News
Egypt: President Mubarak-a bang tura ngiatin kawngzawhtute chuan beihpui an la thlak zel a. January 25 atanga vawiin thlengin Security leh kawngzawhtute tharuma inbeihna vang leh Mubarak-a duh leh duh lotute inbeihna vang hian mi 300 chungin nunna an hloh tawh a, mi 4000 an hliam bawk niin UN chuan a sawi. BBC
London: English Premier League Champion ding lai Chelsea chuan January 31 khan Liverpool hma tlan Fernando Torres pound maktaduai 50 (SingDollar maktaduai 102) in a lei fel thu a puang. chelseafc.com
Myanmar: Parliament Special Session (Upper leh Lower inkhawp) chuan PM nimek U Thein Sein (Retd General) chu President atan Febuary 4 khan a thlang. President hian Home, Defence, Border Ministry tih loh Ministry chelh tur minister dang zawng chu a duhthlan a ruat dawn a ni. CNN
Singapore: Kungfu flim star lar Jet Li chuan Singapore ram mi a nih tawh thu official-in a puang, AFP in January 26 khan a ziak a. Jet Li hi tunhma kum 20 chhung khan US ram mi nihna a lo vuan tawh thin a, Singapore khua leh tui nih a duh nachhan a zawhna chu a fate tawng chihnih hmang (English & Chinese) nih tir a, milarte nitin nun ringawt ngaiven ho Paparazzi te tihbuaina a\anga dah fihlim a duh vang niin a chhang a ni. Agencies
Mizoram: Mizoramah ram dang mite phalna la hmasa loa an luh khapna dan, Protected Area Permit (PAP) sorkar laipuiin January 1-a a hlih a\ang thlakhat chhungin ram dang mi 78 an lut tawh a. Israel ram a\anga zin an tam ber a, 19 an ni. Nikum chhung khan ram dang mi Mizorama lut, Foreigner Registration Office-a inziak lut mi 712 an awm. Vanglaini
Israel: Chikmite chuan tuna Egypt buaina avangin President Mubarak-a paihtlaka a dodaltu pawlin thuneihna an chang a nih chuan Egypt leh Israel Inremna thuthlung 1979-a an ziah khan ngaihsak a hlawh tawh lo ang a, Israel ramin Egypt venthawn thuah invenhimna lam a tih uar sauh a ngai dawn a ni an ti a. Tin, he remna thutluang hian Israel ram invenhimna budget 23% a tih hniam phah niin an chhut bawk. Agencies
Austrilia: Febuary 3 khan Darkar khat mel 185 a chak thlipuiin Queensland state chhak lam tuifinriat kam a nuai a, mi pakhat a thih thu report a ni, mi sang tam takin humhimna center an bel mek bawk. IHT
Russia: Thuneitute chuan January 24 (Monday) a Moscow Demodedovo Airport-a thihchilha bomb tipuaktu an hriat chian tawh thu an puang. He mi 35 thihthua mawhphurtu hi North Caucasus lam a\anga lo kal, kum 20 a upa tih chauh an sawi. NYT
++++++
Keimahni
January ni 22 (Inrini) leh 30 (Inrinni tho) khan 2011 MCFS General meeting vawikhatna chu tluang taka neih a ni a, rorel pawimawh thenkhat kan han tarlang a ni e.
1. 2010 Sum Report (in SingDollar)
(A) Sumpui
Sum chhawm 3482.55
Sum Lut 8549.60
Sum Chhuak 7373.85
Balance 4658.30
(B) Mission
Sum chhawm N/A
Sum Lut 4078.29
Sum Chhuak 515.00
Balance 3563.69
(A hlawma sumchhuahna: Guitar thar, Sound System thar, lawmpuina leh tanpuina, Biak In love gift, Missionary chawmna, Xmas & Kumthar)
2. 2011 chhungin MCF inkhawm thupui atan Debate vawi hnih, Thutlachawp vawi khat neih tur a ni.
