuang lo.

-Suala tlu mekte chhandamna thuchah

kengtu a ni.

By C.E Holmes

++++++++++

Bible Makna Pasarih ( 7)

1) A lo pian chhuah dan hi a mak

em em Kum 1600 vel chhunga ziah a ni.

2) A inzawm dan hi a mak em

em: Lehkhabu hrang hrang 66

nisi, pakhat ni bawk si.

3) A kum hi a mak em em:

Khawvela lekhabu hlui ber a ni.

4) A hralhna: khawvel lekhabu

hralh hnem ber a ni.

5) A tawngkam hi a mak: lehkha

thiamlo te ziak nisi, thu leh hlaa ril ber ni bawk si.

6) A vawnhim dan hi a mak em

em: Khawvela lehkhabu huat

rawn ber ni bawk si, pung zel

bawk si.

7) Mi zawng zawng a mil vek.

Bible Zir

Billy Graham-a hnenah, “Nun bul tan leh dawn ta la enge i tih ang?” tiin an zawt a. Ani chuan, “Bible ka zir nasa ang a, thu ka sawi tlem ang,” a ti a.

Donald Barnhouse-a pawhin, “Lalpa hi kum thum hnuah lo kal dawn ta se, kum hnih Bible ka zir ang a, kum khat thu ka sawi ang,” a ti bawk.

Bible Lampum

B= buy it (Lei rawh)

I= Investigate it (Hre rawh)

B= Believe it (Ring rawh)

L=Love it (Ngaina rawh)

E=Emulate it (Ngaisang rawh)

Source: Kristian Encyclopedia

++++++++++

Bethsy MCFS Inkhawmah

2011-07-08T11:55:00.001+08:00

July 2011 MCFS Newsletter

2011-07-05T00:18:00.002+08:00

Editorial

Kan editor hlui, tuna Tahana leng heuh heuh, hla phuah thiam leh ziakmi, The Rengs khan ti hian a ti thin ‘News lakhawmtuten chanchin thar in rawn thawh loh pawhin a pawi reng reng lo, Article kan ziak khat vek anga ni mai a lawm’.

Tuntum chu tihian kan ti ve a ang - ‘Ziak mite leh memberten article in rawn thawh loh chuan News kan ziak khat vek anga ni mai’ tiin.

Thil pakhat, June thla chhuakah khan telh ngei ngei tura ka dah that ‘CCFS Sport’ a kan va tel chungchang kha a rawn tel ta tlat lo kha mak in lo ti ve em? Min lo hrethiam hlawm dawn nia, eng dang vang a ni lova, June thla chhuak kha ka thawhpui, Board member zinga Tv Biakhmingthanga sawngbawl a nih vang leh a ni hi MCFS sport in-charge a nih vang te, khami tuma kan result a that loh vanga dah bo a tum vang te, ni lovin, ka ziahsa ka lo hlanchhawn theihnghilh vang zawk a ni e. CCFS Sport-a tel fellowship zingah MCF kan hlim ber tih mitin hriat a nih kha, member te hlim tlan kha kan tel chhan a ni a, kan hlawhtling hle a ni.

A chunga ka sawi angin tuntum chu ‘Zan Khat Chu’ tih chawpchilh deuhva ziak article tih loh a dang zawng chu News in kan hnawh khat ta mai a. Saya Bawla’n sermon a rawn thawh kan beisei teh lul nen, a khawlin a chawlhsan a, a che thei lo a ni ngei ang. Khai le, chhiar nuam u le.

++++++++++

Keimahni

2011 July thla chhunga chanvo neitu turte

1st Sunday [3 July 2011]

Chairperson : Tv Biakhmingthanga

Hunneitu : Pu Sangengmawia

2nd Sunday [10 July 2011]

Thulaipuibu Zir 10

Chairperson : Pi Hannah

Hunneitu : Tv Jimmy LRTluanga

3rd Sunday [17 July 2011]

Debate

Chairperson : Tv Zoramchhana

4th Sunday [24 July 2011]

Thulaipuibu zir 11

Chairperson : Nl Lalramdinpuii

Hunneitu : Tv Biakhmingthanga

5th Sunday [31 July 2011]

Sermon

Chairperson : Nl Lalsangliani

Hunneitu : Tv Lalrawngbawla

+++

Meeting

June 26 Inkhawm ban khan MCFS EC chuang meeting a nei a, thuawmsa debate vawihnihna chuangchang a rel a ni. Thupui leh sawitu/hnialtu atana a thlante chu:

