Monday, May 31, 2010

Khuallian kan nei



Rawngbawltu Lo Zin

MCFS-in pastor mikhual kan nei a, May 30 Sunday inkhawmah Pathian thuchah min hrilh bakah Lalpa Zanriah sacrament min buatsaih saka, urhsun leh hlim taka kil ho a ni.

Tuntuma min rawn tlawhtu Rev F. Vanlalchhuanga hi Methodist Kohhran (Upper Myanmar) rawngbawltu a ni a, Malaysia ram Baptist Theological Seminary-ah a Master degree tana zirmek a ni.
Singapore MCF hi Mizoram/Burma atanga Theology sikul rawn kai Mizo rawngbawltuten min enkawl thin a, kan pastor hnuhnung ber Rev Lalrinkima'n a Doctorate research bei zo a min hawng san hnuah pastor thutchilhtu neilovin min rawn tlawh rem chang an awm hunah chauh Lalpa Zanriah buatsaih thin a ni rih a, pastor kan neih theih nan tawngtaipui kan ngai hle a ni.

News

Singapore-ah Kut Dawh An Pung

Kum dang nena khaikhinin nikum khan Singapore-ah kut dawh an pung hle a, thuneituten 109 an man thu sawiin an man zinga 62 te chu a ram mi niin, a dang 47 te chu ramdang mi an nih thu an sawi a.

Ministry of Community Development, Youth and Sport (MCYS) chuan officer-ten hmun hrang hranga regular-a kutdawh an veh thin bakah report an dawn dan ang zelin kut dawh man hna an bawhzui nghal zel niin a sawi a, kum 2006 atanga 2008 inkarah chawhrualin kum khatah mi 77 man an nih thu a atar lang bawk a ni.

Singapore-ah hian sorkar danin kut dawh a khap a, Buddhist puithiam-te pawh phalna nen chauh chaw/pawisa khawn phalsak an ni a, thuneitute hian puithiam-der (a sira thlalak ang chi)te an man ve thin bawk a ni.

Kutdawh an mante chu chhawmdawltu tur chhungkhat laina an neih leh neih loh an ngaihven hnuin tanpuitutur nei lo te chu thuneituten ‘welfare homes’ ah an dah a, ei tur leh an tlin tawk hnathawh tur an ngaihtuah sak thin a ni.

Kut dawh tawh lo tura hriattirna (warning) vawi 2 an pek tawhte chu man an nih lehin court-ah thubuai siamsak tur tih a ni a, Singdollar 3,000 thleng chawitir theih a nih bakah kum 2 lungina khung theih an ni. Ramdang mi an nih chuan thawn hawng turin Immigration and Checkpoints Authority (ICA)-a hlan chhawn tur tih a ni. Ref: The Sunday Times

Wednesday, May 26, 2010

News

Bordar kawng thar

Chin State Chhim lam khawpui pakhat Paletwa khua atanga Mizoram border thleng motor kawng thar, km 120 a sei laih a ni dawn a, he kawng hi India sorkarin phai atanga hmar-chhak state te ei-in leh thuamhnaw supply pek luhna kawng thar atan a duan 'Kalatan Multi-Modal Transit Transport Project' peng pakhat a ni.

Tuna Vairam phai leh hmar-chhak state te kal pawhna kawngpui hman mek hian Bangladesh ramri (Siliguri Corridor) kham ko rek pal tlang a ngai a, Bangladesh ram chuan a ram hawlhtlanga India tan kawngpui thar laih a rem tih loh avangin Kalatan Project hi Rs 3.42 billion (US$ maktaduai 75) sen huamin a duang thar a ni.

He project hian Burma ram Arakan (Rakhine) State khawpui Sittwe-ah lawngchawlhna hmunpui a din ang a, Paletwa ah pawh lawng chawlhna te (jetty) pakhat siam a tum bawk a ni. Kalatan luipui dungzuia Sittwe atanga thuamhnaw phur lawng te chuan Paletwa-ah innghatin an thilphurhte mawtor-ah an hlan chhawng ang a, mawtor te chuan tuna kawngpui thar hmangin Mizoram-ah an phur lut thin dawn tihna a ni.

He project hi May ni 13 khan Essar company hnenah contract pek fel a ni tawh a, a rang thei ang bera hmalak a tum tih hriat a ni bawk. He project hi kum 3 chhunga zofel tura ruahman a ni.


