Tuesday, November 23, 2010

MCF Retreat!!!!

21 Nov 2010 (Inrinni) khan ruahman lawk angin MCFS Retreat tluang taka kan hman theih avangin min kaihruaitu Pathian hming fakin awm rawh se!

Kan biakin neitu Princep Street Presbyterian Church pastor Rev Dr. Ridge Orr-a'n min hruai a, Praise & Worship, Spiritual lam bakah Leadership lecture, Group discussion leh Game hlimawm tak tak nen zing 9.30 atangin tlai 5.00 thleng PSPC Room 101-ah hun kan hmang a ni.

MCFS member a tel thei apiang tel tura sawm kan ni a, mi 15 kan kal.







MCF Retreat!!!!



Thursday, November 11, 2010

Khawvela thlawhna lian ber a buai


Singapore Airline-in Super Jumbo pathum a chawlhtir


Singpoare Airlines (SIA) chuan engine chian lohna avangin Airbus A380 thlawhna pathum a chlawh tir thu a puang. Airbus A380 hi khawvela passenger phur thlawhna lian ber a ni a.


SIA hi he Super Jumbo Jet thlawhna hmang hmasa bertu niin tunah hian 11 a kawl a, pa 8 dang chu a pangngai anga thlawh tir zel an tum a ni.


November 5 khan Qantas Airways (khuan-tas tiin an lamri) ta A380 engine puak avangin Changi Airport, Singapore-ah emergency in a tum a, nihnih lek November 7 ah he Australian thlawhna company ta tho A380 dang pakhat engine chian lohna avangin Singapore-ah vek emergency-in a tum leh a ni. A tum hnih hian passenger thi leh hliam an awm lova.


SIA hman mek he thlawhna lian mangkhen te hi Qantas ta ang bawkin Roll-Royce (England) siam Trent 900 engine hmang an ni a, hetianga a zawna accident vawi 2 meuh an tawh avangin engine siamtu company chuan uluk takin a endik vek niin an asawi.

SIA in tuna a chawlhtir te hi engine chhunga ‘oil berh’ an hmuh vang niin an sawi a, Qantas in a chawlh tir thlawhna pali zinga pathum pawh engine-ah oil a leak tih hmuh chhuah a ni thu Qantas thuneituten an sawi bawk a ni.


Airbus hi Europe ram tangrual EADS - European Aeronautic Defence and Space Company - siam a ni a, he thlawhna chhawnghnih nei chi hi a room then dan a zirin passenger 853 phur thei tura duan a ni. A siamtu company hian Airline company hrang hrang atangin thlawhna 234 siamsak tura ‘order’ an hmu a, 39 a pe chhuak tawh a ni. Thlawhna pakhat hi US$ 346.3 million man a nih thu hriat a ni bawk. IHT/Wikipedia

Wednesday, November 10, 2010

November MCFS News

Mifirfiakten inkhawm 46 an that


Iraq rama hmunkhuar Al-Qaida pawl chuan Baghadad khawpuiah kan hnung Sunday khan Christian-te inkhawm laiah Biakin luhchilhin ringtu 46 an that a, mi tam tak an hliam bawk a ni.


Silai leh bomb nena inthuam mi firfiak pa 4 chuan ‘Our Lady of Salvation Church’ chu darkar 4 chhung an luah hman a, an kut atanga Biakina lo inkhawm mi 120 rual chhanchhuak turin Iraq sipaiten an bei a, nasa takin an indo ta a ni.


Boralte zingah hian Puithiam pahnih pawh an tel a, mi 12 emaw lek hliam pu lovin chhanchhuah an ni.

Misual pa 3 te chu kah hlum an ni a, pa 1 erawh thihchilha bomb hmet puakin Christian tamtak nunna a la tel a ni.

Mi firfiakte hian lungina tang an pawl mi leh sate chhuah turin an ngen a, Catholic Biakina Sakrament kil tura pungkhawmte chu vo nan an hmang niin an sawi.

US in a run hma khan Iraq-ah Christian nuai 8 chuang an awm a, sakhaw dangte beihna an tawh fo avangin mi tamtak ram dangah tlanin himna an zawng a, tunah chuan nuai 5 sing 5 vel chauh an awm tawh nia hriat a ni. AFP/IHT


+++++++++++++++


Tualthahthuah mi pali man


October ni 30 (Inrinni) a Downtown East awmthawvenna hmuna kum 19 mi thattu nia rin mi pali man an ni a, Nilaini khan Court-in an chungchang a ngaihtuah tan a ni.


