Keimahni
2011 May thla chhunga chanvo neitu turte
1st Sunday [1 May 2011]
MCFS Day
Chairperson : Pu Laldinpuia
2nd Sunday [8 May 2011]
Nute Ni Sermon
Chairperson : Tv Lalhriattira
Hunneitu : Pu Sangengmawia
3rd Sunday [15 May 2011]
CCF Sing Song Service
MCFS Inkhawm kharin kan tel ang.
4th Sunday [22 May 2011]
Thulaipuibu zir 6
Chairperson : Nl Lalramdinpuii
Hunneitu : Pu Laldinpuia
5th Sunday [29 May 2011]
Thulaipuibu zir 7
Chairperson : Pi Hannah
Hunneitu : Tv Zoramchhana
++++++++++
Chhiatni/Thatni Fund
Sum kawltu hnen atanga report kan dawn danin April thla tawp thlenga Chhiatni/Thatni Fund pe member 23 chauh an la ni. Pe thei din hmunah i ding a, i la pe lo a nih chuan kum chanve sum endik (June) hma ngeia pek i tum dawn nia.
Nikum thleng khan Member Fee kum tin kan inkhawn thin a, Hei hi MCFS Dan in member-te tih ngei ngei tura a phut a ni. Mahse Member Fee thun an thlem theih em avangin hruaitute chuan ‘Dan anga thu kan lak chuan member fee pe lo chu MCFS member ni lo an ni mai dawn si a, member fee hi khawn tawh lo i la, Mizo MCFS membera in ngai apiang chu member nisa an ni mai a, Chhiatni/Thatnia kan inchhawmdawlna tur in khawn zawk ang u’ tiin ro an rel thar a ni. Hei hi a pawimawh hle a, i ngai pawimawh hram hram ang u khai.
++++++++++
Sangi a hawng
Kan member hlun leh MCFSNews tana thahnem ngai taka thu ziak thawh thin Nl Lalhunsangi chu kan hnungthla ni 4 khan khaw lam panin a hawng. Kan ui em em a ni. Pathian awmpuina a chan zel theih nan i tawngtaipui thin ang u.
++++++++++
News
Tiau luiah tuia tlahlum ruang pa 3 chhar
Mizoram leh Burma inrina, Champhai district-a Khuangthing rama Tiau luiah April 19 khan mi pathum, Khuangthing khua Sanga, Thekte khaw mi Vanpenga leh Chungukliana te, an tlahlum a, an ruang hi April 21 khan hmuh an ni.
Champhai Police-te chuan a hmuna va kalin thil awm dan an enfiah a, heng ruang hi uluk taka an enfiahin kut inthlakna hnu a awm loh avangin tuia tlahlum vek an nih an rin thu Vanglaini an hrilh a ni. Vanglaini
++++++++++
YMA-in Buan bih ni an siam
Venghlui branch YMA chuan YMA kumpuan hmalakna atan an veng nu leh nulate tan kar khatah ni khat puan bih ní siam an tum a; nu leh nulate chu Nilaini apiangin an hnathawhna leh lehkha zirnaah puan bih turin an ngen.
Venghlui YMA-in kar khata puan bih ni siam a, Nilaini apianga puan bih tura an member nu leh nulate an ngenna hian uniform hâk ngai leh puan biha harsatna neite chu a huam lo a ni.Vanglaini
++++++++++
Hekna vangin Mizo doctor sawn
Khampat Civil Hospital-a thu Dr Dingliana chu Tamu District chhunga doctor dangte hekna avangin Chin State-ah sawn a ni.
A chhehvela chengte sawi danin Dr Dingliana hian mipuite harsatzia hriain a tlawm thei ang bera mi a enkawl thin avangin mite ngainat a hlawh hle a, a mah deuh hlir an panthin a ni. Inzai man atan doctor dangin cheng nuaikhat an chhiar laiin a ni chuan sing thum chauh a la thin a ni. Chutiang thil avang chuan a thawhpui doctor dangten thikin chunglam thuneitute hnenah a hek niin an sawi.