Ref: mizzima

Tuesday, May 18, 2010

Politics


Inthlanpui leh Zofate Party

Kumin Burma inthlanpui-a tel turin Chin National Party (CNP) chuan phalna a hmu fel tawh nia hriat a ni a, Zofate din party dang pa 3 pawhin election commision-ah dilna an theh lut ve mek bawk niin Khonumthung website leh internet site dang dang atanga hriat a ni.

State Peace and Development Council (SPDC) chuan kumin 2010 rampum inthlanna dan thar siam (code of conduct) chu March ni-8 khan a puang chhuak a. He danah hian ‘Sorkar hremna hnuaia awm mekte (lungin tangte) party member-a tel phal a nih lo’ tih a tel a, Pi Aung San Suu Kyi leh politic vanga lungin tang tamtak party member atanga hnawl a tul dawn avangin 1990 inthlanpuia hnehna changtu NLD party chuan tel a tum loh thu a puang tawh bawk a ni.

NLD hian inthlan hnua rampum huap inkaihhruaina tur ‘Danpui’ (constitutional), sipai sorkar ziak, hrim hrim hian Burma ramah remna muanna hausatna a thlen theih dawn loh thu a puang chhuak fo tawh thin bawk a ni.

Vawiin thleng hian Burma inthlanpuia tel turin political party 30 te chuan ‘dilna’ an theh lut tawh a, Prime Minister U Thein Sein-a UDSP party chhiartelin, party 24 chuan phalna (permit) an hmu tawh niin Rangoon chhuak ‘The Voice’ journal chuan a sawi a ni.

Chin Progressive Party (CPP), Khami National Solidarity Organization (MKNSO) leh the National Progressive Party te chu Chin mite din phalna dil mek an ni a, CPP leh the National Progressive Party te hian inzawmna an neih leh neih loh hriat chian a la ni lo a ni.

CPP hi sorkar hnathawk tawh thinte leh mi challang tak takte din nia hriat a ni a, Chin National Front (CNF) hotu hlui Pu No Than Kap pawh hruaitu lawk zual zingah a tel thu hriat a ni bawk.

Sipai sawrkar chuan 1990 inthlanpuia tel CNLD (Chin National League for Democracy), ZNC (Zomi National Congress) leh MPP (Mara People’s Party) tihte hi a pawm tawh lo nia hriat a ni a, kum 1990 inthlannaa MP seat khat chang MPP hminga phalna an hmuh theih loh avangin Mara mi leh sa te aiawh thei turin ‘the National Progressive Party’ hi an din niin a lang a ni.

Sipai sorkar hruaitute din 'Union Solidarity and Development Association (USDA)' leh U New Win-a Socialist Party hming thleng National United Party-te chuan kumin 2010 general elections tan Falam, Hakha, Thantlang leh Tonzang townships chhunga candidates turte chu inthlanna Dan an puan hmain an lo tifel diam tawh niin he hmuna chengte chuan an sawi a ni.

Burma Inthlanpui hnuhnung ber 1990 khan Chin State hi constituencies (Member of Parliament thlang tur hmun then) 13 a then darh a ni a, party hrang hrangte MP seat an chan dan chu:

NLD – 4
1. U Ngin Thang - Tedim I
2. U Kyaw Tun - Paletwa I
3. U Htwe Aung - Paletwa II
4. U Shwe Thang - Matupi II
CNLD – 3
1. U C.K. Taik Kwe - Falam I
2. Dr. Za Hlei Thang - Falam II
3. U Shing Pe Ling - Mindat

ZNP - 2
1. U Pu Cin Sian Thang - Tedim II
2. U Taang Thang Lian Pau - Tonzang

NUP – 1
1. U Ling Ha - Kanpetlet

MPP - 1
1. U Ro Uk - Matupi I

Independent - 2
1. U Lian Uk - Haka
2. Dr. Hmuh Thang - Than Tlang

Additional information from DVB-Duhlian Aw

Tlang Au


Phur takin tel theuh ang u Aw!!!


1. June thla Sunday hmasa ber (June 6) khian MCF te Pasir Ris Park-ah Outing neih tur a ni a, zing lam dar 11 ah Pasir Ris MRT-a innghahkhawm tur a ni ang. Outing niah hian Nl Lalchhamdami (Damtei) leh Tv Lalrawngbawla (K’u Bawla)-ten min hruai ang.