Chung Chinese palite chu kum 21 aia naupang hlir a nih thu hriat a ni a, Sipai leh National Service bei mek a ni hlawm bawk.


Nunna hloh Darren Ng hi Republic Poly-a Engineering kum 2na zir mek a ni a, tlailam dar 6 velah vawi tamtak chem nena an vit/sah a tuar a, zan dar 11 velah boral a ni.


Media ten an ngaihven danin a tuartu leh a khawihtute hi ‘in en rum mai mai’ vanga in nghirngho tan an nih rin a ni.


Tuna an mi mante hian pawi an khawih chiang a nih chuan Singapore danin ‘khaihlum tur’ an ni.


Downtown East hi MCFS te outing kalna thin zinga pakhat ‘Pasir Ris Park’ piah chiaha awm a ni.

Channel News Asia

+++++++++++++++++++


Ruihtheihthil hlawhawm ber ‘Zu’


A hmangtu leh midang chunga chhiatna a thlen dan zir chiangin England ram scientist leh mithiamte chuan ruihtheihthil zingah ‘Zu’ a hlauhawm ber niin an ngai, Heroin (No 4) in a dawt a, Vaihlo pawh paruknaah dah a ni.


He pawl – British Independent Scientific Committee on Drugs (ISCD) and EMCDDA - hian ruihhlote chu an hman avanga mihring nunna hloh zat, hriselna a khawih pawi dan, ruihhlova innghah dan chin, inlaichinna a tih chhiat dan te hi a hmangtu chunga chhiatna a thlen teh nan an hmang a, midangte pawi a khawihdan an tehkhawngah chuan danin a khap pawi khawih (crime), thing nungcha leh boruak a tih chhiat, chhungkaw innghirnghona a thlen, sum sen ral, thenrualte nena in hlatna a siam leh a dang tam tak an hmang a ni.


Ruihtheihthil hlauhawm rapthlak ber tur chu full-mark 100 pe chhinin, ruihhlote chu a hnuaia mi ang hian mark pek a ni.


1. Zu (mark 72)

2. Heroin (mark 55)

3. Crack (mark 54)

4. Crystal methamphetamine – seih chuah sie - (mark 33)

5. Cocaine (mark 27)

6. Tobacco (mark 26)

7. Speed (mark 23)

8. Cannabis – sie chhoh – (mark 20)

Reuters

++++++++++


Zawiaidi hralh tla, dotu ngah bawk


Kum 13 chhung Zu zawrh khap a nih hnuin October ni 16 khan Mizoramah Alcohol 14% tel ‘Zawlaidi’ Wine zawrh tan a ni.


He grape wine hi Hnahlan leh Champhai ‘Grape Winery’ siam chhuah a ni a, umkhat (750ml) Rs 170 a hralh chhuah a ni a, kum 18 tling tawhte chuah zawrh tir/ lei tir phalsak an ni.


Gorkha Times in October ni 25-a a tarlan danin Hnahlan Winery hian nuai 27 chuang man Zawlaidi a hralh tawh a ni.


Hetih lai hian Zawlaidi hian dodaltu a ngah hle a, Bawngkawn veng chhunga Zawlaidi zuartu chu ‘zawrhzel a tum chuan’ an veng chhuahsan turin tualchhung Kohhran leh pawl hrang hrang intelkhawm (Joint Action Committee) chuan an hriattir thu hriat a ni.


Zawlaidi chungchanga an ngaihdan sorkar hriattir turin Presbyterian leh Baptist Kohhran Area thenkhat chuan chunglamah thu an thlen nia hriat a ni.


All Mizoram Farmers Association chuan Zawlaidi tanin State sorkarin ‘grape wine’ hi sorkar laipuiin a puan angin chaw chikhat (food item) anga puang thuai tura an duh thu an sawi niin The Zozam Times ah tarlan a ni.


Hnahlan leh Champhaia Zawlaidi siamtute hian grape an chin leh sawr nan hian cheng nuai 208 ve ve loan an lak thu hriat a ni bawk.

Mizoram Express

++++++++++


Naupang pawngsuala thah a ni

Ni 18 Oct zing khan Thakthing Veng, Aizawlah hmeichhe naupang ruang garage pakhatah hmuh a ni a, pawngsual nia hriat a ni a, A khawihtu hriat a la ni lo.


