Monday, December 6, 2010

MCF News December 2010

Chanchinthar


December 1: Lunglei district Bawrhsap M.Zohmingthangi chuan nimin khan thupek chhuahin, mipui vantlang hriselna tichhe thei, plastic bag, bur leh bawm ang chi siam, zawrh leh sem a khap.

Dan tlawh chhanin bawrhsap chuan, kawng sira insakna bungraw dah te, pawisa khelh chi reng reng te, khawpui chhunga ran chhuah te leh a manto (black)-a petrol leh diesel hralh te a khap.

Heng bakah television channel thenkhat, mipui vantlang tana en him lo chhuah te, kawng sira lung lak te, license nei lova silai leh puak thei thil kawl te, sipai motor rawng ang mahni motor rawnga kah ve te, bazar ni lova sa zawrh te, vaihlo atanga thil siam chhuah fak te leh ruihhlo kawl leh zawrh te a khap bawk a ni.

He thupek hi a chhuah ni atanga thla hnih chhung a nung dawn a ni. The Zozam Times

+++++

November 29: Aizawl khawpui chhung kawng sira zaia kutdawh thin mitdel pakuate chuan, sorkarin agarbati stick (hmawlh rimtui milem Pathian hmaa an hal thin ang chi) siamna khawl 40 vel pe se chuan, zaia kutdawh an bànsan theih tur thu an sawi. Kawngpui sîrah zaia kut dawh pa khat chuan nikhatah Rs 200-250 vel a hmuh thin thu a sawi. Mizoram pumah mitdel 4,000 awmin, an zinga 3,000 vel chu khaw hmu lo tawp an ni. Vanglaini

+++++

November 30: Mizoramah ni thum danah road accident thleng ang a chhut a ni a, ni 7 danah mi 1 zel an thi a, ni 2 danah mi 1 in hliam an tuar anga chhut a ni bawk niin Transport Minister PC Zoram Sangliana chuan a sawi. The Zozam Times

+++++

November 27: Aizawl Municipal Council (AMC) huam chhunga V/C zawng zawngte chu November 24 atang khan Local Council tia vuah a ni tawh a, V/C dinglaite’n Local Council hna hi an chelh rih ang. AMC chuan ward 19-ah Ward Committee pakhat theuh din turin leh hmeiche tan reserve seat khat pek zel dan tur a ngaihtuah mek a ni. Vanglaini

+++++

November 13: Daw Aung San Suu Kyi, Burma ram democracy tana thawktu langsar ber leh 1990 Burma Inthlanpuia hnehna chang NLD party hruaitu chu ina hrenbehna atangin chhuah zalen a ni. Democracy tana theihtawp chhuah zel a tum thu a sawi. Agencies

+++++

December 2: November 7 a Burma rampum inthlanah roreltu sipai sorkar party USDP chuan 80% deuh thaw hmuin hnehna a chan thu puan a ni. He inthlan hi free & fair a nih loh thuah sawisel a hlawh nasa hle a ni. Tahan-Kalaymyo bialin MP pahnih leh MLA pathum an thlan zingah CPP atangin Chin quota MLA seat atana candidate Pu No Than Kap chu Tlangmi zinga tling awmchhun a ni. Agencies

+++++


Editorial

Sweet December! Tlangsam par thla a lo thlen tawh hi chuan kan thinlungin bawng in lam a hnaih leh thin. Kan biak Pathian, kan sual tlan tura hringmi anga leia a lo pianni hi hlim leh lawma hman kan induhsak theuh laiin keini hmun hlaa khawsate tan zawng khawlamah chhung kima chawhlui kilho thin kumte mitthlaah a cham reng... la ti fo kan awm em?

Lungngai suh, MCF hruaituten member zawng zawng hlim taka kan U-A-Ma theih theuh na turin rem an ruat fel dimdiam tawh a, he Hlimnania mawhphurhna chi hrang hrang nei turte pawh (thla kal taah tar lang tawh mah i la) phek no 9 naah kan rawn zep tel a.

Tin, Mahlimipu-in Mari leh Josefa thuawih nun nghah chhanin sermon tawi, tha zet mai a rawn thawh a, kan rawn hlui bawk a che u. Tun tum kan News chu Lalhunsangi ziak ‘Chhandamna Famkim leh Lalpa Hnaih Nun’ tih hian a ti changtlung hlein kan hre bawk.

Kan Fellowship Chairman-in thuchah/lawmthusawina message chhuah tur min rawn thawn bawk a, Chairman lehkha chu edit ngam hek lo le a ngai ngaiin kan dah a.

Pi Kawlchuani ‘Hringnun Lamtluang’ part I kha Zo International group-in an website-ah chhuahchhawn min dil a, chhiartuten a beng var thlak an ti viau a ni awm e, part II nen kan rawn chhun zawm bawk. Tv Lalhriattira ziak Chilean miner ho chungchang hi a bengvarthlakin ngaihnawn i tih tur zia kan hai lo bawk. Chhiartu zawng zawng Christmas hman nuam u le!!


+++++


Chairman Thuchah

SERVICE TO GOD AND MANKIND

By FVL. Hruaia

Kalsualna laka min vengtu kohhranho min siam sak a,” Dan hi mihring siam a ni a, mihringte zawm tura siam a ni bawk, mihringte hi, kan pianpui B.A suangtuahna tha lo tak a vangin, kalsual, chetsual kan ching em em a. Lalpa chuan a mi ruatte hmangin kalsualna leh chetsualna lak ata kawngdik, nun mawi, tlawmngaihna, kan lo zir theih nan Kohhranho min siam sak thin a.