Thupui: ‘Chhungkaw enkawltu atan hmeichhia aiin mipa an pawimawh zawk’

Sawitu

Tv Lalrawngbawla (leader)

Tv Biakhmingthanga

Hnialtu

Tv Jimmy Lalruattluanga (leader)

Pu Joshua

Sawitu leh hnialtute hi minutes 7 theuh hun pek an ni ang a, leader ve ve hi a tawp khar nan minute 3 ve ve pek belh an ni ang. Tin, he debate programme hi July 17-a neih tur a ni.

+++

Training

June khan MCFS Leadership Training tum (2)na neih a ni a, hruaitu leh member belhin mi (8) an kal.

He training hi biakinah nikhat chhung hman a ni a, a kalten an hlawkpui hle nia thu dawn a ni.

Pathianthu leh leadership chungchang PSPC pastor Rev Dr Ridge Orr-a’n a zirtir a, intihhlimna hun tawi hman a ni bawk. Fellowship-in training kalte chu chhunchaw leh coffee break a buatsaihsak a ni.

++++++++++

Chanchin Lawrkhawm

HMA in Border venthat phut

Union Home Ministry Affairs chuan Mizoram sorkar hnenah Burma mi lo lut uluk taka endik turin a hriat tir a ni.

Hei hi kumin January thlaa a hriattir tawh hrilh nawn lehna a nih thu June 18 khan The Times of India chanchinbu chuan a sawi a ni.

Sorkar laipui chuan India danin a phal chin, ramri atanga km 16, pela Burma mi lut titawp turin a duh a, hna zawng leh sipai sorkar kut atanga himna beiseia ‘enfiahna awm lova’ Burma mi Mizorama lolut tam lutuk hi India sorkarin a ngaimawh hle a ni a ti bawk a ni.

Tunhma chuan India-in Burma mite hi ramri atanga km 40 thleng zin a phalsak thin a, tunah chuan km 16 pela kal duh chuan New Delhi-ah phalna a la phawt tur a ni tih a ni bawk.

++++++++++

MZ ah mobile nuai 6 chuang

Kum 2010 tawp thleng khan Mizoramah mobile phone connection 6,21,415 a awm tih Mizoram Statistical Handbook 2010 chuan a tarlang a; 2009-a aiin 1,12,978-in a tam a ni.

Mobile phone service provider paruk zingah Airtel hmangtu an tam ber a, 2,17,740 a nei a, a dawttu - Reliance chuan 1,34,836 a nei thung.

Statistical Handbook 2010-a lang hman lo, Mizoramah mobile phone service provider thar, Idea a awm leh tawh bawk. – Vanglaini

++++++++++

Mizorama ran awm zat

Kan hnungthla June 27 chhuak 18th Quinquennial Livestock Census 2007 Report-a a lan danin, Mizoramah mi pakhatin ni khatah bawnghnute gms. 33, kum khatah artui 42 leh sa kg. 11.52 ei ang a ni. Indian Council of Medical Research-in duhthusam a siam ang chuan, mi pakhatin ni khatah bawnghnute gms. 240, kum khatah artui 180 leh sa kg. 12.41 ei tur a ni thung.

Ran awm zat report

Bawng lian 10,694

Zobawng 24,203

Lawi 5,832

Sial 1,939

Beram 974

Kel 15,710

Sakawr 1,357

Vawk lian 2,19,766

Zovawk 47,143,

Ui 35,302

Sazupui 879

Vai ar 3,82,080

Zo ar 8,49,424

Varak 6,544

Sai-ar 333,

Zawhte leh a dang 501

- Vanglaini

++++++++++

Snyod Choir-in Taiwan pan

‘I Love Taiwan Mission 2011’ tih programme hmang turin Central KTP hruaitu thenkhat leh Mizoram Synod Choir-te chuan June 25 khan Aizawl an chhuahsan a, June 29 atangin he programme hi an hmang tan dawn a, July 21-ah Aizawl lo thleng leh tura beisei an ni. – Vanglaini

++++++++++

Nirmal Gram Puraskar Award: India ram chhunga khaw faite an pek thin chu June 23 khan khaw panga, Bawngthah, Hliappui, Lallen, Phulmawi leh Zawlnuam |huampui hnenah CM Pu Lalthanhawla’n a hlan. – Vanglaini

++++++++++

Maid chawlh pek ngaihtuah mek

Minister of State for Community Development, Youth and Sports Madam Halimah Yacob chuan domestic helper (maid) te kartin nikhat chawlh pe tura ‘dan’ siam turin sorkar a nawr a ni.