Emmanuel Zomuanpuii (5) d/o Zoramthanga hi zing dar 6:30 vel khan mipa pakhatin thil leisakah sawmin a kai niin anmahni hmutu pakhat chuan a sawi a; a hmutu dangte chuan naute hi a pawm niin an sawi thung. A nu, Lalruatkimi hian a fanu a bo tih a hriat hnuah an zawng nghal a, khawtlangin an zawnpui bawk.


Kulikawn Police Station hriattir nghal a ni a, police-te pawhin nasa takin an zawng bawk a ni. Chawhma dar 10:30 ah hmuh a ni a, a bek veilamah na taka chhut/sawhna hliam a awm a, a lu ruh a keh a, a mitko leh a hnár sirah hliam a tuar bawk. Ruang hi garage-a bike lâk chhuah tumin a hmu a ni. Vanglaini

+++++++++++


65th YMA General Conference


YMA General Conference vawi 65-na chu 19-21 October khan thuamluaia Mual, Lungleia Leitlangpui Rûn-ah hman a ni a, palai thahnem tak an kal.


A tawp zana vantlang inkhawmah pandal-a leng lo, pawna awm ringawt pawh sing khat anga chhut a ni. Khual khua atanga palai kal 3200 angin an record a, in report lo thahnem tak an awm bawk ni a sawi a ni.


Palai lawmna inkhawmah Local Administrative Department Minister Pu PC Lalthanliana chuan “Mizo hnam dinchhuahna tak tak chu Political Party-ah emaw, Sorkarah emaw, Pawl dangah emaw a innghat lova, YMA-ah hian a innghat a ni” tiin a sawi thu YMA website ah tarlar a ni.


YMA in kum 75-na (Platinum Jubilee) a tlin kum a ni a, Fashion Show a awm a, thirtute mit a tlai hle a ni. Internet

++++++++++


MZ ah Oil laihchuah tum


India Petroleum & Natural Gas Minister Murli Deora chuan, Mizoram-a tuialhthei zawn chhuah (exploration) chu 70% zawh tawh a nih thu leh 2012 atanga laihchhuah tan theih tum a nih thu Economics Editor Conferece ah October 27 khan a sawi.


Minister chuan, “Oil atanga thuneihna lak chungchangah central in sawi theih a la nei lo a, ngaihtuah mek a ni,” a ti. Minister tawiawmtu Oil India Corporation Chiarman chuan, Mizorama exploration hna an thawh mekah Mizo mipuite fakawm a tih thu a sawi a, “Kan chungah an tha em em a, oil laih chhuah hna-ah an phur a, min tawiawm tha hle,” a ti.


He Conference-ah hian chanchinbumi 300 chuang an tel a, Cabinet minister pasarih leh Planning Commission Deputy Chairman Montek Singh-te’n chanchinbumite zawhna an chhang a ni. Mizoram atangin The Zozam Times Editor H. Laldinmawia leh Evening Post Jt. Editor Zoa Tlau te an tel a ni. Vanglaini

++++++++++


Asian Games ah Mizo pasarih


XVI Asian Games, 2010 Guangzhou, China a neih turah chuan Mizo 7 te chu India aiawha fehchhuak tura thlan zingah an tel.


Tun tum hi Asian Games-a Mizote tel tamna ber a ni dawn a, thalkah thiam Lalremsanga chu kum 1994 Asian Games, Hiroshima, Japan-a neih-ah khan India aiawha telin Mizo zinga Asian Games-a tel awmchhun a la ni rih.


Asian Games-a India aiawha tel tur Mizo 7 te hi hmeichhe hockey-ah R Lalchhanhimi, Durtlang; Mipa football-ah JeJe Lalpekhlua (Hnahthial),Lalrozama (Bawngkawn), Robert Lalthlamuana (Khawzawl), Lalrindika (Lunglei) leh Malsawmfela (Ramhlun South) te an ni a. Sepaktakraw-ah Lal-hlimpuia (Sihphir) thlan a ni bawk. Vanglaini

++++++++++


Thlipuiin Arakan State a nuai

October ni 22 khan Burma ram Arakan (Rakhine) State hmun thenkhatah thlipui nasa takin a tleh a, mi 170 an thih bakah mipui nuai 2 chuang awmna tur neilovin a siam a ni.