Sunday school atangin kan lo zir chho tan ta a, rilrua than chhoh pui turin. Chu inzirtirna chuan kan rilruah thui tak hmun a lo luah tawh a, thian tel lova awm har kan ti tawh a, in pawlhona leh inkawmhlimna, inhnem tawnna, in chawimawi tawnna huho nun reng reng hi kan ngai em em a, alovin awm har kan ti tawh a ni.

Chuvangin, Zofate hi khawi hmunah pawh awm ila, kan inzawng zel dawn…mahnia awm hreawm kan ti vek. Chutiang bawkin Singapore-ah pawh hian a awm hmasate Lalpa’n a hmanga Singapore-a lo la kal zel turte leh awmmekte tana inhnemna turin leh kalsualna lak ata min veng turin MCFS min din sak leh ta! “Lalpa, MCF te kan lawm e !’’ Chuvangin, keini zawngin “Kalsualna laka min vengtu MCF min siamsak a,” tiin, Lalpa hnenah lawm thu I sawi theuh ang u..


MCFS (Tual chhungah ):

MCFS ka member pui zawng zawngte u, Krista hmingin “Christmas” chibai ule..!!!

Kumtir atangin kan Birth-day zawng zawng min pekim leh ta theuh bawka Refreshment pawh atui kan ti tlangin ka hria, a zawngchhang tlak riau niin kan unaupa Valbuanga’n a sawi, lawm thute nen.


Thupha chawina:

2010 kum tawp thleng Lalpa kaihhruaina leh ka rawngbawl puite zarah MCFS-ah tling lo tak chungin Chairman nihna ka lo chelh a, ka finna leh ka zirna te, ka thiamna te hian a tlin tawk lo a, rorelna kawngah te, thutlukna siam chungchangah te pawh tlin lohna leh fel chiah lo pawh tamtak a awm ang, chung zawng zawngah chuan thupha ka chawi duh a, tawngkam mawilo emaw, thahnemngaihna a vanga mi duh loh zawng, mi pawi ka lo sawi palh a nih chuan min lo ngaidam turin thupha ka chawi duh bawk a.

Tin, thil engkimah kan bengvar tawk lohnate leh member thar lo huaihawt chungchangah pawh tlin lohna kan ngah ang, min lo hre thiam turin in khawngaihna ka rawn ngen a ni e.


Lawmthu:

A hmasaberin kan chunga zahngai thintu kan Pathian hnenah lawmthu zawng zawng awm rawh se. Kum thum chhung MCFS chairman hna chelh tura min kai hruaitu leh hriselna te, thawhpui tha tak tak te leh tlawmngai tak tak te min pek avang pawhin lawmthu ka sawi duh a.

Ka thawhpui unaute, in zavaiin in chungah ka lawm tak zet a ni, in mi dawmna leh kawng engkimah thu rawn leh mahni ngei a taka chet a tul hunah tlawmngai tak leh phur taka Lalpa leh fellowship tanna in inpekna hi ka ngaisang a. In hnenah pawh hian zirtur tamtak ka nei nghe nghe a ni.

O.B leh Committee member zawng zawngte hnenah lawmthu ka sawi nawn duh a, tin, Pu Editor the Renga’n min hawn san hnuin Tv. Zoramchhana’n tlawmngai leh thahnemngai takin Editor hna chu a chhun zawm leh a.

A ni hi sikul kai chunga hna thawk pahin a hun chep tak karah MCF bember ten Mizo tawng ngeia chanchinthar kan lo chhiar ve theih nan tiin chanchin bu in min chawm hlawm a, a chungah a bikin lawm thu ka sawi duh a, kawng engkimah zangkhai zawka min thawh puina leh “ Service to God and mankind “ tih kan motto hre renga Lalpa leh a MCFS tanna an thawhna kawngah ka lawmin ka thla a ti muang em em a ni. Lalpa hi a tha a, mi thiam tak tak kan mamawh ang zela min pek thin hi.

Tin, kan Secretary Pu Joshua te chhungkua hnenah pawh MCF hmingin lawmthu ka sawi duh bawk. A bik takin huangtau tak leh inthlahrung miah lova an in, metting leh thiltih nana min hman tir thin avangin lawmthu ka sawi duh a, chumai bakah a car hi ‘Ama Keng’ lam chuan MCF motor tiin an nemnghet thlap tawh bawk. A tul huna car thawh thei kan lo awm hian thiltih a ti zangkhai em em a, an ni chhungkua hian MCF hi an ti phuisui tak zet a ni.


Kumthar tana sawmna:

Vawin 05 Dec 2010-ah hian hnakum 2011 hruaitu thar tur kan nei leh ta diam mai a, MCFS committee-in ‘Kum thar hruaitu turte chu mipui hmangin Lalpan min pe mai ang’ tiin a lo rel tawh a.

Mipuiin kan thlan chu Lalpa remruat an ni mai tih hi a ni…hei hi Lalpa tanna kan mission hna a ni tih hre rengin ‘Hruaitu thar zawng zawng te u! Kum thar a tan, tan i la thar leh ang u hmiang…! Pheihkhai rual takin aw! i inpekna leh tlawmngaihna kha kan member tanpui ngaite tan a hlu em em a, Lalpa malsawmna i dawnna tur pawh a ni reng a sin…! Mite tan malsawmna nih tum theuh ang u hmiang. Lal Isuan, “ In zinga mi te berte chunga in tih chu ka chunga ti in ni, “ a ti si a. Lalpa’n MCFS hmangin min hmang duh a, kan kova innghat mekah hian hlim tak leh tlawmngai takin Lalpa lamlian i sial dun leh ang u hming’ tiin ka sawm duh che u a ni.