Khampat leh a chhehvel khaw 20 biala mipuiten sawn lo turin Burma capital Naypyidaw-ah dilna an theh lut na chungin March thla tawp khan Dr Dingliana chu Lung Bang khua, Falam Township, Chin state-ah sawn a nih thu hriat a ni. KNG
++++++++++
Kawl Kumthar Lawmnaah mi 15 thi
Kawl kumthar (water festival) chhung khan Tahan-Kalay ah mi 8 accident vangin an thi a, Tamu-ah mi 7 an thi bawk, tah hian Haizawl khaw mi Tlangmi pa 2 an tel a ni. Rilru leh taksa Insilfaina anga ngaiin tui nena in theh hi he kumthar lawm naa an tih dan thin a ni a, thalaiten nawmsipbawlna anga an hman thin avangin kumtin thi leh hliam an tam thei hle a ni. KNG
++++++++++
DMYA Inkhawmpui
Kum 2011 Tahan District Methodist Youth Association (DMYA) Inkhawmpui chu April 29 atanga May 1 thleng Myohla khuaah neih tur a ni a, thupui sawi turin Rev Vanlalzuata (Mizoram) sawm a ni.
Burma ram chhunga Mizo kohhran lian ber te zinga mi, Methodist kohhranah hian Tahan hi District lian ber niin an inkhawmpui pawhin thawm a nei ring hle thin a ni, tin, thu leh hla bakah infiamna leh intihhlimna chi hrang hrang an telh thin avangin kohhran hrang hrang thalai tam tak a hip khawm thin a ni.
‘Khawiah nge I awm?’ tih chu kumin Inkhawmpui ‘thupui’ tur a ni a, MYA unit 19 atanga thalai rual za tam tak inkhawmpui nan hian pandal (mandat) a dung tlawn 7, a vang tlawn 5 a zauva sak a ni. Huivalenthiam
++++++++++
Feng chhing ngai mawh
Ropui taka hmawn zawh tak Burma ram pum huap Chapchar Kut kha TV Station-te ngaihven pawh a hlawh hle ani. Myanmar Radio & Television (MRTV)-in channel 4 (MRTV-4) ah chhuah turin rem siamsa a ni na’n ‘Cultural dress an show tum khan an feng chhing deuh a, MRTV 4 lamin an pe chhuak thei dawn ta lo’ tiin ‘D Group’ TKTP chhuah Ainawn chanchinbu chuan a sawi a ni.
++++++++++
Khawvel
Thailand: April 28 khan Thailand leh Cambodia ramte kum zabi 11 vela sak Hindu temple, Preah Vihear in chuh vanga indo chuan inkahhai an puang, hei hian ni 7 chhung ramri-a indona chu a ti tawp rih a, mahse inremna thuthlung nghet zawk an peihfel hma chuan tuna inkahhaina hian rei a daih miten an ring lem lo. Tuntum inbeihna avang hian sipai 15 an thi tawh a, a chhehvel mi 50,000 chungin an in leh lo an tlansan a ni. He temple hi International Court of Justice chuan Cambodia ta a nih thu 1962 khan a puang a, mahse 2008-a U.N. World Heritage Site-a puan a nih khan Thailand hian a chuh tha leh a ni. AP
Japan: March ni 11 a lirnghing leh tsunami-in a tih chhiat zawng zawng kha dollar 309 billion man hu niin mithiamten an chhut. (1 billion = maktaduai 1000). Kha thil thleng rapthlak avang khan mi 25000 vel an thi nia chhut a ni. VOA
China: Thuneituten Easter Sunday khan Beijing khawpui pubic area-a inkhawmna neih tum Shouwang Church member mi 20 a man, April thla tir lamah khan mi 100 man an ni tawh bawk. Sorkar hriatpui kohhrana tel duh lo christian maktaduai 50 te chu biak in neih phalsak an ni lo va, he kohhran ang hian harsatna siamsak an ni thin.
Malaysia: Sorkar-in a ram chhungah Malay tawnga ziak Bible chhut a phalsak tawh dawn nia hriat a ni. Indonisia atanga Bible lak luh (import) thin hian border-ah thuneituten an lo man thin avangin Christian-te an lungawi lo hle a ni. Hei hi Bible chhunga ‘Pathian’ tih thumal chu ‘Allah’ tia dah a nih vang niin an sawi. ‘Allah’ tih hi Muslim Pathian bik sawina a ni tiin Muslim tam tak chuan an ngai a ni. Tunah hian Home Ministry-ah Bible 35,100 lakchhuah theih lovin hrenin a awm mek a ni. Bible chhut turah hian ‘Allah’ tih chu hman phal sak a ni dawn a, mahse a kawmah ‘Christian Publication’ tih chhut lang tur a ni ang. Malaysia-ah hian Christian maktaduai 3 deuh thaw an awm nia hriat a ni. AP/CDN
USA: April thla khan US chhim-chhak lam tornado thlipuiin a nuai hrep avangin mi 318 ten nunna an hloh a ni. Alabama state-in a tuar nasa ber a, Tennessee, Mississippi, Georgia leh Virginia state-te pawh a nuai hrep a ni. April 27 (Nilaini) ringawt khan tonardo (van atanga sai nawn ang thawngleiverh rawn tla) vawi 150 zetin henglai hmun hi a nuai a ni.