2. Kumin Chin Combine (CCFS) Advanced Christmas leh Singsong Service ni-ah MCFS biakin khara tel tur a ni ang a.

Wednesday, May 12, 2010

World Cup 2010, South Africa


World Cup khel tur England Team

England chuan World Cup khel tur a player te a thlifim tan tawh a, mi 30 thlang chhuakin Austria-ah training a neihpui hnuah Mexico leh Japan team te nen friendly match an pet tura ruahman a ni a, chu mi hnuah South Africa-a kal tur mi 23 a nemnghet dawn a ni.

Training tur mi 30 zingah hian chhan leh vang chi hrang hrang avangin milar tak tak David Backham, Michel Owen, Owen Hargreaves, Gary Neville, Wayne Bridge te thlan an nilova, Adam Johnson leh Michael Dawson te chu a vawi khatna atan National team a telh an ni thung.

England hi tunlai football khelh dan chingchhuaktu (hmang hmasa ber) rama ngaih an ni a, 1966 World Cup ah pakhatna an lo la tawh thin a ni.

Team England 2010

Manager: Fabio Capello (Italian)
Goalkeepers:
Joe Hart (Man City), David James (Portsmouth), Robert Green (West Ham)

Defenders:
Leighton Baines (Everton), Jamie Carragher (Liverpool), Ashley Cole (Chelsea), Michael Dawson (Tottenham), Rio Ferdinand (Man Utd), Glen Johnson (Liverpool), Ledley King (Tottenham), John Terry (Chelsea), Matthew Upson (West Ham), Stephen Warnock (Aston Villa)

Midfielders:
Gareth Barry (Man City), Michael Carrick (Man Utd), Joe Cole (Chelsea), Steven Gerrard (Liverpool), Tom Huddlestone (Tottenham), Adam Johnson (Man City), Frank Lampard (Chelsea), Aaron Lennon (Tottenham), James Milner (Aston Villa), Scott Parker (West Ham), Theo Walcott (Arsenal), Shaun Wright-Phillips (Man City)

Forwards:
Darren Bent (Sunderland), Peter Crouch (Tottenham), Jermain Defoe (Tottenham), Emile Heskey (Aston Villa), Wayne Rooney (Man Utd)
Ref: CNA

Tuesday, May 4, 2010

MCFS News May 2010

Editorial

History and Civilization

Khawvelah mimal, sawrkar, sakhua, hnam leh pawl ho ang te pawhin inhmuhsitna, inngaihnepna, intihduhdahna bakah intualthahna hial a awm thin a, a awm mek zel bawk a. Suahsual avanga humsual dai (crime) piah lamah ngaihdan leh hmuh dan a inan lohvin, tihdan leh nihna te a inan lohvin innghirnghona a chhuak thin a. Thelh theih loh chinah nasa takin a alh chhuak thin a ni.

Mihringin nun ho dan (civilization) a zir chho zel a, hma a sawn zel bawk a. Hmanlaia mi tlem te ngaihdana rorelna kal thin kha a ai zau zawk danin a thlak zel a, tunah phei chuan international levelin mi chungthu kan ngaihtuah ta a. A fair thawkhat viaua ngaih pawh a ni. Amaherawh chu mihring history rei tawh zia ngaihtuah chuan civilization kan hmelhriatna erawh a la naupang em em a. Beisei loh taka nunrawn leh mawl taka chetlak kan la nei leh zeuh thin.

Keini Mizo te pawh hi Kristian zaa za intiin kan nun te pawh zonunmawi ti hial thin mah ila, kristian nih rikngawt hi nun hona kawngah a tawk lo fo thin a, zonunmawi kan tih te pawh kan lungduhte chunga tih lan chauh tur emaw kan ti niin a lang fo thin. Inzir tur kan neih te i chhut nawn fo ang u.

Kan khawtlang leh kan ngaihdan te hi a ralmuang tawk em?

Article

Falama Kan Awm Lai Khan

- Lalhunsangi

Falam khua hi tunhma chuan Chin state-a khawpui ber leh sawrkar hmunpui ber a ni a, sawrkar hnathawk awmna hmun a ni. Tin, ka pa hi sawrkar lam rorel pawl zinga mi a lo nih avangin Falam khawpuia pem a lo tul ta a. 1974-ah thingtlang Satawm atangin Falam khawpuiah kan pem chho ta a ni. Hun te a la that avangin sumpai te hian man a la nei em em a, cheng hnih khat hian thil a la lei theih teuh a ni. Ka pa hlawh kha cheng za ruk a ni a, a T.A nen chuan 700 vel a ni thin. Bakah buhfai ip lian khat leh sahbawn tlawn sawm hi thlatin ration-ah a thlawnin kan dawng bawk a, a bak chu kan lei ve a. Ka pa hlawh kha kan kham em em a ni.