Chutiang bawkin kan member zawng zawngte u, hruaitute hi Lalpa min pekte an ni a, an thu leh hlate ngaichang chung zelin an hnung kan zui ho zel ang a. “ Hruaitu tha nih i duh chuan, hnungzuitu tha ni phawt rawh,” tih mifingte thuziak hre rengin. Ka lawm e.


+++++


Articles


Hringnun Lamtluang (Chhunzawmna)

By Kawlchuani


Holy Bible chu Singapore ka awm chhung (kum 2 chhung)-a chhiar chhuak tur chuan ka rilru ka siam fel ta a. A bu hi a chhah mai bakah a ziak a sin bawk si a, ka huphurh lutuk chuan a bu chhung a, a bung leh chang zat te chu ka han chhiar chhuak hmasa a, pite hriat lohva a ruk hlira chhiar a ngaih tur te ka ngaihtuah a, ka thulh leh hi a ni ber mai.

Nimahsela beiseina nasa tak nen ka han chhiar tana ka huphurh ai tak chuan chhiar nuam ka tiin ka tui ta em em mai a. ‘Ka thlen tawpna zawn kha enge ni ang?’ tih reng rengin a thu hian min hneh hle a ni. Ka Bible chhiar tamna hmun ber chu bualin hi a ni a. A bu a chhah vangin thuh-ruk a har hle thin. A chang chuan phek khat te tea pawh thlaka iptea ah bova a remchan ve leha chhiar vat hi ka chak ber thin.

Kapite mut reh ka chang a, zanlai pel dar 2 thleng ka chhiar zan te a tam thin. Kapiten min hmuh chang chuan min thawn hawng lo chauh a ni. Kapite an kal chhuah ni hian ka chhiar am em em thin a, ni khatah bung 70 chuang te ka chhiar a, hun ka neih loh avangin ka Bible chhiar hi ka tang hle thin. Dar kar khatah bung 10 atang 13 ka chhiar tlangpui (Sam ziak tiam loh vin).

Chutiang chuan ka Bible chhiarchhuah tum khatna chu ‘thla 7 leh ni 17’ ah ka zo thei a. Ka rin aia ka zo hma tak avangin ka phur zual a, fa pahnih ka nei a, an hming lem talin ka tia, ka han tan leh chu ka awmna te pawh a lo rei ta ve a, kapiten min lo ring tawk ve tawh te pawh a nita ve ang, min tui lian thlir veta mai mai a. Hun zalen tak maia ka han chhiar chuan a tun 2 na chu ‘thla 3 leh ni 29’ ah ka zo leh thei a. Ka vawi thum law law the ang tiin muang changing ka han chhiar a, a tum thumna chu ‘thla 6 leh ni 12 (24.12.2009)’ ‘X’Mas ur lawk zan khan Pathian puihnain ka lo zo fel ta a ni. Sawi ve reng rengah tiin Sam ziak ka chhiar hian No. 1 atangin 100 ni khat ah ka zova.

Chutianga rilru zawng zawng pea Bible ka chhiar rah chu, ka nun khawhar tak, pite nen in nghir-ngho reng pawh hriat loh karin Lalpa’n min lo lak bo sak reng tawh hi a lo ni a. Bible hi ka nun kawng min hruai thatu, chuantuan nunna min kawhhmuhtu a nih hre rengin vawi khat tal chhiar chhuah I tum ang u. Kan Bible chhiar chhuah hi miten min hriat pui lo mahsela mahni’n kan hrait kha a tawk hle ka ti a ni.

Singapore mi ina hnathawh hi thil awl-ai lo tak a ni a. Amaherawh chu keimahni’n kan tum a, kan zir a, kan rinawm phawt chuan kan pi leh pute nen kan inkar hi kan beisei phak ai pawhin a tha thei a. Nimahsela chu hun thleng tur chuan rinawm leh dik taka kan hun hman chhung hi a thla tel emaw, a kum emaw a ni thei a, chu chu kan hngah theih a ngai ve thung. Engkimah hian chawp chilhin hlawhtlin a theih loh erawh kan hriat a ngai.

Hrehawm kan tih ber lai hian keini aia chanchhe zawk an la awm hi I hre reng ang u. Hreawm kan tih ber pawhin Pathianin hna thawh theihna damna min la pe te hi hre reng ang u. Mi kut hnuaia hna kan thawhin mahni ngaihdan kan hman thin chang te hian buaina a lo awm phah fo thin a. Mahlimipu thu ziak ka hrait reng thin chu “Kan lo tha ber lo deuh thin” tih hi. Mite nen kan inrem theih nan mahni inen fiah hmasa ila hreawm pawh a nep thin. Heng Bible thu te hian chakna min pe thin, Phil 4:11-13, Sam 119:71.

Mahni tawka harsatna ka tuar ve hi Lalpaah chakna nasa tak ka hmuh phah a ni. Rinawm tak leh dik taka kan nitin hun kan hman theih dawn phawt chuan Singapore hi a nuamin a mawi em em a ni.