April 29 khan President Obama-an thlipui tuarte tlawhin an intundinna kawngah theih tawp chhuaha tanpui a tiam a ni. BBC
++++++++++
Local
Singapore-ah Christian pung
2010 sorkar census-a a lan danin Singapore mihring zinga 18% te chu Christian an ni a, 3% an pung tihna a, tunah hian he ramah nuai 9 vel ringtu an awm tihna a ni.
Sakhaw zinga lian ber Buddist an kiam nasa ber a, kum 10 chhungin 10% an kiam a, tunah hian singapore mi 33% chauhvin he sakhua hi an zui a ni.
Lehkha thiamte zingah Christian leh Free Thinker hi a lar zual a, University kai mi pathum zela pa 1 chu Christian anga chhut a ni a, rampum mipui 17% hi sakhua nei lo, Free Thinker an ni. AsiaNews
May ni 7 (Inrinni) khian Singapore-ah General Election neih a ni dawn a, vote pe thei maktaduai 2 leh nuai 3 chuang te chuan roreltu tur Parliament Member (MP) 87 an thlang chhuak dawn a ni.
Kumin inthlanah pawh hian Singapore ram independent (1965) atanga vawiin thlenga sorkar-na chang People Action Party (PAP) khingpha tur party lian an awm lo va, eptu party hrang hrang pawhin an tum ber chu Parliament-ah PAP tlang lutuk veng tur eptu thahnem tak neih ve a ni.
An inthlan dan tur chu a ram pumpui hi bial lian (GRC) 15 leh bial te (SMC) 12 ah then a ni a, bial lianah hian candidate pa 2 atanga pa 5 dah a ni - entirnan, Jorung GRC tan MP pa 5 dah a ni a, vote petute chuan mimal candidate nilovin an duh ber Party an vote ang a, vote hmu tam ber Party atanga candidate pa 5 te chu an vaiin thlan tlin an ni tihna a ni. SMC te hi chu candidate-te pakhat leh pakhat inbeihna a ni.
In leh thil dang man to chungchang leh foreigner lo lut tam lutukte hi kumina thu hot ber an ni. Engpawhnise, PM Lee Hsien Loong-a kaihhruai PAP chuan hnehna a chang leh tho dawn niin a lang. ST
++++++++++
Editorial
MCFS Library
Vawiin (May 1) atangin kan Fellowship chuan library (lai-bri tia lam rik tur) kan nei ve ta reng mai! Committee-in a thu maia a lo rel chu Pathian kaihhruaina nen mawhphurhna neituten a hun takah an han puitlin thei hi a lawmawm em em a ni.
Pu L.Keivom chuan library hi Mizo tawngin ‘laibuk’ tiin a hmang thin a, ‘lehkhabu dahkhawmna in’ a tih duhna niin a lang. Hmasawn zel duh tan lehkhabute hi an pawimawh reng a, tunlai kan khawvel hi IT era-a chhalin internet-ah thil engkim zawn hmuh theih angin miten sawi thin mahse, field chi hrang hranga chhui thuk duhte tan library-a lehkhabu rawn lovin thil a famkim thei tak tak lo. Sikul changkang leh veng changkang thliar nan library dinhmun hi tehna lian tak a ni fo reng a ni; chhiar zau leh zau loh hi mi changkang leh kang lo tehna chikhat atan an hmang thin bawk a.
Burma historian chhuan-taw-lawl Professor Dr Tun Tan-a chuan ‘History ka zir nachhan chu ka ‘at’ loh nan’ a tih ang deuhvin, mi ‘ak’ zawnga kan lo ‘chiap’ ve theihna tur talin kan khawvela thil lo thleng tawh, thil thleng mek, mite tawn hriat, miril zawkte ngaihdan, adt kan chhiar ve a tul a ni. Chuvangin Library-a kan lehkhabu neih chhun chhunte hi chhiarin a hmang tangkai ber nih i tum theuh ang u.