Minister chuan June ni 20 khan kartin nikhat chawlh pek an nih chuan maid-te rilru hah leh taksa chau lutuk a chhawk zangkhai phah ngei ang tiin a sawi a, tin, hna dang thawk ho ang bawkin domestic helper ten chawlh an mamawh a ti bawk a ni.

Ministry of Manpower (MOM) chuan chawlhpek chungchang hi a ngaihtuah mek thu a sawi ve nghal bawk a ni.

Singapore hi UNO hnuaia pawl pakhat ILO in June thlaa dan thar a siam: Maid-te hnathawhzat darkar bithliah, an hlawh zat tur siamsak ang chite tawmpuina hming a sign duh lova, MOM chuan he dan thar hi zawm thei tur dinhmuna Singapore a din hunah chauh hming ziah a tum thu a sawi bawk.

Tunah rih chuan chhungkaw tamtakin thlakhat nikhat chawlh pek pawh harsa a la ti niin a lang a.

Newspaper-ahte chuan Singapore hian ILO dan thar zawm thei rih lo mahse, maid-te kartin chawlh pek theih a nih chuan hmasawna lian tak a nih dawn thu uar takin an ziak hlawm a ni. – The Straits Times

++++++++++

HDB tuizemah ruang char

May 16 khan Woodlands veng HDB tuizem pariat zinga pakhatah nula ruang chhar a ni.

Mithi hi Indonisian maid kum 30 a upa niin police te chuan an sawi a, tualthah chungchangah a bialpa nia an rin Bangladesh mi man nghal a ni bawk. Tuizem chhunga ruang awm thu hi he Bangla thian pakhat-in police hnenah phone-in a hrilh nia hriat a ni.

Woodlands Drive 73, Block 686B a khawsa chhungkhaw tam tak chuan he tuizem hi an ring a, ruang awm thu an hriat hmain an tui hman eng deuh ruai leh ban deuh chuan dan pangngai a ang lo tih an hmu a, mahse tam tak chuan nitin mamawh - chawchhumna leh thil dang - atan an lo hmang hman a ni.

Mipuite ngenna angin Town Council chuan S$40,000 sengin tuizem thar nen a thlaksak tawh thu hriat a ni. – yahoo news/ST

++++++++++

Mihring tawlhruk thuah dan thar

Singapore sorkar chuan phalna tel lova inzuar leh hna dang thawk a mante chu tunhma angin immigration dan bawhchhia tia hrem nghal lovin misual kut tuar anga ngaiin an thuhla chhuichianga tha taka enkawl a tum tawh thu a sawi.

Thuneitute chuan khawvel hmun hrang hranga atanga mihring tawlhruk chingten an pan nasat hlauvin dan khoh tak an lo hman thin thu an sawi a; Nawhchizuar leh phalna tel lova hnathawkte chu hrema thawn hawng an ni thin a.

Nikum khan mihring tawlhruk (human trafficking) do chungchangah America sorkar chuan Singapore chu ‘thlingthlak reng tul’ Tier 2 Watch list ah a dah a, an tuar na hle a ni.

Roreltute chuan tun ang hian dan tharte siamin leh inter-agency dinin ‘human trafficking’ do beihpui thlak a tum a, mahse kumin June thla ni 27 chhuak US Trafficking in Person list-ah chuan Tier 2 ah a la dah tho va, Watch list atang chuan a paih ta a ni. – The Straits Times

++++++++++

Lawngsiamnaah kangmei chhuak

May thlaa Benoi Road lawngsiamna hmuna kangmei chu fimkhur lohvanga chhuak niin MOM chuan a enfiahna report a siam a ni.

He kangmei, May 12 a chhuak, avang hian a hmuna hnathawk pahnih an thi a, Malaysian leh Bangladeshi a nih thu hriat a ni.

Kang mei chuan he mi hmuna an siam mek tank-14 awm chi lawng hmalam tank pali a kang alh a, a hma ni 3 a painting spray (tank chhung rawng hnawih) nena inchawhpawlh ‘awlsam taka alh thei thil’ chambang vanga kang ta chiam niin report chuan a sawi a ni.