[Mimal tawnhriat bengvarthlak tak a rawn thawh avangin Pi Kawlchuani chungah kan lawm em em a ni. Min chotuah ngaiin member ten pakhat tal thawh theih ve i tum theuh ang u. Singapore-a hnathawka khawsate nun hrehawmzia phawrhlan tumna lamah ngai lovin rawn kal zel tura leh turi te’n rilru leh chetziaa inpuahchahna tha zawk an neih theih nan information hlu tak kan pe a ni tih i hre thar theuh ang u. Ed]


++++


I Thu Ang Zelin Ka Chungah Thleng Rawh Se

By Mahlimipu


Luka 1: 38, Mathaia 1: 20

Isua chanchin hi Chanchin |ha pali ten uar takin an ziak theuh a. A pian thu erawh Luka leh Mathaia te hian an ziak lang tam. Luka hian a ziak kim chang deuh ber a.

Luka 1:26-38 kan chhiar chuan Lalpa vantirhkoh Gabriela leh Nazaret nula thianghlim Mari inbiakna kimchang takin a lo ziak lang bawk. He an in biakna hi chanchin tha dangah hmuh tur a awm lo a ni.

Gabriela hi thuthlung hlui leh a tharah kan hmu a. Pathian leh mihring inkara thu thlentu, zualko, palai a ni. Zakaria hnena Johana pian tur thu hrilhtu pawh kha Gabriela tho hi a ni.

Zakaria hnena a in lar hnu thla ruknaah Mari hnenah a in lar leh a, Isua a pai tur thu a hrilh bawk. Josefa mumanga in lar vantirhkoh pawh kha Gabriela tho a nih a rinawm.

Bible-ah Mari tih hming pu mi pasarih kan hmu a. Isua nu Mari hi Nazaret nula thianghlim a ni. Lalpa vantirhkoh Gabriela’n Mari hnenah Isua a pai tur thu a hriattir a. A hmangaih leh a duh em em Josefa nen innei turin thu thlung an siam vek tawh si chutah thlarau thianghlim hmang a, a rai tur thu a hriat chuan a rilru a baui hle awm e.

Juda-te danah chuan nula leh tlangvalte hi an inneih hmain an in hual lawk thin a. Mipa chhung ten hmechhe man tur leh thuam tur an pe lawk thin a ni. Kum khat emaw a aia rei emaw a in hual thin.

Chutia an inhual hnua mi dang laka an chetsual chuan Uire anga ngaih an ni, sual lian taka ngaih a ni a, lunga den hlum theih an ni. An Juda dan hi Mari hian a hre chiang hle awm e. Mari hi Puithiam thlah atanga sei lian a ni a.

Mari hian Juda-te dan leh dun hre chiang hle mahse Pathian thu chhuak a nih avangin a hnial ngam si lo. Thih pawh huamin he thu mawi tak hi a chham chhuak ta a ni. Luka 1:38 “Ngai teh, Lalpa bawi nu ka ni, I thu ang zelin ka chungah thleng rawh se,” a ti a. Pathian thu pek chu a Amen tawp mai a ni.

Josefa nun pawh hi a entawn tlak hle mai. Vantirhkohin a nupui hual Mari a rai tur thu a lo hrilh a. Josefa hian a nupui hual Mari a rai tih a hriat vel leh a rukin ban a tum a. Lalpa vantirhkoh a mangah a lo inlar thu Mathaia 1:20-21 ah kan hmu a. Tunlai ang phei chu nise, kan mangah 4D leh mang mak tak tak kan nei thin a. Josefa tan pawh hian awih har tak tur a ni.

Chutah vantirhkohin fapa a hring ang a, a hming ah ‘Isua’ I sa ang a tih phei chu awih har tak tur a ni leh zual. Isua hi Lal chhungkuaa piang turin mitinin a ngai theuh a. Heng hun laia lal fanu ten Lal Isua pai chu an thil chak ber a ni. Josefa hian a manga a hmuh ang chiaha thil a ti zel hi Pathian thu a awizia ti langtu a ni.

Mari leh Josefa anga ‘I thu ang zelin kan chungah thleng rawh se’ kan tih ve theih a pawimawh hle a ni. Kan nitin nunah inngaihtlawmna te, thuhnuairawlhna te leh thuawihna te kan hna thawhpuite leh kan chenpuite bulah kan tih lan a ngai tak zet a ni.

Bible-ah Pathian thu pek Amen thei mi enge maw zat kan hmu a. Chung zingah chuan Nova, Abrahama leh Paula te hi an entawn thlak em em a ni. Pathian thu pek Amen ti thei lo mi tam tak kan hmu bawk a. Kan chunga thil thleng apiang hi Pathiam rem ruatah ngai thiam ila, a chhia emaw a tha emaw ‘Lalpa I thu ang zelin ka chungah thleng rawh se’ kan tih theuh theih nan Lalpa’n mal min sawm sak rawh se. Amen.


+++++


Chhandamna Famkim leh Lalpa Hnaih Nun

By Lalhunsangi


Chutichuan tunah zawng Krista isuaa awmte tan chuan thiam loh chantirna reng a awm tawh lo. Krista Isuaa nunna thlarua dan chuan sualna leh thihna dan ata chu mi tichhuak tawh si a.’ Rom 8:1-2

Ani chuan a tisa put lai niahte khan, thihna lakah amah chhandam theitu hnenah chuan nasa taka au leh mittui tla chungin tawngtainate leh dilnate a hlan a, a tih dek thin avangin ngaihthlakin a awm bawk a, Fapa meuh pawh ni mah sela a thil tuarahte chuan thu awih a zir ta a ni.’ Hebrai 5:7-8

MCF member zawng zawngte Isua hmingin Christmas chibai ka han buk a che u!

