News
TIME Person of The Year 2010
Khawvel huapa magazine ngaihsan leh chhiarhlawh ber TIME magazine chuan ‘Person of The Year 2010’ atan Facebook CEO leh dintu (te zinga mi) Mark Zuckerberg a thlan thu a puang a ni.
TIME hian kum khat chhunga mihringte nunphung sawinghinga danglamna thlen bertu a thlang thin a, 2010 tan hian mi maktaduai 550 chungten inbiak pawh nan leh chanchin inhrilhhriat nana an hman ber Facebook siam chhuaktu hi a thlang ta a ni.
Facebook hian mi pakhat leh pakhat inkarah inlaichin dan a ti danglam nasa hle a, internet hmangtute nitin nun chu kawng chi hrang hrangin a sawinghing a ni.
Zuckerberg-a hi 1984 khan Dobbs Ferry, New York-a pianga seilian a ni. Facebook hi 2004 Harvard University-a school a kai lai atanga a buaipui tan nia hriat a ni.
TIME chhiartute ve thung chuan Person of The Year tan hian Wikileaks hotupa Julian Assange an thlang ve thung a ni. Agencies
Muslim-in Christian a chhan
England ram Muslim hruaitu pakhat chuan Sapramah Christian-nain tihduhdah a tawh mek chungchangah Kohhran hruaituten ‘aw’ chhuaha nghet taka ding turin a fuih thu chanchinbuah a ziak a.
Muslim puithiam (Iman) Taj Hargey chuan secular/Pathian awm ring lo pawl a hluar zel avangin sakhaw tin hian nekchep an hlawh tial tial a, a bik takin England-a sakhaw lian ber Christian-te hian an tuar nasa leh zual niin a sawi a ni.
Nurse pakhat a hnathawhna Royal Devon and Exeter Hospital thuneituten ‘Cross’ te reuh te awrh an phal loh vanga hna atanga an ban thu te, Nurse dang pakhatin dam lo hnena ‘tawngtai sak che i duh em?’ tia a zawh avangin a hna atanga rei tak an chawlh tir lailawk thu te tarlangin Muslim puithiam hian heng thilte hi, miten zalen taka an sakhaw chhinchhiahna neih hrim hrim phalsak loh vanga thil thleng niin a sawi bawk a ni.
Office for National Statatistic website-a tarlan danin Britain mi zaa 72 zel hi Christian niin Ringtu maktaduai 41 an awm a ni. CBN
Misualten Aigupta Christian an bei
Kumtharni khan Egypt ram, Alexandria khua Coptics Biakinah misualin thihchilh bomb a ti puak a, inkhawm mi 21 an thi a, 70 chung an hliam niin chanchinbuten an tarlang a.
He tualthah thua mawhphurhna nei ber man chhuah a la ni lo a, Christian-te chuan sorkar-in Christian-te a hlamchhiah bikah puhin Cairo leh Alexandira-ah nasa takin kawng an zawh a ni.
Egypt ram hi Arab ram zinga mihring chen tamna ber niin maktaduai 80 an awm a, za zela 10 te chu Christian niin a dang zawng chu Muslim an ni thung. The Age
Editorial
Chhiartu zawng zawng Kumthar Chibai! Ahmasain a hun takah MCFS News kan rawn ti chhuak thei lo a, pawi kan ti em em a ni, in mi ngaihdam kan ngai a ni e.
Phek hnihnaah 2011 MCFS min hruaitu turte thlalak kan rawn tar lang a, la hmel hriat rih lo ten in tangkaipui kan beisei. Mahse thlalak vai deuh thaw hi Facebook leh website atanga hlehthlaka eidit chawp an nihnaah erawh a fiah tha hlawm lo deuh a, in lo en rem mai dawn nia.
Nikum chhung khan sermon chhiartelin Article 36 kan chhuah a, chungmi zing atang chuan Nl Lalhunsangi ziak ‘Falama Kan Awm Lai Khan’ tih kha Editorial Board ten short-story chhiar nuam leh mimal tawn hriat hlan chhawnna tha tak a nihnaah ‘Article of The Year’ atan kan thlang a ni a, a ni ang lehkha ziak mi kan nei hi MCFS News ten vannei kan inti em em a ni. Tun tumah pawh ‘Bible Knowledge’ tih a rawn thawh leh a, chhinchhiah tlak tak a niin kan hria.