Hei hi buaivang emaw, hmanhmawh vanga ‘safety rule’ zawm that loh atanga beisei loh taka thil thleng nia a lan thu MOM chuan a sawi a, lawng neitute leh hnathawktute chu englai pawha in ralringin ‘safety rule’ anga thawk thin turin a fuih thu a tarlang bawk a ni. – mom.gov.sg

++++++++++

UN in SG tan Mr Ban thlang nawn

Secretary-General Ban Ki-moon chu kum 5 dang UNO kaihruai leh turin thlanthlin leh a ni.

Mr. Ban hi eptu awm lova thlan tlin a ni a, a term hmasa kum 5 chhunga a thil tihthat a sawinaah 2008 a Nargis thlipuiin Burma ram a nuai laia UN hminga theih tawp chhuaha a tanpui chungchang a telh a ni.

Mr Ban, South Korean foreign minister hlui, leh U Thant (Burma) kha Asia atanga UN SG thawk awm chhun an ni. – BBC

++++++++++

Holland-ah Ran hrawk zai khap

Muslim leh Juda sakhaw zuituten nghawng zaia thisen thlawrchhuah hmanga ran an talh thin khapna dan thar chu Holland ram dan siamtuten an pass tawh a, September thlaa hman tan theih beisei a ni.

Hei hi Muslim leh Juda hruaituten an kalh nasa hle a ni.

Nikuma New Zealand rama hetiang ‘dan’ pass lo tura hlawhtling taka dodal theitu Juda hruaitu pakhat David Zwart chuan kum sang tam tak an lo hman thin, tun anga khap tum hi dona anga a ngaih thu a sawi a.

Judan ten ‘kosher’ an tih Muslim ten ‘halal’ tia an koh ‘sa ei thiang’ nitura nghawng zaia ran talh hian ranten an thih hmain nasa taka ‘na’ a tawrh avanga khap tum a nih thu Dutch thuneituten an sawi a ni. Holland rama cheng Juda leh Muslim ten ram dang atanga ‘sa’ an tawlh a ngai tawh dawn tihna a ni. – CNN

+++++++++++

NY State-in Tuai Inneih Phalsak

America ram New York State chuan tuai inngaizawngte ‘dan’ anga inneih a phalsak tawh a.

He dan hi State Senator ten June 24 khan vote pein an ‘pass’ a, Governor-in a nemngheh hnu ni 30 atangin hman tan nghal a ni ang.

New York State hi US chhunga tuai inneih phalsak State paruk zinga State lian ber a ni ang a, he State chhunga dan hmaa innei tur hian State chhunga cheng nghet nih a ngaih ve loh avangin tuai innei duhten State hmun hrang hrang atanga an rawn pan huai huai rin a ni.

Mihring theuh theuh ang khat veka en tura tanla pawl leh, Tuai leh patil hamthatna tana thawktute chuan lawmna dar an khawngri nasa hle a, sakhaw hruaitute chu a ngui ve thung a ni.

New York Catholic Bishop chuan pawi a tih thu a sawi a, he dan thar hi sakhua leh mihring nihphung kalha a ngaih thu a sawi bawk.

Mithiamte chuan Bible chang thenkhat tanchhanin tuai hi Pathian anchhia, serh thuhmun inneih hi Pathian thilkhap anga an ngaih laiin, tuai tantute chuan Bible-ah tuai hnawl thu fiah taka tarlanna a awm loh thu an sawi ve mek bawk a ni.

Khawvel khaw ropui ber leh khawvel sumdawnna hnuk anga ngaih New York khawpuiah mipa leh mipa inneihna dar a ri chhen tawh dawn niin a lang. - NYT

+++++++++++

E-coli

Europe khawmualah E-coli, kawtha lo natna hrik, a leng a, a intanna German rama chuan Spain ram atanga lo kal fanghma atanga lo chhuak niin an ngai a ni.

Mahse, tunah chuan Germany ram chhuak bean-tiak (sprout - pe-pin-poh) atanga intan a ni tih finfiah a ni ta. Zin miten, German ram atangin an pu darh a, tunah chuan, Europe leh khawvel ram 16 ah a taidarh tawh nia hriat a ni.

He natna hrik pai damlo 4,000 chuang an awm tawh a, mi 50 an thi a, za chuangte chu ‘kal’ thlak ngai khawpin an na mek bawk.