3. MCFS Directory siam that leh tur a ni a, Fellowship Chairman leh Secretary te mawhphurhna pek an ni.
4. MCFS Newsletter hi a rate ngaia chhuah zel tur a ni a, a enkawlu atan a hnuai mite hi thlan an ni.
Editor : Zoramchhana
Members : Biakhmingthanga
: Joseph Lalhmachhuana
: Lalhriattira
: Lalchhandami
5. Library enkawltu tur pa 4 (Tv Joseph Lalhmachhuana, Tv Lalhriatira leh Nl Lalramdinpuii) thlan an ni a, Dan leh thil tul dang tihfel a nih hnuah May thla tir a\angin lehkhabu kan hawh \an theih beisei a ni.
6. Naupang Sunday School din a ni a, zirtirtu atan Nl Lalchhandami, Nl Rosangzuali leh Nl Lalramdinpuii te ruat an ni.
7. 2011 tan MCF-in member fee a khawn dawn lova, mahse chhiatni \hatni Fund atan member tinte S$20 thawh \heuh turin a phut a ni.
8. Kumin chhungin Outing vawi 2 kal leh tum a ni a, a hun atan March leh October Pathianni vawi khatna ve ve thlan a ni.
9. MCF Inkhawmnaah thlakhatah vawi 2 zel thulaipuibu, ‘Tuinung lui by Rev Vanlalzuata’, kan zir \hin ang.
10. Missionary pahnih (Synod-Mizoram leh MEF-Myanmar kal tlangin) kan chawm ang.
11. Hlabu siam thar leh tur a ni a, Hla 100 dah tura rel a ni. A buaipui turin Tv Lalhriattira (Convenor), Pu FVL Hruaia, Tv Siamkima, Tv Bawla leh Nl Lalramdinpuii-te ruat an ni.
12. Mikhual hun pek chungchangah Pastor te chauh hunpui pek thin tur a ni a, Kohhran rawngbawltu dangte chu a nia hunneitu tur nen an inbiak dana zir a ni ang.
13. Chin Christian Fellowship (CCF) committee palai atan Chairman leh Secretary te ruat an ni a, nikum angin CCF Sing Song Service leh Advance XMas ah MCF Biakin kharin kan tel ang. Tin, CCF May Day football tournament-a tel tum a ni a, Sport Committee dinin a hnuaia mi parukte hi member atan thlan an ni.
1. Tv Biakhmingthanga
2. Tv Jimmy Lalruattluanga
3. Tv Joseph Lalhmachhuana
4. MCF Chairman
5. MCF Secretary
6. MCF Treasurer
++++++++++
2011 January thla chhunga chanvo neitu turte
1st Sunday ( 6 Febuary 2011 ) - MCFS Mission Day
Chairperson : Jimmy Lalruattluanga
Hunneitu : Tv Lalrawngbawla
2nd Sunday ( 13 Febuary 2011 ) - Thulaipuibu zir 1
Chairperson : Pu Lalsiamthanga
Hunneitu : Pu Laldinpuia
3rd Sunday ( 20 Febuary, 2011 )
Chairperson : Tv Zothlamuana
Hunneitu : Pu Sangengmawia
4th Sunday ( 27 Febuary 2011 ) - Thulaipuibu zir 2
Chairperson : Nl Rosangliani
Hunneitu : Tv Lalhriattira
++++++++++
Editorial
He kan thlakipbu hi kumin chhung enkawl turin hruituten mawhphurhna min han pe leh chu a ni a, lawmawm kan tih rualin rin aia a hautak ve reuhzia hretu kan nih avangin kan huphurh viau mai. Kan han sawi zel ang a.
Kan Newsletter pan te-a thuziak dah khat tur hian ngaihtuahna sen nasat a ngai tak meuh mai, vawi khat ti chhuak tur hian a tlem berah zan khat tal tleivarin kan buaipui \hin a ni.