Kumte leh thlate a inher zel a, Christian ten kan lo nghanhlelh thin em em Isua piancham Christmas ni lawmawm chu kan lo thleng leh dawn ta. Mimal tinte hian Isua chu engtinnge kan lo hmuah ve? Kan thinlungah hmun a chang ve tawk em? Tih mahni leh mahni inzawt theuh ila.

Mifingten an neih ro thilte kengin Lal Isua chibai an buk ang khan, keini pawhin kan neih thinlung zawng zawngin chibai I buk ve ang u hmiang! He khawvel harsat manganna chi hrang hrang karah hian keini ringtute hi Lalpaa kan dinngheh a tul tak meuh a, Isua Krista chanchin hi a theory maia hriat nilovin a tak ngeia kan hman chhuah a, kan pen erawh a pawimawh tak zet a ni.

Khai le, kan lalpa Isua mizia leh a nihna (God’s attribute) ah khan Pathiana 100% mihring lam pawha 100% a ni a, Pathian nimah sela mihring dan ang zawng zawng a rawn zawh a.


(1) A Pathian Pathianna:

Thu, tisaah a channa (Incarnation) in thlarau thianghlim lakah a lo piang a, a nunah sual reng reng a pianpui lo, mithi kaihthawh theihna a nei, thi theih loh nun a nei, a thil siam tin rengten a thu an awih, natna tin reng tihdam theihna a nei… mihring rilru suangtuahna leh ngaihtuahna zawng zawng a hre tlang thei vek..etc… Amah chu Pa Pathian, Fapa Pathian, Thlarau Thianghlim Pathian, chu Pathian chu hmun khat (Trinity) a ni a. Thawn khat Korinth 12:3 ah Thlarau Thianghlimah chauh lo chuan Isua chu Lalpa a ni tih an hriat theih loh thu Tirhkoh Paula’n a sawi a ni.


(2)A mihring nihringna:

Lungngaihna, manganna leh natnate a nei ve a. A ril a tam thei a, mihringte nih dan phung zawng zawnga kawl kim ve vek….etc… a nun ang kan neih ve theihna turin entawn tur min hnutchhiah mihringte dan ang a rawn zawh famkim vek a, Johana hnenah Baptisma changin felna zawng zawng a hlenchhuah hi atan a mawi tur thu a sawi a ni. Eph 2:6-8 kan chhiar chuan Pathian tluka awm chu thlahlel lovin amah leh amah inti tlawmin bawiah a rawn insiam a, chu a thu zawmnaah chuan chhel takin a tuar a, a Pa thuawihnaah Krossah hruai thlenin a lo awm ta a nih kha!

Adama atanga kan nihna sual (Original sin) zawng zawng chu krossah tihhlumin a lo awm ta a, kan thlarau, rilru leh taksa chu a vaiin a thihchilh a, chu a thihna avanga a thisen chhuak chuan a Pa lung a ti awi ta a, kan nihna sual zawng zawng chu fapa a vang chuan thiam min chantir ta a, tihdamin kan lo awm ta a.

Pa nen chatuan inrem lehna chu kan thih leh thawhlehnaah min pawm saka, a nun lamin min pe ta, chu nun chu kan chungah thlarauin a daha, nang leh kei hian tunah kan lo kawl ta a ni. ‘Tisa nunna chu thisenah chuan a awm si a: in nunna atana inremna siamna tura maicham chunga kan pek che u a ni: nunna atana inremna siamna chu thisen ngei chu a ni si a.’ (Leviticus 17:11. Heb 9:22). Puithiam chuan hmun thianghlimah kum khat tan vawi khat sual thawi nan thisen a theh a, Isua thisen chhuak chuan chatuan atan vawi khat chauh a thi a, mihring tan a tawk a ni.

Isua nun chang tute kan nih tawh avangin tuna I awm dan leh I nun dan ang ang khan lalpa chu han hnaih phawt mai teh. I thil tha hriat leh tuna Pathian thu I hriat chhun khan lalpa chu han dawr phawt mai la. Khawvel thil ngaihtuahna leh suangtuahna kha han dah tha bawk la, chutianga chhel taka ke I pen a, Lalpa pawlna I neih tam zel a, Lalpa tan hun I pek tam hun apiangah I nun a lo hlim anga, I nun chu Lalpa thu chauh ngaihtuaha I hun hman te nen a lo khat tawh ang.

Chutianga taima taka I tih zelna chuan I nunah thu a sawi tawh anga thuawihna chuan I nun a rawn luah khat tawh ang. Kan Bible in ‘thil tha tih tur hriaa ti lo chu a tan sual a ni’ a ti si a, that chhiatna sual, khawvel lam thil tha lo suangtuahna sual zawng zawng ten nitin min bei thin a, kan tlansan phal a tul a, kan tlansan apiangin kan nunah hnehna kan chang thin a ni.

Chu hnehna chu kan chan veleh kan nunah Lalpa tihna a lo awm ang a, thil tha lo lakah a nun a lo veng him thei tawh dawn a lo ni. Thuf 8:13 ah ‘Lalpa tih chu sual huat hi a ni; chapona te, uanthuanna te, thil tha lo china te, |awng chaltlai te hi ka haw tak zet a ni’ a ti a, sual chu kan do thiam leh kan man thiam a tul em em mai a ni.