E-coli bacteria chu Escherichia coli lamtawi a ni a. Mihring leh rannunga natna thlen thei bacteria zinga mi a ni. E-coli avang hian kua a tha lovi ekah thi a tel a. Kaih a thlen theih bawk.

E-coli bacteria hi artui kan, sa hmin manglova chhum leh thil kan atang te, thlai rah thlaihnah thianghlim lo ei vang te, mihring ek - lei that nana an siam - atang tea inkaichhawn theih a ni. - tuivar.com/AP

+++++++++++

Over-stay ngaidam dawn

Malaysia sorkar chuan a ram chhunga phalna tel lova khawsa ramdang mite ngaihdam a tum thu a puang.

‘6P Programme’ an tih ngaihhnathiamna puangin phalchin pela khawsa leh visa dik tak nei lova hna thawkte chu July 11 atangin karhnih chhunga in report tura tih an ni a, dan an siam nena inmilte chu hna thawh chhumzawm phalsak an ni ang.

Mahni rama hawng duhte chu chamrei man chauh chawitir an ni ang a, hnathawk chhunzawm theite chu overstay man RM 300 leh awmphalna RM 100 thun tir an ni ang a, tin, visa fee, medical check-up leh senso dang nen RM 2000 atanga 3500 inkar sen a tul dawn nia hriat a ni.

He programme hi December 31, 2011 a zawhfel tura duan a ni a, chumi hnuah chuan overstay leh illegal-a khawsate uluk taka dapchhuaha hrem an tum thu an sawi bawk.

He ramah hian phalna tel lo (illegal)a hnathawk maktaduai 2 vel an awm nia chhut a ni.

Malaysia-a raltlante enkawltu UNHCR chuan he programme leh raltlante inkungkaihna thuchhuah a la siam lo a. Mahse raltlante chu illegal status chhunga dah an ni lova, ram thumna pemluh hmaa cham rih mai an nih avangin he programme-a inziah luh a tul a rin awm loh thu raltlan hruaitu thenkhatten an sawi. – Zovi (Huiva Group)/ST/The Malaysia Bar (online)

++++++++++

France-in Libya helho tanpui

France chuan Libya hruaitu Gaddafi paihthlak tuma hel pawl ralthuam a pek thu a puang.

Hei hi Gaddafi-a’n a mah duh lotute kut a thlakna laka venhim nan a tangkai dawn vanga ti a nih thu France chuan a sawi a, silai, silaimu leh tank kahchhiatna roket thahnem tak an pek thu an sawi bawk a ni.

UN chuan Gaddafi leh a pawlten mipuite rawng taka an thah thin venhim nan ‘tha thawh’ a phal a, chu chu NATO in hmalain Gaddafi-a sipaite tawmna hmunte chu ni 100 chuang a bomb tawh a ni.

Hetih lai hian China leh Russia chuan NATO (Britain, France, Italy, US, etc. tangrual pawl) chu UN phalna pelin sorkar dinglai paihthlak tuma a hleihluata tharum thawhah an puh ve mek bawk a ni.

Libya buaina avang hian mi sing chuangin nunna an hloh tawk nia hriat a ni a, Gaddafi leh a fapa pahnihte chu tualthattua puhin khawvel court (International Criminal Court)-in man atan a mi duh list-ah a telh ve mek bawk a ni. – Agencies

++++++++++

Tek-in Mizo Tlangval Pa 3 a Deng

June ni 5 khan Haizawl khaw mi tleirawl pathum tek-in a deng a, chawplehchilha an boral nghal thu hriat a ni.

Tleirawl pathum, Thara (14), Ramchullova (16), Teroa (17), te chu rama bawng an venna hmun atanga an hawng, tlailam dar 4 vela chhiat tawk an ni.

Haizawl khua hi Tahan-Tamu kawngpui dung, Tamu thlen hma lawka awm Zo khua a ni a, Mamouh/Htan-Ta-Pin tia koh a ni bawk.