He thlipui, Giri Cyclone tia hming an pek, hi darkar khatah mel 120 a chakin a tleh a, Arakan chhunga khaw lianber te zinga mi Kyaukphyu khua leh a chheh vel a hruat na hle a ni.


An tih dan thin angin Sipai sorkar chuan thipui vanga harsatna tawkte tanpuitu tur pawl ho chi hrang hrangte chu kawng chi hrang hrangin a khuah khirh a ni. Irrawaddy

++++++++++


Pi Suu Kyi-i fapa a nu tlawh a duh


Burma Democracy icon Pi Aung San Suu Kyi-i fapa naupang zawk Kim Aris in Rangoon zina a nu tlawh turin Visa a dil thu hriat a ni.


Kim, kum 33 mi, hian kum 2000 hnu lamah a nu nen vawi khat mah an la inhmu lova, Burma Visa a dilna pawh vawi tamtak hnawl a ni. A u Alexander chu tunlai hian US ah a khawsa nia hriat a ni a, A pa Michael Aris erawh 1999 khan cancer natna nen a boral tawh a ni.


Pi Suu Kyi-i hi November ni 13 ah sorkarin a chhuah zalen an beisei thu NLD hruaituten an sawi. DVB

++++++++++


Vawkno tein Bawngpui hnute hne


Tahan-Letpanchaung kawng phei, Pyinkongyi khuaa Pu Cung Uk Thangte Vawk no te pathum huan an Bawngpui hnute chu tuk zanin an hne ve tlak tlak mai.


Vawk no te hi an pian atnga ni 5-ah a puiin a thihsan a, a neituten an enkawl zo dawna an hriat loh avangin thenawm khaw veng vulh duh a piang an pe a, Pu Cung Uk te chhung hian pathum an la ve a ni.


Vawk no te te hi a hranpaa insaksak an nih loh avangin inhnuaiah Bawngpui no hruai lai leh Bawng dangte nen an awmho ve mai a, chutia awm tlang hlawm na na na chu Bawngpui hnute hi an ring ve ta ni berin a lang.


Zing vartiana puar khawpin an hne a, Bawngpui hi ramah nilengin an veng thin a, an kai chhuakte hi eng emaw chan chuan Vawk no te te hian tawk fang chu an umzui ve dat dat thin. Tlaiah an rawn kaih haw leh hunah a hnute hi an hneksak leh a. Heti anga tuk zan an hnek avang hian Bawng no te pawhin a tuar a, a cher phah hle a ni tiin a neituten an an sawi.

Chhaktiang Thalai Arsi

++++++++++


Editorial


Kum tawp lam kan hnaih ta ruai mai le! Sawi tur leh chah tur a tam mai, MCF member kum la hmang tlem deuhte hnenah kan hriat ang ang han bun rawih rawih vek pawh a chakawm a, chu chauh ni lo, khaw lama hawng tur Biaka te tan ‘Xmas hman dan mawi’ tih ang chi ziah te pawh tih makmawha kan ngaih laiin kan News-ah a leng tlat lo.


Kan hnung thla (October) ni 13 khan South America, Chile ramah leihnuaia thil lai (miner) mi 33 te lei hnuai feet 2000 a thuka tangte chu ni 70 hnuah chhan chhuah an ni a, chu mi chanchin chu kan MCF News board member Tv Lalhriattiran chipchiar leh ngaihnawn takin a ziak a, chu pawh chu tun tum chhuakah a len tak loh avangin website lama publish hmasaka December thla chhuaka telh leh turin kan dah ta a ni, pawi kan ti hle.


November 7 hi Burma ram inthlan tur a ni a, ni hnih khat lekah a result a chhuah beisei i la, December chhuak MCF News ah thailan tum bawk a ni.


MCF pawhin Burma Election zawh atanga thlakhatna December 5 (chawlhni hmasaber) ah 2011 hruaitu tur kan thlang dawn a, Kawlram inthlan aia fair zawka buatsaih tum a ni bawk a ni.


MCF member ten kum thar hruaitu thlan chungchanga kan rilrua kan dah atan tha ka tih tlem han sawi zel i la:


1. MCF hruaitu hna hi rawngbawlna a nih mai bakah tlawmngaih thil tak tak a ni a, Singapore ram angah hi chuan hun pe thei mi thlan thiam a pawimawh em em a ni.


2. Member-te enkawl hi MCF thiltum pawimawh em em a nih avangin kan hruaitu atan member harsatna hrethiama, hnema tanpui theih dan ngaihtuahpui tura in hawng reng mi a nih a ngai.