++++++++++
Articles
Lungawina Kim
By Nghakrengthintu
Famkim lo tak leh vuivainaa khat he khawvel hringnun ke pen tulna karah hian, ram thinghlim leh ram nuam a an chhiar ‘Singapore’ ramah hna thawin khawsa mah I la, mite angin chuan tur ‘car’ ka nei lo a, hman tur ‘han-phone’ tak ngial pawh ka nei lo, chena tur in lah ‘ka ta’ tih tur ka nei hek lo, min tanpuitu tur ‘nu leh pa’ ka nei lo va, min hnemtu tur ‘u leh nau’ pawh hetah an awm hek lo, min ‘hmangaihtu’ an awm lo, he hmunah hian, mihrang vek an ni, ka tan.
Mirethei ka va ni tak lul em! Nimahsela chutiang zawng zawngte chu he ‘Singapore’ ramah nei lo mah I la, mualpho tak leh saruaka kan awm lai pawha khawngaihna leh hmangaihna nena min kuah thintu ‘Lalpa, Pathian’ chu kan bulah a awm reng thin si a, Lapa khawngaihna leh hmangaihna avanga amah nen inpawl zaho theihna tur inkhawmna biakin min pek hi a va ropui tak em. Engmah nei lo mah I la, rinna hmun khata kohhran u leh naute min suihkhawm hi a va ropui in a va hlimawm tak em!
‘Singapore’ ram khawpui takah chuan riangvai taka kan awm lohna turin leh kan kal sual lohna turin ‘MCFS’ min din saktu Lalpa hming chu fakin awm rawh se! Amen.
Kan tlinlohnaah leh kan mamawh thil engkimah lungawina famkim min pe thintu Lapa kan Pathian hnenah lawmthu awm nawn leh rawh se! Amen.
Famkim lohna leh lungawi lohnaten min tlakbuak thin mah sela kan hunawl neih chhun te hi Lalpa hnenah hlanin biakin lam I pan zel ang u khai! Lalpan min pek ‘lungawina famkim’ thinlungah kan vawng that theuh theih nan.
I pen zel ang u, he lei hrehawm hnutiang chhawnin, ram nuam hah chawlhna Lalpa ang chhung kan thlen hma zawng…!
Chhiartu zawng zawng lungawina famkim nen Lalpan malsawm zel che u rawh se! Amen
++++++++++
Ngena/Hriattirna: Library chungchang
MCFS Library hi mi tlawmngaite lehkhabu rawn pek khawm atanga din a ni a, lehkhabu pe duh kan awm chuan, kan danin a khap zinga tel lo, eng lehkhabu pawh a pek theih reng a, pe theuh turin kan in sawm mawlh mawlh duh bawk a ni. A bu-a pe rem chang thei lote tan, sum-in kan thawh thei bawk, a tam leh tlemah innghat lovin kan thawh duhna thinlung zawk kha Lalpan a duh a ni tih I hre theuh ang u.
MCFS LIBRARY DAN
* Zirtirna lam hawi zawng ni lo sex lam lehkhabu reng reng Library-ah lak luh phal a ni lo.
* Library Membership Card siamna tanga sum rawn lutte hi, Library fund a tan ruahman a ni.
* Library ‘Lehkhabu Hawh Chhuah Dan’ hi a tul dan ang zela siam that/belh tur a ni ang.
MCFS Library Lehkhabu Hawh Chhuah Dan
1. Library Membership Card neite chuan a thlawnin lehkhabu an hawh thei a, Card siam man kum khat tan S$5 a ni.
2. Mi pakhat tan vawi khatah lehkhabu pakhat zel/chauh hawh phal a ni a, midang tan hawh chhuahsak phal a ni lo.
3. Lehkhabu kawl phal hun chhung hi ‘thlakhat’ a ni. Hawh hun tiam pela kawlte chu kar khatah S$2 zel chawi tir an ni ang.
4. Lehkhabu hawh zawm (renew) duh chuan librarian-te hrilh tur a ni a, hawh tura nghaktu an awm loh chuan kar hnih chhung pek belh an ni ang.
5. Library-a la dahlet (return) loh, hawh mektu awm, lehkhabu hawh duh tan ‘nghaktu list’ ah inziak lutin ‘hauhsa’ theih a ni a, lehkhabu a lo thlen hunah hauh hmasate hawh tir hmasak an ni zel ang.
6. Lehkhabu hawhte mi dang hnena hawh chhawn loh tur a ni.
7. Lehkhabu tibo emaw tichhia (chhiar theih tawh loh khawpa tih chhia) kan awm chuan : A bu ngai ang chiah chawitir an ni ang, an rem chan loh chuan bukhatah (S$ 15) zel chawitir an ni ang.
8. MCFS Sunday inkhawm banah Library hi hawn thin a ni ang.
++++++++++