Kan awmna chu Pathangkhan veng tlangsang lam, a fala ding concrete in zau tak a ni. Room 14 a awm a, room sarih chu keini’n kan luah a. A dang room sarih chu hman laia Vulmawi musician zinga Buta, Siama te chhungin an luah bawk a. Japan ral hma deuha an sak a ni.

Tin, kan kawmchhak ko pangah puk zau tak, mihring ding chunga inkal pawh theih puk kua pathum a awm a. Japan ral laia mitthi ruang an lo inpaih luhna a ni a. Kan lut a, a chhungah kan inbihruk siak thin. Luruh te, sam zial te kan khai chhuak nawlh nawlh thin, rapna leh hlauhna chang kan hre lo.

Kan kawm chhak lam vekah tlaizawng(cherry) kung lian tak kung hnih leh tuangtuah kung lian pahnih a ding bawk a. A par a vul lai chuan a mawi thei em em a, khaw chhung lam atanga kan in thlir chhoh chuan mawi tak a ni. Tin, kan kawmchhakah iskut hlang zau tak mai a awm a. A rah duh hle a, lawh hun a lo thlenin saiip khat te, ip hnih te kan lo thin.

Tin, ka nu hi thlai chin taima tak a ni a. Huanthlai kan ngahin an tha thei hle a, kan huan a zau bawk si a. Bepui, behlawi, behliang, bete, bekang, alu, bawk-bawn, mai, vaimim, fanghma, antam, parbawr, zikhlum; a tam mai, sawi sen a ni lo. Kan tan bazaar kaiin awmzia a nei vak lo a ni. Bawngsa leh vawksa kan lei duh chang chauhvin bazaar kan kal thin. Thingtlang lama ka pa thiante leh hnathawh puite ho hian sarep chi hrang hrang; sakhi sarep, sial sarep, sazuk, sava sarep an rawn hawn thin. Artui leh arte an rawn khai lut a, a chang chuan ka nu leh ka pa hian an hawn let tir thin.

In Hrang

Kan in kha hmanlai in a nih avangin thla a hrang nasa hle thin a. A awmna a fal bawk si a, thenawm dang reng reng kan nei lo. Zan a lo thlenin tukverh a rawn ri dar dar hmasa a. Thli tleh miah si lovin, nghet taka kan kalh kha thawklehkhatah a rualin a rawn inhawng phut thin. A chang chuan nau te tap thawmri te kan hre thin. Pawn kan enin engmah kan hmu si lo. Tukverh atangin putar hmai hlai deuh, sam var vo tawh, dar thlenga sei, lei sei tak maia chhuah hi a rawn inlar thin a. Ka nu leh ka ute, kan thenawmte pawhin an lo hmu zeuh zeuh thin a ni. Kan chhungkaw hnih chuan kan thla a bar thei em em a. Kan pate ho hi sawrkar pawimawhin khual an zin ziah lehnghal a. Kan chhungkaw hnih chuan zan a lo thlenin riak khawm turin kan infin thin a ni.

Kawm chhak puk bul atangin pawnfen huh nena pen thawmri hluap hluap hi kan hre leh thin a. Light-in kan kah a, kan hmu si lo. Ka pate ho zin hlan hian a hrang duh bik lehzual a.

Tlai khat chu kan then-awm naupangte nen kan tualchai mek laiin pa pakhat hi luikawr lam atang kan lam panin a rawn kal a. Beng pawh nei lo, hmai sen huam mai a ni a. Kan hlau lutuk chu kan khur kan khur ta mai a. A kal zel a, a tawpah a ral ta daih a. Mak kan tiin kan thaah min pawt hial a ni.

Kan hnua rawn luah, Falama sikul han kal nula pakhat pawh amaha chhun a innghah mek laiin room pakhatah nau te tap ri leh ke pen ri a hria a. A enin engmah a hmu si lo, tawk fangah chutiang chuan a lo awm leh a. A hlau lutuk chu kaih phah nan a hmang a. Damdawi inah rei tak a mu a, a awm ngam ta lo a ni.