Lal Isua meuh pawh khawvela a lo kal lai khan Diabola’n themin thlalerah ni 40 leh zan 40 thlarau hruai luhin a awm a, Diabola chuan thlemna chi thum hmangin a thlem a, mahse Isua’n Setana chu kal bo daih turin thu a pe tih kan hmu a. Keini ringtute pawh a nun kan lo neih hnu hian Setana chuan kan duh zawngte hmang hian min thlem thin a ni. Kan tlansan phal a tul, kan do zawh loh ni apaingah kan chhunga awm thlarau thianghlim kan ti vuiin kan ti lungngai thin a ni. Kan man thiama kan do hneh apiangin hnehna kan lo changa kan hnena awm thlarau rah chu kan nunah tih famkimin a lo awm zel a, taksa lam malsawmna chi hrang hrang leh thlarau lam than lenna malsawmnain kan nun min vur thin a ni. Setana hian ringtute hi vawi thum bak min thlem ngai lo, kan tawrh theih loh khawp thlemna min pe ngai lo bawk.

Thlarau rah chu thinurna a lo thlen pawhin ur lohnaah, dawh theih lohna a lo thlen pawhin dawh theihnaah, mirelna tur a lo thlen pawhin rel lohnaah, miin min sawi chhiat pawhin na tih lohnaah, inhauhna a lo thlen pawhin dawh theihnaah etc….kan nun a kaihruai thin a ni.

Taksaa Pathian chawimawi an tih chu nitin kan nun dan leh kan awmdanah Pathian duh zawnga nun hi a ni. Kan inchhung khura kan nungchang, khawlaia kan nun changchangte hi a ni Lalpa’n a en ni. Thlarau lam danah pawh kan taksaa kan tih leh tih lohah a innghat a ni. Pathianin a ngaih pawimawh ber chu tuna kan nungchang hi a ni.

Chuvangin nitin kan nungchang leh rilru put danah Lalpa a lawm em? tih mahni leh mahni in exam thin ila, Lalpa kan chunga alawm chuan a mite dilna a ngai thla thin a ni. A mawh ti lawmtu nih hmasak a pawimawh a. Kan chunga a lawm chuan kan harsat leh mangan niah a vantirhkohte a tir mai thin a ni. Lalpa chungah hel lo phawt ila, a thu kan awih hmasakna atangin mal min sawm thin. A mah chu a be tamtu leh a hnaih duhtute Pathian a ni a, chuvangin Lalpa hi innel siak ang u.

‘Chutichuan Pathian thu thuin awm rawh u; amaherawhchu diabol dodal rawh u, tichuan a tlan bosan ang che u. Pathian hnaih rawh u, tichuan anin a hnaih ang che u.’ (Jakoba 4:7-8)

Chhiartu zawng zawng Lalpa’n a tharin malsawm theuh che u rawh se! AMEN


+++++


Chilean miner mi 33 te chhanchhuah thu

By Lalhriattira


Chile ram hi South America Andes Mountains a tanga chhak lam, Pacific Ocean atanga thlanglam tuipui kam hrula awm a ni. Mining (lei virha leichhunga thil inphum lakchhuah hna) hi an kumkhua thawh a ni tlangpuia, 20th century-ah phei chuan khawvela copper laichhuak tam ber a ni nghe nghe ani. Kum 2000 atangkhan a tlangpuia chawhrualin kum tin mi 34 mining chetsualna in an thi a. Kum 2008 phei kha chuan mi 43 an thi tih a ni.

Tuna kan sawi turte chetsualna mine neitu hi Compañía Minera San Esteban (CMSE) company a ni a, he company mining hmun hi leilam thil laih chhuahna ram leh hmun thuah hosa mahse safety zawng chuan a hlauhawm thunga kum 12 chhung khan miner 8 an thi tawh thin a, kum 2004-2010 inkar hian safety regulations dan zawm lohna avangin tum 42 lei an chawi tawh bawk.

Tuna an chetsualna hmun hi The San Jose Mine an ti a, kum 2007 khan mine accident avanga thi tate chhungten court-a an khin hnuah khar a ni tawh thin a, 2008 a hawn leh a ni. South America khawmualah hian, Chilean copper mine worker hi an hlawh a sang ber a, the San Jose Mine hi safety standard a neih that loh vangin heta thawkte chu company dang aiin 20% in an hlawh a sang zawk bawk a.

The San Jose Mine hi lei hnuai lam zawnga ngil tlang pata laih leh verh a ni lova, spring angin (lem a tar lan ang hian) kual thla reih reiha laih ani. An lei verh kuarawng kual chhuangah hian mine workers group 2 in hna an thawk a, pawnlam deuh a luhna (entrance) hnaihah hian gourp khatin an thawk a, spring anga laih kual, a kual 7 na vel, lei pawn lam atanga 700m (2296.59 ft) vela thukah hian group hnihna ten an thawk bawk.