Tin, Lalenkawli ziak fuihna thu tha tak ‘I Kawng Zawhnaah’ tih leh tunlai khawvel headline ber Wikileaks chanchin kan rawn hlui bawk a che u.
A chhiar chauhva lungawi mai lovin, han ziak ve chhin theuh i la maw le! Thlakipbu tha tak a lo nih theih nan, thu tha tak tak kan chhuah a ngai a, thu tha chhuah tur chuan a ziak thiam leh a hre rilten in rawn ziah teuh a ngai a nia, inthlahrung miah lo khan rawn bul rawih mai rawh.
Keimahni
2010 Kristmas leh 2011 Kumthar inkhawm hlim taka kan hman theih avangin min kaihruaitu Pathian chu fakin awm rawh se!
Kristmas nia Mizo thalai rual kha ti zat kalkhawm buaina sawi rik tur awm miah lo khan kan rilru a puitlinzia a ti lang chiang em em a ni.
Tin, mawhphurhna neiten an chanvo theuh zo taka an hlen theih theuh avangin kan hun hman dan a changtlung em em bakah Aizawl atangin ‘Lengzem’ megazine neitu leh Editor Pu Vanneihtluanga leh mikhual dangten min rawn tawiawm khan 2010 Kristmas a ti chhiahchhiah tlak lehzual a ni.
Mas leh Kumthar commitee member te, fatu te, usher te leh receptionist te bakah a tir atanga atawp thleng atulna apianga thawk tura inpeih reng Mcf member tam tak te inpekna kha Mizo tlawngngaihna nun zemawi kan ti lo thei lo ang.
Kristmas ni atan khan Fellowship-in S$1138.70 a seng niin hruaitute hnen atangin thu kan dawng a, tin, New Year inkhawm & intihhlimna atan khan S$ 242.60 hman a nih thu kan hre bawk.
Kan Chairmanin thupha a chawi ang khan Committee-in Mas rawn tel thei tur a chhut zat chu mi 100 a ni a, mi 140 rual tlai taka ei theih tur hisapa ruai tur chah a ni a, mahse mi 160 chuang lai kan lo nih daih avangin Mizo chawhmeh chang lo tlem kan awma Committee ten pawi an ti hle tih thu kan dawng bawk a ni.
2011 January thla chhunga chanvo neitu turte
1st Sunday ( 2 January 2011 )
Chairperson : Tv Sangte
Sermon : Tv Lalhriattira
2nd Sunday ( 9 January 2011 )
Chairperson : Nl. Rosangliani
Sermon : Tv. Siamkima
3rd Sunday ( 16 January, 2011 )
Chairperson : Nl. Lalchhandami
Sermon : Nl. Lalhunsangi
4th Sunday ( 23 January 2011 )
Chairperson : Pu Joshua
Sermon:Tv. Joseph Lalhmachhuana
5th Sunday ( 30 January 2011 )
Chairperson : Nl. Lalruatdiki
Sermon : Nl. Lalramdinpuii
Articles
I Kawng Zawhnaah
By Lalenkawli
I hringnun kawng zawhnaah harsatna tawkin Lalpa i au thin a, a puihna nghak zo lovin i vui leh a, i hawisan leh si. Amah lo chu belh tur kan nei chuang si lo. Danglam ngai lo Pathian chu a la pangai reng a, a lo thleng thuai dawn tanpui tur chein a awm reng a ni. I kawng zawng zawng hruaitu kha amah a nih kha ringhlel tawh suh. Zam mai lo la, i rinna kha vuan nghet tlatin. I hriatna hmang thiam tura a pek che khan a rawngbawl sak zawk rawh. Chu chu a duhin, a nghak reng che a ni.
Ringtu nun kawng chhuk chhohah hian kawng bumboh hmachhawn tur tam tak kan nei a, harsatna leh hrehawm kan tuarna kawng tin rengah Lalpa’n min chhanhim thin a, a mah kan pawl theih nan, engkim min tihsak bawk thin a ni.