Nursery Sikul

Ka chhang nen nursery sikulah kan kal a. Ka pa office chhak lawk a ni a. Chhun chawlh hun velah ka pa office-ah chuan kan unauvin kan zu chhukthla thin a, ka pa hian kan ei tur chhang leh thingpui min lo chah kep thin. Ka la hriat reng chu sikula kan mutthilhin zirtirtuten min paw haw thin a. Ko chho lamah hah deuhvin min pua a, kawnga kan harh pawhin kan muhil der leh thin.

Primary sikulah ka nau nen kan kal tan a. Sikul chawlh apiangin ka ute ho hnung zuiin ram lamah ka kal ve thin. Nauban par leh chhawk-hlei par la turin tlai sikul ban veleh ramah ka zui thin. Pa zawn hunah ram lamah ka zui leh a, kan hlawhtling thei em em mai a.

Pawl hnih ka pass kum hian ka pate ho pawhin an hna an chawlh san a lo tul ta a. Term khat chhung sawrkar hna thawkin kan chhungkua leh u Buta te chhungkua chuan 1978 may ni khatah Falam atangin Tahan-ah kan pem chho ta a.

LEHKHAPUAN RUAK

- Zikpuii Fanai

Taya Min Wei-a thuziak a remchan dan anga lehlin a ni.

I

He nu ka hmuh hmasak ber ni hi, ruah tlak ser ser ni, July tlai nikhaw dai tak a ni.

Ka vawi khat hmuhnaah ka mang zawng zawng tham khawmtu tur a ni tih chiang takin ka hria. A zunzamin ka tleirawl thinlung chu a vet nghet nasa a. Ka note buah he nula nalh zia hi thu chi hrang hranga tehkhinin ka ziak nasa bawk a ni. Chung hun lai chuan sikul chhunga luikawr tui chu a fawn nasa hle.

Sikul kal lam leh haw lamah te a chanchin hlaa sain ka ngai ngawih ngawih a. Ka hmangaih zia pawh sawichhuah dan thiam lo khawpin ka rilru a buai hle a ni.

II

Class kal tam vak lo, tawng tam lo leh thian kawm tam lo ka nih avangin ani leh a thiante pawn min chik chiang lo vang tih a chiang a ni. Class-ah, mi awm loh laiin a lehkha ziahna dawhkanah, ‘….i ka hma-ngaih’, tih hi ka pen chhe rak khawpa fiahin ka ziak a. Chu chu a hmu nge hmu lo, hmu se engtin nge a ngaih ang tiin ka ngaihtuah buai vel a. Zak ru deuh chuan a rukin ka thin-phu a rang nasa a ni. Mahse ka thu-ziah chu a hmu ta lo a ni. A chhan chu a lehkhabu, notebook leh a thil dangten an hliah thin vang a ni. Eng pawh nise, he sikula he nu ka chenchilh chhung kha ka ni leh thla, ka nunhman liam tawh zawng zawngah a la nung ber a ni. Kan sikul a chhuahsan ni hian ruah a sur buan buan a. Pangparte lungchhiain lei-ah an til nasa bawk a ni. Kan sikul kalsanin an khuaah a haw ta a ni.

III

Kumhlui thlah zanah thalai ho biak in tualah meipui aiin infiamna kan nei a. Thalai hovin, “I ngaihzawng chanchin min hrilh rawh”, an ti a. Chu chanchin chu ka hrilh a.

“ Chu zawng chu maw? A hnuah i hmu tawh lo em ni?”, tiin pakhatin min zawt a. Ka chhanna an nghak thap a.

“ A hnu kum riatah an khuaah ka va zin a.”

“ An khuaah chuan i va hmu em?”

Ka lu ka bu nghauh a.

IV

A hnungah ka zui a, pangpar ka pe a.

“ Ka thlauh a ni lo”, a ti a.

“ Leia tla ka chhar a ni lo. A kunga mi ka thliah a nia.” Tiin a khai-khovah ka thun a, ka kal san ta a.

An khua hi khaw te a ni nain thianghlim leh changkang ve tak a ni. Kalkawngah te, ni sa hnuaiah te, thlifim karah te tum loh deuhvin kan intawk thin a. Innuih leh tawngkam tawia inbiak bak chu engmah ka tilang lo. Rei lovah ka rilrua awm a hrethiam tih ka hria a ni.