A chhiartu turte hi hmun hrang hrang a\anga lo kal kan nih angin kan chhiar duh zawng pawh a dang theuh ngei ang, tin, field chi hrang hranga hnathawk kan nih avang pawhin kan hriatthiam theih chin pawh a in thlau ngei bawk ang. Mitin mila chhuah hi kan tum ber a ni a.
Field reporter kan nei lova, chanchinbu chhiar hlawh tak nilo mah ila media-te ngaihdan ‘print media pakhatin print media danga news a ngai ngaiin a copy chuan a tlawmzia a ti lang’ tih hian min hneh hle a, chuvangin news kan copy te reng reng hi Singapore-a cheng Mizo te hlawkpui theih turin her rem hram hram ka tum a, background information kan zawnnaah hun tam tak kan seng \hin bawk a ni.
Tin, he thlakipbu hi nitin chhuak chanchinbu a ni lo tih min lo hriat thiam sak u la, thla tin chhuak a nih angin kan chhuah hma thlakhat chhunga thil thlengte zinga chhinchhiah tlaka kan ngaih, MCF memberte hrilh hriat kan duhte chhuah kan tum a, chhiartuten kan hlawkpui theih nan theih tawp kan chhuah \hin a, kan chhuah zel dawn a ni. Kan Lawm e.
Articles
Ka Khawvel leh Ka Sawmna
By F Muana
Kei zawng naupan lai a\ang rengin mi zakzum tak ka ni a. Chu ka zahzumna chuan chhelna min pe ngai lova, thiante zingah pawh a \im\i ber pawl ka ni \hin. Tin, beiseina changkang tak pawh ka nei ve ngai lo, a chhan chu kan chhungkaw nun harsatzia ka hriat vang zawkin.
Engmah nei silova, neinung anga lan hi ka hlauh leh ka duh loh ber a ni \hin a, mahse tleirawl chhuah inlak punk duh lai chuan mahni ka intheihnghilh chang a awm thin. Ber ang takin khawlaiah ka leng vel a, in ka thlen vel leh harh chhuakin ka nihna leh dinhmun chu ka hre chhuak leh chauh \hin.
A chang chuan nun beidawnna ka chungah a lo thleng \hin a. vanduaina a lo thlen chang chuan Pathian pawh ka mawh chhiat chang te pawh a tam \hin ngei mai. Engvangin nge harsa taka ka awm? Ka hnathawhah malsawmna ka dawn ve pawn nga ti nge a rei loh theih em em bik ni? Damloh naten min tlakbuai changin u leh nau ban tur kan nei si lo, mahni tein ka rum thin a; keimah leh keimah pawh ka inbe fo \hin.
Mihausa inah hnathawk tein ka luh ka chhuah chang a awm, min duat eng ang mahse kan inchhunga duh dan dana ka mut laite ka hre chhuaka mahni inchhete kha ka ngai leh em em thin. A chang chuan hlimna ka zawng ve \hin a, keimaha ka zawn hlimna chuan ruihtheih thilah min hnuk lut a, ka chhiat phah leh si.
Hlimna neitu Pathian hnenah ka zawng leh a, mahse mihring lamah bawk ka buai leh \hin. Ka thalai puite silh leh fen ken \ha tak avang chuan biakin kawng pawh zawh nuam lo ka ti leh si thin. Nasa taka tan la a \awngtai tur ka nih laiin thatchhiatna leh beidawnnain hun ka khawhral vel mai mai zawk a. A thim zawng ringawta ka ngaihtuah chang chuan damchhan neiin ka inhre lo thin a.