Niimahsela, manganna leh harsatna kan tawh hunah hian a hnen kan thleng ngei a. Lalpan min hlip kian sakna turin kawng min kawh hmuh thin a, chu chu hrethiam lovin kan kal-pel leh si thin a. A va pawi thin em!
A mahah kan innghat a, mahse puitlin lovin a kohna kan phatsan leh mai thin hi hrethiamin i harh ang u. I kawng zawng zawngah a mah hre reng la, I kawngte chu a kawhhmuh zel ang che. (Thuf 3:6)
Mihringte hi Diabola’n fingvervek takin min phuar thin a. Kan nitin nun kawngah duhthlanna tur a awm a, Aw... ringtu, tunge i nun kawng hruai thin che? Tunge i nunah hruaitu ber le? Hmelmapa laka i inthiarfihlim theih nan tawngtaia inhlan thlahthlam suh. Ringtu tana thil hlauhawm ber chu tawngtai theih lohna sual hi a ni.
“Kristiante kan vanneihna pakhat chu danglam ve ngai lo Pathian, rinawmin, kan lama atang reng hi a ni.” I kawng a kawhhmuh na che a, rinawm tak leh a mah hre reng a innghain, I sal tanna zawng zawng hnehin a awm tawh, tih hriain Kross thu chauh chhuangin ke i pen zel dawn nia.
Tuna harsatna i tawh mek atang khan Lalpa ropui nan huaisen takin a hnen thlen la, a sutkian sak ang che. Mahse, hlawhthlinna i chan hunah a mah i theihnghilh si chuan, i chungah ro a rel sak leh ang che. I kawng zawhna atangin i chatuan hmun tur i panthelh palh thei a chu chu tuna I hun hman dan khan a hril dawn a ni. I nun kawngah tunge Lal ber le?
++++++++++
Thuruk Puangtu Wikileaks
by Lalrinawmapu
2007 July 12-a Iraq ram Baghdad khawpuiah US sipaiten helicopter atanga hmelma emaw an tih mipui leh chanchinbumite an kah hlum lai film, US sipai-te kawl that, chu nikum March thla khan Internet-ah theh darh a ni a, chu film tawite ti chhuaktu ‘wikileaks’ website chu kar lovah internet khawvela mite zawn hlawh ber a lo ni ta a ni.
Sorkar leh company, pawlho leh mimal-ten midangte hriat atan an duh loh, document an kawl that - a bik takin internet-a an dah that - te chu hmun hrang hrang atangin ‘wikileaks’ hian a dawng a, mite chhiar theihin a pholang thin a ni.
‘Mahni duh zawng zawng zalen takin kan phochhuak thei a ni (Freedom of expression)’ tih ngawl veite chuan he ‘wikileaks’ hi tanin an fak viau laiin an thuthup phawrhlangtu a nih avangin sorkar leh pawlho tam tak chuan an haw hle thung a ni.
2010 July thla khan he ‘Thuruk Puangtu’ hian Afghanistan ram indona chungchang (2004-2009 inkar) chipchiar, US sipai-te record chu, a ti chhuak leh a, indona hmuna nitin thilthleng bakah vangtlang mipui thi leh hliam te chungchang (chanchinbumiten an hriat loh tam tak) a tel avangin mite ngaihven a hlawh zual zel a ni.
Tin, kum kalta October thla khan ‘Iraq war logs’ an tih Pentagon lehkha pawimawh nuai 4 zet a tih chhuah leh phei chu US Sipai Headquarters-in hun kal tawh zawng zawnga a ruala thuruk a tih ‘leak (put chhuak)’ palh tam ber a la ni ang an ti nghe nghe a ni. He lehkha pawimawh hian US-in 2003 a Iraq a run hnua Iraq thuneituten rawng taka mi tam tak an nghaisak thin lai khan America sipaiten an lo en liam mai mai thin a ni tih a pholang chiang em em a ni.
Iraq War Logs pholan a nih hnu thla khat, nikum November thla, khan khawvel sawi nghing dawt tur a ti chhuak leh a, chu chu, tunlai khawvela mite ngaihven em em ‘US Diplomatic Cables Leaks’ hi a ni.