3. Mizo vek nimah i la, hmun hrang hrang leh Kohhran hrang hrang insuihkhawm kan nih ril taka hriatfiah a pawimawh, hruaitu atan hmun hrang hrang Kohhran hrang hrang a mi lawrkhawm dan thiam pawh kan lungrual zelna atan tih makmawh a ni.


4. Talent dawn zawng a in an loh avangin mawhphurhna la tura kan thlante chu an hna tur thlir sak thiam a tul.


5. Kumina kan thlan te hi kum khuaa kan hruaitu tur nilovin kum 1 tan chauh a ni a, tling tura kan duh a tlin loh pawhin hnakuma nominate leh mai tur a ni.


6. Democracy anga kal kan nih angin mi tam zawk duhna (vote) zah thiamin a tling apiang kan thlantlin anga pawm thiam a pawi em em bawk a ni.

++++++++++


Article

Hring Nun Lamtluang

By Kawlchuani


Singapore kan tuantulnaah hian ka nitin hun hman dante hi ka kal hmaa ka lo in ruahman dan leh awm tum dante nen chuan in persan tak a ni.


Keini ang, lehkha thiam fumfe ve lote, tan chuan mi in awm (Maid) hi kan ni tlangpui a, Employer hnen kan tleng hma hian tih tur pawimawh tak takte a awm a, exam chhan a ngai a; Inchhung bungraw hming leh a hman dan min zawt deuh ber a. Pass ve leh hna pakhat zawh a ni a. Kan pass hma loh vawi thum thleng a zawna chhan a theih a, vawi 3 naa pass loh fo chuan puan tuah tela haw nal nal a ni mai.


Hriselna lam an han en leh a, kan ram lama dam chak ve thin pawh natna an lo hmu leh mai bawk a, chu pawh chu thawn haw tur a ni leh ta, Singapore a maid(nau awm, ei rawngbawl, inchhung tifai, etc.. thawktu Ed) ni tur hian fel fai a va ngai tak em!


Chung zawng zawngah chuan fihlim ve mah ila, chung aia harsa leh hreawm ka tih chu kan employer in kan han rap chiah atang khan ka pianpui tawng kha ka thlah a ngai a. Eng kim maiah hian bul ka tan a. Kan rama ‘kei’ inti ve satliah kha, mi kut hnuaia ka han awm chiah a\ang chuan ‘0’ atang kan intan tha leh a ni ber mai. Kan in lamah sap tawngin hmun a chang ngai si lova, a lehkha lo zir ve mai kha a ni hek lo. Lei hi a tal khal nawk nawk a, sawi tum ber pawh a chhuak dik hlei thei lo a ni ber mai.


Min han vin phei chuan a letin ka buai a, ka hriatsa pawh ka theihngilh vek a, rilru hneh mi lo tan chuan he rama hnathawh hi rilru 20% vel hi chu a kim loh theih ka ring. Rilru buai phah pawh an awm zauh zauh ta. Kan tih tur atana pawimawh ber leh kan himna ber chu engkimah, kan dik e maw dik lo emaw, thiamthu siam lova ngaihdam dil leh “Awle” tih theih vek hmel hlim tak nen chawl hlek lova hna thawh hi a ni.


Ni khat chu phone a lo ri a “I hna thawh zawh hian I chawl thei em” tih hi min lo zawt a, “Chawl thei e, (Pi te hmel en lova hauh leh hauh tih a thut a ni.) mahse an duh dan chuan chaw ka ei pawhin ding chungin ei se tih min duh,” ka han ti ve kher a, kan han thut ve zawk hi chu inhauh an lo hman hle tawh thin reng a. A chang chuan tih tur ber awm tawh si lova ke chawn kham erh-urha ka din nileng hi a tam thin. Chung a nih mai bakah chaw hi an ei bang, duh tawka a hawlh kual hnu kawi nei nuai hi kan chan tawk a ni leh nghal.


Chaw kham khawp ei tur neih loh chang a tam nak a lai ‘chaw heh’ min la ti em em bawk a. Chu ti karah kan kalna lam apianga min enthla zui reng hi an va han hmanin a peih pawh an peih seng ka ti. Thil ka lo ti khem chhiat palh chuan (tih palh leh inngaihdamna a awm ve lem lo) thla hlawh cut hmiah a ni a. An thinrim a zatin ‘Kan thawn hawng ang che’ tih hi an ‘in tih theihna’ a ni bawk; an duh chuan maid-te hi an thawn haw thei reng a. Thil zawng zawng hmu lo se kan lak rukah min puh vek a, englai pawha thil eirua min puh thin hi hreawm tih chang ka ngah thin.