Mahse “Vanduai ka inti maw? Keimah aia van duai hi khawvelah mi engzat nge awm ang?” tia ka ngaihtuah chhuah chang chuan Pathian hnenah ka lawm ve leh em em \hin. Ka \hian kawmngaih deuh pakhat chuan heti hian a ti “Kan naupan laiin ka nu leh pa an in\hen a, chuan ka nuin rei lovah min boral san zui a, belh tur nei lovin ka naute ho nen kan awm a, beidawnna lamah zute ka rui \hin a. Mi khawngaih aiin huat ka hlawh zawk a, tunhmaa ka thinrim ngai lohnaah pawh ka thinrim tlat zel tawh a, chuan ka huatthu pawh a chhe sawt khawp mai” a ti a, vanduai bikah a inngai a, chu chuan a hmasawnna tur a ti dal tlat a ni.
Khawvel hriat mi hlawhtlingte nun han chhut chian chuan mahni nunna thap ngai khawpa harsa an lo sutlang hi a lo ni \hin, khawnge kan puanvente sawi chhingin he ram hausakna thau hi induhsak tawn \heuhvin i sawk ang u hming! Chuan kan ram \heuhvah leh kan awmna khua \heuhvah kan hawn dawn nia.
++++++
Ka Zinna Ram, Singapore
By Lalhunsangi
Singapore kal beiseiin passport chu \hiante nen siam tur chuan Rangoonah kan chhuk ho ta a. Kan siam zawh chuan interview leh oral test kan han nei chhunzawm ta a, thlan zingah chuan ka lo tel ve a ni. Mahse, nghah deuh rih a la \ul a, Chanchin Tha Ruaipui han chhim ka duh bawk nen haw ka rilruk ta a.
Tahan lam pan chuan ka haw ta nal nal a, Chanchin |ha Ruaipui pawh hlim tak leh tluang tak chuan ka va chhim ta a. Tin, mi kam a\anga thu ka hriat ve dan chuan Singapore-a kal ho hi rawn let leh an tam, hna a hau tak si a, an tlin lo tih thuthang chuan min ti phur leh ta lova, ka \hulh leh titih ta a, agent-te min kohna pawh ka ngai pawimawh duh ta lo va.
A hnuah engpawh nisela hun leh cheng tam tak sengin passport ka siam tawh a, kal leh lova awm chu tiin ka passport ui avang chuan kal tum thar lehin Rangoon panin ka chhuk leh a, ka thlen a\anga ni thumna velah ‘ka Nu damdawiinah an zai’ tih min rawn hrilh a, a rang lamin Tahan lam pan chuan ka haw a lo \ul leh a, chu mi kum chuan kal tlin hlei thei lovin hun ka khawh ral a ni ber mai.
Tin, ka Pa’n min dampui laia a fate thu min chah kha ka la hre reng a, (1) Taimakna (2) Rinawmna, (3) Dik taka nun leh thil tih, tihte an ni. ‘Hengte hi khawi hmuna in awm pawhin theih nghlih suh u’ min ti thin a, khawi hmunah pawh awm ila taima tak leh rinawm taka hna kan thawh chuan buaina a awm dawn lo tih leh mahni kan pawimawh zel a ni tih hi ka thu tlukna a ni.
Chutichuan phurna leh kal chak em em lohna in zatin Singapore chu kum 2006 September 9 ah Pathian zarah tluang takin ka thleng thla ve ta hlawl mai a. Tunah chuan kum 4 leh a chanve ka awmna a ni ve ta der mai! Ka awm tan a\angin natna nei hran miah lovin ka hrisel em em mai a, min venghimtu kan Pathian chungah lawm thu ka sawi a ni.
Ka thlen tirhin hnathawh dan tur training lawk a tul deuh avangin agent-te hnenah ka awm deuh ta reng a, ka agent-te chuan hnathawh dan thiam min ti tawk lo deuh a niang chu, mi hauh \hin bakah nikhat chu ‘In ramah I let leh ang a, chuan dollar sanghnih chuang I chawi bawk ang’ min ti ta a. Ka lungngai ta em em a, dollar 2000 chuang chu khawiah mah kan nei dawn si lo tiin ka inngaihtuah lungngai ta em em mai a ni.
