Editorial
INCHEINA
Mizo te hi inchei uar tak hnam kan ni a. Hnam dang inchei dan style pawh inhmeh lo chung chungin kan la chhawng thin.
Kan inchei dan atang hian rilru leh ngaihtuahna tam tak a lang tlang an tih thin pawh hi a dik a rinawm. Kristian kan nih angin kan inchei dan hi Krista chanchin tha nen inmawi fo se a duhawm hle. Chhungkaw khawsak dan nen inmila kan inchei thin pawh a pawimawh.
Thawmhnaw inbel chungchangah a hun leh hmun hriat a pawimawh hle. A bik takin Pathian be tura kan kalin kan thawmhnaw inbel fimkhur thin ila. Hmechhe tan phei chuan kawr ban bul lutuk te, kawr awm hawng zau lutuk te, skirt chhing lutuk ang chi maksak lutuka inbel loh hram ni thei se a tha.
Inkhawma chanvo neite phei chuan khawlai lutuk lo tura inthuam tum i la, a theih hram chuan jeans kekawrtlawn leh T-shirt nen in bel lo se.
Mizoram-ah phei chuan Synod-in biakin chhunga inchei dan tur kaihruaina ‘code’ hial neih tha a ni tawh a, mawhphurhna a pek ten a siam mek a ni.
Kan hla in “Miten min chhiar min thlir reng e” a tih ang deuhin kan inchei dan leh kan awm dan hi kan bul awm ten min thlir reng tih i hre thar leh ang u!
++++++++++
A bumboh lai te tih rual (Isaia 40:4)
By Lalhriattira (Hawilopar)
Khawvel lei pian hmang leh a in dawh chhoh dan te hi han thlir ila, phaizawl nuam tak tak a awm a, a zawl nuam put dawn em maw tih laiin rin lo thut ah tlang sang kham bakbarek thuk leh bumboh rual rem lo tak tak a in thuah thip thlur mai a. Chhak, thlang, chhim leh hmar hi han thlir kual ila, rualrem hi a lo awm lo reng reng a, chhuk chho, hniam sang hian a khat a ni ber mai. Mahse he khawvel rual rem lo leh bumboh tak mai hian Hringnun kan zawh kawnga kan tawn theuh tur hi a lo entir a.
Hringnun hi Pathian thu atang lo chuan zir fiah leh hriat thiam chi pawh a ni lova. Khawvel lam zawng taka kan thlir chuan, chin tawk nei lo duhamna hringnun a ni a. |awngkam mawi loah ngai lo ila, Pathian thu a fiah theih nan, lehlamah han thlir chuan, Singapore-a kan hnathawh chhan leh kan awm chhan te hi tak takah chuan sum leh pai, zirna lam pawh zawh mah ila nakin hnua sum leh pai tho tho tur thlira zir a ni vek a , hausak duh fuan khawm kan ni.
Hausak duh lo tumah kan awm lova, sum leh pai duh lo pawh tumah kan awm hek lo, hausak, sum leh pai duh vanga tan kan lak hi a sual reng reng lo, lei kan dam chhunga ei leh in, silh leh fen, in leh lo tur atana kan thawh hi “Rim taka i thawh rah chu i ei tawh ang” “Leia i kir leh hma loh chuan i hmaia thlan tui luang zawih zawihin chaw i ei tawh ang” tia Evi leh Adam atang a kan ro chan tawh a ni a. Bible pawhin thawk peih lo chu ei pawh ei suh se a lo ti reng a ni.
Pathianin tumah thliar bik nei lovin khawvela mi zawng zawng tan ni khatah darkar 24 min pe theuh a, chu mi hun hmang thiam ten an hausak pui a, an changkanpui laiin, a then tan erawh zawng lungngaihna leh hlawhchhamna a ni ve thung a. Sum leh pai um reng reng hian kan khawsa a, sang zawk beiseiin kan intlansiak a, chan tawkah kan lung a awi leh si lo. Thiante el, a ni ai ka san hma loh, a ni ai ka hausak hma loh ti reng renga khawsa kan ni a.