Aug 5, 2010 tlai dar 2 (CLT) khan tons 700,000 rit lung keh chim chuan, mine khur luhna chu a chhilh phui ta a, lei pawnlam entrance hnaiha thawk group 1 na te chu an tlan chhuak hman a, mahse khur thuk zawka thawk, group 2 na, miner 33 chu chhin betin nungdama an awm leh awm loh chanchin pawh hriat loh khan ni 17 chhuang an awma. Lung chim vanga vui khu chuak vangin darker 6 chhung mit meng thei lovin an khawsa a ni. Miner ho hian thli luh chhuahna ventilation a tanga chhuah tumin theihtawp chhuahin an bei nan mahse chu mi thli luh chhuahna pan phei nan leihlawn code an hmuh tak loh a vangin an tan tihtheih awm hek tawh lo chu, an zinga an hotupa ber Mr Luis Urzua chuan miner ho chu khawikhawmin a him bertura an ngaihna hmunah awmhmun khuarin an awm ta.

Chhanchhuaktu pawl ho chuan lung chimin a hnawh khah lei hnuai luhna haifai tumin bei nasa viau mahse August 7 khan a chim belhin a fuh loh mai bakah, leilung leh lungpher te a tawlh palh chuan lei hnuaiah tangte tan a hlauhawm leh zual dawna an hriat avangin an chawlh san a.

Mahse beidawng mai lovin ruahmana dang siamin nungdama an awm leh awm loh hriat theih nan 15cm (5.9in) lian lei verhna nen hmun 8 ah an verha, mine map leh lei kal hmang an record nate a hluiin an rin tlak loh em em a, chutichuang chuan lungpher sak tak tak verh tlanga miner ho an tawmkhawmna tura an ngaih chu ni 14 chhung zet an verha a miner ho an lo awm lo zel a.

August 22 khan 688m (2,257 ft)a thuk emergency shelter room an tih tang ho lo awm khawmna atanga 20 m (66ft) chauhva hla an verh thleng hlawl mai a, verh thawm ri lo hria miner ho chuan note “Estamos bien en el refugio los 33” (English: “We’re alright in the shelter, the 33 of us”) tih ziakin lei verhna drill shaft-ah chuan tape nen charbetin an thawn phei ta a. Chu lehkhathawn atang chuan an la dam a ni tih an hre thei chauh a ni.

An tanna khuarah hian emergency supplies ni 2/3 daih chauh a nei a. Ei tur chaw an tlak chham em a vangin Tuna fian 2, bawnghnute far 2/3 nen, darkar 48 danah Biscuit pakhat eiin an awm a, chawh rualin kg 8 theuh an tla hniam hman ani. Tui e rawh chu a tla chham lem lo.

An hman lai lei verhna khawl, suahdur, hmunphiah leh wheel barrows ang chi kha chu an kiangah awma, mei eng erawh chu truck batteries hmangin an lukhuma mi an chhi a. Lei verhna vung lo tla te pawh kha chung hmanruate nen chuan an lo thian fai ve zung zung bawk a ni.

Mine chhuanga tang ho unau chhungkhat laina leh thianthate chuan mine laihna bulah camp-te sain tawngtai nen beihpui thlakin an awmchilh a, chanchin bu miten an rawn zui meuh chuan Chile president-in an rawn thlen chilh nghal a, chutichuan company hrang hrang, mimal leh khawvel ram hrang hrang (Latin America, South Africa, Australia, the United States ,Canada leh NASA) specialists ho te nen mi tang ho chhanchhuahna beihpui an han thlak a.

Ruahmana felfai tak pathum: Plan A-Strata 950 khawllian nen metre 702 a thuk, 90° a verh thlak, Plan B-Schramm T130XD khawl nen 82° anga meter 638 thleng verh, Plan C- RIG421 khawl nen 85° zuia 597 meter a thuk verh, tura ruahman a ni.

Chutichuan hmun thumah an verha, Plan A 702m thuka verhtur ah 598m chuah a thlenga, Plan C pawh 372m an thlenin khawllam leh harsana chi hrang hrang a vangin an chawlhsan a, Mahse Oct 9 khan Plan B chuan miner mi 33 ho shelter room chu a verh thleng ta hlawl mai a ni.

Tangho khai chhuah nan ‘Steel Rescue Capsule’ an tih rocket ang deuh (a lema tarlan ang hian) mi pakhat leng tawk tur an siam a, oxygen, mei eng, video leh inbiakna hmanrua bakah a chung pawh lung leh thil sak dang lo tla dang thei tura siam a ni. He Capsule hi an verh kuaah thunin miner 33 te chu pakhat te tea thur chhuanin ni 69 meuh leihnuai thuk thim taka tangte chu Oct 14 khan chhanchuah fel an ni ta a ni.

Miner ho hnena Capsule vawikhat thleng tur hian minute 18 a rei a, hei hian an tana khuar thuk tur zia a ngaihruat theih mai a ni. An vaia an khai chhuah hun chung hi darkar 36 vel niin an sawi. Ni eng hmu lova hun rei tak an awm tak avangin tarmit dur buntir theuh an ni a.

A tang zinga lar zual deuhte chu chhanchuah hmasak ber hi Mr Florencio Avalos kum 31, tin, ex-footballer Mr Franklin Lobos kum 53 leh a naupangber hi Mr Jimmy Sanchez kum 19 a ni.

Lawma a vanga mitui nen boruak thiang thlifim hipa lung duh tak takte nen in tawng leh thei Chilean miner 33 te chuan hringnuna thilmak history an ziak ta. Lawmpuina chi hrang hrang an dawng a, khawvela football club lar ber Real Madrid leh Manchester United ten Europe in khelhna enpui turin an sawm bawk. Tin Chile ram mi hausa chuan mi pakhatah US$ 10,000 (S$ 12,926) theuh a pe a, Apple boss Steve Jobs pawhin iPod chhuak hnuhnung ber pakhat theuh a pek bawk a ni.