Ram hruaitute an that loh avangin foreign company tam tak Burma atangin an kal chhuak a, chu chuan thalai tam tak hna nei lovin a siam a, sum leh pai a harsat avangin Burma ramah naupang sikul kai lova a awm awm thawk an tam em em bawk a ni. – khonumthung

++++++++++

Burma aiawha Boxer Bawi Nei Sin

The Womens Junior and Youth World Championships buatsaih Boxing inelna ropui, Antalya khua, Turkey rama ni April 24-30 chhunga neihah khan Nelly Bawi Nei Sin-i chu kan ram aiawha tirh a ni. A mah hi Sadaw (Tahan atanga km 4 vel) khaw mi a ni a, Pu Than Ceu-a leh Pi Hrang Nei Kil-i te fanu a ni.

Bawi Nei Sin-i hian kum 2009 atang khan Boxing a lo khel tan a, kum 2 chhung a training zawhah ram aiawha thlan a ni ta a ni.

A tum khatnaah Romania nu nen an intum a, a hneh lo phawt a. Tan lak a la tul nasatzia uar takin a sawi. He inkhehnaah hian ram 40 atangin Boxer 40 chuang an tel a, kum 18 hnuai lam vek an ni nghe nghe.

Bawi Nei Suii hi kumin South East Asia inkhelhna ropui, Indonesia rama buatsaih turah hnehna a chan ngei theih nan tunah hian nasa takin tan a la mek a ni. – Tahan Times

++++++++++

Teddim kawngah motor accident

May 17, Thawhlehni khan Tedim-ah leichi (Mi Aw Za) phur motor (Truck) a che suala, driver leh pasenger pakhat an thi.

He Truck hi Tiau atangin Tahan lam pan tur a ni a, dan pangngaiah chuan leichi ip 300 vel an phur thin a, tuna mi hi chuan ip 400 lai a phurh avanga che sual niin a hmuna hmutu pakhat chuan a sawi.

Driver hi Pu Lian Kham, Laitui khua a ni a, passenger thi hi Haimual khaw mi, nula, Falam damdawi ina Nurse zirlai, chawlh a hmang zo, zir zawm leh tura a kal chu heti ang thil thleng rapthlak tak hi a tawng ta a ni.

Weight a tam deuh avangin kal hrih lo turin driver dangin an dang a, mahse he driver hian ngai pawimawh lovin a kal lui ta tho a, tichuan muang changa letin kham feet 100 vela thukah a lum thla ta a ni. – Tahan Times

++++++++++

Zan Khat Chu

by Lalrinawma pu

Tahan chhuak chanchinbu pakhat enkawltu hnen atangin ‘Thu ziak rawn thawh ve la maw le’ tih sawmna ka dawng a, ‘Kei ve mai thuziak thawh tura min sawm chu! khawnge, kan ziak teuh teh ang’ tiin computer ka han hawng a, kan ziak tan nghal dawn a...

‘Eng thu nge ka ziah ang’ tih rei lo te ka han inngaihtuah a, rei lo te atangin rei deuh ka ngaihtuah zel a, a heading pek tur atangin ka buai nghal chu a ni ta der mai.

Ka rilru ka siam fel a, tunlai thu thang ka ziak teh ang tiin. Ka han ngaihtuah nawn leh a, internet atanga ka thu chhiar leh hriatte chu khawvel hmuntin atanga an lo chhiar ve theih vek, Tahan lam hriat sa vek a ni awm si a, tih ka rilruah a lo lang a, mi hriat sa sawi ai chuan tiin ka hnawl fel nghal.

Politics ka hriat tlem te, ka ngaih dan leh hmuh dan tam deuh belhin ziah a tha zawkin ka hria a, mahse ‘Burma ramah an chhuah ngam dawn em ni?’ Tih zawhna a lo lang leh a, a chhanna chu ‘ka chiang lo’ tih hi a ni. Hetiang thil hi, a zalen loh avangin kan ramah chuan sorkar sawichhiatna a ni mai thei a sin! Politics chu ziah loh a tha zawk ang ka ti leh ta a.

Aw le, fuihna thu tluang ziak i la ni mai, ka ti ta a, zau zawkin ka ziah dan tur ka suangtuah zui ta a; Ti atana ‘tha lo’ anga ka sep chhuah tur tam tak chu keimah ngei ngei pawhin ka bansan theih loh thil an lo ni reng mai, tin, mite tih ngei ngei atana ‘tha’ anga ka ngaih ho kha ka tlin loh thil deuh hlir a lo ni si! He subject chu khawih lohva dah that ka thlang leh ta zawk a ni.