Atlangpuiin zing dar 5 ah ka tho thin. Zan hi dar 11 aia hma a mut chu an rem ti lo hle bawk. Maid te hian (sorkar danah chuan) kan awmna in 1 chauhva thawk tur kan nih laiin a then chuan dan pelin in 2, 3 lai an thawhkawp tir thin. Mi tam tak harsa tih luat vangin an awmna in a\anga tlan ru lah an tam. Thenkhat Agent hnenah an va tlan lut a, min lo duat deuh mahna tiin, a lo hnai lo. Agent-in an lo vin na zawk zaw mah a. Rilru hrehawm reng reng in maw, in danga ka in sawn chuan thla 2 hlawh an cut dawn bawk si; chu chu $600 a ni a. Aw! Hrasat luat vangin Singapore-ah maid ka ni hi chu fate ngaih nen hreawm ka va ti thin em!


Singapore ka awm hnua ka thil tawn leh hriat tam tak atang hian pathian ka ngai em em a, Nu leh Pate hmangaihna te, U leh Nau hlutna te leh fate vanga a hreawmah pawh tuar hram hram a tulzia te a takin ka hmu a, Singapore ram ropui leh nuam tak thianghlim bawk si, a hria apiang tena an ngaihsan leh hmuh an chak ramah hian kei chu nun beidawng leh hreawm takin ka hun te ka lo hmang thin a.


Chutia beidawnnaten min hual mek laiin Singapore ka thlen atanga thla 3 pawh a liam hma hian ka hmangaih ka Nu chuan min boral san a, a hnu kum pawh a la vei hmain kan upa ber hmechhiain min boral san leh a. Ka nun khawhar tak chu dam khaw chuak thei turah pawh ka in ruat lo hial a. Chutah hrasa ka tih pakhat chu ka Nu leh ka U an boral tih ka hriat niah pawh ka Pite hlim hmel pua biak ngai tlat kha a ni.


Mahse, nun chau leh khawhar taka ka awm lai chuan Pathianin chu hrehawm ka tih na zawng zawng hnuchhawn thei turin Holy Bible chhiar chhuah tumna rilru min lo pe reng hi a lo ni a, heng chi thum avang hian: (1) Ka hreawmna min chhawk thin, (2) Ringtu ni si Holy Bible ka lo la chhiar chhuak lo hian zahna min neih tir, (3) Ka faten Holy Bible ka lo la chhiar chhuak lo hi min ngaih nep ka hlau.

(December thla chhuaka chhunzawm tur. Ed)

++++++++++


Happy Birthday!!!!!

Zoramchhana 91236723 7-Nov

Lalruatfela 91749384 15-Nov

Benjamin 93457009 17-Nov

Khawlliani 84370630 20-Nov

Lalthankimi 83246392 20-Nov

Roneihtluangi 62459717 22-Nov

Lalhriattira 91889342 24-Nov

Lalhlunmawia 98403089 25-Nov

Duhhnina 26-Nov

Lalniliani 93454381 26-Nov

Landry Lalmuanawma 84109627 26-Nov

Zomuansangi 91654409 29-Nov

++++++++++


October Thla MCF Inkhawm chanvo neitu tur te

7.11.2010

Chairman : Nl Rosangzuali

Hun neitu : Pu Sangengmawia


14.11.2010

Chairman : Pu Joshua

Hun neitu : Tv Lalrawngbawla


21.11.2010

Chairman : Tv Josepth Lalhmachhuana

Hun neitu : Christmas hla zir


28.11.2010

Chairman : Tv Thangpia

Hun neitu : Tv Biakhmingthanga

++++++++++


Keimahni


October 22 khan 2010 MCFS Christmas Sub-Committee chuan kumin Christmas kan hman dan tur ngaihtuahin meeting a nei a, a hnuaia mi ang hian mipuite hriattur pawimawh thenkhat kan han tarlang a ni e.