Neih tuma ngaizawng ka ni lo va. Chu vangin then pawh a tul lo a ni. Neih emaw then emaw tul lovin eng mawi takin ka hmangaih a ni.

Hmangaihna chu rilru chhungrila par chhuak pangpar a ni. Mahni tana thliah emaw, mi tana thliah sak emaw a tha lo. Chu pangpar chu i tihlum tihna ang a ni.

He nula hi ka hmangaih a ni. Mahse ka hmangaihna chu keimah ka nih loh angin ani pawh a ni lo. Hmangaihna chu kan inkarah thla angin a eng a ni.

Thla eng hi sa ti kan awm em?

Chuti chuan ka hmangaih, zirtirtu chu naupang lehkha a zirtir laiin ka va mangtha ni lovin ka haw tur ka va hrilhhria a. Kan khuaah ka haw ta a ni.

V

“Hmangaihna hi ka nunkawngah flag pawl a ni”, tia fiah vak lova ka sawi lai chuan kan meichheh chu a thim deuh duai duai a.

“Ka rawn haw letna hi kum ruk a ni ta”

“I ngai lo em ni?” tiin pakhatin min zawt a.

“Ngai tehreng e. Mahse ka buai hran lo.”

Arsi tla hmu ang maiin an vai chuan phawk deuhvin min en hlawm a. “An khuaah em ni a la awm? Pasal te a nei tawh em?”

An thuzawh tawp hma chuan ka ding thut a. Dawhkan lam panin muangchangin ka kal a, dawhkan chunga blank paper chu ka la a. An vaia hmuh theih turin ka dar zawnah ka keng a.

“He lehkha phek var hi en teh u. Ka hmangaihna chu hetiang hi a ni.”

Kan awmna leh a vel chu rannung hram ri leh meialh puak ri phek phek bak lo eng ri mah hriat tur a awm ta lo va.

NEPNOIS

Ka Zun A Chhuak Ta Raih Mai!

Nula pakhat pawh kha a pa a strict lutuk a, a bialpa nen chance tha an nei hleithei lo va. A bialpa chuan rem a ruat ta a.

Zanah in kawmthlangah ka rawn kal ang a. Ka rawn thlen veleh ka faifuk ang a, chu veleh ka zun a chhuak ti la rawn chhuak ang che’

Zanah chuan a bialpa chu a rawn faifuk raih a. Chu veleh…

‘ Chu, ka pa, ka zun a chhuak ta raih mai! ’

- Suppied by Seni

Ti Talh Te’ng

An thalai hruaitu pakhat pawh kha inkhawm bana committee hi a uar em em a. A hmingah pawh ‘ U Tiliana ’ an tih phah reng a. Tum khat chu an inkhawm banah committee neih loh tur a ni a, a rilru a nuam thei ngang lo a ni awm e. Inkhawm ban dawn chuan a sawi ta a.

‘ Vawin inkhawm bana committee kan neih loh tur hi, a chiang nge chiang lo inkhawm banah kan ngaihtuah ang ’

- Supplied by Zikpuii Fanai

Kap Sawk Te’ng

Hmeichhe pakhat hi silai zawrhna dawrah a va kal a.

‘ Pistol pakhatin min pe rawh’

‘ Mahni inven nan em ni i tih?’

‘ Mahni inven nan ti ila ukil ka ruai zawk ang’

‘ Chiti chu puakruk hi la ta che’

‘ Enga! Pasal paruk neiah min ngai em ni?’

Sunday, May 2, 2010

Thliin Mizoram Hmar-Thlang khaw thenkhat a nuai


April 22 zinga Tlabung (Mizoram) leh a chhehvela thli na tak tleh vangin mi pakhat a thi a, mi dang pasarih an hliam bakah in 500 vel a chhia niin Vanglaini website chuan a tarlang a, mithi hi rangva thlawkin a ngháwngah a ah avang niin a sawi bawk a ni.

Thli chuan Tlabung, Zodin, Zohmun, Chawilung, Talabag, Tablibag, Noonsuri, Silgur, Tablagsora, Kalapani leh Bindasora-te a nuai nasa nia hriat a ni a, in a tih chhiat bakah power line leh telephone line-te a tihchhiat avang leh thing tluin kawng a hnawh pin avangin tlawhpawh theih loh leh biak pawh theih loh khua an awm nual bawk a ni.