Chutia mangang leh lung ngaia ka awm lai tak chuan toilet-ah ka va lut a, ka va \awngtai ta a, ka \awngtai zo chu ka rilru a zang ta huaiin ka hria a, Bible ka la a, Sam 57:4-5 “Lalpa chungah lawm bawk rawh. Ti chuan i thinlung duh zawngte a pe ang che. I awm dan tur chu Lalpa chungah nghat la, a mah chu ring la, a ma’n a ti vek ang” tih ka han chhiara ka thla a muang ta a.
Tin, chu mi tlaiah chuan Lalpa, a hun taka che thin zarah ka boss turte chuan keimah min rawn lam turin an rawn kal a, hlim tak mai chuan kan agent-te hnen a\ang chuan min rawn hruai chhuak ta a.
Ka boss te chu Christian tha tak mai an lo ni hlauh a, chu mi tlai chu kan hlim tlang hle. Chuan, ka boss te chuan “Nang chu kristian I ni a, kan naupangte I enkawl ang a, Pathian thute I hrilh ang a, kristian hla te, in mizo Christian hla te I hrilh ang a, an sikul ban hnuah I hrilh thin ang” min ti a, Indonisia pakhat a awm ve a, “A ni chu Muslim a ni a, a ni’n inlam hna chu a ti ang” min ti a, naupang ho chu sikul ban hnuah ka thiam tawktein lehkha te, hla te leh Pathian thu ka hrilh a, an hlim thei em em a ni. Lalbiak |awngtai (The Loard’s Prayer) ka thiam tir bawk a, an phur thei hle a ni.
Tin, Holy Bible leh Dictionary tih loh chu lehkha dang reng reng ka keng lo, a chhan chu hnathawk tura kal ka nih avangin chhiarna hun ka nei ka in ring lem lova.
Ka \hian Indonisia nu nen hna tur insemin hlim takin kan thawk dun \hin a, amaherawhchu rin aiin China in chu hna a lo tama puih a lo ngai thin a. Zing taka thawh a lo ngai vei nen! meng rei bawk, mut kham lo chung chuan hma kan han bung \hin ta zawng a ni a.
Zan han mut chuan zanlai dar 12 a lo pel leh duai \hin nen, chu mi hnua Bible han chhiar leh phei chu awl-ai lo tak a ni a, chhiar a sawt duh lo khawp mai. Zing 5:30 a thawh a lo ngai bawk nen, chhun awl-len deuha chhiar tur pawhin \hiannu mit mei ven a lo ngai bawk si. Hun chep tak karah ka chhiar thin a, chutichuan kum hnih chhung lekah Holy Bible pumpui chu ka lo chhiar zo ve thei ta a.
Kan in dep lawkah chhekin ang reng store room a awm a, chu tah chuan zing ka hna \an hma deuhin, mi dang hriat miah lohvin, ka va \awngtai \hin a, ni khatah vawi 3 ka \awngtai \hin, a chang chuan toilet-ahte \awngtai turin ka va lut \hin a, chung hmunte chu ka Bethel home an ni ringawt mai.
Singapore ka thlen a\anga kum 2 ka awm chhung khan ka khua a harin ka lung a leng thei em em a, ka chhungte ka ngai ber a ni. A bik takin ka Nu leh ka Pa ka ngai em em a, ka vahte ho nen, ka lung leng lutuk hi in lamah eng nei lo mah ila chhungte nena hlim taka awm ka thlang zawk a ni.
Lalpa ropui nan ka sawi zel ang a, ka awm kum khatna velah ka thiani chuan thil tih chhia leh la ruah min puh \hin a, thiamthu ka sawi hran lem lo. A chang chuan kan boss te pawhin chu tia fing tak leh \awngkam thiam fahrana min puh \hin avang chuan an awih lek lek thin a. Kei chuan “Thil ka tih chhiat palh a awm pawhin in hnenah ka sawi thin lo em ni? Ka lak leh lak loh pawh Pathianin min hmu vek a, keimah leh Pathian inkar a fel chuan ka tan a tawk a ni” ka ti a.