1. Christmas hmanna atan Japanese Garden (White Hall), nikuma kan hmanna tho kha, hawh a ni ang.


2. Registration Fee atan mipakhat S$5 kan pek theuh beisei a ni.


3. Member 160 tel tura hisap a ni a, Vawksa, Arsa leh Antam chhumpawlh Mizo chawhmeh ngei buatsaih tura rel a ni. (Vawksa ei thei lo tan special menu a awm bawk ang)


4. Fatu atan mi 6 ruat an ni a, an ni hian house keeping lam (Hall tihfai, seat rem, etc) pawh mawhphurhna an la nghal ang. Supervisor atan Muana ruat a ni.

(1) Tv Zothlamuana (Muana)

(2) Tv Lalhlunmawia (Mawia)

(3) Tv Muansanga

(4) Pu Malsawmsanga (Puia)

(5) Nl Laldinsangi (Sangtei)

(6) Nl Lalzampuii (Zampuii)


5. Usher atan mi 4 ruat a ni a, mipuite MRT Station atang Hall, a chhunga thutna lo kawhhmuh thleng mawhphurhna an la ang. Tin, Usher-te hian Mipui an lo kal hmain Fatu-te housekeeping thawh an pui bawk ang.

(1) Tv Lalrawngbawla (Supervisor)

(2) Tv Lalawmpuia

(3) Tv Lawmsanga

(4) Tv Van Lalchhawna (Chhawna)


6. Registration Counter-a thu turin Nl Rosangzuali leh Nl Lalpianmawii te ruat an ni. 2011 MCFS Directary-a chhuah tur a nih avangin member-te in register theuh tura ngen kan ni.


7. Gift-Exchange a awm dawn lova, Lucky Draw a awm thung ang. MCF in S$50 sengin Item 10 a thawh ang a, member thawh duhte pawh Welcome an ni.


8. Hunhman dan tur

Inkhawm : 11 am - 12.30pm

Ruai : 12.30pm - 1.30pm

Group thlalak: 1.30pm - 2.00pm

Intihhlimna : 2.00pm - 4.00pm


9. Inkhawmnaa rawngbawltuturte:

Inkhawm hruaitu: Pu F.VL. Hruaia

Sermon: Pu Laldinpuia

|awngtai : Tv. Lalrawngbawla

Solo : Nl. Lalduhsaki

Thilpek khawntu:

Nl. Zomuansangi ( Ms-i ) &

Nl. Lalchawimawii ( Nu-i )

Thilpek hlantu: Pu Lalsiamthanga

Solo: Nl. Lalruatdiki ( Nupuii )

Ruai tan tawngtai: Tv.Lalhriattira


10. Intihhlimna programe hi Pu FVL Hruaia leh Pu Laldinpuia ten min hruai ang, Lucky Draw, Ennawm chi hrang hrang bakah he hunah hian Article of the Year hlan a ni ang. Tv Joseph Lalhmachhuana tawngtainain kan hun tihtawp tur a ni.

++++++++++


NEPNOIS

Pitar pakhat pawh Aizawlah inkhawmpui chhimin an kal a. Nikhat chu Bazar-ah an leng kual a, dawr pakhatah an lut a. Dawr chhunga thawmhnaw fakmawi nana an dah mihring lem chu mihrang tak tak emaw tiin ,bang bo hmel deuh hian “Khawiah nge ka chhuah ang” tiin a zawt a, chhanna a hmu ta si lo. Mahse a sira miten “Ka pi kha kha milem a nih kha” tiin an lo hrilh a, “Aw” ti pah chuan a kal ve leh mai a. A kal zela dawr pakhat nghaktu tlangval, mit khap miah lova nula thawmhnaw en lo thlir, hi a va hmu a, pitar chuan chupa mit chu a zu khawih a. Dawrnghaktupa chuan le “Ka pi engah nge ka mit i rawn khawih rikngawt?” a ti ta a, Pitar chuan “Aw... saw ta ka biak lah kha milem an ti bawk si a. Vawi khat mah ka lo kal tawh lovang, mi bum in hmang” a ti ta hlak hlak a. (Sangtei, Khampat)


Mi bo zawng

Super market-ah a nupui a bo a, paber chuan dawr nghaktu nula hmeltha tak mai chu:

Paber: Kan nu a bo va, khawngaihin kan inbelawk thei ang em?

Nula : In nu bo avangin keinen inbiak a tulna a awm em ni?

Paber: Nangmah ang nula hmeltha tak ka biak a piang hian rin loh takin kan nu hi a rawn lang hlawl thin a, kan inbiak chuan a rawn lang lehhlawl mai ang. (zoin.info)

+++++++++++