Mite hlawhtlin chan a rilru a thik ru tlat, dang pawn leh a dera lawmpui zuap zuap mahse rilru tak a lawmpui der si lo. Han thlir changa mi fate’n chu mi an zir a, chu mi an nei, mi san leh changkanna hmuh ve leh lungawi leh si lo, a tawp a Pathian dem duh rum rum khawp a rirul pu, Kristian inti siin kan ni tin nun hian thutak ram a thleng pha lova. Thiam inchantirna pulpit-ah chuangkai kan tum theuh si a. Mahni remhriatna ang anga kan che vel nun hi hneh kan tuma, mahse a tawpna chu mualpho leh thihna mai a lo ni si a.
Ziaktu pakhatin ‘Mifing pawhin mualpho hun a nei angin mi a pawhin fin hun a nei’ a tih hi a la kal tluang zel a. Mi hausa tamna hmun apiangah fak an hlawh a, mi rethei tamna hmun erawh chuan hnehchhiat an hlawh fo. Pathian anpuia siam mihringte hi mahni kawng theuhah kan inti fing ber a ni. Thu tha ngaithla turin kan induhsak a, mahse mahni lem insiamthata zawm kan tum der si lo.
Mahni theih tawkin rawngbawlna chi hrang hrang kan inti bawl ve a, kan tlin lohzia leh kan fel lohzia sawi zuah zauh rualin tlin tak leh fel taka thawh tumna nei lem si lo hian, a mawiah kan in phaa lawmthu kan sawi leh chul a.
Beiseina khawvelah beisei chung zelin kan khawsa, mahse theih tawp chhuaha tan lak kan tum leh si lo; kan thiam tawk chu a dera nun hi a ni ber mai. Chung zawng zawng chu mihring finna leh rem hriatnaa kan thlir chuan a hmawr tawp suih bawk chu lungngaih mai mai lo chu rah chhuah a nei si lo, famkim lohna khawvela chengte hi engtikah mah chan tawk leh duh tawk neiin kan lungawi ngai lova.
Mahse Isaia 40:4 kan en chuan, “Kawr tin tihsan a ni vek ang a, tlang tin mual tin tihhniam a ni ang a, a bumboh laite tihrual a ni bawk ang” a ti a, he thu hian mihring finna leh remhriatna hmanga kan thlir hringnun bumboh rual rem lo tak mai kha Pathian thu atanga kan thlir ni apiangah a lo rual rem thin, Lalpa chu fakin awm rawh se.
Pathian thu hi tarmitah hmang ila, harsat hrehawm kan tawn chang pawhin, a hmuh dan leh a tawrh dan kan thiam thin. Pualan hausaa awm dan ka thiam, reitheia awm dan poh ka thiam ta a tih pawh hi, Pathian thu atanga thlir a, lungin puk thima a awm lai pawhin Lalpaah chuan ka lawm zel ang a lo ti thei ta a ni. Lalpa hmaah chuan mi fing ber pawh mi a ber, mi mawl ber pawh mi fing ber, Khawvela hausa ber pawh Lalpa ngaih chuan michhe ber a ni a, rethei ber pawh hausa ber ni thung a ni. Hla pawh in “Lalpa nei tute chu mi hausa ber” a lo ti reng a ni.
Changkanna lam pan mek pan zel tur khawvelah hian zir tawh lo tur ka tih na ni lovin, sumdawng tawh loh tur ka tihna ni hek lo, ka sawi tum zawk chu, theihtawp chhuaha kan zir, kan thawh, sum zawnna hian, kan tum leh kan ruahman ang chiah a lo her chhuah lo pawh in, kan nih ang ang a lungawi takin kan pawm thiam tur a ni. Pathain thu atang lo chuan a lungawi theih tak tak lova, Pathian thu atanga thlir zel nun hi a ni ka sawi tum chu. Isaia ziaka kawr ti san, tlang tin mual tin ka rawt hniam anga, a biboh laite tih rual a ni ang a tih hi, tlang tak tak , kawr tak tak, a sawina a ni lova, mihring nun in thlau leh in san siakna rual rem loh tak hi, Pathian thu atang chuan rual rem takin a thlir theih vek a ni.
Zirthiamna, finna, thuneihna, hausak, sum leh pai lamah in san hleihin leh famkim lohna khawvel ni mah se engkim kan tih, kan tawn reng reng hi Pathian thu atangin thlir zel ila, tih danglamin kan awm huai dawn tihna a ni lova, hringnun rual rem lo hi awm reng chung hian, heng khawvel thil ten a khawih dang lam theih loh nun Fapa kal tlanga min pek nun hlimna hi ka sawi tum chu a ni, kan Pathian hming chu fakin awm mawlh rawh se.