Khawvel ram hrang hranga US sorkar tirh palai (diplomat/ambassador) ten an thutna ram hruaitute nena an inbiakna te leh thil an hmuh dan hrim hrim te a ruh lang rawta Headquarters (State Department) a an thawnte (report an pek) chu ‘Diplomatic Cables’ an ti a, he lehkhapawimawh fun khawm a put chhuah avang hian US mai nilovin khawvel ram hrang hranga sorkar hruaitute thuruk sawi chhuak tam tak vantlangmite chhiar theihin a lo awm ta a ni.
US lehkha pawimawhte ti ‘leak-tu' (ru chhuaktu) hi thuneitute chuan Sipai Intelligent Bradley Manning-a niin an ring a, tunah hian an hreng bet mek a, tanpuitu midang pawh an awm ngei an ring a ni. 'Engtin nge hetiang thuruk dah khawm a nuai tel hi a ruk chhuah theih ang?' tih zawhna lian tak chhan tur a awm a.
September 11, 2001 a World Trade Center misualten thlawhna nena an sut chhiat hnu khan America chuan a ram venhim chungchanga chak leh zuala hma a lak theih nan sorkar Department hrang hrangte inbiak pawhna chu hmun khatah a thlung khawm a, chuvangin Sipai ho (Department of Defence - DoD) pawhin Department of State inbiak pawhna zawng zawng chu a lo khawih (access) ve thei a ni; Ambassador/Diplomat te hi Department of State hnuaia thawktute an ni a.
Ru chhuaktua an puh Bradley Manning-a hian a thawhna DoD thuruk bakah Department of State lehkha pawimawh - Diplomatic Cables - te chu download-in ‘wikileaks’ neitute hnenah a hlan chhawng nia rin a ni.
‘Wikileaks’ hian chanchinbu pa 5 - El Pais (Spain), Le Monde (France), Der Spiegel (German), The Guardian (Braitain), The New York Times (US) - te a pe chhawng a, an ni hian mimal ti khaw lo thei tura an ngaihte hlep thlain an chhuah awn awn ta mai a ni. Diplomatic Cables Document 2,500,000 chuang zinga 220 chauh tih chhuah a la ni rih a.
‘Wikileaks’ hi Austrilia mi Computer heacker (computer thiam el-khen ti mai ang) Julian Assange-a leh a thurualpuite din nia hriat a ni a. 2006 atang khan ‘We open government’ - sorkar-te hmuhtlang theih turin kan hawng(?) - tih auhlaa hmangin thuruk chi hrang hrang an pholang tan a, donation ringa ding, hlawkna um lo pawl anga hriat a ni. Head Quarters/office nei lovin Full-time thawktu pa 5 leh khawvel hmun hrang atanga tlawngngaia thawktu 800-ten an server an vil reng nia hriat a ni bawk.
US Diplomatic Cables Leaks a tel chanchin thenkhatte:-
(1) Singapore Prime Minister Lee Hsien Loong-a pa Minister Mentor nimek PM hlui Lee Kuan Yew (MM Lee)-a’n US Deputy Secretary of State James Steinberg hnenah May 30, 2009 khan ‘Burma, Laos, Cambodia te hian ASEAN commitee-a an thusawite China an hrilh chhawn leh nghal zel a rin thu a sawi.
(2) MM Lee tho hian US Duputy Secretary of State Thomas Christensen hnenah Burma ram roreltu General-te chu ‘mawl leh hriatthiam harsa’ a tih hlawm thu leh ‘an ni ho biak chu mithi bia ang kan ni’ tiin a sawi.
(3) Burma ram roreltu General Than Swe-a’n Nargis thlipuiin Burma ram a nuai zawh hlim vel khan a tupa ngenna angin Manchester United Football Club dollar maktaduai 1000 nen lei a rilruk a, mahse a thulh leh. A tupa tihlawm nan Myanmar Natioanal League buatsaih turin thu a pek thu Yangon-a US Embassy chuan a report.
(4) The International Committee of Red Cross chuan 2002-2004 chhungin India sipai ten Kashmir tanin hrang hrangah mi 852 aia tlem lo kawng chi hrang hranga an sawisak dan US palaite hnenah an thlen thu Embassy chuan HQ-ah report a pe.
Ref: The New York Times, The Guardian, CNA, Irrawaddy, Wikipedia
(Chhunzawm tur)
++++++++++