Ka thiani mi puhna leh hekna te zawng zawng chu na pawh ka ti hran lem lova, ka nuih a za mai mai a. A tan \awngtai a ngai zawk tih hriain nitin mai hi ka \awngtai sak \hin a ni. Tin, mahniin hna kan nei hrang a, ka aia naupang deuh zawk mahnise a hnaa mi tirhna apiangah thuawih tak leh zaidawh takin ka thawh sak zel a, a chang chuan, ka mihring rilru a chhuah chang phei chuan, ka tlawm a la lek lek ve \hin bawk a ni, mahse inhauh ai chuan thuawih leh hnial lova tih mai hi a tha berin ka hria a, dawhtheihna nen a mi tirhna hmun apiangah ka kal zel thin a, ka aia awm hmasa a nihnaah thiam ka chan zel a, ka ngaidam ve ta zel a ni. Luka 6:27-28 ah “Inhmelmate chu hmangaih ula, a hua che u chu an thatna tur ti ula anchhia lawhtu che u chu malsawm sak u la, a sawisatu che u chu \awngtai sak rawh u” tih ziak a ni a.
Chutianga a chunga ka tih zel avang chuan Lalpa’n ka tawrhna zawng zawng a hria a, Thlarau lama ka puitlin nan leh lei malsawm ka dawn theihna tur atan heng harsatna zawng zawng leh ngaihdam tur ka hmaah min lo chhawp reng zawk a lo ni a! A mite hi kan harsat leh hreawm tawrh min phala mahse a thlawna kan tawrh erawh a phal lo a ni. A mah hre reng fel tak, dik tak leh rinawm taka titute chu mal a sawm thin angin kum hnih hnu at\ang chuan Lalpa \hatna leh rinawmna azarah hreawm zawng zawng chu ka lo tuar chhuak zo ve ta.
Kan boss te rin tlakah Lalpa’n min siam a, an ei leh in tur bak loh thil dang leh inlam thil zawng zawng chu min hriatpui tawh lem lo a ni. Josefa pawh Pharo a chungah leh Aigupta mi Potiphara chungah fel tak leh rinawm taka Lalpa \ih chunga a thil tihna chuan malsawmna nasa tak a thlen a ni, Pharoh chuan a neih zawng zawng chu Josefa kutah a dah tlat tih Gen 39:5 ah kan hmu a.
Tunah chuan ka nau nen hlim takin kan khawsa dun tawh a, a bakah ka nau hian natna khirh khan tak mai a nei a. Ministry of Manpower pawhin haw tura an tih tawh a ni a, mahse kan boss-te chuan a hawn phal ta lo chuan enkawl dam sak inhuamin an enkawl dam ta ngei a. Lalpa \hatna zarah a mite chu a theihnghilh ngai lova, kan boss-te hmangin tih damna kan lo chang ta a ni.
Mi rama hna thawk mek kan ni a, kan hriat a tan ka duh chu hei hi a ni: Lalpa tih chunga hna kan thawh hi a thlawn lova, nakinah a rah kan la seng dawn, rinawm tak leh dawh thei taka, I thawhna chuan nangmah avangin I chhungte leh I hnathawnna leh nangmah nen Lalpa malsawmna leh thatna chuan a um zui zel ang che, Harsatna hnuaia dikna leh Lalpa \ih chunga I thawhna hi Lalpa’n a theinghilh lo a nia.
I boss te chuan hnehsawh takin an ti mai thei che, dik tak leh rinawm taka hma I lak zel chuan nakinah I chungah Lalpa \hatzia leh malsawmna I dawnna kawng tur a lo ni a. Hreawm I tawrhnaah lawmthu sawi \hin ang che.
++++++++++