A thu bawkin a ngaihna min hriattira, a ngaihna min hriattirna hmunah kan lo phunnawi tawh lo thin a, chu mi hmun ngeiah chuan kan tawn ang anga lawmthu sawi theihnaah min hruai lut thin. Hallelujah! Avan ropui tak em! Lalpa chu fakin awm leh rawh se. Hlain “A ngaihna min hriattir la ka lo phunawi fo thin loh nan” a tih ang khan, a hla mai sa tawh lovin nang leh kei hringnun khawvel kan zin kawngah hian kan nunin a lo sa fo tawh dawn ni. Lalpan malsawm rawh se. Ka lawm e.
[Sermon article hi ka la ziak ngai miah lova, tun tum hi ka vawi khat-na a ni a, tihsual palh a awm leh ngaihdam ka dil a, sermon article ziak tura hun min petu kan Pathian hming chu fakin awm rawh se.]
++++++++++
Chibai! Mikhual duhawm!
By CVL Thafamkima
I pian leh murna ka hre lova, i chi leh kuang lah chhui rual a ni lo. September ni kua, kan Lalpa pian atanga chhiara kum sanghnih leh pakua khan Millenium Center-ah ka hmu che a. Khami ni atang khan ka khawvelah hian i lo tla lut ve ta a. I mitmeng mawi tak leh i sam sei tle siau mai ka mitthla-a cham reng avang hian he thu hi ka ziak ta a ni.
Tihpalh thil thu-a he thuziak hi i lo chhiar fuh ve hlauh a nih pawhin, i tan zawng kei mi naran, zo tlang sanga tlangsam buk leh phuihnamchhe kara seilian hi zawnchhuah mi ka ni lova, hmangaih tlak lah ka ni hek lo. Millenium Center-ah September ni kua khan i kal a ni tih pawh i hre tawh kher lovanga, mi za tel teh meuh khami ni-a Millenium Center-a zi kual hut hut zinga pakhat kha ka ni.
Kawr var ban tlawn i ha a, Jeans pawnfen fual fengin, pheikhawk pum buang paw thek thawk i bun a. Nu valai tak ban vuan chungin, he khawvel hmuh atana a nalh thei ang berin i rawn inlar a. I hriat loh karin kei mi mawl thinlung hi thawidam hleih theih loh khawpa nasa-in i rawn chhun keh a. Hliamin ka awm a; ka hliam tuar mangang hi rumchhuak lo thei ka ni ta lo.
Rilru retheihnaa paltlang ve tawhte tan chauh lova hriatthiam rual lohvin min bawmzui dawn a ni tih hria ni ila, zah dawn lovin, i hmaisa tawn huamin chibai tal ka han buk tur che hi a nia leh!
Mihring hian mihring ve bawk hi, pianze mawina leh hawiher duhawmna hmang ngawtin heti khawp hian a bual a thei ang tih ka ring phak ngai lova. Mahse, ka rinna leh suangtuahna zawng zawngte chu sawidanglama awmin, tihdanglamin ka awm mek si. Thilmak ni-a ka lo hriat thinte pawh tunah chuan ka hmufiah thiam ve ta a, ho mai mai ni-a ka ngaih thinte pawn awmzia a rawn nei chho ta.
Mitthla-a i hmel vawikhat tal hmu lo chuan ni ka vui zo lova. Tawn leh che beiseiin vawitam Aizawl kawtthler hi ka hrutkual tawh a. Mahse, vawiin ni thlengin i hmel hmuh tur reng a awm si lo. Beiseinain min bual at tak tak lai chuan Millenium Center-ah thuthmun remin, darkar thum chuang ngawt te i lo lan leh hun nghakin ka hun ka hmang thin a. Mahse, inlar leh tik ni i nei si lo. Beidawnna leh beiseina inkarah hian ramri a inkham a, chu ramri chu ka chhia leh tha hriatna hian kan tawh turin min nawr a, mahse, ka thinlung hian chakna a nei si lo. He hringnun par tivul tur leh, kei mirethei hmela hlimna zung eng zamtir tur hian vawikhat tal rawn inlar leh ta che, mikhual duhawm!
++++++++++