Ref: Today, My Paper, CNN, Wikipedia


+++++


Christmas Programme

A Hmun : Japanese Garden

(Lake Side MRT Station bul)

Inkhawm : 11 am - 12.30pm

Ruai : 12.30pm - 1.30pm

Group thlalak : 1.30pm - 2.00pm

Intihhlimna : 2.00pm - 4.00pm


Inkhawm Hruaitu : Pu F.VL. Hruaia

Sermon : Pu Laldinpuia

|awngtai : Tv. Lalrawngbawla

Solo : Nl. Lalduhsaki

Thilpek khawntu : Nl. Zomuansangi ( Ms-i ) & Nl. Lalchawimawii ( Nu-i )

Thilpek hlantu : Pu Lalsiamthanga

Solo : Nl. Lalruatdiki ( Nupuii )

Ruai tan tawngtai : Tv.Lalhriattira


Fatu

(1) Tv Zothlamuana (Supervisor)

(2) Tv Lalhlunmawia (Mawia)

(3) Tv Muansanga

(4) Pu Malsawmsanga (Puia)

(5) Nl Laldinsangi (Sangtei)

(6) Nl Lalzampuii (Zampuii)


Ushers

(1) Tv Lalrawngbawla (Supervisor)

Ph 82773165

(2) Tv Lalawmpuia

(3) Tv Lawmsanga

(4) Tv Van Lalchhawna (Chhawna)

(Kal thiam lo tan: Usher Supervisor phone mai tur a ni e)


Receptionists

(1) Nl Rosangzuali

(2) Nl Lalpianmawii


+++++


Happy Birthday!!!!

Lalbiaksangi 81937334 1-Dec

Zosangzela 90762641 4-Dec

F. VL Hruaia 85475344 5-Dec

Zosangliani Zovi 5-Dec

Lalremruata 84109622 5-Dec

Lalhmingliana 91957457 6-Dec

Lalneihchhungi 83124261 6-Dec

Sung Sungi 83124261 6-Dec

Hrangziki Khawmawi 6-Dec

Pensawnthangi 63435564 7-Dec

Daniela 3227894 8-Dec

Lalhmachhuani 82477079 10-Dec

Fanai Zikpuii Aye Khaing 13-Dec

Biakrengpuii 81871875 14-Dec

Zarzoliani 84100979 15-Dec

L. Siamkima 91951456 16-Dec

Lalrintluangi 83862371 17-Dec

Lalrammawii 84162432 18-Dec

Lalpianmawii 93495055 25-Dec

Lalrawngbawla 82773165 25-Dec

Zothlamuana 81058464 26-Dec

Rosangzuali 93405128 27-Dec

Laldawngliana Loi Kaw 31-Dec

Darthangpuii 84109584 30-Dec

Zasiampuii 98951857 30-Dec

Lalhmuaksangi 94495905 31-Dec


+++++


December Roster


5. 12 . 2010

Chairman: Tv Zoramchhana

2011 Hruaitu thlana


12. 12. 2010

Chairman : Nl Rosangzuali

Hun neitu : (Mikhual)


19. 12. 2010

Inkhawm kharin Chin Combine-ah kan tel ang. MCF hminga zaipawl tum 2 neih theih tum a ni bawk.


26. 12. 2010

Chairman : Pu FVL Hruaia

Hun neitu : Pu Laldinpuia


2. 1. 2011

Chairman : Nl Lalramdinpuii

Hun neitu : Tv Lalhriattira


+++++


Nepnawi


Dawn thui

Tupa : Ka pu nimin khan Armstrong-a te thlaah an lawn a sin i lo hre ve em?

Apu : An va nihlei mai mai e aw! Thingkungah te, inchungah te lawn mai mai zawk se la, rawn tla palh sela, ka kawmcharah hian rawn tla se, sawrkar lamah thubuai te ka neih phah dawn a sin. An va aa mai mai ve aw.


Michhe lutuk

Rukrukhmang-1 hian in-1ah a lut a, inchhung leh pindan vel chu cheng/pawisa/sum ruk tur zawngin a hai chiam mai a, lekhabu kar vel te chu a keu kual vel a. Chutilai tak chuan, ineitupa chuan khum chungah mu chungin, “Vala zawng zawng duh suh keipawh nichinah ka zang hrep tawh ka hmu zo lo a ka mu mai mai a ni hi, hmu ila chuan zu in turin ka chhuak daih tawh ang”, a lo ti a. Rukruk hmang chuan, “Michhe lutuk mai”, ti bul bul chung chuan a chhuahsan.


Nausen Baptist

Kohhran-1ah hian nausen piang thar an ngah khawp a, an pastor chuan Sunday inkhawmah a baptist a lawm. Nausen baptist tur kha an tam ropui mai si a, hmanhmawh tak chuan, “Pa leh fapa leh thlarauthiang hmingin ka baptist a che”, tih pah chuan nausen lu chungah kut nghatin tui chu a thlawr zung zung mai a. Inkhawm ban chuan nu-1 chuan, ” Pastorpa nichina i bapist kha ka nau lu a ni lo a nia”, a rawn ti a, pastor chuan, ” Awww! a dup ka ti reng a!!” ( A nu hnuteah a lo baptist niin)

[Fiamthu Lawrkhawm – Lawma Fanai: www.zoin.info atanga lak chawn]

+++++