Kumin March leh April thla chhung hian Mizote chenna hmun hrang hranga thlipui tleh leh in kang sawi tur a tam em em a, March ni 30 zan khan Mizoram-ah thlipui leh ruahsur avangin mi pahnihin, Serchhip-ah leh W Phailengah mi pakhat ve ve, in nunna an chân a ni. Disaster Management & Rehabilitation Department-in a April ni 7 a a report danin thliin in a tih chhiat zawng zawng 4761 a ni a, sorkar building 19, Biak In 15 leh Hall a tel a ni tiin The Zozam Times chuan a tarlang a. Aizawl district-in an tuar nasa ber a, in 1,171 a chhia a ni. Lunglei district-a in 474 a tih chhiat te zingah biak-in pathum (Zobawkah), sikul pasarih leh sorkar in dang pathum a tel a ni.

April thla chhung vek khan Chin State Falam leh New Rih (Tiau) khu te chu thlipuiin a nuai a, Falam-ah in 20 bakah Civil Hospital, No 2 High School leh sorkar in thenkhat a tih chhia a , April 20 ni a New Rih hruttu thlipui chuan khawchhung in 25 bakah Primary School a ti chhe bawk nia hriat a ni.

Ref: vanglaini.org/thezozamtimes.org/khonumthung.com

Lawrkhawm

Mizoram News tawi lawrkhawm


  • Mizo Academy of Letters (MAL) chuan kum 2009 chhunga Mizo iráwm chhuak lehkhabu zinga a tha ber atan Lalrammawia Ngente ziah "Rintei Zùnlêng" tih chu an thlang. MAL Book of the Year hi kum 2009 chhunga Mizo irawm chhuak lehkhabu 162 tih chhuak atanga an thlan a ni.


  • Mizoram Economic Survey 2009-2010-in a tarlan danin, Mizorama mihring zat chu kum 2010-ah hian 11,26,067 tling tur leh, chhungkaw zat pawh 2,49,092 tling tura beisei a ni.


  • Mizoram Synod chuan nikum Synod sum kum, April 2009 - March 2010 chhung khan Rs. 56,55,07,092 (SingDollar Maktaduai 17 chuang) a hmu a; sum hmuh tura beisei, Rs. 12,61,15,592 in a khûm. Pathian Ram atanga lut a tam ber a, Rs. 23,81,17,793 a ni.


  • Art & Culture department chuan Cheraw Kân lam hmanga Quinness World Record siamnaa senso zat kha cheng nuai 45(Rs) vel a nih thu an sawi a, Mizoram sorkarin nuai 40 a tum nia hriat a ni.

Ref: www.vanglaini.org\internet

Saturday, May 1, 2010

World Cup 2010, S. Africa

Cable-pute leh FIFA inbiakna a kal tluang

Singapore TV operator-te chuan World Cup 2010 TV-a chhuah chhawn tur chungchang an ti fel tawh niin nitin chhuak chanchinbu hrang hrangah tarlan a ni, bawlpet atchilh mi sang tam takten thawpui an chhuah thei ta huai a ni.

TV operator-te, SingTel leh StarHub inkawp, chuan World Cup match zawng zawng (64) tana FIFA an pek zat an sawi lang rih lo nan, chanchin lakhawmtute chuan S$21 million vel a nih an ring a.

World Cup hawnni tur chawlhkar 6 emaw lek duh tawh hun chauh a, Singapore TV operator ten inkhel an chhuah theih tur thu, an tih fel hian sawisel an hlawh nasa hle a, football fan thenkhat chuan inrawlh turin Singapore sorkar an ngen tawh thin bawk a ni.

TV a inkhel chhuah tur chungchang a fel lawk loh na chhan hi FIFA in Singapore Dollar Maktaduai 100 a beisei vang niin an sawi a, chu tizat chu TV operator ten an pe ngam lo a ni. World Cup hnuhnung ber 2006 khan StarHub chuan S$7 million a pe nia hriat a ni.

Sum ngiat tam chungchangah football fan te chuan FIFA bakah SingTel an dem a, a hnuhnung zawk hian English Premier League (EPL) kum 3 tih-chhuah nan suangtuah phak loh khawpa tam pein a khingpui StarHub a lan niin ‘thuk taka hretute’ chuan an sawi a. SingTel in EPL tan S$300 million chuang a pek avangin FIFA pawhin World Cup tan a chhiar to phah niin an hmu a ni.