‘Mi te pawh’n university life an ziak fo a lawm’ tiin thlur ka rilruk ta a, chuti chuan Kalay University-a sikul kan kal dante mitthlaah a lo lang a, Biaka te nen Class lak aia thingpuidawra hun khawhral mai mai nuam kan tih zawkzia te, library aia tlang hnuai lungpuili picnic-na hmuna chakai khawrh hlimawm kan tih zia te, lehkha en miah lova pass dan tur kan buaipui lai te, mitthlaah a lo lang a, chhiartute hlawkpui tur sawi tur ka hre der lo mai! Bus fare Ks 20 kan pe thin a, a sira uaite nen passenger kan bawr thei lutuk kha driver ten kan tlak hlauvin vawkte phurh ang maiin hrui nen min phuar khawm thin thu fiamthu atana sawi bak chu university life sawi tur ka hre ta lo.

Singapore ka thleng a, khawvar hmain sikul pana, in chhuahsan a ngai a, banah hawng lovin hnathawhna turin ka kal nghal a, zailaiah in ka thleng nitin chu a ni mai a. Mi te sawifo thin Singapore thianghlim zia te, dan an zawm that zia te, ei tur a chikim zia te, hmun mawi tak tak tlawh tur a tam zia te, ka buaipui hman ve lo. Ha hipa han sawi tur ka hre hlawl lo a ni ber mai.

Ka hria, Bible ka kawl a lawm, Pathianthu thlurin sermon ka ziak teh ang. Khai a! Zinglam dar 2 a lo ri tawh reng mai ka ti! Naktuk dar 6-a tho tur ka nih si maw! Ziak lovin mu daih teh ang.

++++++++++

Nepnois

Naupang: Kapa, thluak hian hna thawk tawh lo ta se, kan la dam tho ang em?

Pa : Kha i la dam tho kha. - sms 84180212

* Pa pakhat zurui pawh a ruih lungpuam lai tak khan a thian te’n an fuihpawrh a lawm, “In nu hi then mai rawh, a sual em mai” an ti a. Tichuan chumi zan chuan an nu chu a ma ta a, an nu chhungte’n bungrua an han la tak tak mai a, calendar leh awke chiah a chang e an tih chu. - bthu.xtreemhost.com

* A sipai tang chak pawh kha a chak lutuk a,. engah nge sipai tante chu i chak viau le, discipline a khauh khauh nen, an ti a. A chhanna chu, “ A sen chi an la tlawm thei a” tih a ni daih. - bthu.xtreemhost.com

* Nu pakhat pawh hi Pathian thu a hre lo ve tiah tiah awm asin, Vawikhat chu Krismas drama-ah a pasal chu Heroda lemah an chantir dawn a. An thenawm nu chuan, “In pâ hi Heroda lemah a chang dawn a, a inhmeh ngawt ang” tiin a hrilh a. A nupui chuan, “Theipui kunga lawn kha maw?” a ti a, An thenawm nu chuan, “ I ti awm lo ve, a ang lo lutuk” a ti a, a nupui chuan, “ E, ka hresual, Isua beng satthlatu kha maw?” a ti leh a. Thenawmnu chuan, “ I ti awm lo lutuk, tuman Isua beng an sat thla lo” a ti leh a. A nupui chuan, “ Ni e, kei hi chu thil ka hresual leh thin a, Mari angin, “a naka ka zen phawt loh chuan” tih ang vel ka ni, a la ti ta deuh deuh a. - bthu.xtreemhost.com

++++++++++

Hriattirna

MCFS Chairman Pu F Vanlalhruaia Phone number thar: (+65) 9849 3045

++++++++++

MCFS Newsletter chuangchanga sawi tur nei emaw, thu chhuah tur News, Article, Fiamthu, adt nei chuan a hnuai Address ah a thawn theih reng a ni.

Hming lem hmang duhte pawh’n editor record atan mahni hming dik ziah tel tur a ni a, tin, lehlin emaw chanchinbu/lehkhabu danga mi lak chhawn a nih chuan ‘Thulakna’ ziah tel ngei ngei tur a ni.

Mr Zoram Chhana

Blk 266, Bukit Batok East Ave 4,

#08-238

Singapore 650266

Ph 9132 4870

email: mcfsingapore@gmail.com

EDITORIAL BOARD

Editor : Zoramchhana

Members:

: Biakhmingthanga

: Lalhriattira

: Lalchhandami

: Lalramdinpuii

++++++++++